Tag: پی آئی اے نجکاری

اسلام آباد : نجکاری کمیشن ذرائع کا کہنا ہے کہ پی آئی اے کی خریدار پارٹی کو پانچ سالوں میں ستر ارب کی سرمایہ کاری کرنا ہوگی۔

تفصیلات کے مطابق ذرائع نجکاری کمیشن کی جانب سے کہا گیا کہ پی آئی اے کی نجکاری کیلئے پری کوالیفائیڈ کمپنیوں کیلئے مطلوبہ عمل شروع ہو چکا ہے، بولی دہندہ کمپنیاں پی آئی اے کے حساب اور اثاثوں کی جانچ پڑتال کر رہی ہیں۔

ذرائع کا کہنا تھا کہ پی آئی اے کے لیے بولی دہندگان کو ایک ڈیٹا سینٹر کے ذریعے جانچ پڑتال کا موقع دیا جا رہا ہے، آئندہ ہفتے سے پری کوالیفائیڈ کمپنیوں کے سائٹ وزٹ اورایکسپرٹ سیشن شروع ہوں گے، ایکسپرٹ سیشن میں طیاروں کی کنڈیشن اور روٹس پر بریفنگ ہوگی۔

ذرائع نے بتایا کہ پی آئی اے کی خریدار پارٹی کو پانچ سالوں میں ستر ارب کی سرمایہ کاری کرنا ہوگی، گزشتہ بڈنگ میں سرمایہ کاروں کےمطالبات پورےنہ ہونےکےباعث سرمایہ کار نکلے۔

مزید پڑھیں : نجکاری کمیشن بورڈ نے پی آئی اے کے لیے 4 سرمایہ کاروں کو پری کوالیفائی کرلیا

سرمایہ کاروں کو اب طیاروں کی خریداری پر سیلز ٹیکس کی چھوٹ حاصل ہو گی، پی آئی اے کی نجکاری میں پری کوالیفائیڈ کمپنیوں کے مطالبات پورے ہو چکے ہیں۔

ذرائع کے مطابق آئی ایم ایف نے پری کوالیفائیڈ کمپنیوں کے دونوں مطالبات ماننے کی اجازت دی ہوئی ہے، پی آئی اے کی کم بولی کی بڈنگ سے نئی بڈنگ پر اثر نہیں پڑے گا، حکومت پاکستان کی کوشش ہے کہ پی آئی اے کی ایکویٹی کو خراب نہ ہونے دیا جائے۔

اسلام آباد : پی آئی اے کی نجکاری کا معاملہ کابینہ کمیٹی کو بجھوانے کا فیصلہ کرلیا گیا ، علیم خان نے بتایا کہ  نجکاری میں ترکش اور سنگاپور سمیت کئی ایئرلائنز نے دلچسپی لی۔

تفصیلات کے مطابق وفاقی وزیر نجکاری علیم خان کی زیرصدارت پرائیوٹائزیشن کمیشن بورڈ کا اجلاس ہوا، اجلاس میں دیگر اداروں کی بھی نجکاری کے مختلف امور پر غور اور سفارشات کی منظوری دی گئی۔

اجلاس میں پی آئی اے کی پرائیویٹائزیشن کے معاملے کو کابینہ کمیٹی کو بھجوانے کا فیصلہ کرلیا گیا۔

وفاقی وزیر نجکاری عبدالعلیم خان نے بتایا کہ اداروں کی پرائیوٹائزیشن کے امور کا حتمی فیصلہ کابینہ کمیٹی نے کرنا ہے، نجکاری کے معاملات قوانین کے مطابق اور ملکی مفاد کو سامنے رکھ کر کیے جائیں گے، ملک و قوم کی بہتری کیلئے جو کچھ ہوا ضرورکریں گے۔

وفاقی وزیر کا کہنا تھا کہ پی آئی اے کی نجکاری کو نگراں حکومت کے فریم ورک کے تحت آگے بڑھایا ہے اور مستقبل میں نجکاری میں شامل اداروں کے تحفظات کو بھی پیش نظر رکھنا ہوگا۔

انھوں نے زور دیا کہ پی آئی اے سمیت اداروں کی پرائیوٹائزیشن کیلئے پیشکش کے عمل کو بہتر بنایا جائے اور پی آئی اے سمیت دیگر سرکاری اداروں کی بلا تاخیر نجکاری کو آگے بڑھایا جائے۔

اجلاس سے خطاب میں ان کا کہنا تھا کہ پی آئی اے کی نجکاری میں ترکش اور سنگاپور سمیت مختلف ائر لائنز نے دلچسپی لی، واضح کیا پرائیوٹائزیشن کمیشن بورڈ پری کوالیفائی کرنے والے کسی بھی ادارے کو نجکاری کے عمل سے نہیں نکال سکتا۔

اسلام آباد : سینیٹ کی قائمہ کمیٹی نجکاری کا اجلاس میں آج پی آئی اے کی نجکاری کے عمل کےحوالے سے بریفنگ دی جائے گی۔

تفصیلات کے مطابق قومی ایئرلائن پی آئی اے کی نجکاری کے معاملے پر سینیٹ کی قائمہ کمیٹی نجکاری کا اجلاس آج 3 اکتوبر کو ہوگا۔

اجلاس کی صدارت چیئرمین سینیٹ اسٹینڈنگ کمیٹی نجکاری سینیٹر محمد طلال بدر کریں گے، اجلاس میں بریفنگ لی جائے گی کہ پی آئی اے کی نجکاری کاعمل کہاں تک پہنچا؟

وزیر نجکاری اورنجکاری کمیشن کے اعلیٰ حکام کو اجلاس میں شرکت یقینی بنانے کی ہدایت کردی ہے۔

اجلاس میں بڈنگ کی تاریخ میں توسیع پربھی قائمہ کمیٹی ارکان سوالات کریں گے جبکہ نجکاری کے حوالے سے اب تک کی مکمل تفصیلات طلب کی گئی ہیں۔

نجکاری تاخیر کا شکار ہونے پر اسٹاک مارکیٹ میں پی آئی اے کے حصص گرنے پر بھی سوالات ہوں گے ، چار کاروباری دنوں میں پی آئی اے کے شیئرز کی قیمت  5 روپے کم ہوچکی ہے۔

یاد رہے نجکاری کمیشن  نے قومی ایئر لائن کی نجکاری کیلیے بڈنگ (بولی) کی تاریخ میں ایک ماہ کی توسیع کا اعلان کیا تھا۔

کمیشن کے مطابق پی آئی اے نجکاری کیلیے بولی یکم اکتوبر کے بجائے 31 اکتوبر کو ہوگی جبکہ معاہدے کے مسودے پر دستخط کی نئی تاریخ 25 اکتوبر مقرر کی گئی، بولی کیلیے پیشگی رقم 28 اکتوبر تک جمع کروائی جا سکتی ہے۔

نگران وفاقی وزیر برائے نجکاری فواد حسن فواد نے کہا کہ جن سیکٹرمیں حکومت ناقابل برداشت نقصان اٹھا رہی ہے ان کی نجکاری ہونی چاہیے.

میڈیا سے گفتگو کرتے ہوئے فواد حسن کہنا تھا کہ پی آئی اے نجکاری کےعمل کی معطلی کا امکان نہیں۔ ہر مرحلے پر میں نے پی آئی اے کے نجکاری کی رائے دی۔ ماضی کی طرح جو فیصلہ حکومت کرے گی اس کے ساتھ کھڑا ہوں گا۔

فواد حسن فواد نے کہا کہ ڈسکوز، جنریشن کمپنیز اور پی آئی اے کو نجکاری کےعمل سے گزارنا چاہیے۔ پی آئی اے کے 713 ارب روپے کے قرضے ہیں۔

انھوں نے کہا کہ پاکستان میں ایوی ایشن کا مستقبل بہترین ہوگا۔ آئندہ 10 سال میں عالمی سطح پر 63 ہزار پائلٹس کی ضرورت ہے۔ پاکستان میں ایوی ایشن کی انجینئرنگ کا مستقبل بہت اچھا ہو گا

نگراں وفاقی وزیر کا کہنا تھا کہ رائٹ ٹو انفارمیشن ایکٹ بھی موجود ہے۔ پی آئی اے کے حوالے سے جو بھی فیصلہ ہو گا میں اس کی ذمہ داری قبول کروں گا۔ پی آئی اے کا مجموعی خسارہ تقریباً 13 ارب روپے ہے۔

فواد حسن فواد نے کہا کہ پی آئی اے کے 34 میں سے 15 جہاز گراونڈ ہیں۔ یہ تمام ادارے پہلے سے نجکاری کی لسٹ میں موجود ہیں جو گزشتہ حکومتوں نے شامل کیے۔ ہمارے پائلٹس کا شمار دنیا کے بہترین پائلٹس میں ہوتا ہے۔

انھوں نے کہا کہ 4 میجر بینکس کی نجکاری ہوئی وہاں ملازمین کی شرح میں بھی اضافہ ہوا۔ ملک میں 19 کروڑ کے قریب ٹیلی کام کے صارف ہیں۔