ARYNews.tv | Urdu – Har Lamha Bakhabar

Tag: پی ایس ایل فور

  • چیخیں وزیر اعلیٰ ہاؤس سندھ سے آ رہی ہیں، مراد علی شاہ کی پریس کانفرنس پر خرم شیر زمان کا رد عمل

    چیخیں وزیر اعلیٰ ہاؤس سندھ سے آ رہی ہیں، مراد علی شاہ کی پریس کانفرنس پر خرم شیر زمان کا رد عمل

    کراچی: وزیرِ اعلیٰ سندھ مراد علی شاہ کی پریس کانفرنس پر تحریکِ انصاف کا ردِ عمل سامنے آ گیا ہے، خرم شیر زمان نے کہا ہے کہ کرپشن پر قدغن سے وزیرِ اعلیٰ ہاؤس سے چیخوں کی آوازیں آ رہی ہیں۔

    تفصیلات کے مطابق وزیرِ اعلیٰ سندھ نے پریس کانفرنس میں کہا ہے کہ کام یاب پی ایس ایل سندھ والوں کی جیت ہے، سندھ کی ترقی روکنے والوں کے ارادے نیست و نابود ہوگئے۔

    مراد علی شاہ کا کہنا تھا کہ پرانا کراچی مل گیا اب پرانا پاکستان بھی مل جائے گا، وہ پرانا پاکستان جہاں حکمران عوام کی چیخیں نکلوانے کی بہ جائے عوام کی خدمت کریں۔

    پی ٹی آئی رہنما رکن سندھ اسمبلی خرم شیر زمان نے رد عمل ظاہر کرتے ہوئے کہا کہ یہ کرپشن پر پابندی لگائے جانے کے بعد کی چیخیں ہیں جو وزیر اعلیٰ ہاؤس سے نکلیں۔

    یہ بھی پڑھیں:  سندھ کی ترقی کے مخالفین کے ارادے نیست و نابود ہوئے: وزیر اعلیٰ سندھ

    ان کا کہنا تھا کہ وزیر اعلیٰ کو بے نامی اکاؤنٹس اور لانچوں سے منی لانڈرنگ نہ ہونے کا غم ہے، ہم نئے پاکستان میں سندھ کا لوٹا ہوا پیسا واپس لائیں گے، وفاق نے سندھ کے حصے کا پیسا نہیں، پیپلز پارٹی کی کرپشن روکی ہے۔

    خرم شیر زمان نے کہا کہ نئے پاکستان میں کرپشن کا باب بند ہو چکا ہے، 11 سال ہزاروں ارب روپے ہڑپ کرنے والوں کی تڑپ معنی خیز ہے۔

  • کل امن کی جیت ہوئی، سب سے بڑھ کر پاکستان کی جیت ہوئی: وزیر اعلیٰ سندھ

    کل امن کی جیت ہوئی، سب سے بڑھ کر پاکستان کی جیت ہوئی: وزیر اعلیٰ سندھ

    کراچی: وزیر اعلیٰ سندھ سید  مراد علی شاہ نے کہا ہے کہ ملک میں‌ انٹرنیشنل کرکٹ کی بحالی میں کراچی کا کردار ہمیشہ یاد رکھا جائے گا.

    ان خیالات کا اظہار انھوں نے خصوصی پریس کانفرنس میں کیا، ان کا کہنا تھا کہ سندھ حکومت نے پی ایس ایل کے انعقاد کا چیلنج قبول کیا، ماحول ایسا تھا کہ ہمارے دشمن جنگ کی باتیں کر رہے ہیں۔

    انھوں نے مزید کہا کہ سندھ کی ترقی کے مخالفین کے ارادے نیست ونابود ہوں گے، پیپلز پارٹی دوبارہ کامیاب ہوئی اور 8 میچز کراچی آئے، کبھی ایسانہیں ہواتھا کہ ایک کےبعد ایک 8 میچ یہاں ہوئے ہوں، کل کوئٹہ نےمیچ جیتا، ہمیں خوشی ہے کہ پاکستان جیتا، اصل میں امن، مسکراہٹوں اور اتحاد کی جیت ہوئی ہے.

    انھوں نے مزید کہا کہ سندھ میں دہشت گردوں کے لئے زیرو برداشت ہے، ، کل امن کی جیت ہوئی، سب سےبڑھ کرپاکستان کی جیت ہوئی، کراچی کےعوام نے بہت تعاون کیا، اس کی مثال نہیں ملتی، میں انتظامیہ کا شکریہ ادا کرتا ہوں، سب نے مل کر ایک ایساایونٹ کرایا، جس کی مثال ملک میں نہیں ملتی، یہ سندھ کے لوگوں کی کامیابی ہے، اس ایونٹ سے پورے پاکستان میں ایک اچھا ماحول پیدا ہوا.

    ان کا کہنا تھا کہ سندھ حکومت نے ہاکی کوفروغ دینے کے لئے اپنا کردارادا کیا ہے، قطرمیں فٹبال ایونٹ جیتنے والے بچوں نے لیاری کا سرفخرسے بلند کیا.

    کرائسٹ چرچ واقعہ

    انھوں نے مزید کہا کہ کرائسٹ چرچ واقعہ اندوہناک ہے، 50 مسلمان جمعے کی نمازسےقبل شہید کر دیے گئے، جاں بحق ہونے والوں میں9 پاکستانی بھی شامل ہیں، آج میں ان تینوں فیملیزکے پاس ہمدردی کے لئے گیا تھا، دہشت گردی کا کوئی مذہب نہیں ہوتا، ہم نےدہشت گردی کی وجہ سےایک لمبا سفر کیا، دہشت گردی کے خلاف جنگ میں ہمارے70 ہزارلوگ شہید ہوئے.

    مرادعلی شاہ نے کہا کہ ہمیں اپنےبیچ دہشت گردوں کو بے نقاب کرنا چاہیے، ہمارا دین امن پسندی کا پیغام دیتا ہے، نیشنل ایکشن پلان کو فالو کرنا چاہیے، بلاول بھٹو نے بھی کہا نیشنل ایکشن پلان پرعمل ہونا چاہیے.

  • پی ایس ایل فتح پاکستانی عوام اورخاص کربلوچستان کے نام ہے‘ سرفراز احمد

    پی ایس ایل فتح پاکستانی عوام اورخاص کربلوچستان کے نام ہے‘ سرفراز احمد

    کراچی: کوئٹہ گلیڈی ایٹرزکے کپتان سرفرازاحمد نے پی ایس ایل کے انعقاد پرسیکیورٹی فورسز، سندھ حکومت اوروفاق کا شکریہ ادا کیا۔

    تفصیلات کے مطابق کوئٹہ گلیڈی ایٹرزکے کپتان سرفرازاحمد نے سماجی رابطے کی ویب سائٹ ٹویٹر پر اپنے پیغام میں کہا کہ پی ایس ایل فتح پاکستانی عوام اورخاص کر بلوچستان کے نام ہے۔

    سرفراز احمد نے پی ایس ایل کے انعقاد پرسیکیورٹی فورسز، سندھ حکومت اوروفاق کا شکریہ ادا کیا۔


    کوئٹہ گلیڈی ایٹرزکے کپتان سرفراز احمد نے عالمی کھلاڑیوں، خصوصاً کراچی کے شائقین کا کامیاب پی ایس ایل پرشکریہ ادا کیا۔

    یاد رہے کہ گزشتہ روز کوئٹہ گلیڈی ایٹرز نے پی ایس ایل فائنل میں پشاور زلمی کو 8 وکٹوں سے شکست دے کر ٹائٹل اپنے نام کیا تھا۔

    کوئٹہ گلیڈی ایٹرز نے پہلی بار پی ایس ایل ٹائٹل جیت لیا

    پی ایس ایل فائنل میں پہلے بیٹنگ کرتے ہوئے پشاور زلمی نے 139 رنز کا ہدف دیا جسے کوئٹہ گلیڈی ایٹرز کی ٹیم نے 18 ویں اوور میں حاصل کرلیا تھا۔

    کوئٹہ گلیڈی ایٹرز کی جانب سے محمد حسنین نے 3، ڈیوین براوو نے 2، محمد نواز اور فواد احمد نے ایک ایک وکٹ حاصل کی تھی۔

  • محفوظ پی ایس ایل کے انعقاد پرسب کا شکرگزار ہوں‘ آسٹریلوی کرکٹر

    محفوظ پی ایس ایل کے انعقاد پرسب کا شکرگزار ہوں‘ آسٹریلوی کرکٹر

    کراچی: آسٹریلوی کرکٹرفواد احمد کا کہنا ہے کہ پی ایس ایل ٹرافی جیت کر خوشی ہوئی، اس لیے سب کھیلتے ہیں۔

    تفصیلات کے مطابق پاکستان سپرلیگ کے چوتھے ایڈیشن میں کوئٹہ گلیڈی ایٹرز کی جانب سے کھیلنے والے آسٹریلوی کرکٹرفواد نے کہا کہ محفوظ پی ایس ایل کے انعقاد پر سب کا شکرگزار ہوں۔

    فواد احمد نے ٹویٹر پر اپنے پیغام میں کہا کہ حوصلہ بڑھانے پراہل خانہ، مداحوں اور دوستوں کا شکر گزار ہوں، پی ایس ایل ٹرافی جیت کر خوشی ہوئی، اس لیے سب کھیلتے ہیں۔

    یاد رہے کہ گزشتہ روز کوئٹہ گلیڈی ایٹرز نے پی ایس ایل فائنل میں پشاور زلمی کو 8 وکٹوں سے شکست دے کر ٹائٹل اپنے نام کیا تھا۔

    کوئٹہ گلیڈی ایٹرز نے پہلی بار پی ایس ایل ٹائٹل جیت لیا

    پی ایس ایل فائنل میں پہلے بیٹنگ کرتے ہوئے پشاور زلمی نے 139 رنز کا ہدف دیا جسے کوئٹہ گلیڈی ایٹرز کی ٹیم نے 18 ویں اوور میں حاصل کرلیا تھا۔

    کوئٹہ گلیڈی ایٹرز کی جانب سے محمد حسنین نے 3، ڈیوین براوو نے 2، محمد نواز اور فواد احمد نے ایک ایک وکٹ حاصل کی تھی۔

  • پی ایس ایل فور: پورا ملک کرکٹ کے رنگ میں رنگ گیا

    پی ایس ایل فور: پورا ملک کرکٹ کے رنگ میں رنگ گیا

    کراچی: پی ایس ایل فور کا فائنل تو کراچی میں کھیلا گیا لیکن پورا ملک کرکٹ کے رنگ میں رنگ گیا۔ اسلام آباد، کوئٹہ، پشاور اور دیگر شہروں میں کرکٹ کے دیوانوں کی بڑی تعداد نے بڑی اسکرین پر میچ دیکھا۔

    تفصیلات کے مطابق پاکستان سپر لیگ سیزن فور کے فائنل کا ٹاکرا کراچی میں ہوا لیکن جوش و خروش پورے ملک میں دیکھا گیا، ہر طرف کرکٹ کے رنگ چھا گئے، بیشتر شہروں میں بڑی تعداد میں کرکٹ کے دیوانوں نے جمع ہوکر بڑی اسکرین پر میچ دیکھا۔

    اسلام آباد میں بھی بڑی اسکرین لگائی گئی، شائقین کی بڑی تعداد جمع ہوئی، کوئی پشاور کا دیوانہ تھا تو کوئی کوئٹہ کا پرستار نکلا، ایک بچے نے تو کمال کر دیا پشاور کی شرٹ پہنے کوئٹہ کو سپورٹ کی اور بتایا شرٹ امی نے پہنا دی۔

    کوئٹہ کے ایوب اسٹیڈیم میں بڑی اسکرین نصب کی گئی اور پرجوش شائقین نے میچ کے ایک ایک بال سے لطف اٹھایا، سب کو یقین تھا کوئٹہ ہی جیتے گا، کوئٹہ کی جیت پاکستان کی جیت ہے۔

    پشاور میں یادگار چوک پر بڑی اسکرین لگا کر پی ایس ایل فائنل کو یادگار بنایا، شائقین انتہائی پر جوش نظر آئے، دلوں کی دھڑکنیں بار بار تیز ہوتی رہیں۔

    کوئٹہ گلیڈی ایٹرز نے پہلی بار پی ایس ایل ٹائٹل جیت لیا، زلمی کو 8 وکٹوں سے شکست

    پاکستان نے پی ایس ایل فور کے اہم میچز اور فائنل کا میدان سجا کر پوری دنیا کو پیغام دے دیا کہ ہمارا ملک پر امن اور دہشت گردوں سے پاک ہے۔

  • کوئٹہ گلیڈی ایٹرز نے کمال کرکٹ کھیلی: فواد چوہدری

    کوئٹہ گلیڈی ایٹرز نے کمال کرکٹ کھیلی: فواد چوہدری

    اسلام آباد: وفاقی وزیرِ اطلاعات فواد چوہدری نے کہا ہے کہ پی ایس ایل فور کے فائنل میں کوئٹہ گلیڈی ایٹرز نے کمال کرکٹ کھیلی۔

    تفصیلات کے مطابق کراچی نیشنل اسٹیڈیم میں کھیلے جانے والے پاکستان سپر لیگ سیزن فور کے فائنل میچ میں کوئٹہ گلیڈی ایٹرز کی کارکردگی کی تعریف کرتے ہوئے وزیر اطلاعات نے کہا کہ کوئٹہ کی ٹیم نے کمال کرکٹ کھیلی ہے۔

    انھوں نے کہا ’میں کوئٹہ گلیڈی ایٹرز کو مبارک باد دیتا ہوں، پشاور زلمی کا بھی شکریہ ادا کرتا ہوں۔‘

    فواد چوہدری نے ملک میں کرکٹ کی واپسی پر تمام پی ایس ایل فرنچائز کا بھی شکریہ ادا کیا، کہا ’تمام فرنچائز کا مشکل وقت میں پاکستان کرکٹ کے لیے ساتھ دینے پر شکریہ ادا کرتا ہوں۔‘

    وفاقی وزیرِ اطلاعات نے کراچی کنگز، لاہور قلندرز، ملتان سلطانز، اسلام آباد یونائیٹڈ کی ٹیموں کا بھی شکریہ ادا کیا۔

    یہ بھی پڑھیں:  کوئٹہ گلیڈی ایٹرز نے پہلی بار پی ایس ایل ٹائٹل جیت لیا، زلمی کو 8 وکٹوں سے شکست

    واضح رہے کہ کوئٹہ گلیڈی ایٹرز پی ایس ایل فور کا چیمپئن بن گیا ہے، دوسری طرف پشاور زلمی کو مسلسل دوسری بار پی ایس ایل فائنل میں شکست ہو گئی ہے، جب کہ کوئٹہ گلیڈی ایٹرز پی ایس ایل ٹائٹل جیتنے والی تیسری ٹیم بن گئی ہے۔

    فائنل میں کوئٹہ گلیڈی ایٹرز نے پشاور زلمی کو 8 وکٹ سے شکست دی، احمد شہزاد 59 اور رائلے روسو 39 رنز بنا کر نمایاں رہے۔

  • پی ایس ایل کا کامیاب انعقاد، اللہ ہمیشہ پاکستان پر اپنی نعمتیں نازل کرتا رہے، آرمی چیف

    پی ایس ایل کا کامیاب انعقاد، اللہ ہمیشہ پاکستان پر اپنی نعمتیں نازل کرتا رہے، آرمی چیف

    کراچی: آرمی چیف نے پی ایس ایل سیزن فور کے کامیاب انعقاد پرمداحوں، ٹیموں اور سیکیورٹی اداروں کو مبارکباد پیش کرتے ہوئے کہا ہے کہ اللہ ہمیشہ پاکستان پر اپنی نعمتیں نازل کرتا رہے۔

    پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے پی ایس ایل فائنل کے کامیاب انعقاد پر سیکیورٹی اداروں، ٹیموں اور مداحوں کو مبارک باد پیش کرتے ہوئے کہا ہے کہ اللہ کے فضل و کرم سے یہ ممکن ہوا، اللہ پاکستان کو اپنی رحمتوں کے سائے میں رکھے۔

    آرمی چیف جنرل قمر جاوید باجوہ نے کہا کہ اللہ ہمیشہ پاکستان پر اپنی نعمتیں نازل کرتا رہے، آرمی چیف کے پیغام میں پاکستان زندہ باد کا ہیش ٹیگ بھی موجود ہے۔

    واضح رہے کہ پی ایس ایل فائنل میچ میں کوئٹہ گلیڈی ایٹرز کی ٹیم نے پشاور زلمی کو 8 وکٹوں سے شکست دے کر پی ایس ایل سیزن فور کا ٹائٹل اپنے نام کرلیا ہے۔

    خیال رہے کہ پاکستان سپر لیگ سیزن فور کے آٹھ میچز کراچی میں کھیلے گئے، غیرملکی کھلاڑیوں نے بھی پاکستان کو پر امن ملک قرار دیا اور کراچی میں کھیلے جانے والے میچز میں شرکت کی۔

    پی ایس ایل میچز کے دوران سیکیورٹی کے سخت انتظامات کیے گئے تھے، یاد رہے کہ وزیراعظم پاکستان عمران خان نے اعلان کیا ہے کہ آئندہ سال پی ایس ایل کے تمام میچز پاکستان میں کھیلے جائیں گے۔

  • کوئٹہ گلیڈی ایٹرز نے پہلی بار پی ایس ایل ٹائٹل جیت لیا، زلمی کو 8 وکٹوں سے شکست

    کوئٹہ گلیڈی ایٹرز نے پہلی بار پی ایس ایل ٹائٹل جیت لیا، زلمی کو 8 وکٹوں سے شکست

    کراچی: پی  ایس سیزن فور کے فائنل میچ میں کوئٹہ گلیڈی ایٹرز نے پشاور زلمی کو 8 وکٹوں سے باآسانی شکست دے کر پی ایس ایل کا ٹائٹل پہلی مرتبہ اپنے نام کرلیا، حسنین کو میچ کا بہترین کھلاڑی قرار دیا گیا۔

    تفصیلات کے مطابق کراچی کے نیشنل اسٹیڈیم میں کھیلے جانے والے میچ میں کوئٹہ گلیڈی ایٹرز نے 139 رنز کا ہدف 2 وکٹوں کے نقصان پر حاصل کرلیا، احمد شہزاد نے شاندار نصف سنچری اسکور کی۔

    گلیڈی ایٹرز کی پہلی وکٹ 19 رنز پر گری جب شین واٹسن 7 رنز بنا کر عمر امین کے ہاتھوں رن آؤٹ ہوئے، احسن علی نے 25 رنز کی اننگز کھیلی۔

    احمد شہزاد نے 59 اور رائلی روسو نے 39 رنز کی ناقابل شکست اننگز کھیلی۔

    پشاور زلمی کے وہاب ریاض نے ایک وکٹ حاصل کی، پی ایس ایل سیزن فور میں سب سے زیادہ وکٹیں حاصل کرنے والے حسن علی فائنل میچ میں کوئی وکٹ نہیں لے سکے۔

    قبل ازیں کراچی کے نیشنل اسٹیڈیم میں کھیلے جانے والے فائنل میچ میں زلمی نے 8 وکٹوں کے نقصان پر 138 رنز بنائے اور گلیڈی ایٹرز کو جیت کے لیے 139 رنز کا ہدف دے دیا۔

    زلمی کی پہلی وکٹ 4 رنز پر گری جب امام الحق 3 رنز بنا کر پویلین لوٹ گئے، 62 رنز کے مجموعی اسکور پر کامران اکمل 21 رنز بنا کر محمد نواز کی گیند پر کلین بولڈ ہوگئے۔

    صہیب مقصود 20 رنز بنا کر براؤو کا نشانہ بنے، عمر امین نے 38 رنز کی اننگز کھیلی، پولارڈ کو 7 رنز پر محمد حسنین نے سرفراز حمد کے ہاتھوں کیچ آؤٹ کرایا۔

    کپتان ڈیرن سیمی 18 رنز بنا کر آؤٹ ہوئے انہیں ڈی جے براؤو نے آؤٹ کیا، وہاب ریاض 12 رنز بنا کر رن آؤٹ ہوئے۔

    فاسٹ بولر محمد حسنین نے 3 کھلاڑیوں کو پویلین روانہ کیا، ڈیوئن براؤو نے دو وکٹیں حاصل کیں، محمد نواز اور فواد احمد نے ایک، ایک وکٹ حاصل کی۔

    قبل ازیں فائنل میچ میں سرفراز احمد نے ٹاس جیت کر پشاور زلمی کو پہلے بیٹنگ کی دعوت دی ہے، دونوں ٹیموں میں کوئی تبدیلی نہیں کی گئی ہے۔

    سرفراز احمد نے کہا کہ پاکستان پر امن ملک ہے اور یہاں کے لوگ کرکٹ سے بہت محبت کرتے ہیں، مداحوں کا شکر گزار ہوں کہ وہ گراؤنڈ میں آئے اور سپورٹ کیا۔

    سرفراز احمد کا کہنا تھا کہ کوشش ہوگی کہ جلد از جلد زلمی کی وکٹیں حاصل کریں جبکہ ڈیرن سیمی کا کہنا تھا کہ اس وکٹ پر 180 رنز کا ٹارگٹ بہت اچھا ہوگا۔

    واضح رہے کہ کوئٹہ گلیڈی ایٹرز کی ٹیم تین بار فائنل میں پہنچی ہے اور ٹائٹل سے محروم رہی ہے جبکہ پشاور زلمی کی ٹیم بھی تین مرتبہ ہی فائنل کھیل چکی ہے اور ایک بار ٹرافی اپنے نام کی۔

  • پی ایس ایل میچز سے پاکستان میں حالات خراب ہونے کی سوچ غلط ثابت ہوئی: ڈیوڈ رچرڈسن

    پی ایس ایل میچز سے پاکستان میں حالات خراب ہونے کی سوچ غلط ثابت ہوئی: ڈیوڈ رچرڈسن

    کراچی: انٹرنیشنل کرکٹ کونسل کے چیف ایگزیکٹو ڈیوڈ رچرڈسن نے کہا ہے کہ پی ایس ایل میچز سے پاکستان میں حالات خراب ہونے کی سوچ غلط ثابت ہوئی۔

    تفصیلات کے مطابق آئی سی سی چیف ایگزیکٹو ڈیوڈ رچرڈ سن نے پریس کانفرنس کرتے ہوئے کہا ہے کہ پاکستان کے خلاف ایک سوچ ہے کہ یہاں حالات خراب ہیں، پی ایس ایل میچز کے انعقاد سے یہ سوچ غلط ثابت ہوئی۔

    [bs-quote quote=”آئی سی سی ٹورنامنٹس میں قانون کے تحت بھارت پاکستان سے کھیلنے کا پابند ہے۔” style=”style-8″ align=”left” author_name=”ڈیوڈ رچرڈسن” author_job=”آئی سی سی چیف ایگزیکٹو”][/bs-quote]

    ڈیوڈ رچرڈسن نے کہا ’پی سی بی کا شکر گزار ہوں کہ مجھے پی ایس ایل فائنل میں بلایا، پی سی بی کے ساتھ تعاون جاری رکھیں گے، غیر ملکی کھلاڑیوں کا بھی شکریہ جو پاکستان آئے۔‘

    آئی سی سی چیف ایگزیکٹو کا کہنا تھا کہ نیوزی لینڈ میں گزشتہ دنوں افسوس ناک واقعہ پیش آیا، سیکورٹی کے حوالے سے آئی سی سی کام کر رہا ہے، ورلڈ کپ کے لیے سیکورٹی کے حوالے سے تمام خدشات دور کیے جائیں گے۔

    سابق جنوبی افریقی کرکٹر اور آئی سی سی چیف ایگزیکٹو نے مزید کہا کہ کوشش ہوتی ہے ممبر ممالک کے ساتھ تعاون کریں، پی ایس ایل کے انتظامات اچھے ہیں، پی سی بی انٹرنیشنل کرکٹ کے لیے رکن ممالک کو دعوت دے ہم تعاون کریں گے۔

    یہ بھی پڑھیں:  پی ایس ایل میچز میران شاہ میں بھی کرائے جائیں گے: ڈی جی آئی ایس پی آر

    ڈیوڈ رچرڈسن نے کہا کہ آئی سی سی کے سی ای او کی ذمہ داری ایک غیر جانب دار ذمہ داری ہے، امید ہے میرے جانے کے بعد بھی آئی سی سی کی پالیسی جاری رہے گی۔

    ان کا کہنا تھا کہ آئی سی سی ٹورنامنٹس میں رکن ممالک کا آپس میں کھیلنا ضروری ہے، آئی سی سی ٹورنامنٹس میں قانون کے تحت بھارت پاکستان سے کھیلنے کا پابند ہے۔

  • پی ایس ایل میچز میران شاہ میں بھی کرائے جائیں گے: ڈی جی آئی ایس پی آر

    پی ایس ایل میچز میران شاہ میں بھی کرائے جائیں گے: ڈی جی آئی ایس پی آر

    کراچی: ڈی جی آئی ایس پی آر میجر جنرل آصف غفور نے کہا ہے کہ پی ایس ایل کی کام یابی پوری قوم کی کام یابی ہے، پی ایس ایل میچز میران شاہ، مظفر آباد اور خیبر میں بھی کرائیں گے۔

    تفصیلات کے مطابق پاک فوج کے ترجمان میجر جنرل آصف غفور نے نیشنل اسٹیڈیم کرچی کے میڈیا باکس میں صحافیوں سے گفتگو کرتے ہوئے کہا کہ پاکستان سپر لیگ کے میچز شمالی وزیرستان کے شہر میران شاہ اور آزاد کشمیر کے دار الحکومت مظفر آباد میں بھی کرائے جائیں گے۔

    پاک فوج کے شعبہ تعلقات عامہ کے ڈائریکٹر جنرل نے کہا کہ ان کی چیئرمین پی سی بی احسان مانی سے میران شاہ اور دیگر شہروں میں اسٹیڈیم کی تعمیر پر بات ہوئی ہے۔

    یہ بھی پڑھیں:  پی ایس ایل فائنل: زلمی نے گلیڈی ایٹرز کو جیت کے لیے 139 رنز کا ہدف دے دیا

    انھوں نے کہا کہ کراچی پچھلی بار بھی پی ایس ایل کے فائنل کا میزبان تھا، کراچی آج بھی فائنل کی میزبانی کر رہا ہے، خوشی کی بات ہے کہ پاکستان میں اسپورٹس سرگرمیاں بحال ہو رہی ہیں۔

    یہ بھی پڑھیں:  کراچی: پی ایس ایل 4 کی اختتامی تقریب کا آغاز، کرائسٹ چرچ کے شہدا کے لیے ایک منٹ کی خاموشی

    میجر جنرل آصف غفور کا کہنا تھا کہ پاکستانی عوام اور فورسز نے بہت کام کیا ہے، جس طرح سیکورٹی فورسز نے کام کیا اسے ریورس نہیں کیا جا سکتا، پی ایس ایل کو پاکستان میں ہونے سے کوئی نہیں روک سکتا۔

    انھوں نے مزید کہا کہ پی ایس ایل کے تمام میچز پاکستان میں کرانے کے لیے پرعزم ہیں، ہم سب نے مل کر ایونٹ کو کام یاب بنایا ہے۔