ARYNews.tv | Urdu – Har Lamha Bakhabar

Tag: پی ایس ایل 4

  • پی ایس ایل 4: افتتاحی میچ میں اسلام آباد یونائیٹڈ نے لاہور قلندرز کو شکست دے دی

    پی ایس ایل 4: افتتاحی میچ میں اسلام آباد یونائیٹڈ نے لاہور قلندرز کو شکست دے دی

    دبئی: پی ایس ایل سیزن فور کے افتتاحی میچ میں اسلام آباد یونائیٹڈ نے لاہورقلندرز کو 5 وکٹ سے شکست دے دی۔

    تفصیلات کے مطابق اسلام آباد یونائیٹڈ نے 20ویں اوور میں 5وکٹ کے نقصان پرہدف حاصل کیا، 2 وکٹ اور 23رنز کے ساتھ فہیم اشرف میچ کے بہترین کھلاڑی قرار پائے۔ حسین طلعت37، آصف علی 36 اور لیوک رونچی27 رنز بناکر نمایاں  رہے۔

    قبل ازیں لاہور قلندرز نے اسلام آباد یونائیٹڈ کو جیت کے لیے  172 رنز کا ہدف دیا، فخر زمان نے شاندار نصف سنچری اسکور کی۔

    پی ایس ایل سیزن فور کے پہلے میچ میں لاہور قلندرز نے مقررہ اوورز میں 8 وکٹوں کے نقصان پر 171 رنز بنائے اور اسلام آباد یونائیٹڈ کو جیت کے لیے 172 رنز کا ہدف دیا، فخر زمان نے شاندار 44 گیندوں پر 65 رنز کی شاندار اننگز کھیلی۔

    محمد سمیع نے ٹاس جیت کر پہلے فیلڈنگ کا فیصلہ کیا جو غلط ثابت ہوا، اوپنر فخر زمان اور سہیل اختر نے شاندار شراکت داری قائم کرکے ٹیم کا اسکور 97 رنز تک پہنچادیا، سہیل اختر 37 رنز بنا کر فہیم اشرف کا نشانہ بنے۔

    اسلام آبا یونائیٹڈ کی دوسری وکٹ 129 رنز پر گری جب فخر زمان 64 رنز بنا کر شاداب خان کی گیند پر آؤٹ ہوئے، اے بی ڈیولیرز 24 رنز بنا کر وقاص مقصود کی گیند پر وکٹ گنوا بیٹھے، برینڈین ٹیلر 2 رنز بنا کر ڈیوچ کی گیند پر آؤٹ ہوئے۔

    کارلوس بریتھ ویتھ 6 رنز بنا کر فہیم اشرف کی گیند پر پویلین لوٹ گئے، ڈیوچ کو فہیم اشرف نے 14 رنز پر رن آؤٹ کیا، یاسر شاہ 7 رنز بنا کر رن آؤٹ ہوئے، شاہین شاہ آفریدی 2 رنز بنا کر محمد سمیع کی گیند پر ایل بی ڈبلیو ہوئے۔

    اسلام آباد یونائیٹڈ کی جانب سے فہیم اشرف نے دو کھلاڑیوں کو پویلین کی راہ دکھائی جبکہ شاداب خان، وقاص مقصود، محمد سمیع اور ڈیوچ نے ایک، ایک وکٹ حاصل کی۔

    قبل ازیں اسلام آباد یونائیٹڈ کے کپتان محمد سمیع نے لاہور قلندرز کے خلاف ٹاس جیت کر پہلے فیلڈنگ کا فیصلہ کیا ہے، اسلام آباد یونائیٹڈ گزشتہ سال پی ایس ایل تھری ٹرافی جیتنے میں کامیاب ہوئی تھی۔

    اسلام آباد یونائیٹڈ اسکواڈ

    اسلام آباد کی ٹیم میں محمد سمیع کپتان، رضوان حسین، لک رونکی، فل سالٹ، حسین طلعت، کیمرون ڈیلپورٹ، آصف علی، آصف علی، فہیم اشرف، شادان خان، سمیٹ پٹیل، اور وقاص مقصود شامل ہیں۔

    لاہور قلندرز اسکواڈ

    لاہور قلندر کی قیادت محمد حفیظ کررہے ہیں، دیگر کھلاڑیوں میں اے بی ڈیولیرز، فخر زمان، سہیل اختر، اینٹون ڈیوچ، برینڈن ٹیلر، کارلوس بریتھ ویٹ، یاسر شاہ، شاہین شاہ آفریدی، حارث سہیل اور راحت علی شامل ہیں۔

    اسلام آباد یونائیٹڈ 2016 میں پی ایس ایل کے پہلے سیزن میں کامیابی سے ہم کنار ہوئی تھی، دوسرے سیزن میں چوتھے نمبر پر رہی جبکہ پی ایس ایل تھری میں پھر کامیابی اسلام آباد یونائیٹڈ کے حصے میں آئی۔

    لاہور قلندرز کے لیے پی ایس ایل کے تینوں سیزن زیادہ اچھے ثابت نہیں ہوئے ہیں، پہلے سیزن میں لاہور کی ٹیم پانچویں پوزیشن دوسرے سیزن میں بھی پانچویں پوزیشن اور پی ایس ایل تھری میں ایک درجہ تنزلی کے بعد چھٹے نمبر پر رہی تھی۔

    مزید پڑھیں: پی ایس ایل کے ٹکٹوں کی آن لائن فروخت آج رات 12 بجے شروع ہوگی

    واضح رہے کہ پی ایس ایل فور میں 6 ٹیموں کے درمیان 34 مقابلے ہوں گے، ابتدائی 26 میچ یو اے ای میں کھیلے جائیں گے، ابوظبی پہلی مرتبہ پی ایس ایل میچز کی میزبانی کرے گا۔

    پی ایس ایل فور کے آخری 8 میچز پاکستان میں کھیلے جائیں گے، 7 سے 17 مارچ تک میچز لاہور اور کراچی میں ہوں گے، لاہور میں 10، 9 اور 12 مارچ کو میچز کھیلے جائیں گے۔

    کراچی میں 15، 13، 10، 7 اور 17 مارچ کو مقابلے ہوں گے، پی ایس ایل فور کا فائنل 17 مارچ کو نیشنل اسٹیڈیم میں کھیلا جائے گا۔

  • پی ایس ایل 4 کا آغاز، افتتاحی تقریب میں‌ شاندار میوزک اور زبردست آتشبازی

    پی ایس ایل 4 کا آغاز، افتتاحی تقریب میں‌ شاندار میوزک اور زبردست آتشبازی

    دبئی: پاکستان سپر لیگ کے چوتھے ایڈیشن کی رنگا رنگ افتتاحی تقریب کا آغاز  قومی ترانے کے ساتھ ہوا، پی سی بی کے چیئرمین احسان مانی  نے شیخ النہیان نے حمایت کا شکریہ ادا کیا۔

    تفصیلات کے مطابق پی ایس ایل کے چوتھے ایڈیشن کی رنگا رنگ افتتاحی تقریب کا باقاعدہ آغاز قومی ترانے کے ساتھ کیا گیا، اسٹیڈیم میں موجود ہزاروں شائقین ’پاک سرزمین شاد باد‘ سنتے ہی احترام میں اپنی نشستوں سے کھڑے ہوئے۔

    پی ایس ایل کی افتتاحی تقریب کا وقت جیسے جیسے قریب آرہا تھا شائقین کرکٹ کی دلوں کی دھڑکنیں تیز ہورہی تھیں کیونکہ اس لیگ کے لیے انہوں نے سارا سال انتظار کیا۔

    تقریب کا آغاز قومی ترانے سے ہوا جس کے بعد اسٹیج پر نامور کمنٹیٹر رمیز راجہ مائیک تھامے اسٹیج پر آئے اور انہوں نے سب سے پہلے حبیب بینک کے صدر کو مدعو کیا۔

    بعد ازاں احسان مانی نے خطاب کرتے ہوئے کہا کہ ’ پاکستان کرکٹ کے فروغ اور حمایت پر دبئی کے حکمران شیخ النہیان کا شکریہ ادا کرتا ہوں۔ انہوں نے تمام فرنچائزز مالکان کا شکریہ ادا کرتے ہوئے کہا کہ ’پی ایس ایل دنیا کی سب سے بڑی لیگ بن گئی، افتتاحی تقریب دیکھ کر بہت خوشی ہورہی ہے‘۔

    میوزیکل تقریب

    غیرملکی جرمن بینڈ نے سب سے پہلے پرفارمنس دی جس کے بعد آئمہ بیگ اور شجاع حیدر نے ایک ساتھ نامور پاکستانی گلوکارہ نازیہ حسن کا گانا ’ڈسکو دیوانے‘ پر پرفارم کیا اور حاضرین کا لہو گرمایا۔


    آئمہ بیگ اور شجاع حیدر کی پرفارمنس

    بعد ازاں جنون بینڈ نے پرفارمنس دی جس پر تماشائی جھوم اٹھے، فواد خان نے پی ایس ایل فور کا آفیشل گانا گا کر شائقین کا لہو گرمایا۔

    یاد رہے کہ پاکستان سپر لیگ کے تین ایڈیشنز کامیاب رہے تھے، چوتھی لیگ میں 6 ٹیمیں کراچی کنگز، کوئٹہ گلیڈی ایٹرز، پشاور زلمی، اسلام آباد یونائیٹڈ، لاہور قلندرز اور ملتان سلطانز شامل ہیں۔

    تصاویر دیکھیں

    پی ایس ایل 4 کا افتتاحی میچ دومرتبہ کی چیمپئین رہنے والی اسلام آباد یونائیٹیڈ اورلاہور قلندرز کے درمیان کھیلا جائے گا۔

    آتش بازی

    پی ایس ایل 4 کے لاہور میں تین میچز نو، دس اور بارہ مارچ کو ہوں گے جبکہ کراچی میں پانچ میچز سات، دس، تیرہ، پندرہ اور سترہ مارچ کو ہوں گے۔

  • پی ایس ایل کے ٹکٹوں کی آن لائن فروخت آج رات 12 بجے شروع ہوگی

    پی ایس ایل کے ٹکٹوں کی آن لائن فروخت آج رات 12 بجے شروع ہوگی

    کراچی: پی ایس ایل سیزن فور شروع ہوچکا ہے پاکستان میں میچز کے لیے ٹکٹوں کی تقسیم آج رات 12 بجے سے شروع ہوگی۔

    تفصیلات کے مطابق پاکستان پاکستان میں پی ایس ایل میچز دیکھنے کے خواہش مند شہریوں کے لیے خوشخبری ہے کہ پی ایس ایل کے ٹکٹ آج رات سے آن لائن دستیاب ہوں گے۔

    رپورٹ کے مطابق پہلے مرحلے میں ابتدائی 4 میچز کے ٹکٹس فروخت کے لیے دستیاب ہوں گے اور شائقین کرکٹ کے لیے ان میچز کے ٹکٹس کی قیمت میں بھی کمی کردی گئی ہے۔

    سیزن تھری میں جن انگلوژر کی قیمت ایک ہزار سے 8 ہزار تھی اب ان کی قیمت کم کرکے 500 سے 3 ہزار کردی گئی ہے، یہی نہیں کراچی میں ہونے والے فائنل میچ کی ٹکٹس کی قیمت میں بھی کمی کردی گئی ہے۔

    رات 12 بجتے ہی ویب سائٹ پر ٹکٹس فروخت کے لیے دستیاب ہوں گے، ٹکٹس پروجیکٹ ہیڈ کا کہنا ہے کہ کوشش ہے کہ سیزن تھری کی طرح اس بار ویب سائٹ کریش نہ ہو۔

    پہلے مرحلے میں کراچی کے 7 اور 10 مارچ کے جبکہ لاہور کے 9 اور 10 مارچ کو ہونے والے میچز کے ٹکٹس دستیاب ہوں گے، ان ٹکٹس کی قیمت 500 روپے، ایک ہزار، دو ہزار، ڈھائی ہزار اور تین ہزار روپے ہے۔

    پلے آف مرحلے اور فائنل میچز کے ٹکٹس کی آن لائن فروخت 20 فروری (بروز بدھ) سے شروع ہوگی، فائنل کے ٹکٹس کی قیمت 500، 2 ہزار، 4 ہزار اور 8 ہزار روپے رکھی گئی ہے۔

    پہلی بار آن لائن ٹکٹس لینے والے خوش نصیبوں کے لیے ہوم ڈیلیوری کی سہولت مہیا کی جارہی ہے جبکہ ملک بھر کے 13 شہروں میں 60 مختلف ٹی سی ایس برانچز میں 25 فروری سے ٹکٹس کی فروخت شروع ہوگی۔

    پی ایس ایل فور کے 4 میچز ابو ظبی میں ہوں گے جبکہ شارجہ اور دبئی میں بھی میچز ہوں گے۔ آخری 8 میچز پاکستان میں ہوں گے جن میں 3 میچ لاہور اور 5 میچ کراچی میں ہوں گے۔

  • پاکستان کو ٹی ٹوینٹی نمبر ون ٹیم بنانے میں پی ایس ایل کا بڑا کردار ہے، مصباح الحق

    پاکستان کو ٹی ٹوینٹی نمبر ون ٹیم بنانے میں پی ایس ایل کا بڑا کردار ہے، مصباح الحق

    دبئی: پاکستان کرکٹ ٹیم کے سابق کپتان مصباح الحق نے کہا ہے کہ پاکستان کو ٹی ٹوینٹی کی نمبر ون ٹیم بنانے میں پی ایس ایل کا بڑا کردار ہے۔

    تفصیلات کے مطابق سابق کپتان قومی کرکٹ ٹیم مصباح الحق نے اے آر وائی نیوز سے خصوصی گفتگو کرتے ہوئے کہا کہ پی ایس ایل پاکستان کی اہم پروڈکٹ ہے، پی ایس ایل سے نئے کھلاڑیوں کے لیے مواقع موجود ہیں، ٹورنامنٹ سے نیا ٹیلنٹ سامنے آرہا ہے۔

    مصباح الحق کا کہنا تھا کہ کرکٹ کے مداحوں کو پی ایس ایل کا انتظار رہتا تھا، ایئرپورٹ پر کرکٹ مداح کہہ رہے تھے کہ پی ایس ایل کے لیے بہت انتظار کرنا پڑا اب ایونٹ شروع ہوگا تو بہت انجوائے کریں گے۔

    پی ایس ایل ٹیموں کے حوالے سے ان کا کہنا تھا کہ پشاور زلمی، اسلام آباد یونائیٹڈ، کراچی کنگز سمیت تمام ہی ٹیمیں اچھی ہیں، پشاور زلمی میں اچھے کھلاڑی موجود ہیں، زلمی کی ٹیم ایک مرتبہ ونر رہ چکی ہے۔

    واضح رہے کہ پی ایس ایل سیزن فور کا آغاز کل سے دبئی میں ہورہا ہے جس میں فواد خان اور جوش بینڈ جلوے بکھیرنے کے لیے تیار ہیں۔

    مزید پڑھیں: پی ایس ایل سے کھلاڑیوں کے لیے مواقع بڑھ رہے ہیں: مکی آرتھر

    پی ایس ایل فور کے پہلے میچ میں اسلام آباد یونائیٹڈ اور لاہور قلندرز آمنے سامنے ہوں گے جبکہ 15 فروری کو کراچی کنگز اور ملتان سلطانز کی ٹیمیں مدمقابل ہوں گی۔

    خیال رہے کہ پی ایس ایل تین سیزنز کھیلے جاچکے ہیں اسلام آباد یونائیٹڈ دو مرتبہ ٹائٹل اپنے نام کرچکی ہے جبکہ پشاور زلمی کی ٹیم نے ڈیرن سیمی کی قیادت میں ایک دفعہ ایونٹ میں کامیابی حاصل کی تھی۔

  • دورانِ پی ایس ایل 4 ، بچوں میں سرطان اور چھاتی کے سرطان کی آگاہی کے دن منائے جائیں گے

    دورانِ پی ایس ایل 4 ، بچوں میں سرطان اور چھاتی کے سرطان کی آگاہی کے دن منائے جائیں گے

    لاہور : پاکستان سپر لیگ کا میدان سجنے والا ہے ، دوران پی ایس ایل 4 بچوں کے سرطان کی آگاہی کا دن پندرہ فروری جبکہ چھاتی کے سرطان کی آگاہی کے لیے پنک ربن ڈے دس مارچ کو منایا جائے گا۔

    تفصیلات کے مطابق پاکستان سپر لیگ سیزن فور کا کل سے آغاز ہونے جارہا ہے ، پی ایس ایل 4 کےدوران بچوں اورچھاتی کےسرطان کے دن منانے کا فیصلہ کیا گیا ہے۔

    بچوں کے سرطان کی آگاہی کا دن پندرہ فروری کو منایا جائے گا جبکہ چھاتی کے سرطان کی آگاہی کے لیے پنک ربن ڈے دس مارچ کو منایا جائے گا۔

    بچوں کے سرطان کی آگاہی کے روز کراچی کنگز اور ملتان سلطانز جبکہ پشاور زلمی اور کوئٹہ گلیڈیٹرز کے درمیان میچز ہوں گے، پندرہ فروری کو چاروں ٹیمیں گولڈن ربن پہنیں گی اور دبئی سٹیڈیم کو بھی اسی مناسبت سے سجایا جائے گا۔

    دس مارچ کو کراچی میں کراچی کنگز اور کوئٹہ گلیڈیٹرز جبکہ لاہورمیں لاہور قلندرز اور ملتان سلطانز پنک ربن ڈے منائیں گی، ان میچز کے دوران چاروں ٹیمیں اپنے بازووں پر پنک ربن پہنیں گی۔

    میچز میں کمنٹیٹرز بھی ربن پہنیں گے، لاہور اور کراچی کے اسٹیڈیم اور وکٹوں کوبھی پنک ربن ڈے کے حوالے سے سجایا جائے گا۔

    خیال رہے پاکستان سپرلیگ سیزن فورکا شاندار آغاز کل دبئی میں ہوگا، افتتاحی میچ دومرتبہ کی چیمپئین اسلام آباد یونائیٹیڈ اورلاہور قلندرز کے درمیان کھیلا جائے گا۔

    پی ایس ایل 4 کے لاہور میں تین میچز نو، دس اور بارہ مارچ کو ہوں گے جبکہ کراچی میں پانچ میچز سات، دس، تیرہ، پندرہ اور سترہ مارچ کو ہوں گے۔

  • پی ایس ایل کی ٹرافی اوراس سے جڑے اہم حقائق

    پی ایس ایل کی ٹرافی اوراس سے جڑے اہم حقائق

    لاہور: گزشتہ روز دبئی میں پاکستان سپر لیگ 4 کے لیے تیار کردہ ٹرافی کی رونمائی کی گئی، آج ہم آپ کو بتا رہے ہیں اس ٹرافی کی تشکیل میں مدنظر رکھے گئے کچھ ایسے عوامل جن کے بارے میں جان کر آپ  حیران رہ جائیں گے

    تفصیلات کے مطابق پاکستان سپر لیگ سیزن فور کی ٹرافی گزشتہ روز دبئی میں اپنی تقریب رونمائی کے بعد سے عوام اور سوشل میڈیا میں گفتگو کا موضوع بنی ہوئی ہے، ٹرافی کی انوکھی اور دلکش ساخت نے دنیا بھر کے شائقین کرکٹ کی توجہ اپنی جانب مبذول کرلی ہے۔

    پاکستانی ثقافت اور رنگوں کی ترجمانی کرتی پاکستان سپر لیگ سیزن فور کی ٹرافی میں پچاس ہزار بیش قیمتی کرسٹلز جڑے گئے ہیں۔

    پی ایس ایل سیزن فور کی ٹرافی میں اوپر نصب سفید ستارہ اور ٹرافی میں سفید و سبز رنگ حسین کی آمیزش پاکستان و قومی پرچم کی ترجمانی کرتی ہے۔

    ٹرافی کے قلب کے اطراف میں سفید کرسٹلز سے مزین چھ پٹیاں (پلر) لگائے گئے ہیں جن کے اوپری حصّے پر موجود رنگ سیزن میں حصّہ لینے والی 6 ٹیموں کے علامتی رنگوں سے مزین ہے۔

    کل سےشروع ہونے والے سیزن فور کی فاتح ٹیم  کے لیے تیارشدہ ٹرافی میں پچاس ہزار کرسٹلز کا استعمال کیا گیا ہے، اوراس کی تیاری میں چار ماہ صرف ہوئے ہیں۔

    دلکش ساخت کی حامل سیزن فور کی ٹرافی کی تیاری کے دوران پاکستانی ثقافت کو نمایاں کیا گیا ہے جہاں عوام ایک پرچم کے سائے تلے اتحاد و اتفاق سے زندگی گزارتے ہیں۔

    یاد رہے کہ  پاکستان سپر لیگ سیزن فور کا آغاز کل سے دبئی میں ہورہا ہے اور افتتاحی میچ اسلام آباد یونائیٹڈ اور لاہور قلندرز کے درمیان کھیلا جائے گا۔

    مزید پڑھیں : پی ایس ایل 4: ٹرافی کی دبئی میں تقریب رونمائی، احسان مانی کامیابی کے لیے پرامید

    خیال رہے کہ گزشتہ روز پاکستان سپرلیگ سیزن فور کی ٹرافی کی تقریب رونمائی کے موقع پر چیئرمین پی سی بی احسان مانی کا کہنا تھاکہ پی ایس ایل دنیا بھر میں ایک معروف برانڈ بن گیا ہے۔

    احسان مانی کا مزید کہنا تھا کہ پی ایس ایل کی کامیابی میں فرنچائز، اسپانسرز اورکھلاڑی شامل ہیں۔

  • وزیراعلیٰ پنجاب کاپی ایس ایل میں شامل تمام ٹیموں کیلئے نیک خواہشات کااظہار

    وزیراعلیٰ پنجاب کاپی ایس ایل میں شامل تمام ٹیموں کیلئے نیک خواہشات کااظہار

    لاہور : وزیراعلیٰ پنجاب عثمان بزدار نے پی ایس ایل 4 کے آغاز پر پی سی بی اور کھلاڑیوں کو مبارکباد دیتے ہوئے کہا کوئی بھی ٹیم جیتے،جیت پرامن پاکستان  اورعوام کی ہوگی، پی ایس ایل سے دنیا کو پیغام جارہا ہے پاکستان ایک پر امن ملک ہے۔

    تفصیلات کے مطابق وزیراعلیٰ پنجاب عثمان بزدار نے پی ایس ایل میں شامل تمام ٹیموں کے لئے نیک خواہشات کا اظہار کرتے ہوئے پی ایس ایل فور کے آغاز پر پی سی بی اور کھلاڑیوں کو مبارکباد دی۔

    [bs-quote quote=”پی ایس ایل میں کوئی بھی ٹیم جیتے،جیت پرامن پاکستان اورعوام کی ہوگی” style=”style-7″ align=”left” author_name=”وزیراعلیٰ پنجاب "][/bs-quote]

    عثمان بزدار نے کہا پی ایس ایل میں کوئی بھی ٹیم جیتے، جیت پرامن پاکستان اور عوام کی ہوگی، پی ایس ایل میچز سے شائقین کرکٹ کو بہترین تفریح کا موقع ملےگا اور دنیا کو پیغام جارہا ہے، پاکستان ایک پر امن ملک ہے۔

    وزیراعلیٰ پنجاب کا کہنا تھا کہ پاکستان کے عوام کھیل بالخصوص کرکٹ سے محبت کرتے ہیں، پاکستان سپرلیگ فور کے ذریعے نئے ٹیلنٹ کو تلاش کرنے میں مدد ملےگی۔

    انھوں نے مزید کہا لاہور میں ہونے والے میچز کیلئے بہترین انتظامات کیےجائیں گے، میچوں کیلئے 100 فیصدفول پروف سیکیورٹی یقینی بنائی جائےگی، جتنابڑا ایونٹ ہے اتنے ہی شاندار انتظامات کئے جائیں گے اور شائقین کرکٹ کو اسٹیڈیم میں بہترین سہولتیں فراہم کریں گے۔

    خیال رہے محکمہ داخلہ پنجاب نے پی ایس ایل میچز کے لئے فول پروف سیکورٹی پلان کوحتمی شکل دے دی ہے، حکام کے مطابق غیر متعلقہ افراد کوکھلاڑیوں سے ملنے کی اجازت نہیں ہوگی، اسٹیڈیم سیکورٹی کا جائزہ ہیلی کاپٹر سے لیا جائےگا جبکہ کھلاڑیوں کو ہوٹل سے اسٹیڈیم لاتے وقت روٹس پراسنائپرز تعینات ہوں گے۔

    خیال رہے پاکستان سپرلیگ سیزن فور کا کل سے آغاز ہونے جارہا ہے ،پی ایس ایل 4 کے لاہور میں تین میچز نو، دس اور بارہ مارچ کو ہوں گے جبکہ کراچی میں پانچ میچز سات، دس، تیرہ، پندرہ اور سترہ مارچ کو ہوں گے۔

  • پی ایس ایل 4 : ’ کراچی کو کرکٹ سٹی قرار دیا جائے گا ‘

    پی ایس ایل 4 : ’ کراچی کو کرکٹ سٹی قرار دیا جائے گا ‘

    کراچی: کمشنر کراچی افتخار شلوانی نے کہا ہے کہ پاکستان سپرلیگ کے دوران شہر قائد کو کرکٹ سٹی قرار دیا جائے گا جس کے تحت مختلف علاقوں میں بڑی اسکرینز نصب کی جائیں گی تاکہ شائقین کو بھرپور تفریح‌ فراہم کی جاسکے۔

    تفصیلات کے مطابق کراچی کنگز کے مالک اور اے آو وائی ڈیجیٹل کے سی ای او سلمان اقبال کی سیکریٹری داخلہ سندھ کبیر قاضی اور کمشنر کراچی افتخار شلوانی سے ملاقات ہوئی جس میں پاکستان سپرلیگ کی سیکیورٹی کے حوالے سے تفصیلی بات چیت کی گئی۔

    اے آر وائی ڈیجیٹل کے چیف ایگزیکٹو آفیسر اور کراچی کنگز کے مالک سلمان اقبال کا کہنا تھا کراچی کنگز شہر قائد کی نہیں بلکہ پورے ملک کی فیورٹ ٹیم بن گئی، پی ایس ایل فور میں ٹیم بہترین کھیل کا مظاہرہ کرے گی۔

    اس موقع پر سیکریٹری داخلہ سندھ کبیر قاضی نے یقین دہانی کرائی کہ حکومت غیر ملکی کھلاڑیوں کو فول پروف سیکیورٹی فراہم کرے گی جبکہ کھلاڑیوں کے اعزاز میں وزیر اعلی سندھ استقبالیہ بھی دیں گے۔

    مزید پڑھیں: پی سی بی نے پی ایس ایل کے کمنٹیٹر اور ماہرین کا اعلان کردیا

    کمشنر کراچی افتخار شلوانی کا کہنا تھا کہ ’پی ایس ایل کے دوران کراچی کو کرکٹ سٹی قرار دیا جائے گا، شہر کے مختلف علاقوں میں بڑی اسکرینز لگانے کا انتظام کیا جائے گا‘۔

    دوسری جانب ملٹی نیشنل کمپنی کانٹی نینٹل بسکٹس لمیٹڈ نے کراچی کنگز کے ساتھ معاہدہ طے کیا، جس کے تحت پی ایس ایل فور میں سی بی ایل کا معروف پروڈکٹ ٹک بسکٹ کراچی کنگز کا ٹائی ٹینیئم اسپانسر ہوگا۔

    اس موقع پر کراچی کنگز کے مالک سلمان اقبال کا کہنا تھا کہ ملٹی نیشنل کمپنی کی آمد سے پی ایس ایل ایک بڑا برانڈ بن جائے گا۔

    یاد رہے کہ پی ایس ایل فور کے چوتھے ایڈیشن کا آغاز 14 فروری سے ہوگا جو 17 مارچ تک جاری رہے گا، پاکستان سپر لیگ کے آغاز کا وقت جیسے جیسے قریب آرہا ہے شائقین کا جوش و جذبہ بڑھتا جارہا ہے۔

    یہ بھی پڑھیں: پی ایس ایل فور: پاکستان کرکٹ بورڈ نے آفیشلز کا اعلان کردیا

    پی ایس ایل فور کے میچز کا انعقاد ابو ظبی، شارجہ اور دبئی میں ہوگا جبکہ آخری 8 میچز پاکستان میں کھیلے جائیں گے جن میں 3 میچ لاہور اور 5 میچ کراچی میں ہوں گے۔

    لاہور میں ہونے والے میچز 9، 10 اور 12 مارچ جبکہ 7، 10، 13 اور 15مارچ کو میچز کراچی میں ہوں گے۔ پی ایس ایل فور کا فائنل 17 مارچ کو کراچی کے نیشنل اسٹیڈیم میں کھیلا جائے گا۔

    دوسری جانب سیاسی، شوبز سمیت معروف شخصیات نے کراچی کنگز کے لیے ایونٹ سے قبل نیک خواہشات کا اظہار کیا ہے، کراچی کنگز کی قیادت سیزن فور میں عماد وسیم کریں گے جبکہ امسال صدر کے فرائض کنگ آف سلطان وسیم اکرم انجام دیں گے۔

  • سوئنگ کے سلطان ایک بار پھر سرفراز کے دفاع میں‌ سامنے آگئے

    سوئنگ کے سلطان ایک بار پھر سرفراز کے دفاع میں‌ سامنے آگئے

    کراچی: سابق کپتان اور کراچی کنگز کے صدر وسیم اکرم نے کہا ہے کہ سرفراز احمد کو قیادت سے ہٹانے کا اب کوئی وقت نہیں ہے، سرفراز سے غلطی ہوگئی، پابندی بھی لگ گئی اب پی سی بی صحیح فیصلے کرے۔

    تفصیلات کے مطابق سابق کپتان قومی کرکٹ ٹیم اور کراچی کنگز کے صدر وسیم اکرم نے کہا ہے کہ سیریز ٹو سیریز کپتان نہیں بنایا جاتا ہے، پی سی بی نے سیریز ٹو سیریز کپتان کا پیغام دیا ہے تو میں اس کے خلاف ہوں۔

    وسیم اکرم نے کہا کہ چیئرمین پی سی بی احسان مانی ابھی نئے ہیں انہیں صورت حال سمجھنے میں وقت لگے گا، ہم سے مشورے مانگیں گے تو ضرور دیں گے، اس بار پی ایس ایل سے اچھے کھلاڑی ملیں گے۔

    پی ایس ایل کی 4 فرنچائز کا معروف کمپنی کے پراڈکٹ اسپرائٹ سے معاہدہ

    دوسری جانب پی ایس ایل کی 4 فرنچائز کا معروف کمپنی کے پراڈکٹ اسپرائٹ سے معاہدہ ہوا ہے، کراچی کنگز، اسلام آباد یونائیٹڈ، کوئٹہ گلیڈی ایٹرز، پشاور زلمی کا جوش اسپرائٹ بڑھائے گا، وسیم اکرم نے کہا کہ ملٹی برانڈ کا 4 فرنچائز سے جڑنا ایک بڑا کارنامہ ہے۔

    کرکٹ بورڈ معاملہ لٹکائے نہیں، اعلان کردے کپتان کون ہوگا، ظہیر عباس

    سابق کرکٹر ظہیر عباس نے کہا کہ کرکٹ بورڈ معاملہ لٹکائے نہیں، اعلان کردے کپتان ہوگا، بہتر وقت یہی ہے سرفراز احمد کا بطور کپتان اعلان کردیا جائے۔

    ظہیر عباس نے کہا کہ آئی سی سی نے فیصلہ دیا ہے تو سوچ سمجھ کر ہی دیا ہوگا، سرفراز احمد کو بھی آرام کا موقع مل گیا ہے تاہم سرفراز احمد کپتان ہیں، انہیں سوچ سمجھ کر بولنا چاہئے۔

  • نیشنل اسٹیڈیم کراچی کی چھت نصب کرنے کا کام شروع

    نیشنل اسٹیڈیم کراچی کی چھت نصب کرنے کا کام شروع

    کراچی: پاکستان سپر لیگ سیزن فور کی تیاریاں عروج پر ہیں ، اسی سلسلے میں نیشنل اسٹیڈیم کراچی میں بھی اہم پیش رفت دیکھنے میں آئی ہے۔

    تفصیلات کے مطابق نیشنل اسٹیڈیم جو کہ گزشتہ سال بحالی کے مرحلے سےگزرا تھا اب اسکے دوسرے فیز میں انکلوژر کی چھت لگانے کے لیے غیر ملکی انجینئرز کی ٹیم نے اسٹیڈیم کا تفصیلی دورہ کیا ہے۔

    بتایا جارہاہے کہ ملائیشیا کی ملٹی میڈیا انجینئرنگ نامی کمپنی کے انجینئرز اس کام کو دو مرحلوں میں طے کریں گے، پہلے مرحلے میں جاوید میانداد انکلوژر سے لے کر نسیم الغنی انکلوژر تک کی چھت نصب کی جائے گی۔

    نصب کی جانے والی چھت کی تھری ڈی ڈرائینگ

    دوسرے مرحلے میں حنیف محمد انکلوژر سے لے کر اقبال قاسم انکلوژر تک کی چھت کی تنصیب کی جائے گی۔

    غیر ملکی انجینئرز کی ٹیم چار لاکھ اسکوائر میٹر ٹیفلون فیبرک کی چھت کی تنصیب کا کام ایک سے دو روز میں شروع کرے گی ، غیرملکی انجینئرنگ ٹیم کو میڈیا کوریج سے دور رکھا گیا ہے۔

    یاد رہے کہ پاکستان سپر لیگ سیزن فور کے پانچ میچز سات سے سترہ مارچ تک نیشنل اسٹیڈیم کراچی میں منعقد ہوں گے، شہر قائد اس میگا ایونٹ کے فائنل کی بھی میزبانی کرے گا۔

    گزشتہ سال پی ایس ایل سے قبل نیشنل اسٹیڈیم میں کئی طویل مدتی منصوبے مکمل کیے گئے تھے، جن میں انکلوژرزکی تزئین و آرائش، لفٹ کی تنصیب، سیوریج سسٹم کی بحالی، نشستوں کی مرمت اور تبدیلی شامل ہیں۔