ARYNews.tv | Urdu – Har Lamha Bakhabar

Tag: پی ایس ایل 4

  • ڈیرن سیمی کی مزارِ قائد پر حاضری، قائدِ اعظم کو خراج عقیدت پیش کیا

    ڈیرن سیمی کی مزارِ قائد پر حاضری، قائدِ اعظم کو خراج عقیدت پیش کیا

    کراچی: پشاور زلمی کے کپتان ڈیرن سیمی نے اپنی ٹیم کے چیئرمین جاوید آفریدی کے ہم راہ بانیٔ پاکستان قائدِ اعظم محمد علی جناح کے مزار پر حاضری دی۔

    تفصیلات کے مطابق ڈیرن سیمی نے پشاور زلمی کے چیئرمین جاوید آفریدی کے ہم راہ مزارِ قائد پر حاضری دی، ڈیری سیمی نے قائدِ اعظم کو خراج تحسین پیش کیا۔

    ویسٹ انڈیز کی طرف سے کھیلنے والے بلے باز ڈیرن سیمی نے مزار قائد پر حاضری کے وقت شلوار قمیض پہن رکھی تھی۔

    پشاور زلمی کے کپتان ڈیرن سیمی نے مزار قائد پر پاکستان کا پرچم بھی لہرایا، انھوں نے مزار قائد کے تعمیراتی حسن کی تعریف کرتے ہوئے کہا کہ عظیم قوم پاکستان کے بانی کے مزار پر حاضری ان کے لیے اعزاز کی بات ہے۔

    ڈیرن سیمی نے کہا کہ قائدِ اعظم محمد علی جناح عظیم رہنما تھا، میں قائد اعظم سے متعلق پڑھ چکا ہوں، ان کے ایمان، اتحاد، تنظیم کے پیغام سے دنیا کو بہترین بنایا جا سکتا ہے۔

    پشاور زلمی کے کپتان ڈیرن سیمی نے قائد اعظم کے میوزیم میں رکھی گئی اشیا میں بھی گہری دل چسپی کا اظہار کیا، اور انھوں نے شوق سے یادگار اشیا دیکھیں۔

    دو مرتبہ ٹی ٹوینٹی ورلڈ کپ جیتنے والے کپتان ڈیرن سیمی نے مزار قائد پر سیکورٹی پر مامور جوانوں کے ساتھ بھی تصاویر بھی بنوائیں۔

    یہ بھی پڑھیں:  پی ایس ایل 4 :‌ عثمان شنواری کی شاندار باؤلنگ، گلیڈی ایٹرزکو ایک رن سے شکست

    خیال رہے کہ پشاور زلمی اور کراچی کنگز کے درمیان آج نیشنل اسٹیڈیم میں میچ کھیلا جائے گا۔

  • انٹرنیشنل ٹیمیں پاکستان ضرور آئیں گی، اب کراچی میں پی ایس ایل کے میچزہوتے رہیں گے: مراد علی شاہ

    انٹرنیشنل ٹیمیں پاکستان ضرور آئیں گی، اب کراچی میں پی ایس ایل کے میچزہوتے رہیں گے: مراد علی شاہ

    کراچی: وزیراعلیٰ سندھ مراد علی شاہ نے کہا ہے کہ انشا اللہ انٹرنیشنل ٹیمیں پاکستان ضرور  آئیں گی.

    ان خیالات کا اظہار انھوں نے پی ایس ایل 4 کے نیشنل اسٹیڈیم میں‌ منعقدہ میچ سے متعلق گفتگو کرتے ہوئے کیا.

    [bs-quote quote=”سندھ کے مختلف شہروں میں بھی میچز کا انعقاد ہوگا” style=”style-8″ align=”left” author_name=”مراد علی شاہ”][/bs-quote]

    وزیراعلیٰ سندھ نے کہا کہ کراچی میں اب پی ایس ایل کے میچزہوتے رہیں گے، سندھ کے مختلف شہروں میں بھی میچز کا انعقاد ہوگا.

    وزیراعلیٰ مرا دعلی شاہ نے کہا ملتان، لاہور اور راولپنڈی میں بھی پی ایس ایل کو پھیلانا ہے، کرکٹ دیکھنے جو بھی آئے ٹکٹ ضرورخریدے.

    یاد رہے کہ ایک طویل انتطار کے بعد پی سی ایل کراچی آگیا ہے. آج اسلام آباد یونائیٹڈ اور لاہور قلندرز مدمقابل ہیں.

    سیکیورٹی کی صورت حال

    قبل ازیں‌ آئی سی سی سیکیورٹی کنسلٹنٹس کی ٹیم نیشنل اسٹیڈیم پہنچی،سیکڑ کمانڈربریگیڈیئرشفیق نے سیکیورٹی اقدامات پربریفنگ دی.

    آئی سی سی سیکیورٹی کنسلٹنٹس نے سیکیورٹی اقدامات پراطمینان کا اظہار کیا.

  • پی ایس ایل 4: مصباح کی شاندار بیٹنگ، زلمی کے ہاتھوں‌ قلندرز کو شکست

    پی ایس ایل 4: مصباح کی شاندار بیٹنگ، زلمی کے ہاتھوں‌ قلندرز کو شکست

    ابوظہبی: پاکستان سپرلیگ سیزن فور کے 25ویں میچ میں مصباح الحق کی شاندار بیٹنگ کی بدولت پشاور زلمی نے لاہور قلندرز کو 6 وکٹوں سے شکست دے کر فتح اپنے نام کرلی۔

    تفصیلات کے مطابق پاکستان سپرلیگ کا 25 واں میچ ابوظہبی کے شیخ زاہد اسٹیڈیم میں پشاور زلمی اور لاہور قلندرز کی ٹیموں کے مابین کھیلا گیا۔

    پشاور زلمی کے کپتان ڈیرن سیمی نے ٹاس جیت کرپہلے فیلڈنگ کا فیصلہ کرتے ہوئے لاہور قلندرز کو بیٹنگ کی دعوت دی۔ لاہور قلندرز نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 124 رنز اسکور کیے۔

    ہدف کے تعاقب میں پشاور زلمی کو ابتدا سے ہی مشکلات کا سامنا کرنا پڑا، امام الحق 6 کے مجموعی اسکور پر پویلین روانہ ہوئے، بعد ازاں کامران اکمل 8، عمر امین اور ڈاؤسن 12 کے مجموعی اسکور پر پویلین لوٹ گئے تھے۔

    کیورن پولارڈ بھی 8 رنز اضافے کے بعد 20 کے مجموعی اسکور پر کلین بولڈ ہوئے، بعد ازاں کپتان ڈیرن سیمی اور مصباح الحق نے محتاط انداز میں بیٹنگ کرتے ہوئے شراکت داری قائم کی اور اپنی ٹیم کو فتح کے قریب لے گئے۔

    پشاور زلمی کے کھلاڑیوں اور ٹیم مینیجمنٹ نے مصباح الحق کی واپسی پر سلیوٹ مار کر اُن کا استقبال کیا۔

    پشاور زلمی کے کپتان ڈیرن سیمی آخری اوور میں نصف سنچری سے چار قدم دور آؤٹ ہوئے جبکہ مصباح الحق نے 55 گیندوں کا سامنا کرتے ہوئے 2 چھکوں اور 4 چوکوں کی مدد سے 59 رنز کی ناقابل شکست اننگز کھیلی۔

    زلمی کی جانب سے مصباح 59 ، کپتان سیمی 46 کے ساتھ نمایاں بلے باز جبکہ شاہین شاہ آفریدی 3 وکٹیں لے کر نمایاں گیند باز رہے۔

    قبل ازیں پشاور زلمی کی دعوت پر لاہور قلندرز نے بیٹنگ کا آغاز کیا تو حارث سہیل کے علاوہ کوئی بھی کھلاڑی خاطر خواہ کارکردگی نہ دکھا سکھا، زمان الیون کی پہلی وکٹ 12 ،  دوسری 18،  تیسری 36،  چوتھی 54، پانچویں 86، چھٹی 99 اور ساتویں 108 کے مجموعی اسکور پر گری۔

    قلندرز کی جانب سے حارث سہیل 43 ڈی ویسی 26 اور عمیر مسعود 22 بنا کر نمایاں بلے باز رہے جبکہ پشاور زلمی کے ٹائمل ملز نے3 ، ثمین گل نے 2 ، وہاب ریاض اور ڈاؤسن نے ایک ایک وکٹ حاصل کی۔

    پوائنٹس ٹیبل پر پشاور زلمی 10 پوائنٹس کے ساتھ دوسرے نمبر پر ہےجبکہ لاہور کی ٹیم 6 پوائنٹس کے ساتھ پانچویں پوزیشن پر ہے۔

    پشاور زلمی نے پلیئنگ الیون میں 2 تبدیلیاں جبکہ لاہور قلندرز نے 5 کھلاڑی تبدیل کیے ہیں۔

  • پی ایس ایل 4: واٹسن کا لاٹھی چارج، گلیڈی ایٹرز کی ایک اور فتح، پلے آف مرحلے تک رسائی

    پی ایس ایل 4: واٹسن کا لاٹھی چارج، گلیڈی ایٹرز کی ایک اور فتح، پلے آف مرحلے تک رسائی

    ابوظہبی: پاکستان سپرلیگ کے 23ویں میچ میں کوئٹہ گلیڈی ایٹرز نے پشاور زلمی کو شکست دے کر ایک اور فتح اپنے نام کرلی، واٹسن اور احمد شہزاد نے نصف سنچریاں اسکور کیں۔

    تفصیلات کے مطابق پاکستان سپرلیگ سیزن 4 کا چوتھا مرحلہ ابوظہبی میں شروع ہوگیا، جس کے تحت گلیڈی ایٹرز اور پشاور زلمی کی ٹیمیں مدمقابل تھیں۔  گلیڈی ایٹرز کے کپتان سرفراز احمد نے ٹاس جیت کر زلمی کو پہلے بیٹنگ کی دعوت دی، سیمی الیون نے پہلے بیٹنگ کرتے ہوئے مخالف ٹیم کو 166 رنز کا ہدف دیا جسے سرفراز الیون نے 2 وکٹوں نقصان پر باآسانی حاصل کیا اور 8 وکٹوں سے فتح اپنے نام کی۔

    گلیڈی ایٹرز کی جانب سے شین واٹسن نے 55 گیندوں پر 6 چوکوں اور 6 چھکوں کی مدد سے 91 رنز کی ناقابل شکست اننگز کھیلی جبکہ احمد شہزاد نے 45 گیندوں پر پی ایس ایل کی پہلی نصف سنچری اسکور کی۔

    کوئٹہ گلیڈی ایٹرز کی ٹیم نے اسکور برابر کیا تو وہاب ریاض نے نو بال کرا کے سرفراز الیون کو جیت دلوا دی۔

    شین واٹسن کو عمدہ کارکردگی دکھانے پر مین آف دی میچ کا ایوارڈ دیا گیا۔

    پشاور زلمی اننگز

    زلمی کو اوپنگ آغاز اچھا ملا اور کامران اکمل نے بہترین بلے بازی کا مظاہرہ کیا، اے ڈی ایس فلیچر محمد نواز کی گیند پر 26 کے انفرادی جبکہ 58 کے مجموعی اسکور پر کلین بولڈ ہوکر پویلین روانہ ہوئے، امام الحق 13 رنز بنا کر فواد احمد کی گیند پر کیچ آؤٹ ہوئے۔

    کامران اکمل نے 50 گیندوں کا سامنا کرتے ہوئے 4 چھکوں اور 7 چوکوں کی مدد سے 72 رنز کی اننگز کھیلی جبکہ کپتان ڈیرن سیمی 3 رنز بنا کر آؤٹ ہوئے۔ پشاور زلمی نے مقررہ 20 اوورز میں 4 وکٹوں کے نقصان پر 165 رنز اسکور کیے۔

    کوئٹہ گلیڈی ایٹرز اننگز

    ہدف کے تعاقب میں کوئٹہ گلیڈی ایٹرز کی جانب سے بیٹنگ کا آغاز واٹس سن اور احسن علی نے کیا، 8 رن کے مجموعی اسکور پر سرفراز الیون کی پہلی وکٹ گری تاہم احمد شہزاد نے واٹس کے ساتھ مل کر ذمہ دارانہ بیٹنگ کی۔

    احمد شہزاد چوالیس گیندوں پر 50 رنز بناکر عمید آصف کی گیند پر کلین بولڈ ہو کر پویلین روانہ ہوئے، انہوں نے 45 گیندوں پر پانچ چوکوں کی مدد سے نصف سنچری اسکور کی یوں گلیڈی ایٹرز کی دوسری وکٹ 137 رنز پر گری۔

    اسکواڈ

    پشاور زلمی

    ڈیرن سیمی پشاور زلمی کے کپتان ہیں، دیگر کھلاڑیوں میں کامران اکمل، امام الحق، عمر امین، اینڈرے فلیچر، کیرون پولارڈ، ڈاسن، حسن علی، ابتشام شیخ، عمید آصف،  اور وہاب ریاض شامل ہیں۔

    کوئٹہ گلیڈی ایٹرز

    سرفراز احمد کپتان ہیں، دیگر کھلاڑیوں میں احمد شہزاد، احسن علی، شین واٹسن، روسو، کامران اکمل، ڈیوائن براوو، محمد نواز، سہیل تنویر، محمد حسنین اور فواد احمد شامل ہیں۔

    میچ سمری

    پی ایس ایل کے ابتدائی تین مراحل میں کھلاڑیوں نے دبئی اور ابوظہبی میں زبردست کھیل کا مظاہرہ کیا، کھلاڑیوں نے میچ جیتنے کے لیے خوب محنت کی، باؤلرز وکٹیں اڑانے کو تیار تھے، تمام ٹیموں کے کپتان اور کھلاڑی ٹرافی حاصل کرنے کے لیے پرعزم ہیں۔

    مزید پڑھیں: پی ایس ایل 4: کراچی شہر کو دلہن کی طرح سجا دیا گیا، ہیلتھ ایکشن پلان بھی تیار

    خیال رہے کہ کراچی کنگز کے کولن انگرام نے سیزن فور کی پہلی سنچری بنائی اور ساتھ ہی 127 رنز بنا کر سب سے بڑی انفرادی اننگز کھیل کر میچ کے بہترین کھلاڑی قرار پائے۔

    کراچی کنگز کے ہی بابر اعظم اور لیونگسٹن نے 157 رنز بنا کر پی ایس ایل کی سب سے بڑی شراکت قائم کی جسے ابھی تک کوئی برابر نہیں کرسکا۔

  • پاکستان سپرلیگ کا چوتھا مرحلہ آج سے ابوظہبی میں شروع ہوگا

    پاکستان سپرلیگ کا چوتھا مرحلہ آج سے ابوظہبی میں شروع ہوگا

    ابوظہبی: پاکستان سپرلیگ کا چوتھا مرحلہ آج سے ابوظہبی میں شروع ہوگا۔ کوئٹہ گلیڈی ایٹرز اور پشاورزلمی جبکہ کراچی کنگز اور ملتان سلطانز مدمقابل ہوں گے۔

    تفصیلات کے مطابق پاکستان سپر لیگ کے سیزن فور کا چوتھا مرحلہ آج سے اماراتی دارالحکومت ابوظہبی میں شروع ہوگا، کوئٹہ گلیڈی ایٹرز کا ٹاکرا پشاور زلمی سے ہوگا جبکہ کراچی کنگز اور ملتان سلطان مدمقابل آئیں گے۔

    پی ایس ایل کے پہلے سے تیسرے مرحلے تک کھلاڑیوں نے دبئی میں دکھایا جوش اب سجے گا میدان ابوظہبی کا جہاں چھکے اور چوکوں کی برسات ہوگی۔

    کھلاڑیوں نے میچ جیتنے کے لیے خوب محنت کی، بالرز  وکٹیں اڑانے کو تیار کھڑے ہیں، ٹیم کے کپتان بھی میچ میں فتح یابی کے لیے پرعزم ہیں۔

    کل کھیلے جانے والے مقابلوں میں پہلا ٹاکرا کوئٹہ گلیڈی ایٹرز اور پشاور زلمی کے درمیان ہوگا جبکہ دوسرے میچ میں کراچی کنگز اور ملتان سلطانز پنجا آزمائی کریں گے۔

    خیال رہے کہ کراچی کنگز کے کولن انگرام نے سیزن فور کی پہلی سنچری بنائی اور ساتھ ہی 127 رنز بنا کر سب سے بڑی انفرادی اننگز کھیل کر میچ کے بہترین کھلاڑی قرار پائے۔

    کراچی کنگز کے بابر اعظم اور لیونگسٹن نے 157 رنز بنا کر پی ایس ایل کی سب سے بڑی شراکت قائم کررکھی ہے۔

    پی ایس ایل سیزن فور کا تیسرا مرحلہ مکمل، کھلاڑیوں کی شاندار پرفارمنس

    اسلام آباد یونائیٹڈ کے کپتان محمد سمیع نے پی ایس ایل سیزن فور کی پہلی ہیٹ ٹرک کی اور ٹیم کی جیت میں اہم کردار ادا کیا۔

    پشاور زلمی کے کیرون پولارڈ نے بلند و بالا چھکے لگا کر نصف سنچری اسکور کی، زلمی کے فاسٹ بولر حسن علی 18 وکٹیں حاصل کرکے سب سے آگے ہیں۔

    ملتان سلطانز کی ٹیم ایونٹ میں صرف 2 دومیچز ہی جیت سکی ہے تاہم کپتان شعیب ملک 240 رنز بنا کر سرفہرست ہیں۔

  • پی ایس ایل 4: کراچی شہر کو دلہن کی طرح سجا دیا گیا، ہیلتھ ایکشن پلان بھی تیار

    پی ایس ایل 4: کراچی شہر کو دلہن کی طرح سجا دیا گیا، ہیلتھ ایکشن پلان بھی تیار

    کراچی: پاکستان میں پی ایس ایل کے آٹھوں میچز کی کراچی منتقلی کے بعد کراچی کو دلہن کی طرح سجا دیا گیا ہے، کراچی پی ایس ایل فور کی میزبانی کرے گا۔

    تفصیلات کے مطابق شہریوں کی بڑی تعداد شارع فیصل اور اسٹیڈیم کے اطراف جمع ہو رہی ہے، شایقین کرکٹ کا کہنا ہے کہ وہ کھلاڑیوں کو بھرپور طریقے سے خوش آمدید کہنے کے لیے تیار ہیں۔

    [bs-quote quote=”نیشنل اسٹیڈیم میں 8 بستروں پر مشتمل عارضی اسپتال بھی قائم کیا جا رہا ہے۔” style=”style-8″ align=”left”][/bs-quote]

    شائقین کرکٹ کا کہنا ہے کہ شہر کی سجاوٹ دیکھ کر دل خوش ہو گیا ہے۔ دوسری طرف شہری پی ایس ایل میں شامل کھلاڑیوں کی تصاویر کے ساتھ تصویریں بنانے میں بھی مصروف نظر آئے۔

    ادھر پاکستان سپر لیگ میچز کے لیے محکمہ صحت سندھ نے بھی ایکشن پلان تیار کر لیا ہے، ڈاکٹر عارف نیاز اور ڈاکٹر ظفر مہدی کو فوکل پرسن تعینات کر دیا گیا ہے۔

    آغا خان، لیاقت نیشنل، جناح، سول، عباسی شہید، بے نظیر ٹراما سینٹر کو الرٹ رہنے کی ہدایت جاری کر دی گئی، نیشنل اسٹیڈیم میں 8 بستروں پر مشتمل عارضی اسپتال بھی قائم کیا جا رہا ہے۔

    رپورٹس کے مطابق ایمبولینس سروسز بھی ہائی الرٹ ہوں گی، ایدھی، چھیپا، امن فاؤنڈیشن اور اسپتالوں کی 60 ایمبولینسز کا قافلہ بھی ٹیموں کے ساتھ رہے گا۔

    یہ بھی پڑھیں:  کراچی پولیس کرکٹ میچوں کی میزبانی کے لیے تیار ہے: ڈاکٹر امیر شیخ

    80 ڈاکٹرز اور نیم طبی عملے کے افراد تعینات ہوں گے، ہوٹلوں میں میڈیکل ٹیمیں بھی تعینات ہوں گی، جناح، سول، عباسی شہید اور بے نظیر ٹراما سینٹر میں ادویات کی دستیابی کو یقینی بنانے کی ہدایت جاری کر دی گئی ہے۔

    خیال رہے کہ کراچی پولیس بھی میچز کے سلسلے میں سیکورٹی پلان بنا چکی ہے، اے آئی جی امیر شیخ نے کہا کہ کراچی پولیس کرکٹ میچوں کی میزبانی کے لیے پوری طرح تیار ہے۔

  • پاکستان سپر لیگ کی ٹیموں کی کراچی آمد سے متعلق شیڈول جاری

    پاکستان سپر لیگ کی ٹیموں کی کراچی آمد سے متعلق شیڈول جاری

    کراچی: پاکستان سپر لیگ سیزن فور کی ٹیموں کی کراچی آمد سے متعلق شیڈول جاری کردیا گیا۔

    تفصیلات کے مطابق پی ایس ایل سیزن فور کی ٹیموں کی کراچی آمد سے متعلق شیڈول جاری کردیا گیا ہے جس کے مطابق کراچی کنگز کی ٹیم 6 مارچ کو ای کے 606 کے ذریعے کراچی پہنچے گی۔

    [bs-quote quote=”لاہور کے ٹکٹس ریفنڈ کردئیے جائیں گے” style=”style-8″ align=”left” author_name=”پی سی بی”][/bs-quote]

    پشاور زلمی کی ٹیم بھی 6 مارچ کو ای کے 604 کے ذریعے دبئی سے کراچی پہنچے گی، کوئٹہ گلیڈی ایٹرز کی ٹیم 9 مارچ کو ای کے 602 کے ذریعے کراچی پہنچے گی۔

    پی ایس ایل کی تمام ٹیموں کو اولڈ ٹرمینل سے ہوٹل سخت سیکیورٹی میں لے جایا جائے گا۔

    دوسری جانب پی سی بی کا کہنا ہے کہ لاہور کے ٹکٹس ریفنڈ کردئیے جائیں گے، کراچی کے نئے ٹکٹس کی معلومات بھی فراہم کردی جائیں گی۔

    مزید پڑھیں: پی ایس ایل کے لاہورمیں شیڈول تمام میچزکراچی منتقل

    واضح رہے کہ پی ایس ایل کے پاکستان میں ہونے والے تمام میچز لاہور سے کراچی منتقل کردئیے گئے ہیں، 9 ماچ کو کراچی میں لاہور قلندرز اور اسلام آباد یونائیٹڈ کا میچ ہوگا۔

    دس مارچ کو کراچی کنگز اور کوئٹہ گلیڈی ایٹرز کی ٹیمیں مدمقابل آئیں گی، 11 مارچ کو نیشنل اسٹیڈیم کراچی میں 2 میچز کھیلے جائیں گے، لاہور قلندرز اور ملتان سلطانز کا میچ دوپہر 2 بجے شروع ہوگا جبکہ کراچی کنگز اور پشاور زلمی شام 7 بجے مدمقابل ہوں گی۔

    پی ایس ایل سیزن فور کا کوالیفائر 13 مارچ کو کراچی میں ہوگا، 14 مارچ کو پہلا ایلیمنیٹر، 15 مارچ کو دوسرا ایلیمنیٹر کھیلا جائے گا، فائنل میچ 17 مارچ کو نیشنل اسٹیڈیم کراچی میں کھیلا جائے گا۔

  • سب مل کر پی ایس ایل 4 کو کامیاب بنائیں گے، وزیر اعلیٰ سندھ

    سب مل کر پی ایس ایل 4 کو کامیاب بنائیں گے، وزیر اعلیٰ سندھ

    کراچی : وزیر اعلیٰ سندھ سید مراد علی شاہ نے پی ایس ایل 4 کی کراچی منتقلی سے متعلق کہا ہے کہ دو سال قبل ایک میچ مانگا تھا اب تو سارے میچز کراچی آرہے ہیں، سب مل کر پی ایس ایل کو کامیاب بنائیں گے۔

    تفصیلات کے مطابق پاکستان سپر لیگ سیزن فور کے لاہور میں شیڈول میچز اچانک کراچی منتقل کرکے نیا شیڈول جاری کیا گیا ہے، پی ایس ایل 4 فائنل سمیت آٹھ میچز کراچی کے نیشنل اسٹیڈیم میں کھیلیں جائیں گے۔

    وزیر اعلیٰ سندھ نے میڈیا سے گفتگو کرتے ہوئے کہا ہے کہ سب مل کر پاکستان سپر لیگ 4 کو کامیاب بنائیں گے۔

    ذرائع کا کہنا ہے کہ پی ایس ایل سیزن 4 کے لاہور میں شیڈول میچز پاک بھارت کیشدگی کے بعد سیکیورٹی وجوہات کی بناء پر کراچی منتقل کیے گئے ہیں۔

    واضح رہے کہ ایونٹ کے شیڈول میں بھی تبدیلی کی گئی ہے جس کے بعد 7 مارچ سے شروع ہونے والے میچز اب 9 سے 17مارچ تک ہوں گے۔

    کراچی کنگزکا پشاورزلمی کے ساتھ نیشنل اسٹیڈیم میں پہلا میچ 7مارچ کی بجائے 10مارچ کوہوگا، 11مارچ کو کراچی کنگزاورکوئٹہ گلیڈی ایٹرزکا میچ ہوگا۔

    پاکستان سپرلیگ فور کے نیشنل اسٹیڈیم میں ہونے والے تمام میچزشام میں کھیلے جائیں گے۔

    پاکستان میں پی ایس ایل کے میچز شیڈول کے مطابق ہوں گے، چیئرمین پی سی بی

    یاد رہے کہ 28 فروری کو چیئرمین پاکستان کرکٹ بورڈ احسان مانی کا کہنا تھا کہ پی ایس ایل کے میچز شیڈول کے مطابق پاکستان میں ہوں گے اور کسی بھی کھلاڑی نے پاکستان آنے سے انکار نہیں کیا۔

    چیئرمین پی سی بی احسان مانی کا کہنا تھا کہ تمام ٹیمیں پاکستان میں میچز کھیلنے کی حمایت کررہی ہیں، پی ایس ایل کے تمام کھلاڑی پاکستان میں کھیلنے کو تیار ہیں۔

    واضح رہے کہ پی ایس ایل فور کے فائنل سمیت 8 میچز پاکستان میں کھیلیں جائیں گے جن میں سے 3 لاہور اور فائنل سمیت 5 میچز کی میزبانی کراچی کے نیشنل اسٹیڈیم کو دی گئی تھی۔

  • پی ایس ایل 4 : دوسرا مرحلہ مکمل، کوئٹہ گلیڈی ایٹرز کی سرفرازی، کراچی کنگز کا شاندار کم بیک

    پی ایس ایل 4 : دوسرا مرحلہ مکمل، کوئٹہ گلیڈی ایٹرز کی سرفرازی، کراچی کنگز کا شاندار کم بیک

    ابوظہبی : پاکستان سپرلیگ کے چوتھے سیزن کا دوسرا مرحلہ مکمل ہوگیا، پوائنٹس ٹیبل پر کوئٹہ گلیڈی ایٹرز پہلے نمبر پر ہے جبکہ کراچی کنگز نے ایونٹ میں شاندار کم بیک کیا۔

    تفصیلات کے مطابق چودہ فروری سے شروع ہونے والے پی ایس ایل فور کے دوسرے مرحلے میں شائقین کو عمدہ اور سنسنی خیز مقابلے دیکھنے کو ملے۔

    ابوظہبی میں کھیلے جانے والے میچز میں کھلاڑیوں کی شاندار پرفارمنس نے ایونٹ کو مزید پرجوش بنایا، تمام ٹیموں کے کھلاڑیوں نے شاندار فیلڈنگ کرتے ہوئے ناقابلِ یقین کیچز پکڑے۔

    مزید پڑھیں: پی ایس ایل 4: پہلا مرحلہ مکمل، گلیڈی ایٹرز سرفہرست، نئے باؤلرز کا جادو چل گیا

    کراچی کنگز کے بلے باز کولن انگرام نےایک روز قبل کھیلے جانے والے میچ میں شاندار بیٹنگ کرتے ہوئے پی ایس ایل کی تاریخی اننگز کھیلی اور تیز ترین سنچری اسکور کرکے ٹیم کو شاندار کم بیک کروای۔

    دوسرے مرحلے میں اے بی ڈی ویلیئرز اور پولارڈ نے بھی شاندار چھکے مارے جبکہ ابوظہبی کے انٹرنیشنل اسٹیڈیم میں کھیلے جانے والے میچ میں سرفراز نے اننگز کی آخری گیند پر شاندار چھکا لگا کر اختتام کیا۔

    یہ بھی پڑھیں: کولن انگرم کی سنچری، کراچی کنگز نے کوئٹہ گلیڈی ایٹرز کی فتح‌ کو بریک لگادیا

    تمام ٹیموں کے کھلاڑی ابوظہبی سے دبئی روانہ ہوگئے جہاں وہ ایک روز آرام کریں گے اور پھر کل یعنی 26 فروری سے ایونٹ کا دوبارہ آغاز ہوگا۔

    پوائنٹس ٹیبل پر کوئٹہ گلیڈی ایٹرز 8 پوائنٹس کے ساتھ سرفہرست ہے جبکہ پشاور زلمی اور اسلام آباد یونائیٹڈ 6 ، 6 پوائنٹس کے ساتھ بالترتیب دوسری اور تیسری پوزیشن پر لاہور قلندرز اور کراچی کنگز چار پوائنٹس کے ساتھ چوتھی اور پانچویں جبکہ ملتان سلطانز چھٹی پوزیشن پر ہے۔

  • کولن انگرم کی سنچری، کراچی کنگز نے کوئٹہ گلیڈی ایٹرز کی فتح‌ کو بریک لگادیا

    کولن انگرم کی سنچری، کراچی کنگز نے کوئٹہ گلیڈی ایٹرز کی فتح‌ کو بریک لگادیا

    شارجہ: پی ایس ایل سیزن فور کے 15ویں میچ میں کولن انگرم کی شاندار سنچری کی بدولت کراچی کنگز نے کوئٹہ گلیڈی ایٹرز کو سنسنی خیز مقابلے کے بعد 6 وکٹوں سے شکست دے دی۔

    تفصیلات کے مطابق شارجہ میں کھیلے جانے والے میچ میں کوئٹہ گلیڈی ایٹرز نے کراچی کنگز کو جیت کے لیے 187 رنز کا ہدف دیا جسے کراچی کنگز نے 18.4 اوورز میں انگرم کی شاندار سنچری کی بدولت  4 وکٹوں کے نقصان پر حاصل کرلیا۔

    انگرم نے 54 گیندوں پر شاندار 127 رنز کی ناقابل شکست اننگز کھیلی، ان کی اننگز میں 8 چھکے اور 12 چوکے شامل تھے، انگرم پی ایس ایل میں سب سے زیادہ انفرادی اسکور بنانے والے کھلاڑی بن گئے۔

    بابر اعظم بغیر کوئی رن بنائے سہیل تنویر کی گیند پر کیچ آؤٹ ہوئے، کولن منرو کو تین رنز پر محمد نواز نے آؤٹ کیا، لیونگ اسٹون نے 18 جبکہ اویس ضیا نے 19 رنز بنائے۔

    وکٹ کیپر بلے باز بین ڈنک 9 بالز پر 15 رنز بنا کر ناٹ آؤٹ رہے۔

    گلیڈی ایٹرز کے سہیل تنویر نے دو وکٹیں حاصل کیں جبکہ محمد نواز اور فواد احمد کے حصے میں ایک، ایک وکٹ آئی۔

    قبل ازیں شارجہ میں کھیلے جانے والے میچ میں کوئٹہ گلیڈی ایٹرز نے مقررہ اوورز میں 5 وکٹوں کے نقصان پر 186 رنز بنائے اور کراچی کنگز کو جیت کے لیے 187 رنز کا ہدف دے دیا۔

    عمر اکمل نے 55 رنز بنا کر عامر یامین کی گیند پر کیچ آؤٹ ہوئے، روسو 44 رنز کی برق رفتار اننگز کھیل کر عامر یامین کی گیند پر بولڈ ہوئے، احسن علی 7 رنز بنا کر پویلین لوٹ گئے۔

    شین واٹسن نے 25 رنز کی اننگز کھیلی انہیں عمر خان نے آؤٹ کیا، ڈیون اسمتھ 9 رنز بنا کر محمد عامر کی گیند پر آؤٹ ہوئے، انور علی تین گیندوں پر تین چھکے لگائے اور 27 رنز کی ناقابل شکست بنائے۔

    کراچی کنگز کے عامر یامین نے تین وکٹیں حاصل لیں جبکہ عمر خان اور محمد عامر کے حصے میں ایک وکٹ حاصل کی۔

    قبل ازیں شارجہ میں کھیلے جانے والے میچ میں عماد وسیم نے ٹاس جیت کر کوئٹہ گلیڈی ایٹرز کو بیٹنگ کی دعوت دی ہے، کراچی کنگز کی ٹیم میں ایک تبدیلی کی گئی ہے عثمان شنواری کی جگہ سہیل خان کو اسکواڈ کا حصہ بنایا گیا ہے۔

    کراچی کنگز اسکواڈ

    کراچی کنگز کی قیادت عماد وسیم کررہے ہیں دیگر کھلاڑیوں میں بابر اعظم، کولن منرو، اویس ضیا، کولن انگرام، لیام لیونگ اٹون، بین ڈنک، عامر یامین، محمد عامر، سہیل خان، عمر خان

    کوئٹہ گلیڈی ایٹر اسکواڈ

    گلیڈی ایٹرز کی قیادت سرفراز احمد کررہے ہیں، دیگر کھلاڑیوں میں شین واٹسن، احسن علی، روسو، عمر اکمل، ڈیون اسمتھ، محمد نواز، انور علی، سہیل تنویر، غلام مدثر، فواد احمد شامل ہیں۔

    کوئٹہ گلیڈی ایٹرز کی ٹیم نے 4 میچ جیت کر 8 پوائنٹس حاصل کیے ہیں جبکہ کراچی کنگز صرف ایک میچ جیت سکی ہے اور اس کے دو پوائنٹس ہیں۔

    اب سے کچھ دیر قبل کھیلے گئے میچ میں پشاور زلمی نے ملتان سلطانز کو 5 وکٹوں سے شکست دی تھی، امام الحق نے شاندار 52 رنز کی اننگز کھیلی تھی۔