ARYNews.tv | Urdu – Har Lamha Bakhabar

Tag: پی ایس ایل 6

  • ابوظہبی میں پی ایس ایل 6 کے بقیہ میچزکا انعقاد، وزیراطلاعات سندھ کا نیک خواہشات کا اظہار

    ابوظہبی میں پی ایس ایل 6 کے بقیہ میچزکا انعقاد، وزیراطلاعات سندھ کا نیک خواہشات کا اظہار

    کراچی : وزیراطلاعات سندھ ناصر حسین شاہ نے پی ایس ایل 6 کے بقیہ میچز کے انعقاد میں تمام رکاوٹیں دور ہونے پر انتظامیہ کیلئے نیک خواہشات کا اظہار کیا۔

    تفصیلات کے مطابق وزیراطلاعات سندھ ناصر حسین شاہ نے سماجی رابطے کی ویب سائٹ ٹوئٹر پر اپنے پیغام میں کہا کہ ابوظہبی میں پی ایس ایل 6کے بقیہ میچز کے انعقاد میں تمام رکاوٹیں دور ہوگئیں، انشاء اللہ اگلے 5 دن میں لیگ شروع ہوگی ، پی ایس ایل انتظامیہ کیلئے نیک خواہشات ہیں۔

    اس سے قبل ایک ٹوئٹ میں ناصر حسین شاہ کا کہنا تھا کہ پاکستان کی عزت ہم سب کی عزت ہے، پی ایس ایل 2021کےابوظہبی میں انعقاد میں دشواری ہے تو مدد کیلئے تیار ہوں، میں اعلیٰ حکام سے بات کرنے کیلئے تیار ہوں، اگر وہ چاہتے ہیں توپی سی بی مجھ سے فوری رابطہ کرے۔

    خیال رہے ذرائع کا کہنا ہے کہ پی ایس ایل 6 کے بقیہ میچز 9جون سے شروع ہوں گے اور پی ایس ایل کا فائنل 24 جون کو کھیلا جائے گا۔

  • پی ایس ایل 6 کے کمنٹری پینل میں کون کون شامل ہے؟

    پی ایس ایل 6 کے کمنٹری پینل میں کون کون شامل ہے؟

    لاہور: پاکستان سپر لیگ (پی ایس ایل) کے سیزن 6 کے لیے کمنٹری پینل تیار کر لیا گیا۔

    تفصیلات کے مطابق پی ایس ایل 6 کے بقیہ میچز کے لیے 10 رکنی کمنٹری پینل منتخب کر لیا گیا ہے، ذرائع کا کہنا ہے کہ پینل میں 9 کمنٹیٹرز اور ایک پریزینٹر شامل ہے۔

    ذرائع کے مطابق سابق انگلش کپتان اور مشہور کمنٹیٹر ڈیوڈ گاور بھی پینل میں شامل کیے گئے ہیں، اس پینل میں پاکستان سے رمیز راجہ، بازید خان، ثنا میر، عروج ممتاز، طارق سعید اور سکندر بخت کو بھی شامل کیا گیا ہے۔

    جنوبی افریقا کے سابق ٹیسٹ کرکٹر جے پی ڈومنی بھی کمنٹری پینل میں شامل ہیں، زمبابوے کے پومی بنگوا بھی پینل کا حصہ ہوں گے، جب کہ زینب عباس کو بطور پریزینٹر کمنٹری پینل میں شامل کیا گیا ہے۔

    ذرائع کا کہنا ہے کہ پی ایس ایل میچز میں پہلی بار یو اے ای سے اردو کمنٹری بھی ہوگی۔

    واضح رہے کہ پی ایس ایل 6 کے بقیہ میچز کے لیے کھلاڑیوں کی ابوظبی روانگی ایک دن آگے بڑھا دی گئی ہے، ذرائع کا کہنا تھا کہ کچھ کھلاڑیوں اور آفیشلز کو ویزوں کے اجرا میں تاخیر ہوئی، جس کی وجہ سے تمام کھلاڑی اور آفیشلز مائیکرو سیکیور ببل میں ایک دن مزید رہیں گے۔

    اب تمام کھلاڑیوں اور آفیشلز کی ویزا کنفرمیشن کے بعد ہی روانگی ممکن ہوگی، پاکستان میں موجود کھلاڑی اور آفیشلز اب جمعرات کو ابوظبی روانہ ہوں گے۔

    سیزن 6 میں شرکت کے لیے بھارت سے ابوظبی سفر کرنے والے تمام 25 افراد کو ویزے جاری کر دیے گئے ہیں، جن میں جنوبی افریقا سے تعلق رکھنے والے کھلاڑیوں اور اسپورٹ اسٹاف شامل ہے۔

  • پی ایس ایل 6 : مزید 3 کھلاڑی کورونا کا شکار

    پی ایس ایل 6 : مزید 3 کھلاڑی کورونا کا شکار

    کراچی : پی ایس ایل 6 میں 2 ٹیموں کے مزید 3 کھلاڑی کورونا کا شکار ہوگئے ، علامات ظاہر ہونے پر گزشتہ روز دوپہر میں کورونا ٹیسٹ کروائے گئے تھے۔

    تفصیلات کے مطابق پاکستان سُپر لیگ (پی ایس ایل) کے سیزن 6 میں 2 ٹیموں کے مزید 3 کھلاڑیوں کے کورونا ٹیسٹ مثبت نکل آئے،پی سی بی کا کہنا ہے کہ تینوں کھلاڑی 10 روز تک آئسولیشن میں رہیں گے، متاثرہ کھلاڑیوں نے بدھ کے روز منعقدہ میچز میں شرکت نہیں کی، علامات ظاہر ہونے پرگزشتہ روز دوپہر میں کورونا ٹیسٹ کروائے گئے تھے۔

    پی ایس ایل6 کی آرگنائزنگ کمیٹی آج ورچوئل میٹنگ کاانعقادکرےگی ، جس میں تمام ٹیموں کے مالکان اورمینجمنٹ شرکت کرے گی۔

    اس سے قبل پی ایس ایل 6 میں تین کھلاڑیوں اور ایک آفیشل میں کورونا کی تصدیق ہوئی تھی ، جس میں اسلام آباد یونائیٹڈ کے فواد احمد اور لوئس گریگری اور کوئٹہ گلیڈی ایٹرز کے ٹام بینٹن شامل تھے۔

    کورونا مثبت آنے کے بعد تینوں کھلاڑیوں اور فیلڈنگ کوچ کامران خان کو دس دن کے لیے فوری طور پر قرنطینہ کردیا گیا تھا

    یاد رہے اسلام آباد یونائیٹڈ کے آسٹریلوی اسپنر فواد احمد کورونا وائرس میں مبتلا ہوئے تھے جس کے بعد اسلام آباد یونائیٹڈ اور کوئٹہ گلیڈی ایٹرز کا میچ ایک روز کے لیے ملتوی کردیا گیا تھا۔

    خیال رہے پاکستان کرکٹ بورڈ نے پی ایس ایل سکس میں شامل کھلاڑیوں اور آفیشلز کو کورونا ویکسین لگوانے کی پیشکش کی ، ویکسین آج لگائی جائے گی۔

    کھلاڑیوں اور آفیشلز کو ویکسین لگوانے یا نہ لگوانے کے فیصلے کا اختیار ہوگا، چیف ایگزیکٹیو پی سی بی وسیم خان نے کہا کہ پی سی بی ، کھلاڑیوں اور آفیشلز کی صحت کو بہت سنجیدگی سے لیتا، اسی لئے بائیو سیکیور ببل میں موجود تمام افراد کو ویکسین لگوانے کی پیشکش کی۔

    واضح رہے پاکستان سپرلیگ میں آج اسلام آبادیونائیٹڈاورلاہورقلندرزکےدرمیان میچ کھیلاجائےگا، یہ میچ کراچی نیشنل اسٹیڈیم میں شام سات بجے شروع ہوگا، دونوں ٹیمیں پوائنٹس ٹیبل پرٹاپ پوزیشن حاصل کرنے کے لئے آج ایکشن میں دکھائی دیں گے۔

  • پی ایس ایل 6 کا انعقاد : فول پروف سیکیورٹی فراہم کرنے کا فیصلہ

    پی ایس ایل 6 کا انعقاد : فول پروف سیکیورٹی فراہم کرنے کا فیصلہ

    کراچی : پی ایس ایل کے انعقاد کے موقع پر فول پروف سیکیورٹی فراہم کرنے کا فیصلہ کرتے ہوئے سیکیورٹی انتظامات کوحتمی شکل دی گئی۔

    تفصیلات کے مطابق کمشنرکراچی نوید شیخ کی زیرصدارت پاکستان سپر لیگ 6 کی سیکیورٹی اور انتظامات سےمتعلق جائزہ اجلاس کمشنرہاؤس میں ہوا۔

    اجلاس میں ایڈیشنل آئی جی کراچی، پی سی بی نمائندےاورڈپٹی کمشنرزکی بریفنگ دی گئی اور پی ایس ایل 6کےسیکیورٹی انتظامات کوحتمی شکل دی گئی۔

    اجلاس میں پی ایس ایل کے انعقاد کے موقع پر فول پروف سیکیورٹی فراہم کرنے کا فیصلہ کیا گیا، اس موقع پرکمشنرکراچی نویدشیخ نے کہا ٹریفک کی روانی کے خصوصی اقدامات کئے جائیں ، ٹریفک کی وجہ سےشہریوں کوتکلیف نہ ہو۔

    کمشنر نے متعلقہ حکام کو ہدایات کی کہ اسٹیڈیم کےاطراف اورراستوں کوسجایاجائے گا اور کھلاڑیوں کے ایکشن کٹ آؤٹس شارع فیصل ودیگرمقامات پر آویزاں کئے جائیں۔

    نویدشیخ کا کہنا تھا کہ ضروری راستوں کو بند کیا جائے اور ٹریفک روانی کے خصوصی انتظامات کئے جائیں۔

    خیال رہے پی ایس ایل سکس کے آغاز میں صرف ایک دن رہ گیا، ایونٹ کی افتتاحی تقریب کل شام کوہوگی اور پہلےمیچ میں دفاعی چیمپئن کراچی اور کوئٹہ کے درمیان مقابلہ ہوگا۔

    میگا ایونٹ سے پہلے ٹیموں کی جم کے پریکٹس جاری ہے، دلوں کے بادشاہ کراچی کنگز آج نیشنل اسٹیڈیم میں پریکٹس کرے گی۔

  • بلال آصف نے پی ایس ایل کا گانا ریلیز کردیا

    بلال آصف نے پی ایس ایل کا گانا ریلیز کردیا

    معروف کرکٹر اور گلوکار بلال آصف نے پاکستان سپر لیگ کے لیے گانا ریلیز کردیا، بلال آصف کے گانے کو مداحوں کی جانب سے بہت پسند کیا جارہا ہے۔

    تفصیلات کے مطابق پاکستانی کرکٹر بلال آصف نے پاکستان سپر لیگ کے لیے نیا گانا یہ ہے پی ایس ایل ریلیز کردیا، گزشتہ روز ریلیز کیے جانے والے اس گانے کے حوالے سے بلال آصف نے لکھا ہے کہ یہ گانا پی ایس ایل کے مداحوں کے لیے بنایا گیا ہے۔

    اس گانے کے بول کرکٹر بلال آصف نے لکھے ہیں، اسے گایا بھی انہوں نے ہے جبکہ وہ خود بھی ویڈیو میں موجود ہیں۔ گانے کی ویڈیو لاہور کے تاریخی شاہی قلعے اور اندرون شہر کی گلیوں میں بنائی گئی ہے۔

    گانے میں پی ایس ایل میں شامل تمام ٹیمز کا ذکر کرتے ہوئے انہیں خراج تحسین پیش کیا گیا ہے۔

    بلال آصف کے گانے کو مداحوں کی جانب سے بہت پسند کیا جارہا ہے۔

    یاد رہے کہ پاکستان سپر لیگ 6 کا آفیشل گانا چند روز قبل ریلیز کیا گیا تھا جسے نصیبو لعل اور آئمہ بیگ نے گایا ہے، ابتدا میں گانے کو تنقید کا نشانہ بنایا گیا تاہم بعد ازاں لوگوں کی بڑی تعداد نے نصیبو لعل کی گائیکی کو شاندار قرار دیا اور ان کی حمایت کی۔

    دوسری جانب پاکستان سپر لیگ 6 کے میچز کا آغاز رواں ہفتے 20 فروری سے کراچی میں ہونے جارہا ہے، لیگ کا فائنل 22 مارچ کو ہوگا۔