لاہور: سابق قومی کپتان بابراعظم نے پی ایس ایل 9 میں اسلام آباد کے بولرز کے خلاف لاٹھی چارج کرتے ہوئے اپنی پہلی سنچری بنا ڈالی۔
پاکستان سپر لیگ میں بابر اعظم نے اسلام آباد یونائیٹڈ کے بولز کو نشانے پر رکھ لیا۔ پشاور کے کپتان نے دھواں دھار اننگز کھیلتے ہوئے 63 بالز پر 111 رنز بنائے۔ اس دوران انھوں نے دو چھکے اور 14 چوکے بھی لگائے۔
اپنی جارحانہ اننگز کے دوران بابر نے گراؤنڈ کے چاروں جانب خوبصورت شاٹس کھیلے اور لاہور کے شائقین سے داد وصول کی۔
پی ایس ایل 9 میں یہ پشاور کے کپتان کی پہلی سنچری ہے، بابر اسیزن 9 میں سنچری بنانے والے دوسرے بیٹر بن گئے ہیں۔
ان کی عمدہ اننگز کی بدولت زلمی نے مقررہ اوورز میں 5 وکٹوں کے نقصان پر 211 رنز کا مجموعہ اسکور بورڈ پر سجایا۔
اس سے قبل ڈوسن نے پشاور زلمی کیخلاف طوفانی اننگز کھیلتے ہوئے 50 گیندوں پر اپنی اور پی ایس ایل 9 کی پہلی سنچری اسکور کی تھی۔
وہ 104 رنز کے ساتھ ناٹ آؤٹ رہے تھے، ان کی اننگز میں 6 بلند و بالا چھکے بھی شامل تھے جبکہ ڈوسن نے اپنی بیٹنگ کے دوران 7 چوکے لگائے تھے۔
