پی ایس ایل 8 کے 23ویں میچ میں پشاور زلمی نے لاہور قلندرز کو باآسانی 35 رنز سے شکست دے دی،
راولپنڈی میں کھیلے گئے میچ میں لاہور قلندرز کی ٹیم پشاور زلمی کی جانب سے دیے گئے 208 رنز کے تعاقب میں 172 رنز پر ڈھیر ہوگئی، شاہین شاہ آفریدی کی نصف سنچری بھی ٹیم کو کامیابی نہ دلوا سکی۔
حسین طلعت نے 37 گیندوں پر 63 رنز کی ذمہ دارانہ اننگز کھیلی، شاہین آفریدی نے 52 رنز بنائے ان کی اننگز میں 5 چھکے اور تین چوکے شامل تھے۔
سکندر رضا 20 رنز بنا سکے جبکہ ڈیوڈ ویزے بغیر کوئی رن بنائے پویلین لوٹ گئے۔
پشاور زلمی کی جانب سے وہاب ریاض اور ارشد اقبال نے تین، تین وکٹیں حاصل کیں۔ عظمت اللہ عمرزئی دو وکٹیں حاصل کرسکے۔
اس سے قبل پشاور زلمی نے لاہور قلندرز کو جیت کیلئے 208 رنز کا ہدف دیا تھا۔
راولپنڈی اسٹیڈیم میں لاہور قلندرز اور پشاور زلمی کے درمیان کھیلے جانے والے میچ میں پشاور زلمی کے کپتان بابر اعظم نے ٹاس جیت کر پہلے بیٹنگ کا فیصلہ کیا تھا اور پشاور زلمی کی پوری ٹیم آخری اوور میں 207 رنز بناکر آؤٹ ہوگئی تھی۔
صائم ایوب نے 64 رنز کی شاندار اننگز کھیلی جس کے بعد کپتان بابر اعظم 50، محمد حارث 9، ٹام کوہلر 36 اور رومن پاول 9 رنز بنا کر آؤٹ ہوئے اس کے بعد پشاور زلمی کے تمام کھلاڑی یکے بعد دیگر آؤٹ ہوگئے
دوسری جانب لاہور قلندرز سے راشد خان نے 2، حارث رؤف نے 2 اور کپتان شاہین شاہ آٖفریدی نے 4 وکٹ لی۔
لاہور قلندرز دفاعی چیمپئن اس وقت 7 میچز کھیلنے کے بعد 12پوائنٹس کے ساتھ ٹیبل پر سرفہرست ہے اور پہلے ہی پی ایس ایل 8 کے پلے آف کے لیے کوالیفائی کر چکی ہے۔
دریں اثنا، بابر اعظم کی زیر قیادت پشاور زلمی 6 پوائنٹس کے ساتھ ٹیبل پر چوتھی پوزیشن پر ہے۔ اگر آج ٹیم یلو یہ میچ جیت جاتی ہے تو ان کے پلے آف کے لیے کوالیفائی کرنے کے امکانات بڑھ جائیں گے۔
لاہور قلندرز: کی ٹیم میں فخر زمان، شاویز عرفان، سیم بلنگز (وکٹ کیپر)، عبداللہ شفیق، حسین طلعت، سکندر رضا، راشد خان، ڈیوڈ ویز، شاہین آفریدی (کپتان)، حارث رؤف، زمان خان شامل ہے۔
پشاور زلمی: کی ٹیم میں محمد حارث (وکٹ کیپر)، بابر اعظم (کپتان)، صائم ایوب، ٹام کوہلر کیڈمور، حسیب اللہ خان، روومین پاول، عامر جمال، وہاب ریاض، عظمت اللہ عمرزئی، مجیب الرحمان، ارشد اقبال شامل ہے۔
