Tag: پی ایچ ایف

کراچی: نئے تعینات ہونے والے پاکستان ہاکی فیڈریشن کے سیکریٹری محمد آصف باجوہ نے کہا ہے کہ انھوں نے ہاکی ٹیم کو ٹاپ ٹین میں لانے کے بعد ٹاپ فور تک پہنچانے کا عزم کیا ہے۔

تفصیلات کے مطابق سابق اولمپئن اور پی ایچ ایف کے سیکریٹری آصف باجوہ نے کراچی میں پریس کانفرنس کرتے ہوئے کہا ہے کہ انھوں نے پاکستان ہاکی کو دوبارہ اجاگر کرنے کے لیے چیلنج سمجھ کر یہ عہدہ قبول کیا۔

آصف باجوہ نے کہا کہ ہاکی ٹیم کو ٹاپ ٹین میں لا کر ٹاپ فور تک پہنچانا ہے، قومی کھیل ہاکی کی موجودہ صورت حال کسی سے چھپی نہیں، عالمی رینکنگ میں پاکستان کی پوزیشن گرتی چلی جا رہی ہے۔

یہ بھی پڑھیں:  ازبکستان کی ہاکی اور رگبی ٹیمیں پاکستان پہنچ گئیں

انھوں نے کہا کہ اولمپئینز سمیت حکام کی عزت کو داغ دار نہیں کیا جائے گا، پاکستان ہاکی کی تباہی کی اصل وجہ پالیسی برقرار نہیں رکھنا ہے، آئندہ سالوں میں پروفیشنل لیگ کے انعقاد کو یقینی بنائیں گے۔

یاد رہے کہ گزشتہ روز لاہور میں انھوں نے کہا تھا کہ ہاکی کھیل کی بہتری کے لیے تمام اسٹیک ہولڈرز کو آن بورڈ لا کر ان سے مشاورت کی جائے گی۔

انھوں نے نیشنل ہاکی اسٹیڈیم میں پریس کانفرنس میں کہا تھا کہ تمام سابق اولمپئنز اور کھلاڑیوں کو اعتماد میں لے کر ان سے تکنیکی معاونت لی جائے گی۔

لاہور: انٹرنیشنل ہاکی فیڈریشن نے پاکستانی ٹیم کو پروہاکی لیگ سے باہر کردیا، پاکستان ہاکی فیڈریشن نے ایف آئی ایچ سے ابتدائی راؤنڈ کھیلنے سے معذرت کی تھی۔

تفصیلات کے مطابق انٹرنیشنل ہاکی فیڈریشن نے پاکستان کو پروہاکی لیگ سے باہر کردیا ہے جس کے بعد لاہور میں جاری پاکستان ہاکی ٹیم کا تربیتی کیمپ بھی جلد ختم کردیا گیا ہے۔

ایف آئی ایچ کا کہنا ہے کہ افسوس ہے پاکستان کو پورے ایونٹ سے معطل کررہے ہیں، ایونٹ میں شریک ٹیموں نے پاکستان کو شامل کرنے کے لیے تعاون کیا تھا۔

ایف آئی ایچ کے مطابق پاکستان کے باہر ہونے سے پرو ہاکی لیگ پر فرق نہیں پڑے گا، پی ایچ ایف نے ارجنٹینا، نیوزی لینڈ، آسٹریلیا کے خلاف ابتدائی راؤنڈ کھیلنے سے معذرت کی تھی۔

مزید پڑھیں: پاکستان ہاکی ٹیم کے اولپمک کوالیفائنگ راؤنڈ میچز کھیلنے کے امکانات معدوم

پی ایچ ایف کے مطابق ٹیم کا کیمپ لگا رکھا تھا مگر فنڈز کی کمی کی وجہ سے معذرت کرنا پڑی، وفاقی حکومت سے بار بار درخواست کے باوجود فنڈز جاری نہیں کیے گئے۔

ایف آئی ایچ کے مطابق پرو ہاکی لیگ میں شیڈول کے مطابق آٹھ ٹیمیں میچز کھیلیں گی۔

دوسری جانب ہیڈ کوچ و منیجر پاکستان ہاکی ٹیم سعید خان کا کہنا ہے کہ لیگ میں عدم شرکت قومی ہاکی ٹیم کے لیے ایک سیاہ دن ہے، فنڈز نہ ہونے کی وجہ سے یہ دن دیکھنا پڑا ہے، پرو ہاکی لیگ میں شرکت نہ کرنا نہایت افسوس ناک ہے۔

انہوں نے کہا کہ حکومت کی جانب سے فنڈز نہ ملیں تو ہاکی ٹیم کو کیسے اپنے پاؤں پر کحڑا کیا جاسکتا ہے، اچھے وقت کے انتظار میں اب ڈومیسٹک ہاکی پر توجہ دینا ہوگی۔

سعید خان کا کہنا تھا کہ پرو ہاکی لیگ سے معطل ہونے پر اب تربیتی کیمپ جاری رکھنے کا کوئی جواز نہیں رہا ہے آج کا دن قومی ہاکی کے لیے بہت ہی برا دن ہے۔

لاہور: قومی کھیل ہاکی پھر فنڈز کی کمی کا شکار ہو گیا ہے، قومی ہاکی ٹیم نے پروفیشنل ہاکی لیگ سے دست برداری پر غور شروع کر دیا ہے۔

تفصیلات کے مطابق مالی مسائل کے باعث قومی ہاکی ٹیم نے پروفیشنل ہاکی لیگ سے دست برداری پر غور شروع کر دیا ہے، ہاکی لیگ میں شرکت میں فنڈز ایک بار پھر رکاوٹ بننے لگے۔

[bs-quote quote=”پی ایچ ایف کا کھلاڑیوں کے ساتھ ناروا سلوک، ایک کمرے میں 12 سے 16 کھلاڑیوں کو ٹھہرا دیا۔” style=”style-7″ align=”left” color=”#dd3333″][/bs-quote]

سفری انتظامات نہ ہونے کی وجہ سے پاکستان ہاکی فیڈریشن پرو لیگ میں عدم شرکت کا فیصلہ کر سکتا ہے، تاہم ایونٹ میں حصہ نہ لیا تو پابندی اور جرمانہ بھی ہو سکتا ہے۔

پاکستان ہاکی ٹیم نے پرفیشنل لیگ میں شرکت نہیں کی تو اس پر دو سال کی پابندی لگ سکتی ہے، پاکستان اولمپکس میں شرکت سے بھی محروم ہو جائے گا۔

دوسری طرف تربیتی کیمپ میں شامل ہاکی کھلاڑیوں سے بھی پی ایچ ایف نے ناروا سلوک اختیار کیے رکھا، اسٹیڈیم کے چینجنگ روم میں انھیں رہائش دی گئی۔

پاکستان ہاکی فیڈریشن نے ایک کمرے میں 12 سے 16 کھلاڑیوں کو ٹھہرا دیا۔

یہ بھی پڑھیں:  ورلڈ کپ میں ناقص کارکردگی، ہاکی ٹیم کے سینئیر کھلاڑی پرو لیگ اسکواڈ سے باہر

خیال رہے کہ پاکستان ہاکی ٹیم کو پرو لیگ میں شرکت کے لیے ارجنٹائن کم از کم 7 روز قبل پہنچنا ہے، جب کہ 2 فروری کو پاکستان کا پہلا میچ شیڈول ہے۔

یاد رہے کہ پی ایچ ایف سنیئر کھلاڑیوں کے خلاف آپریشن کلین اپ کرتے ہوئے پرو لیگ سے قومی ہاکی ٹیم کے کئی سینئر کھلاڑی ڈراپ کر چکا ہے، اولمپک کوالیفائنگ راؤنڈ کے لیے جونئیر کھلاڑیوں پر تجربہ کیا جا رہا ہے۔