Tag: پی سی آر ٹیسٹ

ابو ظہبی: دبئی پہنچنے والے افراد کی سہولت کے لیے نئے ضوابط کا اعلان کردیا گیا، دبئی سے جاتے وقت پی سی آر ٹیسٹ کی شرط ختم کر دی گئی ہے۔

بین الاقوامی ویب سائٹ کے مطابق دبئی حکام نے سفر کے حوالے سے نئے ضوابط کا اعلان کیا ہے، دبئی میڈیا آفس کا کہنا ہے کہ دبئی آنے والوں کے لیے دبئی سے جاتے وقت پی سی آر ٹیسٹ کی شرط ختم کر دی گئی ہے۔

اب ایسے افراد کو جو دوسری جگہوں سے دبئی آتے ہیں صرف آمد کے وقت ٹیسٹ کروانا پڑے گا۔ حکام کا کہنا ہے کہ اس سے کوئی فرق نہیں پڑے گا کہ دبئی آنے والے افراد کا باہر کتنا عرصہ قیام رہا ہے اور وہ کہاں سے آرہے ہیں۔

تاہم سیاحوں اور شہریوں کے لیے دبئی آمد پر پی سی آر ٹیسٹ کروانا لازمی ہوگا۔

اگر دبئی سے کوئی فرد باہر جا رہا ہے اور جہاں جا رہا ہے وہاں آمد سے قبل پی سی آر ٹیسٹ کی شرط ہے تو ایسے افراد کو روانگی سے قبل پی سی آر ٹیسٹ کروانا پڑے گا۔

خیال رہے رواں ہفتے کے شروع میں دبئی میں پی سی آر ٹیسٹ کی فیس 250 درہم سے کم کر کے 150 درہم کر دی گئی تھی۔ محکمہ صحت نے کہا تھا کہ عوام کی سہولت اور ریاست میں موجود ہر شخص کو پی سی آر ٹیسٹ کروانے کی ترغیب دینے کے لیے فیس میں کمی کا اعلان کیا گیا ہے۔

محکمہ صحت نے متعلقہ مراکز سے کہا تھا کہ 29 ستمبر سے لیبارٹری ٹیسٹ کی 250 درہم کے بجائے نئی منظور شدہ فیس 150 درہم کی وصولی کے لیے فوری اقدامات اٹھائے جائیں۔