پشاور سے پاکستان تحریک انصاف (پی ٹی آئی) کے قافلے کی قیادت کے معاملے میں وزیر اعلیٰ علی امین گنڈا پور اور بشریٰ بی بی میں اختلافات کھل کر سامنے آگئے۔
تفصیلات کے مطابق پاکستان بانی پی ٹی آئی عمران خان کی 24 نومبر کے احتجاج کی کال کے پیش نظر پی ٹی آئی رہنماؤں کی کارکنان کے ہمراہ اسلام آباد پہنچنے کے لینے نکل رہے ہیں۔
ذرائع کا کہنا ہے کہ شیڈول کے مطابق پشاور سے پی ٹی آئی قافلےکی قیادت علی امین گنڈاپور نے کرنی ہے لیکن بشریٰ بی بی بضد ہیں پی ٹی آئی قافلے کی قیادت میں کروں گی۔
ذرائع کا کہنا ہے کہ علی امین گنڈاپور نے کہا بانی کہتے ہیں آ بشریٰ بی بی کا سیاست سے کوئی تعلق نہیں ہے، علی امین نے بشریٰ بی بی سےکہا آپ گھر بیٹھیں، قافلےکو میں لیڈ کروں گا۔
ذرائع کا مزید کہنا ہے کہ دونوں کے درمیان کشمکش کے باعث پی ٹی آئی قافلہ تاحال پشاور سے نہیں نکل سکا ہے۔
پی ٹی آئی احتجاج: اسلام آباد اور پنجاب کے داخلی وخارجی راستے مکمل طور پر سیل
واضح رہے کہ بانی پی ٹی آئی عمران خان نے احتجاج کا اعلان کر رکھا ہے اور پارٹی رہنماؤں وکارکنان کو ڈی چوک اسلام آباد پہنچ کر مطالبات کی منظوری تک احتجاج جاری رکھنے کی ہدایت کی ہے۔
دوسری جانب حکومت کی جانب سے بھی مظاہرین کو اسلام آباد پہنچنے سے روکنے کے لیے وفاقی دارالحکومت کو چاروں جانب سے کنٹینرز لگا کر سیل کر دیا گیا ہے۔
اس کے علاوہ پنجاب سے ملحقہ تینوں صوبوں کی سرحدیں سیل، موٹر ویز مکمل بند کر دیے گئے ہیں۔ اسلام آباد میں دو ماہ جب کہ پنجاب میں تین دن کے لیے دفعہ 144 نافذ کر کے ہر قسم کے جلسے جلوس اور اجتماعات پر پابندی عائد کر دی گئی ہے جب کہ کئی اضلاع میں رینجرز کو تعینات کیا گیا ہے۔
آئی جی اسلام آباد نے بھی احتجاج روکنے کے لیے سندھ، پنجاب اور بلوچستان پولیس سے مدد مانگ لی ہے۔ پولیس نفری کے علاوہ ڈنڈے، شیلز، گاڑیاں بھی طلب کی گئی ہیں۔
