Tag: پی ٹی آئی حکومت

کراچی: ماہ اگست میں ایل پی جی کی قیمتوں میں اضافہ کر دیا گیا ہے، اضافے سے متعلق با ضابطہ نوٹیفکیشن بھی جاری کر دیا گیا۔

تفصیلات کے مطابق ایل پی جی کی قیمتوں میں اضافہ کر دیا گیا، گھریلو سلنڈر میں 19 روپے، کمرشل سلنڈر کی قیمت میں 90 روپے اضافے کا نوٹیفکیشن جاری کیا گیا۔

نوٹیفکیشن کے مطابق ایل پی جی کی پیداواری قیمت میں 1384 روپے فی میٹرک ٹن اضافہ کیا گیا، گھریلو سلنڈر 1350 روپے جب کہ کمرشل سلنڈر 5194 روپے میں دستیاب ہوگا۔

واضح رہے کہ اگست کا مہینہ عوام پر بھاری پڑنے والا ہے، یکم اگست سے پٹرول کی قیمت میں بھی 5 روپے فی لیٹر اضافے کا امکان ہے، جس کے لیے اوگرا نے سمری تیار کر کے پٹرولیم ڈویژن کو ارسال کر دی‌‌‌ ہے۔

یہ بھی پڑھیں:  یکم اگست سے پٹرول کی قیمت میں اضافے کا امکان

اوگرا کی جانب سے تیار شدہ سمری میں ہائی اسپیڈ ڈیزل کی قیمت میں 5 روپے 65 پیسے اور پٹرول کی قیمت میں 5 روپے 15 پیسے فی لیٹر اضافے کی تجویز دی گئی ہے۔

اوگرا نے مٹی کے تیل کی قیمت میں 5 روپے 38 پیسے اور لائٹ ڈیزل کی قیمت میں 8 روپے 90 پیسے اضافے کی سفارش کی ہے۔

تاہم قیمتوں میں اضافے کی منظوری وزیر اعظم دیں گے، جب کہ ان کا اطلاق یکم اگست سے ہوگا۔

یاد رہے کہ گزشتہ ماہ جون میں حکومت نے پٹرولیم مصنوعات کی قیمتیں برقرار رکھنے کا فیصلہ کیا تھا جب کہ اوگرا نے 28 جون کو پٹرولیم مصنوعات کی نئی قیمتوں کے حوالے سے سمری پٹرولیم ڈویژن کو ارسال کی تھی، جس میں پٹرول کی فی لیٹر قیمت 77 پیسے کم کرنے کی تجویز دی گئی تھی۔

اسلام آباد: وزیر اعظم کے معاون خصوصی برائے صحت ڈاکٹر ظفر مرزا نے کہا ہے کہ حکومت نے ہیپاٹائٹس کے مکمل خاتمے کے لیے 5 سالہ منصوبہ بنایا ہے۔

تفصیلات کے مطابق ہیپاٹائٹس کے عالمی دن پر عالمی ادارۂ صحت کے زیر اہتمام تقریب سے خطاب کرتے ہوئے معاون خصوصی نے کہا کہ وزیر اعظم نے ہیپاٹائٹس سی کی ٹیسٹنگ اور علاج کے پروگرام کا اعلان کیا ہے۔

ظفر مرزا نے بتایا کہ وزیر اعظم عمران خان کا انسداد ہیپاٹائٹس پروگرام صوبوں کے تعاون سے کام کرے گا، اس پروگرام کے تحت لاکھوں مریضوں کی اسکریننگ میں معاونت فراہم کی جائے گی۔

ڈاکٹر ظفر مرزا کا کہنا تھا کہ پاکستان میں ڈیڑھ کروڑ افراد ہیپاٹائٹس میں مبتلا ہیں، ایڈز اور ہیپاٹائٹس پر قابو پانے کے لیے ٹاسک فورسز بنا دی گئی ہیں۔

یہ بھی پڑھیں:  وزیر اعظم 2 ہفتوں میں شعبۂ صحت سے متعلق بڑا اعلان کریں گے: ڈاکٹر ظفر مرزا

وزیر اعظم کے معاون خصوصی نے مزید کہا کہ حکومت نیشنل بلڈ ٹرانسفیوژن اتھارٹی کے قیام پر غور کر رہی ہے، یہ اتھارٹی عطیہ شدہ خون کی اسکریننگ کی ذمہ دار ہوگی، حکومت ملک میں آٹو لاک سرنجز متعارف کرانے پر بھی غور کر رہی ہے۔

ڈاکٹر ظفر مرزا نے کہا کہ ملک میں مریض دوست اور محفوظ اسپتالوں کا منصوبہ زیر غور ہے، ڈبلیو ایچ او مریض دوست، محفوظ اسپتالوں کے لیے تعاون کرے گا، چاروں صوبوں میں ایک سرکاری، ایک نجی اسپتال کو ماڈل بنایا جائے گا۔

اسلام آباد: وفاقی حکومت نے تمام وزارتوں میں مالیاتی مشیر کا عہدہ ختم کر دیا، وزارتِ خزانہ نے اس حوالے سے با ضابطہ نوٹیفکیشن جاری کر دیا۔

تفصیلات کے مطابق حکومت نے ایک نوٹیفکیشن کے ذریعے مالیاتی مشیر کا عہدہ ختم کر دیا ہے، وزارتوں اور ڈویژنوں کے مالی امور کی ذمہ داری اب چیف فنانس اور اکاؤنٹس افسر کے پاس ہوگی۔

نوٹیفکیشن میں کہا گیا ہے کہ مالیاتی مشیر کا عہدہ فنانشل مینجمنٹ ایکٹ 2019 کے تحت ختم کیا گیا ہے۔

وزارتِ خزانہ کے مطابق مالیاتی مشیر کے عہدے کا خاتمہ اقتصادی اصلاحات پروگرام کا حصہ ہے، خیال رہے کہ مالیاتی مشیر کا عہدہ عمومی طور پر وزارتِ خزانہ کے افسران کے پاس ہوتا تھا۔

مزید تازہ خبریں پڑھیں:  سابقہ حکمرانوں کی سرکاری پیسے پر شاہ خرچیوں کی تفصیلات طلب

وزارتِ خزانہ کے حکام کا کہنا ہے کہ مستقبل میں وزارتوں اور ڈویژنز میں اے جی پی آر کے اختیارات محدود ہونے کا بھی امکان ہے، تمام اداروں میں چیف انٹرنل آڈیٹر کی اسامی بھی تخلیق کی جائے گی۔

ادھر ٹیکس گوشوارے جمع کرانے کی آخری تاریخ میں 6 دن رہ گئے ہیں۔ گزشتہ روز فیڈرل بورڈ آف ریونیو (ایف بی آر) کے چیئرمین شبر زیدی نے کہا تھا کہ 500 گز سے زاید کے گھر یا 1 ہزار سی سی سے زیادہ کی گاڑی رکھنے والے افراد لازماً ٹیکس ریٹرن فائل کرنے کے ذمہ دار ہیں۔

اسلام آباد: ایل این جی اسکینڈل میں سابق وزیر اعظم شاہد خاقان عباسی کی گرفتاری کی وجوہ سامنے آ گئیں۔

تفصیلات کے مطابق اے آر وائی نیوز نے وہ دستاویز حاصل کر لیا جس میں ن لیگی رہنما شاہد خاقان کی ایل این جی اسکینڈل میں گرفتاری کی وجوہ بیان کی گئی ہیں۔

دستاویز میں کہا گیا ہے کہ شاہد خاقان کو کرپشن، کرپٹ پریکٹسز کے ٹھوس شواہد پر گرفتار کیا گیا ہے۔

دستاویز کے مطابق جولائی 2013 میں کیو ای ڈی کنسلٹنٹ کو خلاف ضابطہ عالمی کنسلٹنٹ بنایا گیا جو پروکیورمنٹ سروسز ریگولیشینز 2010 کی واضح خلاف ورزی ہے۔

ایل این جی ٹرمینل ون کی بولی کی دستاویز کے لیے من پسند لیگل فرم کا استعمال کیا گیا، سابق وزیر اعظم نے یہ کام سوئی سدرن کی بہ جائے کیو ای جی کنسلٹنٹ کو دیا۔

یہ بھی پڑھیں:  نیب نے سابق وزیر اعظم شاہد خاقان عباسی کو گرفتار کرلیا

دستاویز میں یہ بھی کہا گیا ہے کہ ای ای پی ٹی پی ایل کو بھی ٹھیکا دینے کے لیے شاہد خاقان نے اثر و رسوخ استعمال کیا، ٹھیکے میں کمپنی مفاد کو ترجیح دینے پر قومی خزانے کو اربوں نقصان ہو رہا ہے۔

دستاویز کے مطابق شاہد خاقان عباسی نے پرائیویٹ کمپنی کے سی ای او عمران الحق کو ناجائز طور پر ایم ڈی پی ایس او لگایا۔

خیال رہے کہ آج شاہد خاقان عباسی کو نیب کی جانب سے ایل این جی کیس میں طلب کیا گیا تھا، تاہم وہ پیش نہیں ہوئے، نیب نے انھیں ٹھوکر نیاز بیگ کے قریب ٹول پلازہ پر روک کر گرفتار کیا، انھیں وارنٹ گرفتاری دکھا کر حراست میں لیا گیا، سابق وزیر اعظم نے کہا تھا وہ لاہور میں ہیں نہیں آ سکتے، جس پر ان کی لوکیشن ٹریس کرنے کے بعد انھیں حراست میں لیا گیا۔

اسلام آباد: چیئرمین سینیٹ کے خلاف تحریکِ عدم اعتماد کے سلسلے میں اپوزیشن کو نمبر گیم میں کمی کا خدشہ پیدا ہو گیا ہے۔

تفصیلات کے مطابق اپوزیشن چیئرمین سینیٹ صادق سنجرانی کے خلاف تحریک عدم اعتماد لا رہی ہے، تاہم اپوزیشن کو اچانک نمبر گیم میں کمی کا خدشہ لا حق ہو گیا ہے۔

ذرایع نے کہا ہے کہ تحریک عدم اعتماد کے سلسلے میں اپوزیشن کے 10 سے 15 سینیٹرز پارٹی پالیسی سے منحرف ہو سکتے ہیں۔

چیئرمین سینیٹ کو ہٹانے کی حکمتِ عملی پر مشاورت کے لیے ن لیگی سینیٹرز کا اجلاس بلایا گیا تاہم اس اہم بیٹھک میں 30 میں سے صرف 19 ارکان نے شرکت کی۔

اہم بیٹھک میں ایک تہائی لیگی سینیٹرز اجلاس سے غائب ہونے کے بعد یہ خدشہ پیدا ہو گیا ہے کہ عین موقع پر تحریکِ عدم اعتماد ناکام ہو سکتی ہے۔

یہ بھی پڑھیں:  پی ٹی آئی کا ڈپٹی چیئرمین سینیٹ سلیم مانڈوی والا کے خلاف تحریک عدم اعتماد لانے کا فیصلہ

ادھر اپوزیشن لیڈر شہباز شریف نے سیکریٹری سینیٹ کو خط لکھ کر ریکوزیشن بلانے سے متعلق اعتراض دور کرنے کی کوشش کی۔

خیال رہے کہ وزیر اعظم پاکستان عمران خان چیئرمین سینیٹ صادق سنجرانی کو بھرپور تعاون کی یقین دہانی کرا چکے ہیں، ادھر سینیٹر شیری رحمان نے کہا ہے کہ حکومت کے پاس سینیٹ میں مطلوبہ تعداد موجود نہیں، فارورڈ بلاک کس طرح بن سکتا ہے؟ یہ تو قانون کی نفی ہوگی۔

پی پی رہنما شیری رحمان نے وزیر اعظم اور چیئرمین سینیٹ کی ملاقات کے موقع پر دیے گئے بیان کو بھی ہارس ٹریڈنگ قرار دیا تھا۔ انھوں نے کہا کہ اپوزیشن کو واضح اکثریت حاصل ہے، اس لیے چیئرمین سینیٹ لانے میں کوئی دقت نہیں ہوگی۔

اسلام آباد: قائد حزب اختلاف شہباز شریف نے آئی ایم ایف کی رپورٹ پر ردِ عمل دیتے ہوئے کہا ہے کہ اس رپورٹ نے جھوٹ کا پول کھول دیا ہے، آئی ایم ایف نے بتایا 750 ارب کے نئے ٹیکس لگائے گئے ہیں۔

تفصیلات کے مطابق شہباز شریف نے کہا ہے کہ پارلیمنٹ میں قوم سے جھوٹ بولا گیا کہ 500 ارب کے نئے ٹیکس لگائے گئے ہیں، تاہم آئی ایف رپورٹ کہہ رہی ہے کہ نئے ٹیکس سات سو پچاس ارب روپے کے ہیں۔

پاکستان مسلم لیگ ن کے صدر نے کہا کہ حکومت 1600 ارب کا ریکارڈ ٹیکسوں کا بوجھ عوام پر لاد رہی ہے، 90 ارب کا اضافی ٹیکس تنخواہ دار، کاروباری افراد سے لیا جائے گا۔

شہباز شریف نے کہا کہ انھوں نے پارلیمنٹ میں 516 ارب روپے کے ٹیکس بتائے، آئی ایم ایف کا کہنا ہے ستمبر تک 1000 ارب کے ٹیکس جمع کرنا ہوں گے۔

انھوں نے کہا کہ سیمنٹ، سریا، زمین، پٹرول، ڈیزل، خوراک پہلے ہی مہنگی ہو گئیں، تباہی کا نیا نسخہ لوگوں کے کچن پر تالا لگانے کا منصوبہ ہے، آئی ایم ایف نے گواہی دی عوام سے، پارلیمان سے جھوٹ بولا جا رہا ہے۔

ن لیگی رہنما کا کہنا تھا کہ ٹیکسوں سے متعلق جھوٹ بول کر پارلیمان کا استحقاق مجروح کیا گیا، پارلیمنٹ کی توہین اور استحقاق مجروح کرنے کا معاملہ پارلیمنٹ میں اٹھائیں گے۔

شہباز شریف کا کہنا تھا نئے ٹیکسوں سے پراپرٹی ٹیکس کا بوجھ 45 ارب روپے بڑھ جائے گا، اتنے بھاری ٹیکسوں سے بے روزگاری مزید بڑھ جائے گی، نئے گھر تو نہیں بنیں گے، لوگ اپنے گھر بیچنے پر مجبور ہو جائیں گے۔