لاہور : انسداد دہشت گردی عدالت نے پولیس کو جناح ہاؤس حملہ کے مقدمے میں خدیجہ شاہ سمیت تیرہ پی ٹی آئی خواتین سےتفتیش مکمل کرکے چالان پیش کرنے کا حکم دے دیا۔
تفصیلات کے مطابق انسداد دہشت گردی عدالت نے جناح ہاؤس حملہ کیس میں خدیجہ شاہ سمیت 13 پی ٹی آئی خواتین کارکنان کو جوڈیشل ریمانڈ پر جیل بھجوانے کا تحریری حکم جاری کردیا۔
ایڈمن جج عبہر گل کی جانب سے تحریری حکم جاری کیا، جس میں عدالت نے تفتیشی افسر کو ہدایت کی کہ 22 جون تک تفتیش مکمل کرکے مقدمے کا چالان پیش کیا جاٸے۔
تحریری فیصلے میں کہا گیا کہ تفتیشی افسر نے خواتین سے ریکوری کےلیے 20 دن کا جسمانی ریمانڈ مانگا، جس پر خواتین سے ریکوری کیلئے پہلے ہی پانچ دن کا جسمانی ریمانڈ دیا گیا۔
تحریری حکم کے مطابق تفتیشی افسر کی جانب سے مزید جسمانی ریمانڈ کی استدعا کی گئی لیکن تفتیشی افسر اس کے لیے ٹھوس وجوہات نہیں دے سکے۔
عدالت نے تمام خواتین کو 14 دنوں کے جوڈیشل ریمانڈ پر جیل بھیج دیا اور انہیں 22 جون کو دوبارہ پیش کرنے کی ہدایت کردی۔
