لاہور : پولیس نے پی ٹی آئی رہنما ڈاکٹر شاہد صدیق کے قتل کی تحقیقات میں مقتول کے بیٹے قیوم کی دوست کو بھی شامل تفتیش کرلیا۔
تفصیلات کے مطابق لاہور میں تحریک انصاف کے رہنما اور نجی اسپتال کے مالک ڈاکٹر شاہد صدیق کے قتل کی تحقیقات جاری ہے۔
ذرائع نے بتایا کہ پولیس نے مقتول کے بیٹے قیوم کی دوست کو بھی شامل تفتیش کرلیا ہے، لڑکی قتل کی واردات یا منصوبہ بندی میں ملوث ہے یا نہیں۔ اس حوالے سے تفتیش جاری ہے۔
واردات میں استعمال ہونے والی گاڑی وہاڑی سے رینٹ پر لی گئی اور رہنما پی ٹی آئی کو قتل کرنے سے پہلے شوٹر نے گاڑی کی نمبر پلیٹ تبدیل کی۔
واردات کے بعد شہر سے باہر نکلتے ہوئے گاڑی کی اصل نمبرپلیٹ لگائی گئی، ملزم قیوم اور شہر یار گزشتہ 8 سال سے دوست ہیں، شہریارویلنشیاٹاؤن میں کسی دوست کے پاس رہائش پذیر تھا۔
پولیس کا مزید کہنا تھا کہ ملزم قیوم شامل تفتیش کی جانے والی لڑکی سے شادی کرنا چاہتا تھا۔
