اسلام آباد : ایف آئی اے نے پی ٹی آئی فنڈنگ کیس میں اکاؤنٹس کی چھان بین کے لیے مزید ٹیمیں تشکیل دے دیں۔
تفصیلات کے مطابق پی ٹی آئی فنڈنگ کیس میں الیکشن کمیشن فیصلے کے بعد تحقیقات کے معاملے پر اکاؤنٹس کی چھان بین کے لئے ایف آئی اے کی مزید ٹیمیں تشکیل دے دی گئیں۔
وفاقی دارالحکومت میں تشکیل دی گئی ٹیم کی قیادت ڈپٹی ڈائریکٹرآمنہ بیگ کوسونپ دی گئی جبکہ ٹیم میں اجمل صدیق سندھو، سردار اللہ بابر، اصغر علی بلوچ، ریحانہ کوثر اور ارباب عباسی شامل ہیں۔
خیبرپختونخوا اور سندھ زون ون میں پانچ ، پانچ جبکہ پنجاب زون ون اور بلوچستان میں چار ، چار رکنی ٹیمیں تحقیقات کریں گی۔
بلوچستان میں 4 رکنی ٹیم میں محمدعلی ابڑو،محمدراشد بھٹی،افروز احمد کلہواڑ،راجہ محمدامتیاز شامل ہیں۔
کے پی کے میں تشکیل 5 رکنی ٹیم کی قیادت ڈپٹی ڈائریکٹر محمد آفتاب بٹ کریں گے اور دیگر میں افضل خان ،محمد طاہر ،عرفان اللہ اور صائمہ ندیم سب انسپکٹر شامل ہیں۔
سندھ زون ون کی 5 رکنی ٹیم کی سربراہی ڈپٹی ڈائریکٹر رابعہ قریشی کریں گی اور ٹیم میں رؤف شیخ،سبین غوری،آفتاب وٹو،راحت خان شامل ہیں۔
اسی طرح پنجاب زون ون ٹیم کی سربراہی ڈپٹی ڈائریکٹر میاں عامر اقبال کریں گے جبکہ محمد یوسف،شاہد علی اور عرفان خان ٹیم میں شامل ہوں گے۔
