اسلام آباد: پاکستان بار کونسل کے رکن چوہدری حفیظ الرحمان نے ساتھیوں سمیت پی ٹی آئی میں شمولیت کا اعلان کر دیا۔
تفصیلات کے مطابق چیئرمین تحریک انصاف عمران خان سے زمان پارک میں وکلا کے ایک وفد نے ملاقات کی، جس میں اراکین پنجاب بارکونسل اویس قاضی، اقبال موہل، سابق رکن پنجاب بار کونسل میاں فیض اللہ شامل، سابق صدر لاہور بار سید محمد شاہ اور نائب صدر سپریم کورٹ بار ایسوسی ایشن ارشد باجوہ شامل تھے۔
پی ٹی آئی میں شمولیت اختیار کرنے والے وکلا میں سپریم کورٹ بار ایسوسی ایشن کے ایگزیکٹو رکن عارف محمود چوہدری، لاہور بار کے نائب صدور میاں عصمت اللہ اور محمد حیات سندھو، عارف اعوان، طاہر امین چوہدری، زاہد نواز چیمہ، نورالمصطفیٰ، مبین عارف چوہدری، حسیب عارف چوہدری اور فصیح الرحمان بھی شامل تھے۔
وکلا نے عدلیہ کی آزادی اور جمہوریت کے تحفظ و استحکام کے حوالے سے عمران خان کے مؤقف کی مکمل تائید کا اعلان کیا، جب کہ حکمران اتحاد کی جانب سے عدلیہ پر حملوں اور دستور سے انحراف کی شدید مذمت کی گئی۔
وکلا نے آرٹیکل 224 کے تحت پنجاب، کے پی میں 90 روز میں انتخابات کے انعقاد کا آئینی تقاضا پورا کرنے کا مطالبہ کیا، اور سپریم کورٹ کی جانب سے آئین کے مذکورہ آرٹیکل کی تشریح کی بھی مکمل توثیق کا اعلان کیا۔
وکلا کے وفد کا کہنا تھا کہ دستور اور عدلیہ کے خلاف سازشیں اور حملے کرنے والوں کو ہرگز اجازت نہیں دیں گے، عدلیہ کے بازو مروڑنے کی کوششیں ترک نہ کی گئیں تو 2007 سے بڑی تحریک برپا کریں گے۔
وکلا نے کہا کہ آئین پر حملہ کرنے والوں کا علاج آرٹیکل 6 کی صورت میں خود آئین تجویز کرتا ہے، معزز سپریم کورٹ دستور کی حفاظت کا آئینی فریضہ بلاخوف سرانجام دے۔
وکلا کا کہنا تھا کہ دھونس اور سازش پر آمادہ گروہ سے وکلا اور قوم نمٹ لیں گے، جمہوریت کے استحکام و فروغ اور دستور کی بالادستی کے لیے عمران خان کے ایجنڈے کی تائید کرتے ہیں۔
دوسری طرف عمران خان نے چوہدری حفیظ الرحمان کی ساتھیوں سمیت تحریک انصاف میں شمولیت کا خیر مقدم کیا۔
