اسلام آباد : اکبر ایس بابر نے پی ٹی آئی کے انٹرا پارٹی انتخابات کو چیلنج کرنے کا اعلان کرتے ہوئے کہا کہ انٹرا پارٹی الیکشن کے نام پر اس فراڈ کو کیسے تسلیم کیا جاسکتا ہے۔
تفصیلات کے مطابق اکبر ایس بابر نے پی ٹی آئی کے انٹرا پارٹی انتخابات کے حوالے سے بیان میں کہا کہ شفاف الیکشن کا مطالبہ کرنے والوں کا انٹرا پارٹی الیکشن نیا سیاہ باب ہے۔
اکبرایس بابر کا کہنا تھا کہ پی ٹی آئی انٹراپارٹی الیکشن میں 940لوگوں نے ووٹ دیا جو 0.11فیصد ہے، انٹرا پارٹی الیکشن کے نام پر اس فراڈ کو کیسے تسلیم کیا جاسکتا ہے۔
سابق رہنما نے کہا کہ کل 5 مارچ کو الیکشن کمیشن میں انٹرا پارٹی الیکشن کوچیلنج کروں گا۔
یاد رہے پاکستان تحریک انصاف نے انٹرا پارٹی الیکشن کے نتائج اعلان کیا تھا ، جس کے مطابق بیرسٹر گوہر ایک مرتبہ پھر بلا مقابلہ چیئرمین اور عمر ایوب بلا مقابلہ جنرل سیکریٹری مںتخب ہوئے۔
پی ٹی آئی انفارمیشن سیکریٹری رؤف حسن نے کہا تھا کہ ہم نے تیسری دفعہ انٹرا پارٹی الیکشن کرائے ہیں، ہم نے الیکشن رولز کے مطابق الیکشن کرائے ہیں، اس وقت بھی بلوچستان میں پولنگ ہو رہی ہے، اور باقی صوبوں میں کمشنر صاحبان الیکشن کرا رہے ہیں۔
