سرگودھا: پاکستان تحریک انصاف کے چیئرمین عمران خان نے کہا ہے کہ جتنی تباہی پانچ سال میں پاکستان میں ہوئی اتنی کہیں نہین ہوئی، اسٹیٹس کو کی وجہ سے ملک میں تبدیلی نہیں آسکتی۔

ان خیالات کا اظہار انہوں نے سرگودھا میں ورکرز کنونشن سے خطاب کرتے ہوئے کیا، عمران خان نے کہا کہ پاکستان کو اللہ نے دوسری بار تباہی سے بچانے کا موقع دیا ہے، یہ الیکشن ملک کو تبدیل کردے گا، سخت مقابلہ ہونے جارہا ہے، یہ الیکشن پاکستان کا فیصلہ کرے گا۔

انہوں نے کہا کہ آج پیرسیالوی سے ملاقات کا موقع ملا، ان سے ملاقات کرکے خوشی ہوئی، جبکہ جو بھی سیاسی جماعت انتخابات میں کامیابی حاصل کرے گی اس کو مسائل درپیش ہوں گے، جو اداروں کو مضبوط کرسکتا ہے وہی پاکستان کو ٹھیک کرسکتا ہے۔

عمران خان نے کہا کہ پاکستان 27 ہزار ارب ڈالر کا مقروض ہے، پاکستان پر 90 ارب ڈالر بیرون ملک قرضے ہیں، ڈالر مہنگا ہوگیا، روپے کی قدر کم ہورہی ہے، قرضے بڑھتے جارہے ہیں، مہنگائی غریب کو غریب اور امیر طبقے کو مزید امیر کردیتی ہے۔

تحریک انصاف کے چیئرمین نے کہا کہ امیدوار سڑکوں پر نکلیں، گلیوں میں جائیں لوگوں کو پیغام دیں، سندھ کی طرح سرگودھا میں کسان بے حال ہے، محنت کش طبقے کی تباہی پانچ سال میں سب سے زیادہ ہوئی ہے، کسانوں کو اس دلدل سے نکالنے کے لیے پروگرام لے کر آرہے ہیں، کسان خوشحال ہوگا تو ملک سے مسائل کا خاتمہ ہوگا۔

عمران خان نے کہا ہے کہ پی ٹی آئی کا منشور 5 سے 6 دن میں آرہا ہے، بدقسمتی سے ہم سب امیدواروں کو ٹکٹ نہیں دے سکتے تھے، ٹکٹ دیانت داری اور منصفانہ طریقے سے دیے ہیں، نظریاتی کارکنوں کے لیے پی ٹی آئی میں بڑی جگہ ہے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں