اسلام آباد : پاکستان تحریک انصاف کے سربراہ عمران خان کا کہنا ہے کہ وقت آگیا ہے پی ٹی آئی الیکشن میں لینڈ سلائیڈ فتح حاصل کرے گی، جنرل باجوہ پہلے آرمی چیف ہیں جنہوں نے مکمل طورپرواضح کردیا ہے کہ وہ جمہوریت کے ساتھ ہیں۔
تفصیلات کے مطابق چیئرمین پی ٹی آئی عمران خان نے برطانوی نشریاتی ادارے کو انٹرویو دیتے ہوئے کہا پاکستان کے مسائل بھی وہی ہیں جو دیگرممالک کے ہیں، وقت آگیا ہے پی ٹی آئی الیکشن میں لینڈ سلائیڈ فتح حاصل کرے گی۔
عمران خان کا کہنا تھا کہ پاکستان میں گورننس ناکام ہے، اپنی صلاحیتوں کا استعمال نہیں کرسکے،ادارے کمزورہیں، 2 پارٹیوں کی گزشتہ حکومتوں نے ادارے تباہ کیے، چیف جسٹس نے کورٹ میں کہا پاکستان میں ادارے تباہ ہیں۔
پی ٹی آئی چیئرمین نے کہا کہ پارٹیوں کی مقبولیت سے متعلق سروے گمراہ کن ہوتے ہیں، ضمنی انتخابات میں ہمیشہ حکمران پارٹی فتح حاصل کرتی ہے۔
ان کا کہنا تھا کہ پیپلزپارٹی اورن لیگ کی پالیسیوں نے امیروں کو مزید امیرکیا، 30سالوں میں امیروں اورغریبوں میں خلیج میں اضافہ ہوا، پاکستان میں امیروں کے جزیرے اور غربیوں کا سمندر ہے۔
سربراہ پی ٹی آئی نے انٹرویو میں کہا کہ پی ٹی آئی واحد پارٹی ہے، جو اداروں کی تعمیر کرسکتی ہے، جس ادارے کی تعمیر سب سے زیادہ مشکل ہے وہ پولیس ہے، پی ٹی آئی نے کے پی میں پولیس کو سیاسی دباؤ سے آزاد کیا۔
عمران خان کا کہنا تھا کہ میں نے بنی گالا کاگھرلندن کے فلیٹس فروخت کرکےخریدا، لندن فلیٹس کرکٹ کے دورکی کمائی سے خریدے تھے اور میں نے یہ بات سپریم کورٹ میں ثابت بھی کی ہے۔
آرمی چیف کے حوالے سے پی ٹی آئی چیئرمین نے کہا کہ جنرل باجوہ پہلے آرمی چیف ہیں جنہوں نے مکمل طور پر واضح کردیا ہے کہ وہ جمہوریت کے ساتھ ہیں، جنرل باجوہ پاکستان کے آئین کے ساتھ کھڑے ہیں۔
ان کا پپیلز پارٹی کے چیئرمین سے متعلق کہنا تھا کہ بلاول کو پتا نہیں پاکستانی سیاست میں کیا ہورہا ہے، بلاول پیراشوٹ سے پاکستانی سیاست میں اترے۔
چیئرمین پی ٹی آئی نے اپنی زاتی زندگی کے حوالے سے کہا کہ ہماری ذاتی زندگیوں میں بہت کچھ ہورہا ہوتا ہے، میری تیسری شادی ہے،خیال نہیں اس سے کسی کا کچھ لینا دینا ہے۔
ان کا کہنا تھا کہ پاکستان کوداعش سےخطرہ ہے، داعش پاکستانی سرحدکےقریب افغان علاقوں میں موجود ہے، مستقبل میں داعش سے زیادہ خطرہ ہے۔
سربراہ تحریک انصاف نے کہا کہ امریکا سپر پاور ہے، پاکستان کو دوستانہ تعلقات رکھنے چاہئیں، دکھ ہواجب ٹرمپ نے ناکامیوں کا الزام پاکستان پر عائد کیا، امریکا کی جانب سے پاکستان کو قربانی کا بکرا بنایا گیا، دہشت گردی کیخلاف جنگ میں70 ہزار جانوں کی قربانی دی، پالیسیوں پر تنقید کا مطلب کسی کے مخالف ہونا نہیں ہوتا۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
