اسلام آباد : پاکستان تحریک انصاف کے ایڈیشنل سیکریٹری جنرل عامر کیانی نے باضابطہ طور پر پارٹی چھوڑنے کا اعلان کردیا۔ انہوں نے کہا کہ نہ صرف پی ٹی آئی بلکہ سیاست سے بھی کنارا کشی اختیار کررہا ہوں۔
یہ بات انہوں نے نیشنل پریس کلب اسلام آباد میں نیوز کانفرنس سے خطاب کرتے ہوئے کہی، ان کا کہنا تھا کہ9مئی کے واقعات نے مجھے ذاتی طور پر تکلیف پہنچائی ہے، میرا خاندان فوج سے تعلق رکھتا ہے۔
ایڈشنل سیکریٹری جنرل پی ٹی آئی کا کہنا تھا کہ 1996میں پی ٹی آئی کو جوائن کیا تھا، ایک ڈیڑھ ماہ پہلے تک پارٹی کیلئے کام کیا، ڈیڑھ ماہ سے کسی میٹنگ میں شریک نہیں ہوا کیونکہ میری رائے کچھ اور تھی۔
عامر کیانی نے کہا کہ میرے خلاف بھی پرچے ہوئے جو سیاسی ہیں، 27سال میں آج تک کبھی افواج یا کسی ادارے کیخلاف بیان نہیں دیا،
میری رائے سادہ سی ہے ہمیں اپنی حدود میں جدوجہد کرنی چاہئے، اللہ کے بعد ہماری بقا سرحدوں پر کھڑے جوانوں کی وجہ سے ہے، ابھی بھی سرحدوں پر روزانہ کی بنیاد پر3سے4شہادتیں ہوتی ہیں۔
واضح رہے کہ اس سے قبل گزشتہ روز کراچی سے منتخب رکن قومی اسمبلی مولوی محمود نے پارٹی چھوڑنے کا اعلان کیا تھا۔
پریس کانفرنس کرتے ہوئے ان کا کہنا تھا کہ پارٹی چھوڑنے کی اصل وجہ یہ ہے کہ میں فوج کیخلاف نہ گیا ہوں نہ جاؤں گا، سیاسی جماعتیں بدلی جاسکتی ہیں مگر ہم فوج کو نہیں بدل سکتے۔
اس کے علاوہ سندھ اسمبلی اجلاس کے دوران پی ٹی آئی رکن سندھ اسمبلی کریم گبول نے پارٹی چھوڑنے کا اعلان کردیا۔
منحرف رکن کا کہنا تھا کہ پی ٹی آئی میں سیاسی جماعت سمجھ کر گیا تھا لیکن وہ دہشت گرد جماعت بن گئی ہے، اداروں پر حملے تشدد برداشت نہیں کروں گا، میں دہشت گرد تنظیم کا حصہ نہیں بنوں گا،حملوں کی مذمت کرتا ہوں۔
علاوہ ازیں گزشتہ روز ہی پی ٹی آئی سندھ کے صدر اور سابق وفاقی وزیر علی زیدی کی پی ٹی آئی چھوڑنے کی افواہیں گردش کی تھیں جس کی تردید آج خود علی زیدی نے کردی ہے۔
