لاہور: شہباز گل کی گرفتاری پر ردِ عمل دیتے ہوئے پاکستان تحریک انصاف نے عدلیہ سے حکومتی اقدامات کا نوٹس لینے کا مطالبہ کر دیا ہے۔
تفصیلات کے مطابق پی ٹی آئی رہنما عمر سرفراز چیمہ نے شہباز گل کی گرفتاری کے بعد پریس کانفرنس کرتے ہوئے مطالبہ کیا کہ عدلیہ فوری طور پر حکومت کے ایسے اقدامات کا نوٹس لے۔
انھوں نے کہا کہ ملک کے اندر سیاسی اور معاشی عدم استحکام ہے، فاشسٹ اقدامات کر کے ملک میں بےیقینی کی صورت حال پیدا کی جاتی ہے، لیکن ہماری کوشش ہے کہ ہماری طرف سے کوئی ایسا عمل نہ ہو جس سے حالات خراب ہوں۔
نشریات کی بندش: اے آر وائی کی لائیو ٹرانسمیشن یہاں دیکھیں
عمر سرفراز نے کہا ہم سیاسی جماعت ہیں کوئی فاشسٹ مافیا نہیں، ہمارے خلاف ایسے اقدامات جاری رہے تو حالات کی ذمہ دار وفاقی حکومت ہوگی، جمہوریت کو نقصان پہنچا تو اس کی ذمہ دار بھی پی ڈی ایم جماعتیں ہوں گی۔
انھوں نے کہا بتایا جا رہا ہے کہ شہباز گل کو بیانات کی بنیاد پر گرفتار کیا گیا، لیکن شہباز گل کو جس طرح گرفتار کیا گیا ایسے تو کوئی دہشت گرد بھی گرفتار نہیں ہوتا، شہباز گل کی گاڑی کے شیشے توڑے گئے۔
شہبازگل کو بنی گالہ جاتے ہوئے پولیس نے گرفتار کرلیا
سابق گورنر پنجاب نے کہا کہ 25 مئی کو بھی پی ٹی آئی رہنماؤں اور کارکنوں پر فاشسٹ اقدامات کیے گئے، ہم مطالبہ کرتے ہیں کہ عدلیہ فوری طور پر حکومت کے ایسے اقدامات کا نوٹس لے۔
