نگران وزیراعظم انوارالحق کاکڑ نے کہا ہے کہ پی ٹی آئی سمیت کسی جماعت کو جلسوں، ریلیوں سے نہیں روکا، 8 فروری کو انتخابات ہوں گے۔
تفصیلات کے مطابق انوارالحق کاکڑ کا کہنا تھا کہ الیکشن کے بعد سیاسی استحکام کیلئے بڑی جماعتوں کو سوچنا ہوگا۔ پی ٹی آئی سمیت کسی جماعت کو جلسوں اور ریلیوں سے نہیں روکا۔ پی ٹی آئی کو سیاسی سرگرمیوں کی مکمل اجازت ہے۔
انوارالحق کاکڑ نے کہا کہ 8 فروری کو انتخابات ہوں گے، اپنی ذمےداریاں بخوبی ادا کریں گے۔ نگران حکومت کسی ایک جماعت کو فیور نہیں دے رہی۔ نگران حکومت کے تمام جماعتوں کے ساتھ بہتر تعلقات ہیں۔
وزیراعظم کا کہنا تھا کہ ایس آئی ایف سی کے پلیٹ فارم کو متنازع بنانےکی کوششیں کی گئیں۔ مختلف ایم او یوز سائن کرنے قطر، سعودی عرب اور کویت جارہے ہیں۔ آنے والے ہفتے میں اچھی خبریں سننے کو ملیں گی۔
انھوں نے کہا کہ اگلے 2 ماہ میں بھاری اور متاثرکن غیرملکی سرمایہ کاری ہوگی۔ دوست ممالک کو پاکستان میں سرمایہ کاری پر کوئی کنفیوژن نہیں۔
انوارالحق نے کہا کہ اس وقت ملک میں سیکیورٹی چیلنجز پہلے سے زیادہ ہیں۔ سیکیورٹی چیلنجز کو سیاسی عمل سے نہیں جوڑنا چاہتے۔ نگران حکومت شفاف الیکشن یقینی بنائے گی۔ عوام سے ووٹ لینے کیلئے محرومی کا کارڈ استعمال کیا جارہا ہے۔
نگران وزیراعظم کا کہنا تھا کہ 29 نومبر کو بیرون ملک ہوں گا، عدالت میں پیشی ممکن نہیں۔ عسکریت پسند بلوچ مزدوروں اور اساتذہ کو قتل کرتے ہیں۔ عدالت اس قتل عام پر بھی جواب طلب کرے۔
انوارالحق نے کہا کہ سرفراز بگٹی کے چیئرمین پی ٹی آئی کو عدلیہ کے لاڈلے کہنے کے بیان کا علم نہیں۔ میں سرفراز بگٹی میری کابینہ کے ممبر ہیں۔ جو باتیں سرفرازبگٹی نے کیں شاید ان کی ذاتیات سے متعلق ہوں۔
انھوں نے کہا کہ سرفرازبگٹی نے ن لیگ کی حمایت میں بیان دیا ہے تو میں ان کا ترجمان نہیں۔ سیاسی جماعتوں کی الیکشن سے متعلق جائز شکایتوں پر کارروائی ہوگی۔
