ARYNews.tv | Urdu – Har Lamha Bakhabar

Tag: پی ڈی ایم اے

  • لاہور والے ہوشیار ہوجائیں! طوفانی بارشوں کا الرٹ جاری

    لاہور والے ہوشیار ہوجائیں! طوفانی بارشوں کا الرٹ جاری

    لاہور: صوبہ پنجاب کے مختلف شہروں میں آج سے 16 اگست تک موسلا دھار بارشوں کا امکان ہے، نشیبی علاقے زیر آب آسکتے ہیں۔

    تفصیلات کے مطابق صوبائی ڈیزاسٹر مینجمنٹ اتھارٹی نے مزید مون سون بارشوں کا الرٹ جاری کردیا۔

    پی ڈی ایم اے کا کہنا ہے کہ مون سون ہوائیں جنوبی علاقوں میں داخل ہو رہی ہیں، آج سے 16 اگست تک پنجاب کے مختلف شہروں میں موسلا دھار بارش کا امکان ہے۔ 18 اگست تک ڈیرہ غازی خان کے برساتی اور مقامی ندی نالوں میں طغیانی کا خدشہ ہے۔

    پی ڈی ایم اے کا کہنا ہے کہ 15 اور 16 اگست کے دوران راولپنڈی، سیالکوٹ اور نارووال کے ندی نالوں میں طغیانی کا خدشہ ہے، راولپنڈی، فیصل آباد، لاہور اور گوجرانوالہ میں بھی نشیبی علاقے زیر آب آسکتے ہیں۔

    پی ڈی ایم اے کی جانب سے کہا گیا ہے کہ تمام ادارے ہنگامی صورتحال سے نمٹنے کے لیے الرٹ رہیں، روزانہ کی بنیاد پر ندی نالوں میں پانی کی سطح کا جائزہ لیا جائے۔

  • بلوچستان میں طوفانی بارشوں سے مزید 9 افراد جاں بحق، تعداد 99 ہو گئی

    بلوچستان میں طوفانی بارشوں سے مزید 9 افراد جاں بحق، تعداد 99 ہو گئی

    کوئٹہ: صوبہ بلوچستان میں طوفانی بارشوں سے مزید 9 افراد جاں بحق ہو گئے جس سے مجموعی ہلاکتوں کی تعداد 99 ہو گئی۔

    تفصیلات کے مطابق پی ڈی ایم اے نے بارشوں سے ہونے والے نقصانات کی رپورٹ جاری کر دی ہے، اتھارٹی کا کہنا ہے کہ 24 گھنٹے کے دوران مزید 9 افراد بارشوں کی نذر ہو گئے، جب کہ حالیہ بارشوں کے دوران مختلف حادثات میں جاں بحق افراد کی تعداد 99 ہو گئی ہے۔

    پی ڈی ایم اے کے مطابق جاں بحق ہونے والوں میں خواتین اور بچوں کی بڑی تعداد شامل ہے، اب تک 39 مرد، 28 خواتین، اور 32 بچے جاں بحق ہو چکے ہیں۔

    اموات بولان، کوئٹہ، ژوب، دکی، خضدار، کوہلو، کیچ، مستونگ، ہرنائی، قلعہ سیف اللہ اور سبی میں ہوئیں، بارشوں کے دوران حادثات میں 57 افراد زخمی بھی ہوئے۔

    پی ڈی ایم اے کی رپورٹ میں کہا گیا ہے کہ بارشوں میں مجموعی طور پر صوبے بھر میں 3953 مکانات منہدم ہوئے، 550 کلو میٹر مشتمل مختلف 4 شاہراہیں متاثر ہوئیں، اور 706 مال مویشی ہلاک ہوئے۔

  • عوام تیار ہوجائیں! عید پر بارش اور گرج چمک کے ساتھ طوفان کی پیش گوئی

    عوام تیار ہوجائیں! عید پر بارش اور گرج چمک کے ساتھ طوفان کی پیش گوئی

    لاہور : عید پر پنجاب کے مختلف اضلاع میں بارش اور  مٹی کے طوفا ن کا امکان ہے ،موسمی صورتحال کے پیش نظر مشینری متحرک کردی گئی۔

    تفصیلات کے مطابق محمکہ موسمیات نے پنجاب میں سخت گرمی، حبس کے بعد آندھی اور گرج چمک کے ساتھ بارشوں کی پیش گوئی کردی۔

    پی ڈی ایم اے نے عید پر پنجاب کے مختلف اضلاع میں بارش اور مٹی کے  طوفان کا امکان ظاہر کردیا اور موسمی صورتحال کے پیش  نظرمشینری متحرک کردی گئی ہے، کہیں مٹی کا طوفان تو کہیں بارش کا طوفان آنے کی اطلاعات ہیں۔

    غیر معمولی موسم صورتحال پر ڈپٹی کمشنرز کو انتظامات کرنے کی ہدایت کرتے ہوئے سیکرٹری مواصلات و تعمیرات،سیکریٹری بلدیات ،سیکرٹری آبپاشی کو مراسلہ ارسال کردیا ہے۔

    ڈائریکٹرجنرل ریسکو 1122کو ایمرجنسی صورتحال کیلئے تیار رہنے کی ہدایت کردی ہے۔

    پی ڈی ایم اے کا کہنا ہے کہ مئی کے اوائل میں گرمی کا زورٹوٹنے اور ٹھنڈی ہوا چلنے کی اطلاعات ہیں، یکم سے 3مئی راجن پور،ڈی جی خان لیہ، بھکر، ملتان،خانیوال، ساہیوال ،اوکاڑہ، پاکپتن،بہاولنگر،بہاولپور،رحیم یار خان میں بارش کاامکان ہے۔

    مری، جھنگ ، شیخوپورہ، لاہور، حافظ آباد، گوجرانوالہ ، سیالکوٹ، ناروال ، گجرات میں مٹی کے طوفان کی پیشگوئی کی گئی ہے۔

  • آج رات سے 7جنوری تک سندھ میں بارشیں، پی ڈی ایم اے کا الرٹ جاری

    آج رات سے 7جنوری تک سندھ میں بارشیں، پی ڈی ایم اے کا الرٹ جاری

    کراچی : پی ڈی ایم سندھ نے 4 جنوری کی رات سے 7 جنوری کے دوران بارشوں کا الرٹ جاری کر دیا اور انتظامیہ کو الرٹ رہنے کی ہدایت کردی ہے۔

    تفصیلات کے مطابق نئے سال کے پہلے ہفتے میں صوبہ سندھ کے چند اضلاع میں تیز ہواؤں کے ساتھ بارش کا امکان کے بعد صوبائی ڈیزاسٹر مینجمنٹ اتھارٹی (پی ڈی ایم اے) سندھ نے 4 جنوری کی رات سے 7 جنوری کے دوران بارشوں کا الرٹ جاری کر دیا ہے۔

    ی ڈی ایم اے سندھ کی جانب سے جاری کردہ مراسلے میں کہا گیا ہے کہ 4 جنوری سے 7 جنوری کے دوران ضلع سکھر،شہید بے نظیر آباد، لاڑکانہ، کراچی، جامشورو ، میرپورخاص، دادو، بدین، ٹنڈو الہیار، ٹنڈو محمد خان، سانگھڑ، جیکب آباد، شکار پور، تھر پارکر، قمبر شہد اد کوٹ اور عمر کوٹ میں تیز ہواؤں اور طوفان کے ساتھ بارش کا امکان ہے۔

    پی ڈی ایم اے سندھ نے ممکنہ متاثرہ اضلاع کی انتظامیہ کو الرٹ رہنے اور ضروری اقدام کرنے کی ہدایت کردی ہے۔

    محکمۂ موسمیات کے چیف میٹرولوجسٹ سردار سرفراز کا کہنا ہے کہ کراچی میں آج سے شروع ہونے والی بارش سے سردی میں اضافہ ہو گا اور درجۂ حرارت سنگل ڈیجٹ میں جا سکتا ہے۔

    چیف میٹرولوجسٹ کے مطابق موسمِ سرما کا طاقت ور مغربی ہواؤں کا سلسلہ بلوچستان پر اثر انداز ہوا ہے، اس مغربی ہواؤں کے سسٹم نے جنوبی بلوچستان میں اچھی بارش برسائی ہے۔

    انہوں نے بتایا کہ اس سسٹم کے تحت کراچی میں آج شام یا رات سے گرج چمک کے ساتھ بارش کا امکان ہے، اس دوران تیز سرد ہوائیں بھی چل سکتی ہیں۔

  • ‌‌‌کراچی میں تیز بارش کی پیشگوئی ، پی ڈی ایم اے کا الرٹ جاری

    ‌‌‌کراچی میں تیز بارش کی پیشگوئی ، پی ڈی ایم اے کا الرٹ جاری

    کراچی : محکمہ پی ڈی ایم اے نے  کراچی میں ممکنہ بارشوں کے پیش نظر متعلقہ اداروں کو ہائی الرٹ رہنے اور حفاظتی اقدامات کی ہدایت کردی ۔

    سندھ میں ممکنہ بارشوں کے پیش نظر پی ڈی ایم اے نے الرٹ جاری کردیا ، جس میں کہا گیا ہے کہ ممکنہ بارشوں کےپیش نظر حفاظتی اقدامات کیےجائیں ، بل بورڈ اور ہورڈنگز کو فوری ہٹایا جائے، تھرپارکر،عمرکوٹ،سانگھڑ،بدین ،سکھر میں 31 اگست تا 3 ستمبر بارش متوقع ہے۔

    خیال رہے محکمہ موسمیات نے شہرقائد سمیت سندھ بھر میں یکم ستمبر سے بارش کی پیش گوئی کرتے ہوئے کہا ہے کہ مون سون ہواؤں کا سلسلہ کل رات سے سندھ میں داخل ہوگا ، جس کے باعث 01ستمبر سے 03 ستمبر تک تیز بارشوں کا امکان ہے۔

    محکمہ موسمیات نے بتایا کہ کراچی میں 45تا50کلو میٹر فی گھنٹہ کی رفتار سے تیز ہوائیں بھی چل سکتی ہیں تاہم شہر میں آئندہ 24گھنٹے میں موسم جزوی ابر آلود رہے گا۔

  • پختونخواہ میں بارشیں، مختلف حادثات میں 14 افراد جاں بحق

    پختونخواہ میں بارشیں، مختلف حادثات میں 14 افراد جاں بحق

    پشاور: صوبہ خیبر پختونخواہ کی ڈیزاسٹر مینجمنٹ اتھارٹی کا کہنا ہے کہ بارشوں سے مختلف حادثات میں صوبے میں 14 افراد جاں بحق ہوگئے، ضلعی انتظامیہ کو متاثرہ علاقوں میں کارروائیاں تیز کرنے کی ہدایات کردی گئی ہیں۔

    تفصیلات کے مطابق صوبائی ڈیزاسٹر مینجمنٹ اتھارٹی نے خیبر پختونخواہ میں بارشوں سے نقصانات کی رپورٹ جاری کردی۔ مختلف حادثات میں 14 افراد جاں بحق اور 26 زخمی ہوگئے۔

    پی ڈی ایم اے کا کہنا ہے کہ 21 گھروں کو جزوی جبکہ 4 گھروں کو مکمل نقصان پہنچا، ضلعی انتظامیہ کو متاثرہ علاقوں میں کارروائیاں تیز کرنے کی ہدایات کردی گئی ہیں۔

    پی ڈی ایم اے کے مطابق شبقدر مٹہ رستم خیل کے متاثرین میں ضلعی انتظامیہ نے امدادی سامان تقسیم کیا۔

  • پختونخواہ میں بارشوں اور سیلابی ریلوں سے 2 افراد جاں بحق

    پختونخواہ میں بارشوں اور سیلابی ریلوں سے 2 افراد جاں بحق

    پشاور: صوبہ خیبر پختونخواہ کی ڈیزاسٹر مینجمنٹ اتھارٹی کا کہنا ہے کہ بارشوں اور سیلابی ریلوں سے صوبے میں 2 افراد جاں بحق ہوئے، انتظامیہ بند سڑکیں کھولنے کے لیے بھی متحرک ہے۔

    تفصیلات کے مطابق صوبائی ڈیزاسٹر مینجمنٹ اتھارٹی نے خیبر پختونخواہ میں بارشوں سے نقصانات کی ابتدائی رپورٹ جاری کردی۔ بارشوں اور سیلابی ریلوں سے اپر دیر میں 2 افراد جاں بحق ہوئے۔

    پی ڈی ایم اے کا کہنا ہے کہ اپر دیر میں ایک مکان کو جزوی نقصان پہنچا، متعلقہ ضلعی انتظامیہ کو امدادی کارروائیاں تیز کرنے کی ہدایت کردی گئی۔

    ترجمان پی ڈی ایم اے کے مطابق انتظامیہ شرننگل میں بند سڑکیں کھولنے کے لیے بھی متحرک ہے، پی ڈی ایم اے متعلقہ اداروں کے ساتھ رابطے میں ہے۔

    ترجمان کا کہنا ہے کہ پی ڈی ایم اے نے 15 جولائی کو تمام اضلاع کو مراسلہ ارسال کیا تھا، بارشوں کی پیش گوئی اور پیشگی حفاظتی اقدامات کی ہدایت کی گئی تھی۔

    ترجمان کا مزید کہنا تھا کہ پی ڈی ایم اے کا کنٹرول روم 24 گھنٹے فعال ہے، کسی ناخوشگوار واقعے کی اطلاع ہیلپ لائن پر دیں۔

  • پختونخواہ میں بارشیں: مختلف حادثات میں 4 افراد جاں بحق

    پختونخواہ میں بارشیں: مختلف حادثات میں 4 افراد جاں بحق

    پشاور: صوبہ خیبر پختونخواہ میں گزشتہ رات سے جاری بارشوں کے دوران مختلف حادثات میں 3 بچوں سمیت 4 افراد جاں بحق ہوگئے جبکہ کچھ گھروں کو بھی جزوی نقصان پہنچا۔

    تفصیلات کے مطابق صوبہ خیبر پختونخواہ کی صوبائی ڈیزاسٹر مینجمنٹ اتھارٹی نے گزشتہ رات سے جاری بارشوں پر رپورٹ جاری کردی۔ بارشوں سے مختلف حادثات میں 3 بچوں سمیت 4 افراد جاں بحق ہوئے۔

    پی ڈی ایم اے کا کہنا ہے کہ لوئر دیر میں چھت گرنے سے 2 بچے جاں بحق اور 1 زخمی ہوا۔ مانسہرہ میں دیوار گرنے سے بچے سمیت 2 افراد جاں بحق ہوئے۔

    ترجمان پی ڈی ایم اے کے مطابق مانسہرہ اور تورغر میں بھی 1، 1 گھر کو جزوی نقصان پہنچا۔

    ترجمان کا کہنا ہے کہ وزیر اعلیٰ پختونخواہ ریسکیو آپریشن کی نگرانی کر رہے ہیں اور متعلقہ اداروں سے رابطے میں ہیں۔

  • خیبر پختونخواہ میں بارش و برفباری: 2 خواتین زخمی، گھروں کو بھی نقصان

    خیبر پختونخواہ میں بارش و برفباری: 2 خواتین زخمی، گھروں کو بھی نقصان

    پشاور: صوبائی ڈیزاسٹر مینجمنٹ اتھارٹی کا کہنا ہے کہ خیبر پختونخواہ میں بارش و برفباری سے 2 خواتین زخمی ہوئیں، جبکہ 2 گھروں کو بھی جزوی نقصان پہنچا۔

    تفصیلات کے مطابق صوبہ خیبر پختونخواہ کی ڈیزاسٹر مینجمنٹ اتھارٹی کا کہنا ہے کہ صوبے میں بارش و برفباری سے 2 خواتین زخمی ہوئیں، دونوں خواتین مٹہ کے علاقے بھر مٹہ میں دیوارگرنے سے زخمی ہوئیں۔

    پی ڈی ایم اے کا کہنا ہے کہ بارشوں اور برفباری سے 2 گھروں کو جزوی نقصان پہنچا، برفباری سے بند سڑکیں کھولنے کے اقدامات جاری ہیں۔

    دوسری جانب ڈپٹی کمشنر مانسہرہ کا کہنا ہے کہ برفباری سے بند شاہراہ کاغان کو آمد و رفت کے لیے بحال کردیا گیا ہے۔

    ڈی سی کے مطابق ناران، شاہراہ کاغان سکی کناری کے مقام پر پھنسے سیاحوں کو بھی نکال لیا گیا ہے، برف باری سے 6 کوسٹر اور 16 چھوٹی گاڑیاں پھنس گئی تھیں۔

    خیال رہے کہ صوبہ خیبر پختونخواہ اور گلگت بلتستان کے بالائی علاقوں میں شدید برفباری اور بارشیں جاری ہیں، کوئٹہ، قلات اور دیر میں درجہ حرارت منفی 1 سے بھی نیچے جا چکا ہے۔

  • پی ڈی ایم کا 11 اکتوبر کو کوئٹہ میں جلسے کا اعلان

    پی ڈی ایم کا 11 اکتوبر کو کوئٹہ میں جلسے کا اعلان

    لاہور: اپوزیشن جماعتوں کی پاکستان ڈیموکریٹک موومنٹ (پی ڈی ایم) نے 11 اکتوبر کو کوئٹہ میں جلسے کا اعلان کردیا۔

    اے آر وائی نیوز کی رپورٹ کے مطابق اپوزیشن جماعتوں کی پاکستان ڈیمو کریٹک موومنٹ (پی ڈی ایم) نے 11 اکتوبر کو کوئٹہ میں جلسے کا اعلان کیا جبکہ پی ڈی ایم اے کی اسٹیئرنگ کمیٹی کا سربراہ احسن اقبال کو بنایا گیا ہے۔

    مسلم لیگ ن کے مرکزی نائب صدر شاہد خاقان عباسی کا کہنا تھا کہ پی ڈی ایم اجلاس میں شہباز شریف کی گرفتاری کی شدید مذمت کی گئی، ملک میں جمہوریت سلب کی جارہی ہے، ملکی پارلیمنٹ پر قدغن ہے اس کی اجلاس میں مذمت کی گئی۔

    شاہد خاقان عباسی نے کہا کہ پاکستان ڈیموکریٹک موومنٹ ایک خاص مقاصد کے لیے بنائی گئی ہے، آج کے اجلاس میں جمہوریت کی بحالی اور عوامی تکالیف پر گفتگو ہوئی، پی ڈی ایم کو آگے بڑھانے کے لیے اپنا کردار ادا کریں گے۔

    انہوں نے کہا کہ پورے پاکستان میں تحریک کا آغاز کیا جارہا ہے، تمام جماعتیں آج کے اجلاس میں کیے گئے فیصلوں پر متفق ہیں، تحریک ملکی سیاسی تاریخ میں حقیقی سیاسی تبدیلی لائے گی۔

    شاہد خاقان عباسی نے کہا کہ اسٹیئرنگ کمیٹی میں ہر جماعت کے دو ممبران شامل ہوں گے، چاروں صوبوں میں پی ڈی ایم کے مرکزی جلسے ہوں گے۔

    جلسوں کی شروعات ہورہی ہے، راجہ پرویز اشرف

    پیپلزپارٹی کے رہنما راجہ پرویز اشرف نے کہا کہ شہباز شریف کی گرفتاری سب کے لیے قابل افسوس لمحہ تھا، حکومتی وزرا آئے روز پریس کانفرنسز کرتے رہتے ہیں، پریس کانفرنس سے ظاہر ہوتا ہے نیب نیازی گٹھ جوڑ ہے۔

    انہوں نے کہا کہ اسٹیئرنگ کمیٹی نے 11 اکتوبر کو کوئٹہ میں جلسے کا فیصلہ کیا ہے، جلسوں کی شروعات ہورہی ہے، اپوزیشن کی تمام جماعتیں متفق ہیں، عوام کے ساتھ کھڑے ہیں۔

    حکومت نے عوام کو سبز باغ دکھائے لیکن کچھ بھی نہیں کیا، عبدالغفور حیدری

    جمعیت علماء اسلام (ف) کے رہنما عبدالغفور حیدری نے کہا کہ تحریک کا باضابطہ آغاز 11 اکتوبر سے کررہے ہیں، حکومت نے عوام کو سبز باغ دکھائے لیکن کچھ بھی نہیں کیا، نیب آئے روز اپوزیشن کو تنگ اور گرفتاریاں کررہی ہے۔