اسلام آباد: حویلیاں میں حادثے کا شکار ہونے والے طیارے کے ملبے کی اسلام آباد منتقلی دوسرے روز بھی جاری ہے۔ طیارے کا ملبہ لکڑی کے باکسز میں اسلام آباد منتقل کیا جا رہا ہے۔
حویلیاں میں حادثے کا شکار ہونے والے طیارے کا ملبہ اٹھانے کا کام مکمل کرلیا گیا۔ تباہ شدہ طیارے کا ملبہ اٹھانے کے لیے ٹھیکیدار کو ٹھیکہ دیا گیا ہے۔ ملبہ اٹھانے کے لیے حادثے کی جگہ تک رسائی کے لیے پہلے سڑک تعمیر کی گئی۔
جائے حادثہ سے جمع کیا جانے والا ملبہ لکڑی کے باکسز میں ڈال کر اسلام آباد منتقل کیا جا رہا ہے۔ ملبہ پی آ ئی اے اور سول ایوی ایشن حکام کی نگرانی میں اسلام آباد منتقل کیا جا رہا ہے۔
اس سے قبل حادثے میں جاں بحق ہونے والے تمام افراد کی میتیں شناخت کے صبر آزما مرحلے کے بعد ان کے ورثا کے حوالے کردی گئی تھیں۔
واضح رہے کہ پی آئی اے کا اے ٹی آر طیارہ 7 دسمبر کی شام حویلیاں کے قریب حادثہ کا شکار ہوا تھا جس میں مذہبی اسکالر جنید جمشید سمیت 42 مسافر اور عملے کے پانچ افراد جاں بحق ہوگئے تھے۔
