Tag: چارسدہ

چارسدہ: اپوزیشن لیڈر شہباز شریف نے دعویٰ کیا ہے کہ وزیر اعظم عمران خان کے کارندوں نے جیل میں آ کر کہا تھا کہ اس کو زمین پر سلاؤ۔

تفصیلات کے مطابق چارسدہ میں بیگم نسیم ولی خان کے انتقال پر تعزیت کے موقع پر میڈیا سے گفتگو کرتے ہوئے شہباز شریف نے کہا کہ میں کئی بار گرفتار ہوا، پہلے 1996 میں گرفتار کیا گیا تھا، نواز شریف کے ساتھ اٹک جیل میں رکھا گیا، لانڈھی جیل میں بھی نواز شریف کے ساتھ جیل کاٹی، جیلیں کاٹ رہے ہیں کیا یہ ڈیل ہے؟

انھوں نے دعویٰ کیا کہ جیل میں عمران خان کے کارندے آئے، ان کا نام نہیں لوں گا، انھوں نے کہا اس کو زمین پر سلاؤ، عام قیدیوں کے ساتھ رکھو، پھر جیل انتظامیہ کے لوگ میرے پاس آئے، اور مجھے کمر کی تکلیف کے باوجود جیل میں پہلی رات زمین پر سلایا گیا۔

شہباز شریف نے کہا تاریخ میں اتنی بدترین حکومت نہیں دیکھی، رنگ روڈ منصوبے میں ایکسٹینشن کی خود عمران خان نے اجازت دی، ویڈیو موجود ہے جس میں عمران خان خود اجازت دے رہے ہیں، جب شور مچا تو یو ٹرن لینا شروع کر دیا، ان کی عادت ہے یوٹرن لینے کی۔

ان کا کہنا تھا رنگ روڈ اسکینڈل پر ن لیگ نے واضح مؤقف اختیار کیا، میرے دورمیں رنگ روڈ منصوبے کی پلاننگ 2016-17 میں ہو چکی تھی، ڈاکٹر توقیر کو منصوبے سے متعلق انتہائی ایمان دار پایا، ڈاکٹر توقیر سے متعلق کوئی بات سامنے آتی تو میرے دور میں آنی چاہیے تھی۔

اپوزیشن لیڈر نے کہا جس طرف دیکھیں ہر طرف اسکینڈل ہے، مہنگائی اور ویکسین کی بات کریں تو چور ڈاکو کہا جاتا ہے، حکومت نے ملک میں بے روزگاری، مہنگائی کر دی، لاکھوں لوگ بے روزگار ہو گئے، حکومت نے ویکسین کا انتظام نہیں کیا، کرونا نے ملک میں تباہی مچا دی، حکومت کو چاہیے تھا راتوں رات جہاز بھیج کرجہاں سے ویکسین ملتی لے کر آتی، لیکن ویکسین کا نام لیں تو چور ڈاکو کہا جاتا ہے۔

چارسدہ: خیبر پختون خوا کے شہر چارسدہ میں پولیس نے تباہی کا بڑا منصوبہ ناکام بناتے ہوئے 2 ملزمان کو بارودی مواد کے ساتھ گرفتار کر لیا۔

تفصیلات کے مطابق ضلع چارسدہ میں تھانہ سرو پولیس نے ایک کامیاب کارروائی کے دوران گاؤں سرو میں ایک گاڑی سے بڑی مقدار میں بارودی مواد برآمد کر لیا۔

چارسدہ پولیس کے مطابق ایک پک اپ گاڑی کے خفیہ خانوں سے 200 میٹر پرائما کارڈ اور 1200 ڈائنا مائٹ برآمد کیے گئے ہیں، 2 ملزمان طیب اور امان کو بھی گرفتار کر لیا گیا ہے۔

پولیس کا کہنا ہے کہ تفتیش سے معلوم ہوا کہ دونوں ملزمان کا تعلق صوابی سے ہے، جو بارودی مواد شبقدر کے راستے ضلع مہمند منتقل کر رہے تھے، ملزمان کے خلاف تھانہ سرو میں مقدمات درج کر کے مزید تفتیش شروع کر دی گئی ہے۔

نوشہرہ : بارودی مواد پھٹنے سے دھماکا ، 5 افراد جاں بحق

یاد رہے کہ 29 ستمبر کو صوبہ خیبر پختون خوا کے ضلع نوشہرہ کے علاقے اکبرپورہ میں دریا کنارے سے ملنے والے مارٹر گولے کے پھٹنے سے دھماکے میں 5 افراد جاں بحق اور ایک زخمی ہوگیا تھا۔

پولیس کا کہنا تھا کہ دھماکا اسکریپ میں موجود بارودی مواد پھٹنے سے ہوا، واقعہ مقامی لوگوں کو دریا کنارے سے ملنے والے مارٹر گولے کو کباڑ میں بیچنے کے دوران پیش آیا۔