ARYNews.tv | Urdu – Har Lamha Bakhabar

Tag: چالان

  • نہ سفارش، نہ بحث، کراچی میں ای چالان کا آغاز کب سے ہوگا ؟

    نہ سفارش، نہ بحث، کراچی میں ای چالان کا آغاز کب سے ہوگا ؟

    کراچی: نہ سفارش، نہ بحث، اب چالان ہوگا ثبوت کیساتھ، ٹریفک پولیس کی جانب سے آگاہی مہم کے دوسرے مرحلے کا آغاز کردیا گیا۔

    تفصیلات کے مطابق ڈی آئی جی ٹریفک اور آؤٹ ڈورایڈور ٹائزرزکے درمیان ملاقات ہوئی، آؤٹ ڈور ایڈور ٹائزرز نے ٹریفک پولیس سے تعاون کا اعلان کردیا۔

    100سے زائد مقامات پر ٹریفک آگاہی اشتہارات چلائے جائیں گے، اسٹریمرز اور سائن بورڈز پر ٹریفک قوانین کا مواد جاری کیا جائے گا۔ ویڈیوز اور تصاویر کے ذریعے شہریوں کو آگاہی دی جائے گی۔

    شہر قائد میں جلد ای چالان کا آغاز کیا جا رہا ہے، فیس لیس سسٹم کے تحت خلاف ورزی پر خود کار چالان جاری ہوگا۔ چالان ڈاک کے ذریعے شہری کے گھر پہنچے گا۔

    ٹریفک پولیس کے مطابق چالان کی معلومات ٹریفک پولیس ایپ سے بھی حاصل کی جا سکے گی، شہری زحمت سے بچنے کیلئے ٹریفک قوانین پر عمل کریں۔

    دوسری جانب سیف سٹی بہاولپور نے ٹریفک نظم و ضبط کو مؤثر اور جدید تقاضوں سے ہم آہنگ بنانے کیلیے 25 جولائی 2025 سے ای چالان نظام کا باقاعدہ آغاز کر دیا ہے۔

    جدید ٹیکنالوجی سے لیس کیمرے ٹریفک قوانین کی خلاف ورزی کی صورت میں خودکار طریقے سے ای چالان جاری کریں گے جس سے قانون نافذ کرنے کے عمل میں شفافیت اور تیزی ممکن ہو سکے گی۔

    ٹریفک پولیس نے متعدد ٹریفک اہلکاروں کے چالان کر دیے

    بہاولپور میں ای چالان کا یہ نظام انٹیلیجنٹ ٹریفک مینجمنٹ سسٹم (ITMS) کے تحت فعال کیا گیا ہے جو نہ صرف ٹریفک کی مؤثر نگرانی کرتا ہے بلکہ ڈیفالٹر گاڑیوں پر بھی کڑی نظر رکھتا ہے۔

    جدید آرٹیفیشل انٹیلیجنس سے مزین یہ نظام ٹریفک پولیس بہاولپور کیلیے ایک مؤثر معاون ثابت ہوگا اور شہر میں ٹریفک کے بہاؤ کو منظم رکھنے کے ساتھ ساتھ شہریوں میں ٹریفک آگاہی پیدا کرنے میں بھی کلیدی کردار ادا کرے گا۔

  • ٹریفک پولیس نے متعدد ٹریفک اہلکاروں کے چالان کر دیے

    ٹریفک پولیس نے متعدد ٹریفک اہلکاروں کے چالان کر دیے

    کراچی (28 جولائی 2025): شہر قائد میں ٹریفک قوانین پر عمل درآمد کروانے کے لیے جاری مہم میں پیٹی بند بھائی بھی نہ بچ سکے، اور ٹریفک پولیس نے متعدد اہلکاروں کے چالان کر دیے، جو شہریوں کے لیے ایک پیغام ہے کہ اب قوانین پر عمل درآمد کے سلسلے میں کوئی رو رعایت نہیں برتی جائے گی۔

    تفصیلات کے مطابق کراچی میں ٹریفک قوانین کی خلاف ورزی کرنے پر پیٹی بند بھائی بھی ٹریفک اہلکاروں کے ہاتھوں نہ بچ سکے، محکمہ ٹریفک کی جانب سے جاری مہم کے دوران پولیس نے متعدد اہلکاروں کے چالان اور جرمانے بھی کر دیے ہیں۔ٹریفک پولیس چالان کراچی

    ڈی آئی جی ٹریفک پیر محمد شاہ کے مطابق ٹریفک پولیس بلا تفریق کارروائیاں کر رہی ہے، عام شہری کی طرح محکمہ ٹریفک کے کسی افسر یا اہلکار کو بھی قانون شکنی کی اجازت نہیں ہے۔

    سی ٹی ڈی نے منگھوپیر میں ایک مکان پر چھاپے میں 3 دہشت گرد مار دیے

    ڈی آئی جی ٹریفک کے مطابق اب تک 24 سے زائد اہلکاروں کو مختلف خلاف ورزیوں پر جرمانے کیے گئے ہیں، جن میں 23 کا تعلق ٹریفک پولیس جب کہ ایک کا تعلق ڈسٹرکٹ پولیس سے ہے، پیرمحمد شاہ نے بتایا کہ جن اہلکاروں کے چالان کیے گئے ان میں 8 اہلکار سٹی، 1 کورنگی، 7 ایسٹ، 7 ساؤتھ اور 1 ڈسٹرکٹ سینٹرل میں تعینات ہے۔

    جن اہلکاروں کے چالان ہوئے ان کی خلاف ورزیوں کے بارے میں ڈی آئی جی نے بتایا کہ کچھ اہلکاروں نے ہیلمٹ نہیں پہنا تھا، اور کچھ غلط سمت موٹر سائیکل چلا رہے تھے۔ انھوں نے کہا کہ ٹریفک قوانین پر عمل درآمد کروانے کے لیے بلاتفریق کارروائیاں جاری رہیں گی۔

  • لاہور: پولیس اہلکار نے وزیراعلیٰ پنجاب کے بیٹے جنید صفدر کا چالان کردیا

    لاہور: پولیس اہلکار نے وزیراعلیٰ پنجاب کے بیٹے جنید صفدر کا چالان کردیا

    لاہور: وزیراعلیٰ پنجاب مریم نواز کے بیٹے جنید صفدر کا چالان کردیا گیا، ٹریفک قوانین کی خلاف ورزی پر ان کا چالان کردیا گیا۔

    ذرائع نے بتایا کہ جوہرٹاؤن لاہور میں پولیس اہلکار کی جانب سے مریم نواز کے صاحبزادے جنید صفدر کا چالان کیا گیا، نئے ٹریفک رولز کی خلاف ورزی کرنے پر وزیراعلیٰ پنجاب کے بیٹے جنید صفدر کا چالان کیا گیا۔

    لاہوریوں نے ٹریفک قوانین کی خلاف ورزیوں کے تمام ریکارڈ توڑ دیئے

    اس سے قبل حکومت سندھ کی جانب سے ٹریفک قوانین کی پاسداری کے لیے اصلاحات کا اعلان کیا تھا، ڈی آئی جی ٹریفک پیر محمد شاہ کا کہنا تھا کہ یکم جون سے شہر قائد میں ٹریفک قوانین کی خلاف ورزی پر کو بھاری جرمانہ ادا کرنا ہوگا۔

    ڈی آئی جی ٹریفک کا کہنا تھا کہ اصلاحات کا عمل مکمل ہو گیا، یکم جون سے چالان کی رقم کے پانچ ہزار سے پانچ لاکھ روپے تک بھرنا پڑیں گے۔

    https://urdu.arynews.tv/traffic-police-issue-challans-worth-three-billion-for-first-time-in-history-in-lahore/

  • ٹریفک چالان 5 ہزار سے 5 لاکھ تک، کراچی والے ہوشیار

    ٹریفک چالان 5 ہزار سے 5 لاکھ تک، کراچی والے ہوشیار

    کراچی: حکومت سندھ نے ٹریفک قوانین کی پاس داری کے لیے اصلاحات کا اعلان کیا ہے۔

    تفصیلات کے مطابق حکومت سندھ نے ٹریفک قوانین کی پاسداری کے لیے اصلاحات کا اعلان کر دیا ہے، ڈی آئی جی ٹریفک پیر محمد شاہ نے کہا ہے کہ یکم جون سے شہر قائد میں ٹریفک قوانین کی خلاف ورزی کرنے والوں کو 5 ہزار سے 5 لاکھ روپے تک جرمانہ ادا کرنا ہوگا۔

    کراچی والے اب ہوشیار ہو جائیں، کیوں کہ امیر زادہ ہو یا عام شہری سب کو ٹریفک قوانین پر عمل کرنا پڑے گا، ڈی آئی جی ٹریفک کا کہنا ہے کہ اصلاحات کا عمل مکمل ہو گیا، یکم جون سے چالان کی رقم کے پانچ ہزار سے پانچ لاکھ روپے بھرنا پڑیں گے۔

    کراچی کی 11 مرکزی سڑکوں پر پابندی کے باوجود رکشے کیوں رواں دواں ہیں؟ ویڈیو رپورٹ

    انھوں نے کہا شہر میں اب قوانین کی خلاف ورزی پر پیسے دو جان چھڑاوٴ والا سسٹم نہیں چلے گا، جدید کیمروں کی مدد سے پیپر لیس سسٹم کے تحت چالان گھر تک پہنچائیں گے۔ ڈی آئی جی ٹریفک کے مطابق موٹر بائیک کے لیے 5 ہزار، کار کے لیے 10 ہزار، بسوں کے لیے 15 ہزار، اور بڑی گاڑیوں ہیوی ٹریفک کے لیے 20 ہزار روپے کے جرمانوں کی تجویز دی گئی ہے۔

    ڈی آئی جی ٹریفک کے مطابق ڈرائیونگ لائسنس کا حصول بھی اب آسان نہیں ہوگا، کراچی ڈرائیونگ انسٹیوٹ کے تحت 30 گھنٹے ڈرائیونگ کا ٹیسٹ دینا ہوگا۔ انھوں نے کہا ہیوی ٹریفک کا بھی علاج کر رہے ہیں۔ تاہم، ڈی آئی جی ٹریفک نے شکوہ کیا کہ سندھ میں ٹریفک حادثات سے سب سے زیادہ اموات ضلع گھوٹکی میں ہوتی ہیں، تاہم میڈیا رپورٹ نہیں کرتا۔

    ملٹی میڈیا – ویڈیو خبریں دیکھنے کے لیے کلک کریں

  • اوور لوڈنگ، اوور اسپیڈنگ، غیر معیاری گاڑیوں کے خلاف ایکشن شروع

    اوور لوڈنگ، اوور اسپیڈنگ، غیر معیاری گاڑیوں کے خلاف ایکشن شروع

    کراچی: شہر قائد میں ٹریفک حادثات میں پے در پے اموات کے بعد روڈ سیفٹی کمیٹی نے ٹریفک خلاف ورزیوں پر ایکشن لے لیا۔

    تفصیلات کے مطابق کراچی میں صوبائی وزیر شرجیل میمن کی ہدایت پر روڈ سیفٹی کمیٹی ایکشن میں آ گئی ہے، اوور لوڈنگ، اوور اسپیڈنگ اور غیر معیاری کمرشل گاڑیوں کے خلاف کریک ڈاؤن شروع ہو گیا ہے۔

    کریک ڈاؤن کے دوران 33 گاڑیوں کی جانچ کی گئی، 20 کا چالان کیا گیا، اور 4 گاڑیاں تحویل میں لے لی گئیں، مجموعی طور پر خلاف ورزی کرنے والے ڈرائیورز پر ایک لاکھ سے زائد جرمانہ کیا گیا۔

    شرجیل میمن نے کہا ہے کہ شہر میں اوور لوڈنگ، اوور اسپیڈنگ یا ان فٹ گاڑیوں کو سڑکوں پر برداشت نہیں کیا جائے گا۔

    ادھر چیف سیکریٹری سندھ نے شہر میں بڑھتے ٹریفک حادثات پر اعلیٰ سطح کا اجلاس 10 فروری کو طلب کر لیا ہے، اجلاس میں آئی جی سندھ، کمشنر کراچی، سیکریٹری ٹرانسپورٹ، ڈی آئی جی ٹریفک اور دیگر حکام شریک ہوں گے، ترجمان نے کہا کہ اجلاس میں ہیوی ٹریفک ریگولیٹ کرنے کے اقدامات زیر غور آئیں گے، چیف سیکریٹری نے کہا کہ شہر میں حادثات کی روک تھام کے لیے ٹریفک پولیس کی نفری بڑھائی جائے گی۔

    کراچی : ایک اور خونی ڈمپر نے موٹر سائیکل سوار بہن بھائی کو کچل دیا

    واضح رہے کہ کراچی میں بے قابو خونی ڈمپر لوگوں کی جانوں سے کھیلنے لگے ہیں، گزشتہ رات شاہ لطیف ٹاؤن میں ایک اور تیز رفتار ڈمپر نے موٹر سائیکل سوار بہن بھائی کو ٹکر مار دی۔ حادثے میں موٹر سائیکل سوار بھائی جاں بحق اور اس کی بہن شدید زخمی ہو گئی۔

  • ویڈیو رپورٹ: اے آئی چالان سسٹم سے محروم شہر، جہاں پولیس ٹولیوں کی شکل میں چالان کرتی ہے

    ویڈیو رپورٹ: اے آئی چالان سسٹم سے محروم شہر، جہاں پولیس ٹولیوں کی شکل میں چالان کرتی ہے

    کراچی پاکستان کا سب سے بڑا شہر ہونے کے باوجود اب تک ٹریفک چالان کے جدید نظام سے محروم ہے۔

    لاہور میں گاڑیوں کا چالان اب آرٹیفیشل انٹیلیجنس کے ذریعے کیا جائے گا، چالان کے اس طریقہ کار میں کسی اہلکار کی ضرورت نہیں ہوتی، اس جدید سسٹم کو دبئی طرز پر نافذ کیا جا رہا ہے۔

    لیکن پاکستان کا سب سے بڑا شہر کراچی، جہاں 70 لاکھ سے زائد موٹر سائکلیں اور لاکھوں گاڑیاں سڑکوں پر دوڑ رہی ہیں، ہر وقت ٹریفک کے سنگین مسائل کا شکار ہے، ٹریفک قوانین کی خلاف ورزیوں پر جدید چالان کے نظام سے اب تک محروم ہے، شہر بھر میں اب بھی ٹریفک پولیس ٹولیوں کی شکل میں چالان کرتی نظر آتی ہے۔

    لاہور میں 2016 سے کیمروں کے ذریعے سڑکوں پر ٹریفک قوانین کی خلاف ورزیوں پر ای چالان متعارف کیا گیا تھا، پنجاب پولیس نے حال ہی میں آرٹیفیشل انٹیلیجنس کے ذریعے چالان کرنے کا نظام متعارف کرایا ہے۔

    پنجاب پولیس کی جانب سے جاری کردہ ویڈیو کے مطابق یہ جدید نظام سڑکوں پر موٹر سائکلوں پر ٹرپل سواریوں سے لے کر ہر طرح کی خلاف ورزیوں پر چالان کر سکے گا۔ واضح رہے کہ دنیا بھر میں ٹریفک قوانین کی خلاف ورزیوں پر کیمروں کے ذریعے چالان کا نظام رائج ہے۔

    ویڈیو رپورٹ: روزانہ 3 افراد ہیوی کمرشل گاڑیوں سے حادثاتی موت کا شکار ہو رہے ہیں

    ڈی آی جی ٹریفک کراچی احد نواز چیمہ نے بتایا کہ گزشتہ برس ٹریفک پولیس نے کیمرے کے ذریعے چالان کا کنٹریکٹ دینے کی کوشش کی تھی لیکن لیکن فنڈز کی کمی کی وجہ سے وہ کنٹریکٹ ایوارڈ نہیں ہو سکا۔ ہمیں امید ہے کہ اس سال کراچی میں کیمروں کے ذریعے چالان کا نظام شروع کر دیا جائے گا۔

  • چالان کرنے پر ڈرائیور نے ٹریفک اہلکاروں پر گاڑی چڑھا دی، فوٹیج بھی سامنے آگئی

    چالان کرنے پر ڈرائیور نے ٹریفک اہلکاروں پر گاڑی چڑھا دی، فوٹیج بھی سامنے آگئی

    پشاور میں چالان کیے جانے پر ڈرائیور نے ٹریفک اہلکاروں پر گاڑی چڑھا دی، جس کی سی سی ٹی وی فوٹیج بھی سامنے آگئی۔

    تفصیلات کے مطابق پشاور کے نشتر آباد چوک میں چلان کیے جانے پر ڈرائیور نے ٹریفک اہلکاروں پر گاڑی چڑھادی، پشاور پولیس کے مطابق واقعے کی سی سی ٹی فوٹیج سامنے آئی ہے جس میں ملزمان کو ٹریفک اہلکاروں پر گاڑی چڑھانے کے بعد فرار ہوتے دیکھا جاسکتا ہے۔

    Challan karne par driver ne gari traffic ahelkaro par chara di (youtube.com)

    پولیس کا کہنا ہے کہ یہ واقعہ نشتر آباد چوک میں پیش آیا جبکہ زخمی ٹریفک پولیس اہلکار کو اسپتال منتقل کردیا گیا ہے، ملزم اس واقعے کے بعد سے فرار ہیں تاہم مقدمہ درج کرلیا گیا ہے۔

    مقدمے کے متن کے مطابق ٹریفک قوانین کی خلاف ورزی پر  چالان کیا گیا، ڈرائیور نے مارنے کی غرض سے گاڑی ہم پر چڑھائی، پولیس کا کہنا ہے کہ ملزمان کا موبائل فون نمبر ٹریس کررہے ہیں جلد تلاش کرلیا جائے گا۔

  • پی ٹی آئی کے ایم پی اے کا چالان کرنے والے 2 ٹریفک اہلکار معطل

    پی ٹی آئی کے ایم پی اے کا چالان کرنے والے 2 ٹریفک اہلکار معطل

    پشاور : پی ٹی آئی کے ایم پی اے شیرعلی آفریدی کا چالان کرنے والے 2 ٹریفک اہلکاروں کو معطل کردیا گیا۔

    تفصیلات کے مطابق چیف ٹریفک پولیس آفیسر پشاور نے پی ٹی آئی کے ایم پی اے شیرعلی آفریدی کا چالان کرنے والے دوٹریفک اہلکاروں کو معطل کردیا۔

    دونوں اہلکاروں کی معطلی کا اعلامیہ جاری کردیا، جس میں کہا ہے کہ اہلکاروں نے ٹریفک قوانین کی خلاف ورزی پر ایم پی اے کو 500 روپے جرمانہ کیا تھا۔

    ٹریفک پولیس کا کہنا تھا کہ ایم پی اے نے شکایت کی کہ ٹریفک اہلکاروں نے ان کے ساتھ بدسلوکی کی، بد اخلاقی پر ٹریفک اہلکاروں کو معطل کیا گیا ہے۔

    شیرعلی آفریدی نے بتایا کہ ٹریفک اہلکار نے رکنے کا اشارہ دیا تومیں نے گاڑی کھڑی کردی، میرے بھائی نے ٹریفک اہلکار کو کہا کہ یہ ایم پی اے ہے۔

    پی ٹی آئی ایم پی اے کا کہنا تھا کہ بات شروع ہوتے ہی ٹریفک اہلکار نے مجھے نامناسب الفاظ کہیں، ٹریفک اہلکار نے میرے ساتھ بدسلوکی کی۔

  • الیکشن تک چالان کس طرح ہوں گے؟ اہم اعلان

    الیکشن تک چالان کس طرح ہوں گے؟ اہم اعلان

    لاہور: سٹی ٹریفک آفیسر لاہور  نے عام انتخابات کے پیش نظر 8 فروری تک کسی بھی شہری کا شناختی کارڈ پر چالان نہ کرنے کا فیصلہ کیا ہے۔

    اے آر وائی نیوز کے مطابق سٹی ٹریفک پولیس( سی ٹی او) عمارہ اطہر نے کہا ہے کہ 8 فروری تک کسی شہری کا شناختی کارڈ پر چالان نہیں کیا جائے گا۔

    عمارہ اطہر کا کہنا تھا کہ شہری رات 11 بجے تک شناختی کارڈ متعلقہ ٹریفک سیکشن سے موصول کر سکتے ہیں، چالان کی صورت میں شہری بطور ضمانت رجسٹریشن بک، لائسنس جمع کرواسکتے ہیں۔

     سی ٹی او لاہور کے مطابق ڈیجیٹل سسٹم سے شہری چالان جمع کروا کر کاغذات واپسی حاصل کرسکتے ہیں۔

    واضح رہے کہ پاکستان میں عام انتخابات کے لیے پولنگ کل ہو گی، ووٹرز قومی اور صوبائی اسمبلیوں کے 855 حلقوں میں امیدوار چنیں گے۔

  • چالان پر مشتعل ہو کر شہری نے اپنی گاڑی تباہ کردی

    چالان پر مشتعل ہو کر شہری نے اپنی گاڑی تباہ کردی

    عمان: اردن میں ایک شہری نے 3 بار چالان کیے جانے پر مشتعل ہو کر گاڑی کو پہاڑ کی چوٹی سے دھکا دے دیا اور گاڑی تباہ کردی۔

    العربیہ نیٹ کے مطابق اردن میں ایک شہری نے مہم جوئی کا مظاہرہ کرتے ہوئے اپنی گاڑی کو پہاڑی کی چوٹی سے گرا کر اس کی ویڈیو بنائی اور اسے سماجی رابطوں کی ویب سائٹ فیس بک پر پوسٹ کی۔

    اردنی شہری شادی المداحہ اپنے غصے پر قابو نہ رکھ سکا کیونکہ اسے جنوبی اردن کی الکراک گورنری میں 3 مقامات پرٹریفک خلاف ورزی پر چالان ہوا، اس لیے اس کے پاس اپنی گاڑی کو پہاڑ کی چوٹی سے دھکیلنے کے سوا کوئی چارہ نہیں تھا۔

    اس نے گاڑی کا چالان بھرنے سے انکار کرتے ہوئے اپنی گاڑی ہی کو تباہ کردیا۔

    مشتعل شہری جعفر المداحدہ نے فیس بک پر لائیو ویڈیو میں اس کی وضاحت کی کہ اس کے ساتھ کیا ہوا۔

    اس نے وضاحت کی کہ وہ کل صبح بیدار ہوا اور ایک کلو لیموں خریدنے گیا، جہاں ایک ٹریفک سارجنٹ نے اسے روکا اور اس کا چالان کیا۔

    اس نے کہا کہ خلاف ورزی ایک شق سے ہونی چاہیئے تھی، بحث بڑھ کر 3 شقوں کی خلاف ورزی بن گئی، جس سے اس شخص نے انکار کر دیا۔ اس کے اس رویے پر سوشل میڈیا پر ملا جلا رد عمل سامنے آیا ہے۔

    دوسری طرف اردنی پبلک سکیورٹی ڈائریکٹوریٹ کے میڈیا ترجمان کرنل عامر السرتاوی نے گاڑی کی ٹریفک خلاف ورزی کی تفصیلات بتائی۔

    انہوں نے تصدیق کی کہ گاڑی کے ڈرائیور نے اسے اس طرح روکا جس سے ٹریفک میں رکاوٹ پیدا ہوئی، ٹریفک سارجنٹ کی جانب سے ایک سے زائد بار پوچھے جانے کے باوجود اس نے تعاون سے انکار کیا۔