ARYNews.tv | Urdu – Har Lamha Bakhabar

Tag: چوری

  • دبئی میں ڈرائیور کی کمپنی سے چوری کی کوشش

    دبئی میں ڈرائیور کی کمپنی سے چوری کی کوشش

    ابو ظہبی: متحدہ عرب امارات کے شہر دبئی میں زیر تعمیر عمارت سے سریا چوری کرنے کی کوشش ناکام ہونے کے بعد کمپنی ڈرائیور کو سزا سنا دی گئی۔

    اردو نیوز کے مطابق متحدہ عرب امارات کے شہر دبئی میں زیر تعمیرعمارت کے سیکیورٹی گارڈ نے موبائل کیمرے کی مدد سے چوری کی واردات ناکام بنادی، چور میں کمپنی کا ڈرائیور ملوث تھا۔

    کمپنی کے ڈرائیور نے زیر تعمیرعمارت کے احاطے میں موجود سریا، سکریپ کے 3 تاجروں کے ہاتھوں فروخت کرنے کی کوشش کی تھی۔

    سیکیورٹی گارڈ نے اپنے موبائل کیمرے سے واردات میں استعمال ہونے والی گاڑی اور ملزمان کی ویڈیو بنالی تھی، جیسے ہی ملزمان کو خطرہ محسوس ہوا وہ مسروقہ سریا چھوڑ کر فرار ہوگئے۔

    دبئی پولیس نے کمپنی کے ڈرائیور اور تینوں مفرور ملزمان کو گرفتار کرلیا۔

    دبئی فوجداری عدالت نے ڈرائیور کو قید کی سزا سنائی ہے اور سزا مکمل ہونے پر بے دخلی کا حکم بھی دیا ہے، سریا خریدنے والوں کو بری کردیا گیا۔

  • دبئی: دکان سے پتلون چرانے پر یورپی شہری کو سزا

    دبئی: دکان سے پتلون چرانے پر یورپی شہری کو سزا

    ابو ظہبی: متحدہ عرب امارات کے شہر دبئی میں ایک یورپی شہری کو ایک دکان سے پتلون چرانا مہنگا پڑ گیا، عدالت نے جرم ثابت ہوجانے پر سزا سنا دی۔

    اردو نیوز کے مطابق یورپی شہری کو دبئی میں معروف کمپنی کی پتلون کی چوری مہنگی پڑگئی، عدالت نے قید و جرمانے کا حکم سنا دیا۔

    یورپی شہری کو 13 سو 75 درہم قیمت والی پتلون پسند آگئی تھی، اس نے کاؤنٹر پر شرٹ کی قیمت 575 درہم ادا کردی اور پتلون بیگ میں چھپا کر شاپنگ سینٹر سے باہر نکل آیا۔

    شاپنگ سینٹر کے نمائندے نے تفصیلات بتاتے ہوئے کہا کہ یورپی شہری نے پسندیدہ پتلون لے کر چینجنگ روم میں جا کر پتلون بیگ میں ڈال لی اور شرٹ چیک کرنے کے بعد باہر آیا اور کاؤنٹر پر اس نے صرف شرٹ کی قیمت ادا کی اور باہر نکل گیا۔

    دبئی کورٹ نے الزام ثابت ہوجانے پر یورپی شہری کو ایک ماہ قید اور مسروقہ پتلون کی قیمت ادا کرنے کا حکم دے دیا۔

    یورپی باشندے نے پولیس اسٹیشن میں چوری کی واردات کے حوالے سے اقبالی بیان ریکارڈ کروادیا۔

    عدالت نے رحمدلی کا مظاہرہ کرتے ہوئے اسے ایک ماہ قید اور ریاست سے بے دخلی کی سزا سنائی، پتلون کی قیمت جمع کروانے کا بھی حکم دیا۔

  • 35 لاکھ روپے کے سگریٹ چوری کرنے والا ملزم گرفتار

    35 لاکھ روپے کے سگریٹ چوری کرنے والا ملزم گرفتار

    بھارتی ریاست راجھستان میں 35 لاکھ بھارتی روپے کے سگریٹ چوری کر لیے گئے، پولیس نے ملزم کو گرفتار کرلیا۔

    بھارتی میڈیا کے مطابق راجھستان کے ضلع الور میں سبھاش چندر نامی شخص نے پولیس کو رپورٹ درج کروائی کہ اس کے گوادم سے لاکھوں مالیت کی سگریٹ چوری کی گئی ہے۔

    چوری شدہ سگریٹ کی مالیت 35 لاکھ روپے تھے۔

    پولیس نے تفتیش شروع کی اور جلد ہی اوم پرکاش نامی ملزم کو گرفتار کرلیا گیا، ملزم گرفتاری سے بچنے کے لیے مفرور تھا۔

    پولیس کے مطابق واردات میں اوم پرکاش کے ساتھ کئی افراد شریک ہیں جن کی تلاش جاری ہے۔

  • کے فور منصوبہ تاحال نامکمل، قومی خزانے کو اربوں کا نقصان

    کے فور منصوبہ تاحال نامکمل، قومی خزانے کو اربوں کا نقصان

    کراچی: صوبہ سندھ میں شروع کیا جانے والا فراہمی آب کا منصوبہ کے فور تاحال مکمل نہ ہوسکا اور اس کے نام پر قومی خزانے کو اربوں روپے کا نقصان ہوگیا۔

    تفصیلات کے مطابق کے فور منصوبے کے نام پر قومی خزانے کو 14 ارب روپے کا نقصان ہوگیا، کے فور منصوبہ مکمل نہ ہوا مگرسامان چوری ہونا شروع ہوگیا۔

    منصوبے کے ترک شدہ ڈیزائن کے لیے منگوائے گئے کروڑوں روپے کے پائپ چوری ہوگئے ہیں۔

    سنہ 2018 میں پرانے ڈیزائن پر کام رکا تو قیمتی پائپ کو بغیر نگرانی چھوڑ دیا گیا تھا، چور پائپس کو گیس کٹر کے ساتھ کاٹ کر لے جاتے رہے، انتظامیہ لاعلم رہی۔

    پولیس کا کہنا ہے کہ تھانہ جنگ شاہی میں چوری کا مقدمہ درج کرلیا گیا ہے جبکہ 2 ملزمان کو گرفتار بھی کرلیا گیا ہے۔

    خیال رہے کہ کے فور منصوبے کے نئے ڈیزائن پر واپڈا کام کر رہی ہے، نئے ڈیزائن کے، کے فور منصوبے کی لاگت 126 ارب روپے ہے۔

  • چوری پر رپورٹ دینے والا صحافی کیمرے کے سامنے لٹ گیا

    چوری پر رپورٹ دینے والا صحافی کیمرے کے سامنے لٹ گیا

    ٹیلی ویژن پر براہ راست نشریات کے دوران رپورٹرز یا اینکرز کے ساتھ کوئی دلچسپ یا ناخوشگوار واقعہ پیش آجاتا ہے جو اس نشریات کو یادگار بنا دیتا ہے۔

    ایسا ہی ایک واقعہ چلی کے دارالحکومت سان تیاگو میں پیش آیا جہاں ڈکیتی کی وارداتوں پر رپورٹ کرنے والے رپورٹر کو نشریات کے دوران لوٹ لیا گیا، اور اسے لوٹنے والا کوئی اور نہیں ایک طوطا تھا۔

    سوشل میڈیا پر وائرل ہونے والی ویڈیو میں دیکھا جاسکتا ہے کہ رپورٹر مقامی زبان میں علاقے میں ہونے والی چوریوں کے بارے میں معلومات دے رہا ہے۔

    اس دوران ایک طوطا اس کے کندھے پر آ کر بیٹھ جاتا ہے تاہم رپورٹر اپنی گفتگو جاری رکھتا ہے۔

    اس کے بعد شرارتی طوطا رپورٹر کے کان میں لگا ایئر پیس نکال لیتا ہے اور پھر اچانک اڑ جاتا ہے۔

    اس دوران رپورٹر اس چوری سے پریشان تو ہوگیا تاہم اس نے اپنی رپورٹ جاری رکھی اور وہاں موجود افراد کو متوجہ کرنے کے لیے اشارے بھی کرتا رہا۔

    ٹویٹر پر صارفین اس ویڈیو سے بے حد محفوظ ہوئے اور رپورٹر سے ہمدردی کا اظہار بھی کیا۔

  • بھارتی اداکارہ کو صارفین نے چوری پر ایک بار پھر آڑے ہاتھوں لے لیا

    بھارتی اداکارہ کو صارفین نے چوری پر ایک بار پھر آڑے ہاتھوں لے لیا

    بھارت: ماڈل اور بالی ووڈ اداکارہ اروشی روٹیلا منفرد وجوہ سے میڈیا کی سرخیوں میں رہتی ہیں۔

     حال ہی میں ان کا اور بھارتی کرکٹر رشبھ پنت کا معاملہ گزشتہ کئی دنوں تک سوشل میڈیا اور مین اسٹریم میڈیا پر زیرِ بحث رہا تھا۔

    اروشی روٹیلا نے ایک انٹرویو میں دعوٰی کیا تھا کہ ایک ’آر پی‘ نامی شخص نے ان سے ملنے کے لیے ہوٹل میں کئی گھنٹے انتظار کیا، اس دعوے کے بعد اروشی اور رشبھ پنت کے درمیان لفظی جنگ شروع ہو گئی جو اروشی کے معافی مانگنے پر ختم ہوئی۔

    ایشیا کپ کے دوران بھی پاکستان کے فاسٹ بولر نسیم شاہ کی ویڈیو ری شیئر کرنے پر کئی دنوں تک وہ سوشل میڈیا میں تبصروں کی زینت بنی رہی۔

    لیکن اس بار انہیں سوشل میڈیا صارفین نے ایک چوری کرنے کی وجہ سے آڑے ہاتھوں لیا ہے۔

    Urvashi's entire TedX talk is plagiarized from two articles about ted talks.. she's literally reading out articles word for word.. how did the audience sit through this? Lol (links in comments)
    by inBollyBlindsNGossip

    صارف کی جانب سے ان پر یہ الزام لگایا جارہا ہے کہ ٹی ای ڈی ٹاک میں انہوں نے جو تقریر کی اس کا ایک بڑا حصہ چوری کیا ہوا ہے۔

    میڈیا رپورٹ کے مطابق ماڈل و اداکارہ نے تقریر میں ازابیل آلیندے، چیمامانڈا نگوزی اڈیچی، ڈین پنک، برینی براؤن، اور دیگر کی تقریروں کے کچھ حصے اپنی تقریر میں شامل کیے ہیں۔

    یاد رہے کہ یہ پہلی بار نہیں ہے جب ان پر اس طرح کا الزام لگایا جارہا ہے، اس سے قبل 2021 میں اروشی روٹیلا پر اسپائیڈر مین کی اداکارہ زندایا کی انسٹا پوسٹ کا کیپشن کاپی کرنے کا الزام لگایا گیا تھا۔

    جب کہ 2019 میں اروشی روٹیلا کو چنکی پانڈے کے بھتیجے آہان پانڈے کے ساتھ کافی پیتے ہوئے دیکھا گیا جس کے بعد ڈیٹنگ کی افواہیں گردش کرنے لگی تھی۔ اروشی روٹیلا نے ان الزامات کا تفصیلی جواب سپر ماڈل گیگی حدید کی پوسٹ چوری کر کے دیا تھا۔

  • چوروں نے نہایت آسانی سے دکان کا شٹر کھول لیا، ویڈیو وائرل

    چوروں نے نہایت آسانی سے دکان کا شٹر کھول لیا، ویڈیو وائرل

    بھارت میں چوری کی ایک انوکھی واردات پیش آئی جس میں چوروں نے کپڑے کی مدد سے دکان کا بھاری شٹر کھول لیا اور قیمتی سامان اور نقدی لے اڑے۔

    سوشل میڈیا پر وائرل یہ ویڈیو سی سی ٹی وی کیمرے کی ہے جس نے چوروں کی کارستانی فلمبند کرلی۔

    ویڈیو میں دیکھا جاسکتا ہے کہ 3 سے 4 چور رات کے اندھیرے میں چوری کی نیت سے ایک دکان کے قریب پہنچتے ہیں۔ پہلے تو وہ ہاتھ سے شٹر کھولنے کی کوشش کرتے ہیں لیکن ناکام رہتے ہیں۔

    اس کے بعد شٹر کے ہینڈل میں ایک کپڑا پھنساتے ہیں اور سب مل کر کپڑے کو کھینچتے ہیں جس سے شٹر اچھا خاصا کھل جاتا ہے۔

    اس کے بعد چور اندر جا کر دکان کا سامان اور نقدی چراتے ہیں اور باآسانی فرار ہوجاتے ہیں۔

     

    View this post on Instagram

     

    A post shared by GiDDa CoMpAnY (@giedde)

    سوشل میڈیا پر صارفین چوروں کی یہ چالاکی دیکھ کر دنگ رہ گئے، ایک صارف نے لکھا کہ اس ویڈیو سے دیگر کئی چوروں کو بھی یہ آئیڈیا مل گیا۔

  • سرکاری ٹی وی پر پیٹرول چرانے کا طریقہ بتایا جانے لگا

    سرکاری ٹی وی پر پیٹرول چرانے کا طریقہ بتایا جانے لگا

    ایتھنز: یونان میں سرکاری ٹی وی پر پیٹرول چرانے کا طریقہ بتایا جانے لگا جس پر لوگوں میں غم و غصے کی لہر دوڑ گئی، یونان میں اس وقت پیٹرول کی قیمت آسمان پر جا پہنچی ہے۔

    بین الاقوامی ویب سائٹ کے مطابق یونان کا سرکاری ٹی وی چینل اس وقت لوگوں کی تنقید کا نشانہ بن گیا جب ایک پروگرام میں دکھایا گیا کہ ایک پائپ سے کسی کی گاڑی سے پیٹرول کیسے نکالا جاسکتا ہے۔

    یہ پروگرام اس وقت نشر ہوا جب یونان میں پیٹرولیم مصنوعات کی قیمتوں میں تیزی سے اضافہ ہوا ہے۔

    ای آر ٹی نامی چینل میں 22 جون کو مارننگ شو میں رپورٹر نے بتایا کہ یہ بہت زیادہ مشکل کام نہیں، درحقیقت آپ کو کسی خصوصی ٹیوب کی بھی ضرورت نہیں، ایک عام پائپ سے بھی ایسا کیا جاسکتا ہے۔

    گاڑی سے پیٹرول کو نکالنے کے طریقہ کار کا مظاہرہ کرنے کے بعد ایک مکینک نے ان جگہوں کی نشاندہی بھی کی جہاں سے گاڑی کے پیٹرول ٹینک سے ایندھن کو چرایا جاسکتا ہے۔

    اس پروگرام پر لوگوں نے سوشل میڈیا نیٹ ورک ٹویٹر پر بہت زیادہ تنقید کی۔

    ایک صارف نے کہا کہ کیا آپ لوگ پاگل ہوگئے ہیں جو لوگوں کو پیٹرول چرانے کے طریقے بتا رہے ہیں۔

    ایک اورصارف نے کہا کہ پیٹرول کو آسانی سے چرانے کے 2 طریقوں کے بعد اب ای آر ٹی کی جانب سے یہ سکھایا جائے گا کہ کس طرح تالوں کو کھولا جاسکتا ہے اور بٹوے چرائے جاسکتے ہیں۔

    یونان کی ایک ویب سائٹ پر اس ویڈیو کو 23 جون تک 1 لاکھ 70 ہزار بار سے زیادہ دیکھا جاچکا تھا جبکہ ہزاروں افراد نے ٹویٹر پر بھی اسے دیکھا۔

    خیال رہے کہ یونان میں حالیہ مہینوں میں ایندھن کی قیمتوں میں اضافہ ہوا ہے اور اس وقت ایک لیٹر پیٹرول کی قیمت 2.37 یورو ہے۔

  • دا کراؤن کے سیٹ سے لاکھوں ڈالر مالیت کے نوادرات چوری

    دا کراؤن کے سیٹ سے لاکھوں ڈالر مالیت کے نوادرات چوری

    امریکی اسٹریمنگ سروس نیٹ فلکس کی مشہور سیریز دا کراؤن میں استعمال ہونے والی 2 لاکھ ڈالرز مالیت کی نوادرات چوری ہوگئیں، نیٹ فلکس نے تصدیق کرتے ہوئے بتایا کہ چوری ہونے والی نادر اشیا کی تعداد 350 کے قریب بنتی ہے۔

    نیٹ فلکس کے ترجمان کے مطابق چوری ہونے والی اشیا میں سونے اور چاندی کا سامان بھی شامل ہے۔

    ترجمان کا مزید کہنا تھا کہ چوری ہونے والی اشیا کا متبادل منگوا لیا گیا ہے اور انہیں امید ہے کہ اس چوری سے سیریز کی عکس بندی متاثر نہیں ہوگی۔

    دوسری جانب ساؤتھ یارک شائر پولیس کا کہنا ہے کہ یہ چوری بدھ کو ہوئی جب 3 گاڑیوں میں موجود لوگ سب سامان اٹھا کر لے گئے۔

    یاد رہے کہ اس وقت دا کراؤن کے پانچویں سیزن کی عکسبندی کی جا رہی ہے، سیزن 5 کی عکس بندی جولائی میں شروع ہوئی تھی اور سیزن کے دوران ملکہ الزبتھ دوئم کو بھی دکھایا جائے گا۔

    دا کراؤن کا پانچواں سیزن رواں سال نومبر میں نشر کیا جائے گا۔

  • 2022 کی چوری کی سب سے بڑی واردات کا سراغ لگ گیا

    2022 کی چوری کی سب سے بڑی واردات کا سراغ لگ گیا

    راولپنڈی: پولیس نے 2022 کی چوری کی سب سے بڑی واردات کا سراغ لگا لیا، واردات خواتین پر مشتمل گروہ نے کی تھی۔

    تفصیلات کے مطابق راولپنڈی پولیس نے 2022 کی چوری کی سب سے بڑی واردات کا سراغ لگا کر گھر میں کام کاج کے دوران وارداتیں کرنے والی خواتین چور گینگ کو گرفتار کر لیا۔

    ایس ایس پی آپریشن وسیم ریاض نے نیوز کانفرنس میں انکشاف کیا کہ گرفتار کی گئیں 2 چور خواتین نے تیسری خاتون ساتھی کے ہمراہ تھانہ ریس کورس کی حدود افشاں کالونی میں چوری کی بڑی واردات کی تھی۔

    واردات کے دوران گھر سے 65 تولہ سونے کے زیورات، اور 13 لاکھ روپے چرائے تھے، ایس ایس پی آپریشن کے مطابق ملوث خواتین کو گرفتار کر کے چوری کیا گیا مال برآمد کر لیا گیا ہے۔

    ایس ایس پی آپریشن وسیم ریاض نے دوران نیوز کانفرنس بتایا کہ چور خواتین گینگ گھر میں ملازمت حاصل کر کے لوٹ مار کرتی تھیں، یہ خواتین 3 جنوری 2022 کو بلال نامی شہری کے گھر سے لوٹ مار کر کے فرار ہو گئی تھیں۔

    دونوں خواتین کو پولیس نے جڑانوالہ سے گرفتار کیا، جب کہ تیسری ساتھی ملزمہ کی گرفتاری کے لیے پولیس کی تلاش جاری ہے، پولیس نے برآمد ہونے والا مال مسروقہ بھی میڈیا کے سامنے پیش کیا۔

    مددگار 15 کے اہل کار کا ذہنی معذور پر انسانیت سوز تشدد (ویڈیو کمزور دل افراد نہ دیکھیں)