Tag: چوری

دبئی: کرونا وبا کے دوران فیس ماسک سے جہاں وائرس کی منتقلی روکی جاتی ہے، وہاں ماسک نے ایک چورنی بھی پکڑوا دی ہے۔

تفصیلات کے مطابق دبئی میں فیس ماسک کی مدد سے ایک عجیب و غریب قسم کی چوری پکڑی گئی ہے، ایک خادمہ کچھ عرصے سے اپنی مالکن کی قیمتی چیزیں چرا رہی تھی لیکن پتا اس وقت چلا جب اس نے ایک فیس ماسک چرا لیا۔

جی سی سی ممالک (خلیج تعاون کونسل) سے تعلق رکھنے والی ایک خاتون نے پولیس کو بتایا کہ اس کی خادمہ اس کے کمرے سے مسلسل چوریاں کرتی رہی ہے، لیکن ان کو کبھی پتا نہیں چلا، وہ سجھتی تھیں کہ ان کی چیزیں کہیں کھو گئیں۔

خاتون کا کہنا تھا چوریوں کا انکشاف ان پر اس وقت ہوا جب انھوں نے اپنا مخصوص نقش و نگار والا فیس ماسک خادمہ کے کمرے میں دیکھا۔

جب خادمہ سے فیس ماسک کے سلسلے میں پوچھ گچھ کی گئی تو وہ ہڑبڑائی، خاتون نے بتایا کہ خادمہ نے دیدہ دلیری سے کہا یہ ماسک آپ ہی نے تو دیا تھا مجھے۔

تاہم مالکن کے بیان کے مطابق انھیں خادمہ کی بات پر شک ہوا کیوں کہ انھیں یاد نہیں آ رہا تھا کہ ماسک انھوں نے دیا ہو، اس لیے انھوں نے خادمہ کے کمرے کی تلاشی لینا شروع کر دی، اور وہ یہ دیکھ کر ششدر رہ گئیں کہ ان کی کھوئی ہوئی قیمتی چیزیں کمرے میں موجود تھیں، جن میں کئی موبائل فونز، آئی پیڈ، کچھ زیورات، قیمتی چشمے اور دیگر چیزیں شامل تھیں۔

خاتون نے بتایا میں نے فوراً پولیس کو اطلاع کر دی جس پر خادمہ کو گرفتار کر لیا گیا، اور تفتیش کے دوران اس نے اقرار کر لیا کہ وہ مسلسل چوریاں کرتی رہی ہے۔ پولیس نے افریقہ سے تعلق رکھنے والی 39 سالہ خادمہ کو 5 ہزار درہم سے زائد کی اشیا چوری کرنے کے جرم میں گرفتار کیا۔