Tag: چور

برازیلیا: جب بات آتی ہے بچوں پر تو مائیں حقیقی زندگی میں ہیرو کا کردار ادا کر جاتی ہیں، ایسا ہی ایک واقعہ برازیل میں سڑک پر بارش کے دوران پیش آیا جسے سی سی ٹی وی کیمروں نے ریکارڈ کر لیا۔

برازیل کے شہر ساؤ پالو کے ایک ساحلی قصبے میں یکم دسمبر کو ایک خاتون اپنی 15 سالہ بیٹی کے ہمراہ شاپنگ کے بعد ٹیکسی کی تلاش میں ایک سڑک پر جا رہی تھیں کہ سائیکل پر سوار چور اچانک بیٹی کا موبائل فون چھین کر فرار ہونے لگا۔

ادھر چور نے پیڈل پر زور سے پاؤں مارے اور ادھر 50 سالہ ماں نے بپھر کر اس کے پیچھے دوڑ لگا دی، ماں کے ہاتھ میں اس وقت ایک چھتری تھی کہ بارش ہو رہی تھی، انھوں نے بند چھتری کھینچ کر سائیکل سوار چور کو دے ماری۔

اس حملے سے سائیکل سوار گیلی سڑک پر اپنا توازن برقرار نہ رکھ سکا اور سائیکل سمیت ڈھیر ہو گیا، جس پر ماں بیٹی دونوں نے مل کر اس کی پٹائی شروع کر دی، ماں نے اپنی چھتری اٹھائی اور چور کی دھلائی کرنے لگیں۔ اس دوران راہ گیر بھی ان کے ساتھ شامل ہو گئے اور چور کو پکڑ کر پیٹنے لگے۔

بیٹی کا موبائل فون بچانے والی مشتعل ماں نے مقامی میڈیا کو بتایا کہ میرا رد عمل بالکل فطری تھا، میں بس اپنی بیٹی کو تحفظ فراہم کرنا چاہ رہی تھی، میں اپنی بیٹی کا خوف زدہ چہرہ دیکھ کر سخت غصے میں آ گئی تھی۔

بہادر ماں نے بتایا کہ انھوں نے انجام کے بارے میں بالکل نہ سوچتے ہوئے چور پر حملہ کیا، سب کچھ بہت اچانک ہوا تھا، میری بیٹی فون بچانا چاہ رہی تھیں لیکن چور اسے لے اڑا، میں اسے روکنے کے لیے مڑی اور اس پر چھتری پھینک دی تاکہ وہ کسی طرح رک سکے۔

انھوں نے کہا میں بالکل پاگل ہو گئی تھی، چور کو پیٹتے ہوئے چلا رہی تھی، میری بیٹی سے تم نے چوری کی ہمت کیسے کی، اور اس کے بعد دیگر لوگ بھی ہمارے ساتھ شامل ہو گئے۔

واضح رہے کہ کچھ دیر کی پٹائی کے بعد چور کو موقع مل گیا اور وہ سائیکل چھوڑ کر بھاگ گیا۔ واقعے کی اطلاع پولیس کو بھی دی گئی جو چور کو تلاش کر رہی ہے۔

بہادر ماں نے بتایا کہ وہ کپڑے خریدنے نکلے تھے، شاپنگ ہو چکی تھی، اور بیٹی اپنے موبائل فون پر ٹیکسی ڈرائیور کی تفصیلات پڑھ رہی تھیں کہ یہ واقعہ پیش آیا۔ ان کا کہنا تھا کہ تین سال قبل ان سے بھی اسی طرح موبائل چھینا گیا تھا۔

ورجینیا: چوروں نے ایک گروسری اسٹور میں واردات کے دوران پہچان چھپانے کے لیے نقاب کی جگہ تربوز ‘اوڑھ’ لیے۔

غیر ملکی میڈیا کے مطابق امریکی ریاست ورجینیا میں ایک گروسری اسٹور میں چوروں نے پہچان چھپانے کے لیے اندر سے خالی کیے گئے تربوز سر پر رکھ کر کام یاب واردات کی اور بھاگ گئے۔

ورجینیا کے علاقے لوسیا کی پولیس نے ایک بیان جاری کیا ہے کہ 6 مئی کو علاقے کے ایک گروسری اسٹور میں سر پر تربوز رکھے دو چوروں نے واردات کی تھی، ان میں سے ایک مبینہ چور کو گرفتار کر لیا گیا ہے۔

پولیس کا کہنا تھا کہ واردات کے بعد چور ایک ایسی کار میں بھاگے تھے جو 2006 میں چرائی گئی تھی، پولیس نے واردات کے بعد فیس بک پیج پر تربوز والے سروں کے چوروں کی تصاویر اپ لوڈ کر کے لوگوں سے اپیل کی تھی کہ کسی کے پاس چوروں سے متعلق معلومات ہوں تو پولیس کی مدد کریں۔ ایک ملزم کی گرفتاری کے بعد مذکورہ پوسٹ فیس بک سے ہٹا دی گئی۔

پولیس کے مطابق گرفتار مبینہ چور کی عمر 20 سال ہے، جس پر چوری کرنے، کم عمری میں شراب رکھنے اور شراب چرانے کے الزامات لگائے گئے ہیں۔ مقامی لوگوں کا کہنا تھا کہ یہ ٹاؤن بہت پرسکون ہے، اور یہاں اس قسم کی وارداتیں عموماً نہیں ہوتیں، اس عجیب و غریب واردات نے لوگوں کو حیران کر دیا ہے۔