اسلام آباد: وزیر داخلہ چوہدری نثار علی نے کہا ہے کہ دستاویز کے بغیر ویزا دیے جانے کا وزارت داخلہ اور ایف آئی اے کسی کے پاس بھی ریکارڈ نہیں، مادرپدر ویزے جاری کرنے کا عمل تشویش ناک ہے، اب ایسا نہیں ہوگا، امیگریشن کو ایف آئی سے علیحدہ کردیا، ایک ایک ویزا فارم کی جانچ پڑتال کی جارہی ہے۔
یہ بات انہوں نے اسلام آباد میں پریس کانفرنس کرتے ہوئے کہی۔ انہوں نے کہا کہ ویزے کسی بھی ملک کے لیے انتہائی اہم ہوتے ہیں، ویزے مادر پدر جاری کیے گئے جو کہ تشویش ناک عمل ہے۔
انہوں نے بغیر کسی دستاویز کے غیر ملکیوں کے ملک میں داخلے پر خدشات کا اظہار کیا اور کہا کہ میرے خدشات پر پچھلی دونوں حکومتوں نے جواب نہیں دیا ایک غیر ملک میں موجود سفیر کو ویزا کے اجرا کی اجازت دی گئی۔
ان کا کہنا تھا کہ میں نے 2014 میں اس نوٹی فکیشن کو منسوخ کردیا تھا، غیر ملکی ملی بھگت اور جعلی کاغذات پر پاکستان آتے تھے لیکن اب ایسا نہیں ہوگا کہ کوئی جعلی دستاویز پر پاکستان آئے۔
وزیر داخلہ نے کہا کہ اسلام آباد میں 400 کے قریب مشکوک گھروں پر خدشہ ظاہر کیا ہے ان 400 گھروں کی پچھلی حکومتوں کو آگاہی نہیں تھی۔
امیگریشن کو ایف آئی اے سے علیحدہ کرنے کا فیصلہ
چوہدری نثار کا کہنا تھا کہ ویزا کے اجرا کو شفاف بنانے کے لیے اقدامات کیے ہیں،غیر ملکی ایئر لائنز کو 9 کروڑ روپے کے جرمانے عائد کیے گئے، ویزا کے فارم آن لائن دینے کے لیے سسٹم لارہے ہیں، ساتھ ہی امیگریشن کو ایف آئی اے سے علیحدہ کرنے کا فیصلہ کیا ہے،اب ایک ایک ویزا کے فارم کی جانچ پڑتال کی جاتی ہے، سفارت کاروں کو بھی ایک سال کے ویزے کے بعد سیکیورٹی کلیئرنس ہوتی ہے۔
ہمارے سفارت خانوں کی جانب سے جاری ویزا کے اجرا کا ریکارڈ بھی نہیں دیا گیا،ذاتی طور پر ویزا کے اجرا کی سوداگری کی گئی۔
بہت جلد صرف ایک بٹن سے پتا چل جائے گا کون کون پاکستان آیا
انہوں نے بتایا کہ اب جو بھی پاکستان آرہا ہے سیکیورٹی کلیئرنس کے بعد آرہا ہے، بہت جلد ایک بٹن سے پتا چلے گا پاکستان کون کس وجہ سے آیا،پاکستان آنے والے ایک ایک غیرملکی کے کوائف خود چیک کرتا ہوں، جن لوگوں کو بغیر دستاویز جہاز بھر کر بھیجا گیا انہیں واپس کیا، ڈین جونز جیسے مشہور کرکٹر کو بھی نامکمل دستاویز پر واپس کیا،بغیر دستاویز آنے والوں کو واپس بھیجنے پراندرونی و بیرونی دباؤ برداشت کیا۔
گستاخانہ مواد کے معاملے پر امریکن ایف بی آئی نے مدد کی یقین دہانی کرائی ہے
انہوں نے کہا کہ گستاخانہ مواد کے خلاف اقدامات جاری ہیں، تمام مسلم ممالک کے سفیروں کو بلایا، گستاخانہ مواد کے معاملے پر عرب لیگ کو خط لکھا، مسلم ممالک کے سفیر کے اجلاس پر خط او آئی سی کو بھی لکھا گیا، سفیروں کے اجلاس کی قرارداد کو اقوام متحدہ کو بھی بھیجا جائے گا۔
چوہدری نثار نے کہا کہ ایف بی آئی نے بھی اس مسئلے پر کام کرنے کے لیے یقین دہانی کرائی ہے،دو سے تین روز میں 45 سائٹس بلاک کی ہیں،فیس بک کے 62 صفحات بلاک کیے گئے ہیں، اسلام کے خلاف اس قسم کی تشہیر روکنے کےلیے سوشل میڈیا کو پابند بنائیں گے اور گستاخانہ مواد کے معاملے کو منطقی انجام تک پہنچائیں گے، واشنگٹن میں موجود سفیر کو فیس بک انتظامیہ سے رابطہ کرنے کا کہا ہے۔
دستاویز کے بغیر ویزا دیے جانے کا کوئی ریکارڈ نہیں
انہوں نے کہا کہ دستاویز کے بغیر ویزا دیے جانے کا نہ ایف آئی اے کے پاس کوئی ریکارڈ ہے اور نہ ہی وزارت داخلہ کے پاس، بغیر دستاویزات ویزا کے اجرا کو ہمیشہ کے لیے روکنے کی ضرورت ہے۔
آصف زرداری کو چکری کے جلسے میں خوش آمدید کہوں گا
پیپلز پارٹی کے شریک چیئرمین آصف زرداری کی جانب سے چکری میں جلسے کے اعلان پر انہوں نے کہا کہ چکری میرا آبائی گاؤں ہے آصف زرداری جلسہ کرنا چاہیں تو انہیں گھر پر خوش آمدید کہوں گا، زرداری سے ذاتی دشمنی نہیں آصف زرداری نے جو بھی اقدامات کیےاس سے اختلافات ہیں۔
Govt denotified ambassador’s powers to issue… by arynews
انہوں نے کہا کہ ایک شخص دو سال تک ملک سے باہر چھپا رہا،5ارب کی کرپشن کا جواب دینے کے بجائے الزام تراشی کی جارہی ہے،یہ لوگ اپنی کرپشن کی وضاحت کرنے کے بجائے چیخیں مارتے ہیں، آئندہ الیکشن میں پی پی امیدوار کی چکری سے ضمانت ضبط ہوگی۔
