اسلام آباد : ایف بی آر نے چھوٹے دکانداروں کیلئے یکم جولائی سے ماہانہ ٹیکس اسکیم کا ایس آر او جاری کردیا۔
تفصیلات کے مطابق تاجر دوست اسکیم میں رجسٹریشن کیلئے اہم پیش رفت سامنے آئی ، ملک بھر کے 42 شہروں کے 25 ہزار 989 بازاروں کے انکم ٹیکس ریٹ کا اعلان کردیا۔
ایف بی آر نے 688 صفحات پرمشتمل انکم ٹیکس ریٹ کی لسٹ جاری کردی ، ملک بھر کے 42 بڑے شہروں کے چھوٹے تاجروں سے فکس ٹیکس وصولی کا آغاز ہوگیا۔
ایف بی آر نے چھوٹے دکانداروں کیلئے یکم جولائی سے ماہانہ ٹیکس اسکیم کا ایس آر او جاری کردیا، نوٹیفکیشن میں کہا ہے اسکیم کے تحت چھوٹے دکانداروں سے کم از کم ماہانہ انکم ٹیکس 100روپے اور زیادہ سے زیادہ ماہانہ انکم ٹیکس 20 ہزار وصول کیا جائے گا۔
ایف بی آر کا کہنا تھا کہ ٹیکس کا تعین دکانوں کی فیئرمارکیٹ ویلیو کے حساب سےکیا جائے گا، دکانداروں سے انکم ٹیکس کیلئے فیئر مارکیٹ ویلیو کا تعین ایف بی آر خود کرے گا۔
حکام نے بتایا کہ ریٹیلرز اسکیم ایبٹ آباد، اٹک، بہاولنگر، بہاولپور، چکوال میں بھی نافذ ہے جبکہ ڈی آئی خان، فیصل آباد، گھوٹکی، گجرات اور گوادر میں بھی تاجروں کی رجسٹریشن ہوگی۔
حافظ آباد،ہری پور، حیدرآباد،اسلام آباد،جھنگ،جہلم، کراچی ، قصور، خوشاب،لاہور، لاڑکانہ، لسبیلہ، لودھراں اور منڈی بہاؤ الدین میں بھی اسکیم نافذ ہے۔
مانسہرہ،مردان، میرپورخاص، ملتان، ننکانہ، نارووال، پشاور، کوئٹہ،رحیم یارخان، راولپنڈی، ساہیوال، سرگودھا، شیخوپورہ اور سیالکوٹ میں بھی ریٹیلرز رجسٹریشن کے پابند ہے۔
سکھر اور ٹوبہ ٹیک سنگھ میں بھی تاجر دوست اسکیم نافذ کردی گئی ہے، ٹیکس کا تعین علاقہ اور دکان کے سائز کے تحت کیا جائے گا تاہم عارضی کھوکھوں کو ماہانہ ایڈوانس ٹیکس سے استثنیٰ دیا گیا ہے۔