اسلام آباد : حکومت نے چیئرمین ایس ای سی پی فرخ سبزواری کو عہدے سے ہٹانے کا فیصلہ کرلیا، وفاقی کابینہ کے اجلاس میں عامر خان کی بطور چیئرمین ایس ای سی پی تقرری کا فیصلہ کیا گیا ہے۔
تفصیلات کے مطابق وزیر اعظم کی زیر صدارت آج ہونے والے وفاقی کابینہ کے اجلاس میں فیصلہ کیا گیا ہے کہ ایس ای سی پی کے چیئرمین فرخ سبزواری کو ان کے عہدے سے برطرف کردیا جائے گا۔
اس حوالے سے ذرائع کا کہنا ہے کہ فرخ سبزواری کو ہٹانے کا فیصلہ اسٹاک ایکسچینج کے معاملات صحیح طرح نہ چلانے پر کیا گیا۔
اجلاس میں فیصلہ کیا گیا کہ عامر خان کو نیا چیئرمین ایس ای سی پی تعینات کیا جائے گا، عامرخان ایس ای سی پی میں بطور کمشنر اسپیشلائزڈ کمپنیز ڈویژن تعینات رہے ہیں۔
عامر خان کارپوریٹ اورکیپٹل مارکیٹس میں کام کرنے کا وسیع تجربہ رکھتے ہیں، ذرائع کے مطابق عامر خان کی بطور چیئرمین ایس ای سی پی تقرری کا نوٹیفکیشن آج جاری ہوگا۔
اس کے علاوہ ایس ای سی پی پالیسی بورڈ کے چیئرمین خالد مرزا کوبھی ہٹانے کا فیصلہ کیا گیا ہے، ان کی جگہ مسعود نقوی ایس ای سی پی پالیسی بورڈ کےنئے چیئرمین تعینات ہوں گے۔ اس کے علاوہ ایرا کے چیئرمین اور ڈپٹی چیئرمین کی بھی تعیناتی کی منظوری دی گئی ہے۔
مزید پڑھیں: وزیراعظم کی زیرصدارت کابینہ اجلاس، قومی سلامتی کمیٹی کے تمام فیصلوں کی توثیق
واضح رہے کہ وزیر اعظم عمران خان کی زیر صدارت وفاقی کابینہ کے اجلاس میں قومی سلامتی کمیٹی کے تمام فیصلوں کی توثیق کر دی گئی۔
وزیراعظم نے فخرامام کی سربراہی میں خصوصی کمیٹی قائم کی ہے، جس میں اپوزیشن ارکان کو بھی شامل کرنے کی تجویز سامنے آئی ہے۔
اجلاس میں سمجھوتہ اور تھر ایکسپریس بند کرنے کے فیصلے کی توثیق کی گئی، وفاقی کابینہ نے بھارت کے ساتھ تجارت بند کرنے کے فیصلےکی بھی توثیق کردی۔
وفاقی کابینہ کو احساس پروگرام کے حوالے سے بھی تفصیلی بریفنگ دی گئی، وفاقی کابینہ نے پارلیمنٹ کے مشترکہ اجلاس کی متفقہ قرار داد کی بھی توثیق کی۔
