Tag: چیئرمین تحریک انصاف عمران خان

لیہ : چیئرمین تحریک انصاف نے کہا ہے کہ پاکستان میں بیرون ملک سے سرمایہ کاری لے کر آئیں گے اور ایک بار بیرونی سرمایہ کاری آّگئی تو بے روزگاری ہمیشہ کے لیے ختم ہو جائے گی لیکن کرپشن کے باعث یہاں سرمایہ کاری نہیں آرہی ہے.

وہ لیہ میں جلسہ عام سے خطاب کر رہے تھے عمران خان کا کہنا تھا کہ جس معاشرے میں کرپشن ہوتی ہے وہاں سرمایہ کاری نہیں ہوتی اور جہاں کرپشن نہ ہو وہ سرمایہ کاری کھینچے چلے جاسکتے ہیں یہی وجہ ہے کہ سرمایہ کار سنگاپور جانے کو تیار رہتے ہیں جب کہ پاکستان کا صرف ایک شہر کراچی 111 نمبر پر ہے جہاں لوگ سرمایہ کاری کے لیے آتے ہیں.

عمران خان نے کہا ہے کہ جب نظام ٹھیک نہیں ہوگا تو سرمایہ کار نہیں آئے گا اور اگر سسٹم ٹھیک کرلیا تو قرضے مانگنے کی ضرورت نہیں پڑے گی بلکہ سرمایہ کاری اتنی بڑھ چکی ہو گی کہ لوگوں کو روزگار بھی میسر ہوگا اور ملک کی معیشت بھی ترقی کرے گی.

انہوں نے کہا کہ ابھی صرف ساڑھے 3 ہزار ارب روپے ٹیکس اکٹھا ہوتا ہے لیکن جب تحریک انصاف کی حکومت آئے گی تو ہم اسی پاکستان سے 8 ہزار ارب روپے تک کا ٹیکس اکٹھا کر کے دکھائیں گے آخر شوکت خانم کیلئے پیسہ بھی پاکستان کے عوام ہی دیتے ہیں کیوں جب انہیں پتہ ہو کہ پیسہ ٹھیک جگہ خرچ ہو رہا ہے تو وہ پیسہ دیتے ہیں.

انہوں نے کہا کہ عوام ٹیکس اس لئے کم دیتے ہیں کیوں کہ ان کا پیسہ لوٹا جاتا ہے غریب قوم کا پیسہ وزیراعظم اور گورنر ہاؤسز پر لگا دیا جاتا ہے لیکن اب ہم عوام کے ٹیکس کا پیسہ مغل لائف اسٹائل پر خرچ نہیں ہونے دوں گا بلکہ عوام کا پیسہ عوام کی خدمت میں خرچ ہوگا.

عمران خان نے کہا کہ پی ٹی آئی کی حکومت آئی تو میری نظر لاہور کے گورنر ہاؤس پر ہوگی اور میں دیکھ رہا ہوں کہ لاہور کے گورنرہاؤس کی دیواریں بلڈوزر سے گر رہی ہوں گی اور ایسے ہی بقیہ مقامات کو عوام کے فلاحی مقاصد کے لیے استعمال کیا جائے گا.

انہوں نے سابق وزیراعظم نواز شریف کو مخاطب کرتے ہوئے کہا کہ نوازشریف شرم کرو چوری کا پیسہ ہی پاکستان لے آتے اور موازنہ میرے ساتھ کرتے ہیں جب کہ ان کا موازنہ میرے ساتھ نہیں بلکہ سلطانہ ڈاکو سے ہے یا فلپائن کے مارکوس سے ہے جو پیسہ لوٹ کر بھاگا تھا.

اسلام آباد : چیئرمین تحریک انصاف عمران خان نے کہا ہے کہ فیض آباد دھرنے کے شرکاء سے فوج نے مصالحت کرا کے ملک کو انتشار اورافراتفری سے بچا لیا ورنہ نااہل حکومت نے اپنے ہی لوگوں کی لاشیں گرانے کا پورا انتظام کرلیا تھا.

وہ پارٹی رہنماؤں کے ہمراہ ہنگامی پریس کانفرنس سے خطاب کر رہے تھے، عمران خان کا کہنا تھا کہ دھرنے کے اختتام سُن کر شکرانے کے نفل ادا کیے تھے کیوں کہ ملک میں تصادم کی فضا قائم ہو چکی تھی جس کے نتیجے میں بڑے پیمانے پر جانی و مالی نقصان کا اندیشہ تھا.

انہوں نے کہا کہ پاک فوج نے ملک کو بڑی تباہی سے بچالیا ہے جس پر حکومت کو فوج کا شکر گذار ہونا چاہیئے تھا لیکن حکومت کا منصوبہ کچھ اور تھا جسے پاک فوج نے ناکام بنایا تو حکومت نے فوج کو بدنام کرانے کے لیے اپنی سوشل میڈیا ٹیم کو متحرک کردیا جو کہ نہایت شرمناک حرکت ہے.

سربراہ تحریک انصاف نے کہا کہ موجودہ صورت حال سے نکلنے کا واحد حل صرف قبل از وقت انتخابات ہیں اور حلقہ بندیوں کا معاملہ کون سا ہاتھی ہے جس کو درست نہیں کیا جاسکتا؟ برطانیہ میں بھی 2 مرتبہ قبل از وقت انتخابات ہوئے ہیں لیکن موجودہ حکومت ہی اس وقت جمہوریت کو کمزور کر رہی ہے.

عمران خان نے کہا کہ نااہل وزیراعظم کو 40،40 گاڑیوں کا پروٹوکول دیا جارہا ہے جس شخص نےعوام کا پیسہ چوری کیا اس کو سرکاری پروٹوکول مل رہا ہے تو دوسری جانب دو اہم محکمے رکھنے والے خواجہ آصف کو اقامہ کے ذریعے 17 لاکھ روپے ماہانہ تنخواہ مل رہی تھی.

اسی طرح احسن اقبال کی کارکردگی بھی سب کے سامنے ہے اور وزیراعظم شاہد خاقان ایک نااہل شخص کو پروٹوکول دینے میں مشغول ہیں جس کی وجہ سے پوری حکومت مفلوج ہو چکی ہے اور ملکی معاملات ٹھپ ہو چکے ہیں اس لیے حکومت کو فوری طور پر مستعفی ہو کر قبل از انتخابات کروانے چاہیئے.

انہوں نے عاصمہ جہانگیر کو تنقید کا نشانہ بناتے ہوئے کہا کہ ڈرون حملوں پر ہماری ہیومن رائٹس کی ملکہ ایک لفظ نہیں کہتی ہیں حالانکہ لبرل کا مطلب انسانیت سے محبت اور جنگ سے نفرت کرنا ہوتا ہے اور ہر قسم کی دہشت گردی کی کھل کر مذمت کرنا ہے لیکن کچھ لوگ ڈرون حملوں پر خاموشی اختیار رکھتے ہیں.