لاہور : پاکستان تحریک انصاف کے چیئرمین عمران خان نے کہا ہے کہ پھٹیچر کا لفظ غیر رسمی گفتگو میں استعمال کیا تھا لیکن ایساشور مچادیا گیا جیسے میں نے کوئی قتل کردیا ہو۔
میڈیا سے گفتگو کرتے ہوئے چیئرمین تحریک انصاف نے کہا کہ نجی گفتگو میں کہے لفظ کو پکڑ طوفان برپا کردیا گیا اور ایسا شور کیا گیا جیسے میں نے قتل کردیا ہو۔
انہوں نے کہا کہ انصاف اسٹوڈینٹس فیڈریشن کے رضاکاروں کے ساتھ مل کر اس سال کے آخر تک خیبر پختونخوا میں ایک ارب درخت لگانے کا ہدف پورا کر لیں گے جب کہ پنجاب میں بھی 10 ہزار درخت لگائیں گے۔
سربراہ تحریک انصاف کا کہنا تھا کہ دنیا کو گلومل وارمنگ کا خدشہ لاحق ہے اس لیے ہمیں اپنے مستقبل کو محفوظ بنانا ہے تو زیادہ سے زیادہ درخت اگانے ہوں گے جس کے لیے پاکستان کے نوجوانوں کو آگے آنا ہوگا اور اس سلسلے میں انصاف اسٹوڈینٹس فیڈریشن اپنا بھرپور کردار ادا کرے گی۔
انہوں نے سوال کیا کہ اگر نیب نے اسد قیصر کو خط نہیں لکھا تو پھر کس نے لکھے ہیں اس کے ذمہ داروں کا تعین کرنا ہوگا اور مجھے پورا یقین ہے موٹوگینگ اس کے ذمہ دار ہیں۔
چیئرمین تحریک انصاف عمران خان نے وزیراعظم نواز شریف اور وزیراعلیٰ شہباز شریف کو ہدفِ تنقید بناتے ہوئے کہا کہ دونوں بھائی قوم کے ٹیکس کے پیسوں سے اشتہارات شائر کر رہے ہیں اور اب تک یہ دونوں بھائی 25 سے 30ارب روپے کے اشتہارات کی مد میں پھونک چکے ہیں۔
پاکستان تحریک انصاف نے کل پارلیمنٹ میں جانے کا اعلان کردیا، عمران خان نے کہا ہے کہ سپریم کورٹ نے مایوس کیا، وہ کل قومی اسمبلی کے اجلاس میں دو تحریکیں پیش کرنے جارہے ہیں۔
اسلام آباد میں میڈیا سے گفتگو کرتے ہوئے تحریک انصاف کے چیئرمین عمران خان نے اعلان کیا کہ وہ پارلیمنٹ کا بائیکاٹ ختم کررہے ہیں اور تحریک انصاف کل قومی اسمبلی کے اجلاس میں وزیراعظم کے خلاف دو تحاریک پیش کرے گی۔
انہوں نے کہا کہ نواز شریف نے پارلیمنٹ میں بھی جھوٹ بولے، جھوٹ بولنے والے وزیراعظم پر اعتبار کیوں کیا جائے؟وزیراعظم پارلیمنٹ میں اپنی تقریر میں کچھ کہتے ہیں اور سپریم کورٹ میں کچھ،کیا پارلیمنٹ نواز شریف سے جواب طلب کرے گی؟ کہ وہ اب سپریم کورٹ میں جھوٹ کہہ رہے ہیں یا یہاں جو کہا وہ سچ تھا؟ کل پارلیمنٹ کا بھی امتحان ہوگا۔
ان کا کہنا تھا کہ عدالت کو بتایا گیا کہ پی ٹی آئی کے پاس نواز شریف کے خلاف کوئی ثبوت نہیں۔
انہوں نے کہا کہ حکومت کے غلط کام پر اپوزیشن کا کام جواب طلب کرنا ہے، اگر ہم جواب طلب کرتے ہیں تو ہمیں کیا کچھ کہا جاتا ہے، ہمیں جواب ہی نہیں دیا جاتا،کل ہم دیکھیں گے کہ ہماری تحریک التوا پر ن لیگ کیا رد عمل دیتی ہے۔
ان کا موقف تھا کہ پارلیمنٹ میں جانے کا مقصد ہی قانون کی بالادستی ہے ، اگر قانون پر عمل درآمد ہی نہیں ہوگا پارلیمنٹ کا کیا فائدہ؟
ایک سوال پر انہوں نے کہا کہ اس میں کوئی شک نہیں کہ نریندر مودی پاکستان کو تنہا کرنا اور صوبوں کو علیحدہ کرنا چاہتا ہے، مجھے سب سے زیادہ تکلیف بھارت کی جانب سے ہمارے مشیر خارجہ سرتاج عزیز کو بے عزت کرنے پر ہوئی، ان کی بے عزتی سے پورے پاکستان کی بے عزتی ہوئی، حکومت کو سرتاج عزیز کو وہاں بھیجنا ہی نہیں چاہیے تھا۔
انہوں نے کہا کہ قطری شہزادوں کو تلور کے شکار پر یہاں بلالیا، یہ غیر قانونی ہے، اس کے شکار کی اجازت نہیں ہے، قانون توڑ کر انہیں شکار کی اجازت دی گئی،کیا یہ لوگ کہیں باہر جاکر قانون توڑ سکتے ہیں؟اب حکومت عدالت میں یہ کہتی ہے کہ یہ ہماری خارجہ پالیسی کا حصہ ہے، کیا پرندے مروانا بھی خارجہ پالیسی ہے؟
پی ٹی آئی کے رہنما شاہ محمود قریشی نے کہا کہ پیپلز پارٹی میں چار نکات کو لے کر اس وقت دو گروپس بن چکے ہیں، ایک گروپ شیری رحمان، کائرہ، خورشید شاہ و ہمنوا کا ہے جب کہ دوسرا گروپ یوسف رضا گیلانی اینڈکو کا ہے جو چاہتا ہے کہ ان چار مطالبات کو لے کر حکومت سے اپنے مطالبات منوائے جائیں، ڈاکٹر عاصم کی رہائی سمیت دیگر معاملات پر سودے بازی کی جائے۔
لاہور: تحریک انصاف کے چیئرمین عمران خان نے نواز شریف کو احتساب کے لیے محرم تک الٹی میٹم دیتے ہوئے کہا ہے کہ اب ہم جلسہ نہیں کریں بلکہ محرم کے بعد اسلام آباد بند کردیں گے اور حکومت چلنے نہیں دیں گے کارکنان تیاری کریں۔
یہ الٹی میٹم انہوں نے اڈہ پلاٹ پر رائے ونڈ مارچ میں کارکنوں سے خطاب کرتے ہوئے دیا۔ عمران خان ہیلی کاپٹر کے ذریعے جلسہ گاہ پہنچے اور کئی رہنماؤں کے خطاب کے بعد آخری خطاب کیا۔
اسٹیج پر عوامی مسلم لیگ کے سربراہ شیخ رشید،وزیراعلیٰ خیبر پختونخوا پرویز خٹک،تحریک انصاف کے رہنما شاہ محمود قریشی، جہانگیر ترین، نعیم الحق، عبدالرشید، چوہدری سرور، شفقت محمود، اسد عمر، اعجاز چوہدری،عارف علوی، عمران اسماعیل اور دیگر موجود تھے۔
سرحدی صورتحال مخدوش نہ ہوتی تو عوام کو یہی روک لیتا
عمران خان نے اعلان کیا کہ اب ہم جلسہ نہیں کریں گے، نواز شریف کو خبردار کرتے ہیں وہ محرم تک اپنے اپ کو احتساب کے لیے پیش کردیں ورنہ ماہ محرم الحرام نواز شریف کو حکومت کرنے نہیں دیں گے، اگر سرحدی صورتحال ٹھیک ہوتی تو میں عوام کو یہیں رائے ونڈ میں روک لیتا۔
فرعون کے گڑھ میں جلسہ کرکے خوف کا بت توڑا
تحریک انصاف کے چیئرمین عمران خان نے کہا کہ مجھے خوشی ہے کہ خواتین مارچ کے لیے گھروں سے باہر نکلیں، کارکن میری بات آخر تک سنیں میں آخر میں اہم اعلان کروں گا،کارکنوں نے فرعون کے خلاف جلسہ کیا اور اپنے خوف کا بت توڑا وہ خراج تحسین کے قابل ہیں۔
جاتی امرا کی دیواروں پر 60 کروڑ اور سیکیورٹی پر ساڑھے 8ارب خرچ ہوئے
انہوں نے کہا کہ نواز شریف فرعون ہیں اور ان کے گھر کی صرف دیواروں پر عوام کا 60 کروڑ روپیہ لگا ہوا ہے،جاتی امرا کی سیکیورٹی پر ساڑھے آٹھ ارب روپے خرچ ہوئے، وہ خوف زدہ ہیں، کرپشن سے اتنا پیسہ کمالیا کہ وہ اب بزدل ہوگئے ہیں جتنا وزیراعظم کا اسٹاف ہے اس کا نصف اسٹاف وائٹ ہائوس کا ہے۔
بڑے بڑے فرعون دیکھے، نواز شریف کا بھی وقت آچکا
انہوں نے کہا کہ میں وقت کے فرعون کو بتادینا چاہتا ہوں کہ میں نے بڑے بڑے فرعون دیکھے، شاہ ایران کی بہت دہشت تھی لیکن جب عوام سڑکوں پر نکل آئے تو شاہ ایران کے جہاز کو لینڈنگ کے لیے بھی کوئی ملک تیار نہیں تھا، حسنی مبارک،قذافی اور صدام حسین کا انجام نواز شریف نہ بھولیں،نواز شریف کا بھی آخری وقت آچکا ہے۔
قوم کا پیسہ کھانے پر نواز شریف کو دل کا نہیں معدے کا مسئلہ ہے
انہوں نے کہا کہ نواز شریف کو دل کا نہیں معدے کا مسئلہ ہے، وزیراعظم نے عوام کے اربوں روپے کھائے ہیں انہیں بدہضمی ہورہی ہے وہ اپنے دل کا نہیں بلکہ معدے کا علاج کرائیں۔
حسین، حسین،مریم اور نواز شریف کے پاناما لیکس پر بیانات دکھائے گئے
عمران خان نے خطاب کے دوران اسٹیج پر موجود بڑی اسکرین پر ویڈیو دکھائی جس میں پاناما لیکس کی کرپشن کے متعلق دستاویزات دکھائی گئیں،مریم نواز کا ایک بیان دکھایا گیا جس میں وہ کسی بھی آف شور کمپنی کی ملکیت سے انکار کررہی تھیں۔
عمران خان نے کہا کہ اس ویڈیو میں مریم نواز نے انکار کیا لیکن پاناما لیکس میں مریم نواز کی کمپنیاں نکل آئیں اور یہ ہم نےنہیں آئی سی آئی جے نے کہا ہے، مریم نواز کے پاس پیسے ہی نہیں تھے تو ان کے نام پر پراپرٹی کیسے نکل آئی؟؟؟ وہ کہتی تھیں کہ میری پاکستان تو دور کی بات باہر بھی کوئی پراپرٹی نہیں ، اللہ آپ کو سچ بولنے ہدایت کرے۔
انہوں نے ویڈیو میں نواز شریف کے بیٹوں حسین اور حسن نواز کے بیانات بھی دکھائے جس میں تضاد بیانی آنے پر عمران خان نے تینوں کو تنقید کا نشانہ بنایا بعدازاں نواز شریف کا اسمبلی میں دیا گیا بیان دکھایا گیا جس میں نواز شریف نے جدہ اسٹیل مل اور لندن کے فلیٹس خریدنے کے لیے پاکستان سے ایک بھی روپیہ جانے سے انکار کیا اور چوہدری نثار سمیت دیگر وزرا کے ویڈیو بیانات دکھائے جن میں فلیٹس کی خریداری سے متعلق تضاد بیانی تھی۔
پورے شریف خاندان کا بیان جھوٹ صرف کلثوم نواز کا بیان سچ ہے
عمران خان نے کہا کہ ادھر وزیراعظم انکار کرتے ہیں کہ پاکستان سے پیسہ باہر نہیں گیا اور دوسری جانب ان ہی کے بیٹے اور بیگم کلثوم نواز کے فلیٹ کے متعلق دیے گئے بیانات میں تضاد ہے، چوہدری نثار کہتے ہیں کہ فلیٹس 20 سال قبل خریدے گئے جب کہ نواز شریف کہتے ہیں 7 سال قبل خریدے گئے، دراصل بیگم کلثو م نواز کا بیان درست ہے ان کے سوا سب جھوٹ بول رہے ہیں انہوں نے سال 2000ء میں کہا تھا کہ فلیٹس ہمارے ہیں۔
عمران خان نے کہا کہ کسی کو شک نہیں ہونا چاہیے کہ نواز شریف نے کرپشن کرکے پیسہ حاصل کیا، منی لانڈرنگ کرکے پیسہ باہر بھیجا اور اپنے بچوں کے نام پر پراپرٹیز خریدیں۔
نیب، ایف بی آر اور ایف آئی اے کرپشن پر پکڑ دھکڑ کیوں نہیں کرتے
انہوں نے قومی احتساب بیورو(نیب) کے چیئرمین پر تنقید کرتے ہوئے کہا کہ وہ چند لاکھ روپے کھانے والوں کو پکڑنے میں لگے ہوئے ہیں لیکن اربوں روپے کھانے والوں کے خلاف کوئی کارروائی نہیں ہورہی،اسی طرح ایف بی آر اور ایف آئی اے بھی پاناما لیکس میں شامل افراد کے خلاف کچھ نہیں کررہے، پہلے سپریم کورٹ ہر بات پر سوموٹو ایکشن لیتی تھی لیکن اب اتنے بڑے معاملے پر کچھ نہیں کررہی۔
خواجہ آصف سن لیں، پاناما لیکس بھولنے نہیں دوں گا
انہوں نے ن لیگ کے وزیر خواجہ آصف پر تنقید کرتے ہوئے کہا کہ انہوں نے وزیراعظم کو مشورہ دیا کہ میاں صاحب فکر نہ کریں قوم جلد اس معاملے کو بھول جائے گی، ایسے درباری سن لیں، نہ لوگ پاناما لیکس کو بھولیں گے اور نہ میں انہیں بھولنے دوں گا۔
کچھ نہ بھی کروں تب بھی اللہ کا دیا بہت کچھ ہے
انہوں نے کہا کہ مجھے اللہ نے اتنا دیا ہے کہ اگر ساری زندگی کچھ نہ بھی کروں تب بھی زندگی بادشاہوں کی طرح گزر جائے لیکن میں یہ سب کچھ انصاف کی خاطر کررہا ہوں۔
نجم سیٹھی اور پیمرا پر بھی تنقید
انہوں نے نجم سیٹھی اور پیمرا پر بھی تنقید کی اور کہا کہ کرپشن کرنے والے اور الیکشن فکسنگ کرنے والےنجم سیٹھی کو کرکٹ بورڈ کاسربراہ اور ن لیگ کے کارکن کو پیمرا کا چیئرمین لگادیا گیا، جب ملک کا وزیراعظم خود چور ہو تو دوسرے چوروں کا باہر موجود پیسہ کیسے واپس لاسکتا ہے، نوازشریف آصف زرداری کو کیسے کہہ سکتے ہیں کہ زرداری سوئس بینکوں میں رکھا اپنا پیسہ واپس لائیں۔
نواز شریف کو برطانیہ کا وزیراعظم بنادیا جائے
انہوں نے کہا کہ نواز شریف کو برطانیہ کا وزیراعظم بنادیا جائے تو پانچ برس میں برطانیہ کا دیوالیہ نکل جائے گا۔
مودی سے کہا پاکبھارت ایٹمی طاقتیں ہیں، جنگ کا سوچنا بھی نہیں چاہیے
انہوں نے کہا کہ میں جنگوں پر نہیں امن پر یقین رکھتا ہوں اور جنگوں کے خلاف ہوں، عراق اور افغان پر بمباری کا مخالف رہا، ہندوستان جا کر نریندر مودی سے ملا کہ جنگوں کے بجائے پیسہ عوام پر خرچ کیا جائے، جنگ کے بجائے بات چیت سے مسائل حل کیے جائیں کیوں کہ بھارت اور پاکستان دونوں ایٹمی ممالک ہیں ان کو تو جنگ کا سوچنا بھی نہیں چاہیے۔
مودی سن لیں، ہر پاکستانی نواز شریف کی طرح بزدل نہیں
انہوں نے کہا کہ مودی کان کھول کر سن لیں ہر پاکستانی نواز شریف نہیں، یہاں سب ایک ہیں، ہر پاکستان نواز شریف کی طرح بزدل نہیں، مسئلہ کشمیر حل کرنا ہوگا اور کشمیری باشندوں کو ان کے حقوق دینے ہوں گے،ہمارے دل کشمیریوں کے ساتھ دھڑکتے ہیں اور کسی صورت اس کی حمایت سے دست بردار نہیں ہوں گے، گولیوں اور بندوقوں سے کشمیری عوام کو روکا نہیں جاسکتا، ہم ملک کا پانی بند کرنے یا ایل او سی پر حملے کامنہ توڑ جواب دیں گے۔
مودی پاکستان کو تنہا کریں میں پیسہ اکٹھا کرکے دکھاؤں گا
انہوں نے مودی کو چیلنج دیا کہ وہ پاکستان کو تنہا کرکے دکھائیں میں اسی پاکستان سے پیسہ اکٹھا کرکے دکھا دوں گا۔
اقوام متحدہ میں نواز شریف کشمیر پر یہ باتیں کرنا نہیں چاہتے تھے
انہوں نے کہا کہ اقوام متحدہ کی سلامتی کونسل کے اجلاس میں نواز شریف نے کشمیر کے متعلق اچھی باتیں کیں میں ان کی شکل دیکھ رہا تھا وہ یہ باتیں کرنا نہیں چاہ رہے تھے لگ رہا تھا کہ ان سے یہ باتیں کروائی گئی ہیں۔
مشرف مجرم ہے، ڈالر کی خاطر وزیرستان میں فوج بھیجی
انہوں نے کہا کہ جنرل مشرف قوم کے مجرم ہیں جنہوں نے ڈالر کی خاطر وزیرستان میں فوج بھیجی،فوج کبھی بھی مسئل کا حل نہیں رہی، قبائل اور بگٹی کے خلاف بھی فوجی آپریشن کا مخالف رہا۔
پنجاب حکومت نے قوم کا 30ارب اشتہارات پر خرچ کیا
عمران خان نے کہا کہ پنجاب حکومت نے قوم کا 30 ارب روپیہ اشتہارات پر خرچ کیا، خیبر پختون خوا میں کرپشن کا کوئی ایک بھی کیس ہے تو بتادیں۔
نواز شریف نے دو ٹی وی چینلز کو اپنی حمایت میں پیسہ دیا
انہوں نے کہا کہ نواز شریف نے ملک کے دو ٹی وی چینلز کو پیسہ دیا ہواہے اپنی کمپین چلانے کے لیے، وہ کون سے دو ٹی وی چینلز ہے عوام مجھے جواب دیں، جس پر مجمع نے ایک ٹی وی چینل جیو کا نام لیا۔
کراچی کے 47فیصد لوگ باہر جا کر کمانا چاہتے ہیں
انہوں نے کہا کہ کراچی کے 47فیصد نوجوان ملک سے باہر جا کر کمانے کے خواہش مند ہیں، انہیں کہتا ہوں کہ یہ زمین سونا ہے صرف یہاں موجود ڈاکوئوں کے ٹولے کو شکست دینی ہے، نواز شریف کی جدہ اسٹیل مل چل رہے ہی لیکن پاکستان اسٹیل مل نہیں۔
بھارت واہگہ سے آلو ٹماٹر اور چمن بارڈر سے دہشت گردبھیجتا ہے، شاہ محمود قریشی
اپنے خطاب میں شاہ محمود قریشی نے کہا کہ بھارت واہگہ سے آلو ٹماٹر اور طور خم بارڈر سے دہشت گردبھیجتا ہے، سنا ہے مودی سرجیکل اسٹرائیک کے بارے میں سوچ رہے ہیں انہیں خبردار کرتا ہوں کہ وہ ایسی حماقت نہ کریں ورنہ بیس کروڑ عوام کھڑے ہوجائیں گے۔
انہوں نے کہا کہ مودی کی سیاست بے نقاب ہوگئی،بھارتی وزیراعظم کی بغل میں چھری اور منہ پر رام رام ہے ،بھارت نے سارک سربراہ کانفرنس میں شرکت نہ کرکے خطے کی خوشحالی میں رکاوٹ ڈالی۔
انہوں نے سابق وزیر خارجہ ہونے کے ناطے موجودہ بھارتی وزیر خارجہ کو چیلنج کیا کہ وہ آئیں اور میرے ہمراہ سری نگر میں نعرہ لگائیں پتا چل جائے گا کہ کشمیری عوام کس کے ساتھ ہیں۔
بھارت کو اجمل قصاب کا پتا نواز شریف نے دیا ، شیخ رشید
عوامی مسلم لیگ کے سربراہ شیخ رشید نے کہا کہ مودی اور نواز شریف سرکار دونوں کی سوچ ایک جیسی ہے، بھارت کو اجمل قصاب کا پتا نواز شریف نے دیا تھا،یہ چور اور دہشت گردی را سے ملے ہوئے ہیں، بھارت کا حملہ لوگوں میں خوف پیدا کرنے کے لیے تھا،سچا لیڈر وہی ہے جو مودی کی آنکھ میں آنکھ ڈال کر بات کرے۔
انہوں نے کہا کہ ہمیں ڈنڈے دکھانے والے ڈوب مریں، جب بھی جلسہ کرتے ہیں حملہ ہونےکاپرچہ تھما دیاجاتا ہے،اگر خون درکار ہے تو سب سے پہلے خون میں دوں گا،عمران خان ہمیں حکم دیں تو جاتی امرا کی اینٹ سے اینٹ بجادیں گے۔
انہوں نے مزید کہا کہ اگر کسی نے پاکستان پر حملہ کیا تو مندروں کی گھنٹیاں نہیں بجیں گی بلکہ بھارت بھرمیں کلمہ طیبہ کی آواز بلند ہوگی۔
نئے پاکستان میں نوجوان نوکری کیلئے پریشان نہ ہوں گے، جہانگیر ترین
جہانگیر ترین نے کہا کہ عمران خان نیا پاکستان بنائیں جہاں نوجوان ڈگریاں حاصل کرکے نوکریوں کے لیے مارے مارے نہ پھریں،کیا کارکنان نئے پاکستان کے لیے تیار ہیں؟ خان صاحب ہم دیر نہیں کرسکتے، بتائیں نئے پاکستان کے لیے کیا کرنا ہے؟
سب سے پہلے خطاب کرتے ہوئے عارف علوی نے کہا کہ کراچی میں را کا استعمال کیا گیا، قائد متحدہ الطاف حسین را کے ایجنٹ ہیں، جو پاکستان کے خلاف نعرہ لگائے گا اس کی زبان کھینچ لیں گے۔
بھارت کے خلاف فوج اور عوام متحد ہیں، چوہدری سرور
خطاب کرتے ہوئے چوہدری سرور نے کہا کہ کامیاب جلسے کے انعقاد پر تحریک انصاف مبارک باد کی مستحق ہے،بھارت کے خلاف پاک فوج اور عوام متحد ہیں،نعرہ تکبیر بلند کرنے سے بھارتی فوجیوں کو نیند نہیں آتی، کشمیریوں کو پیغام دینا چاہتا ہوں کہ قوم ان کے ساتھ ہے۔
خان صاحب گوگلیاں بہت ہوگئیں، اب بائونسر کی ضرورت ہے، پرویز خٹک
اپنے خطاب میں وزیراعلیٰ خیبر پختون خوا پرویز خٹک کا کہنا تھا کہ خان صاحب گوگلیاں بہت ہوگئیں، اب بائونسر کی ضرورت ہے، ہم نے قربانیاں دی ہیں، کس کی مجال ہے ہمیں دھمکیاں دے۔انہوں نے کہا کہ حکمرانوں کو انتخابات تک جانے کا موقع کیوں دیا جائے، کارکنوں اٹھو اور ان دیواروں کو گرادو۔
کارکنوں کی دھکم پیل سے واک تھرو گیٹ گر گیا
قبل ازیں کارکنوں کو کافی دیر سے عمران خان کا بڑی بے چینی سے انتظار تھا، اپنے قائد کی آمد پر ان کے جوش و خروش اضافہ ہوگیا اور وہ جذبات کے سبب ایک دم غیر منظم ہوگئے جس پر ہونے والی دھکم پیل کے باعث واک تھرو گیٹ ٹوٹ گیا۔جلسہ گاہ میں بجتے ہوئے گانوں نے بھی کارکنوں کے جذبے کو تقویت دینے میں اہم کردار ادا کیا۔
سلمان احمد اور عطا اللہ عیسیٰ خیلوی نے نغمات پیش کیے
جلسہ گاہ میں گلوکار سلمان احمد نے پی ٹی آئی کا نغمہ پیش کیا ان کے ہمراہ اداکار فواد خان بھی موجود رہے بعدازاں مقررین کے خطابات کے بعد اور عمران خان کے خطاب سے قبل گلوکار عطا اللہ عیسیٰ خیلوی نے ’’ بنے گا نیا پاکستان‘‘ نغمہ سنایا۔
پنڈال میں 10 لاکھ افراد موجود ہیں ، پی ٹی آئی کا دعویٰ
پاکستان تحریک انصاف کے متعدد رہنماؤں دعویٰ کیا ہے کہ جلسہ گاہ میں دو لاکھ 40 ہزار افراد موجود ہیں جب کہ رہنما فیصل جاوید نے دعویٰ کیا ہے کہ جلسہ گاہ میں موجود لوگوں کی تعداد دس لاکھ افراد سے تجاوز کرگئی جب کہ ن لیگ کے رہنما و وزیر قانون رانا ثنا اللہ نے کہا ہے کہ جلسہ گاہ میں صرف تیس ہزار افراد موجود ہیں۔
شیریں مزاری نے دعویٰ کیا کہ پنڈال میں دو لاکھ افراد موجود ہیں، آج صرف جلسہ ہے عمران خان آئندہ کے لائحہ عمل کا اعلان کریں گے۔
جلسے سے قبل عمران خان کا انتظامات کا جائزہ
تحریک انصاف کے سربراہ عمران خان نے گزشتہ رات رائے ونڈ مارچ کی تیاریوں کا جائزہ لیا،مارچ میں شرکت کے لیے مختلف شہروں سے قافلوں کی آمد جاری ہے،بڑی تعداد میں کارکن پہنچ بھی چکے ہیں،خواتین کی بڑی تعداد بھی احتجاج کے لیے رائے ونڈ اڈاہ پلاٹ پہنچی ہیں۔
خیال رہے کہ آج صبح گیارہ بجے تحریک انصاف کے سربراہ عمران خان نے لاہور میں اپنی رہاہش گاہ زمان پارک پر پارٹی رہنماؤں کا اجلاس طلب کیا تھا جس میں تحریک انصاف کے سربراہ کی تقریر سمیت دیگر اہم امور پر مشاوت کی گئی۔
مودی کے لیے واضح پیغام دیں گے، شاہ محمود قریشی
تحریک انصاف کے اجلاس کے پی ٹی آئی کے سینئر رہنما شاہ محمود قریشی کا کہنا تھا کہ مشاورت کرلی گئی ہے آج رائے ونڈ کے میدان سے مودی کے لیے واضح پیغام آئے گا۔
شاہ محمود قریشی کا کہنا تھا کہ قوم تیارہوجائے وطن کی مٹی پکار رہی ہے،انہوں نے کہا کہ امید ہے آج تحریک انصاف کے سربراہ عمران خان قوم کو مایوس نہیں کریں گے۔
تحریک انصاف کے سینئر رہنما کا رائے ونڈ مارچ کے حوالے سے کہنا تھا کہ چار بجے پنڈال کے لیے روانہ ہوں گے اور حتمی فیصلہ اس وقت صورت حال کو دیکھ کر کیا جائے گا کہ عمران خان روڈ کے ذریعے یا ہیلی کاپٹر کے ذریعے پنڈال پہنچیں گے۔
ملک کرپشن کے ساتھ نہیں چل سکتا، وزیراعلیٰ کے پی کے
قبل ازیں جلسہ گاہ پہنچنے پر وزیراعلیٰ پرویز خٹک کاکہنا تھا کہ آج ثابت کردیں گے کہ ملک کرپشن کے ساتھ نہیں چل سکتا۔
رائےونڈ روڈ پر تحریک انصاف کے جلسے کے دوران ٹریفک کا بہاؤ بحال رکھنے کے لیے 2ایس پیز، 6ڈی ایس پیز، 42انسپکٹر، 112پٹرولنگ آفیسرزاور 760ٹریفک وارڈنز تعینات کر دیے گئے ہیں۔
چیف ٹریفک آفیسرلاہور طیب حفیظ چیمہ نے دعویٰ کیا ہے کہ اڈاپلاٹ میں ہونےوالے جلسہ کے موقع پر سٹی ٹریفک پولیس نے شہریوں کی سہولت کےلیے انتظامات مکمل کر لیے۔
ٹریفک رواں رکھنے کے لیے 10لفٹر اور 4بریک ڈاؤن بھی ہوں گے۔کئی مقامات پر ٹریفک کو متبادل راستوں سےگزارا جائے گا۔شہر کے داخلی راستوں سے آنےوالی ایمبولینسوں کو اسپتالوں تک پہنچانے کی ہدایت بھی جاری کردی گئی ہے۔
واضح رہےکہ گزشتہ روز لاہور میں میڈیا سے گفتگو کرتے ہوئے عمران خان کا کہنا تھا کہ رائے ونڈ میں تاریخی مارچ ہوگا پہلے نوازشریف کے لیے پیغام دینا تھااب نریندر مودی کو سخت پیغام دیں گے۔
لاہور: چیئرمین تحریک انصاف عمران خان اسلام آباد سے لاہور پہنچ گئے، عمران خان مقامی ہوٹل پہنچنے پر لفٹ میں پھنس گئے۔
عمران خان لاہور کے مقامی ہوٹل میں منعقدہ تقریب میں شرکت کے لئے ہوٹل پہنچ کر لفٹ کے ذریعے اوپری منزل کی جانب جارہے تھے کہ اس دوران بجلی چلی گئی جس کے باعث وہ لفٹ میں پھنس گئے۔
ہوٹل انتظامیہ نے کافی دیر کوشش کے بعد عمران خان کو لفٹ سے نکالا اور پھر وہ سیڑھیوں کے ذریعے تقریب میں شریک ہوئے، مقامی ہوٹل کی انتظامیہ کا کہنا ہے کہ بیک اپ جنریٹر موجود تھے لیکن انہیں اسٹارٹ ہونے میں کچھ وقت لگتا ہے۔
بعد ازاں میڈیا سے گفتگو میں پاکستان تحریک انصاف کے سربراہ عمران خان کا کہنا تھا کہ کرپشن کے خلاف تحریک اپنی جگہ مگر سب پاک فوج اور کشمیریوں کیساتھ کھڑے ہیں، عمران خان کا کہنا تھا پاناما معاملے پر تمام پارٹیاں متحد ہیں اس معاملے پرخاموش نہیں رہ سکتے۔
پشاور: عمران خان نے کہا کہ وزیراعظم نےاپوزیشن، نیب، الیکشن کمیشن سب کوقابو کرلیا،استعفے کے بجائے ملک کے دورے شروع کردیئے۔
تفصیلات کے مطابق چیئرمین تحریک انصاف عمران خان نے پشاور میں جلسے سے خطاب کرتے ہوئے کہا کہ میں نے سوچا کہ جب تک میں پہنچوں گا پنڈال خالی ہوجائے گا، آپ پاکستانی ہیں اورآپ اس ملک کامستقبل ہیں، نوجوانوں گولی کیاآپ کوکوئی بھی چیزڈرا نہیں سکتی۔
عمران خان نے اکرم درانی پر تنقید کرتے ہوئے کہا کہ اکرم درانی نے کہا تھا بنی گالا کی اینٹ سے اینٹ بجا دوں گا، بنی گالا تو دور کی بات پرسوں بنوں آرہا ہوں دیکھنا میں کیا کرتا ہوں، اکرم درانی کہتے ہیں کہ وہ کے پی کے حکومت گراسکتے ہیں،کیا لوگوں کو پیسے دے کر حکومت گرائیں گے،
ہمیں ایسےلوگ نہیں چاہتےجن کی قیمت لگ جائے،اکرم درانی کواسلام کےنام پرسیاست کرتےہوئےشرم آنی چاہئے۔
عمران خان نے مولانا فضل الرحمان پر تنقید کرتے ہوئے کہا مولانا صاحب بار بار کہتے ہیں کہ میں یہودیوں کا ایجنٹ ہوں مولانا صاحب آپ کے ہوتے ہوئے یہودیوں کے ایجنٹ کی ضرورت نہیں،جو سازش مولانا کرتے ہیں یہودی کی ضرورت نہیں، مولاناصاحب ماضی میں آصف زرداری سےملے،اب نوازشریف کےساتھ ہیں،مولانافضل الرحمان پرویزمشرف کےدور میں بھی حکومت میں تھے،کوئی یہودی ہمارے ملک کاسربراہ بن گیاتومولاناان کےبھی وزیربن جائیں گے۔
انہوں نے اپنے خطاب میں ملائیشیا کی ترقی کی مثال دیتے ہوئے کہا مہاتیر محمد نے ملایشیا کو عظیم ملک بنایا، مہاتیر محمد نے کہا کہ لیڈر کو ایماندار ہونا چاہیے کیونکہ جب لیڈر کرپٹ ہو تو پورا ملک تباہ ہو جاتا ہے، جب لیڈر خود چور ہو تو نیب کو کیسے آزاد ہونے دے گا ورنہ خود پکڑا جائے گا۔ خیبرپختونخوا کی نیب نے وزیر کو پکڑا کبھی ایسا پہلے نہیں ہوا تھا، نواز شریف اگر بے قصور ہیں تو خیبرپختونخوا کی طرح احتساب کا قانون لیکر آئیں، خیبرپختونخوا پولیس نے سورن سنگھ کے قاتلوں کو 24 گھنٹے میں پکڑ لیا، زیادہ دیر نہیں پنجاب پولیس بھی ٹھیک کر کے دکھاؤں گا، میاں صاحب نے کرپشن بچانے کیلئے پورے ملک کا نظام تباہ کر دیا۔
اسلام آباد : تحریک انصاف نے خورشید شاہ کی جانب سے حکومت کے ساتھ ثالثی کی پیشکش مسترد کر دی ہے۔
آزادی مارچ کے چیف آرگنائزر سیف اللہ نیازی نے سید خورشید شاہ کی جانب سے حکومت سے ثالثی کی پیشکش پر کہا ہے کہ وہ خورشید شاہ کے جذبات کی قدر کرتے ہیں ، لیکن اب بات چیت وقت گزر چکا ہے، آزادی مارچ کا مقصد دھاندلی زدہ حکمرانوں کو بے نقاب کرنا ہے، آزادی مارچ ہر صورت ہو گا، ملک کو بادشاہت سے نجات دلائیں گے،اگر حکومت نے پارٹی قیادت یا کارکنان کو گرفتار کرنے کی کوشش کی تو غیر جمہوری ہو گا، پیپلز پارٹی کے رہنما قمر زمان کائرہ نے کہا ہےکہ حکومت سنجیدیگی کا مظاہرہ نہیں کررہی، حکومت کو صورتحال دیکھ کر کچھ کرنا چاہئےاور جمہوریت کاتسلسل برقرار رہناچاہئے،تحریک انصاف استعفے کیلئے تیار ہے پھر حکومت کیا کریگی۔
کراچی: تحریک انصاف نےجماعت اسلامی کولانگ میں شرکت کی دعوت دے دی،سراج الحق کہتے ہیں شرکت کا فیصلہ مشاورت سے کریں گے۔
تحریک انصاف کے سینئر وائس چیرمین شاہ محمود قریشی سے ملاقات کے بعد امیر جماعت اسلامی سراج الحق کا کہنا تھا کہ جلسے جلوس کرنا تحریک انصاف کا حق ہے، سراج الحق نے کہا کہ تحریک انصاف اور جماعت اسلامی کا مشترکہ موقف ہے کہ انتخابات شفاف اور الیکشن کمیشن خود مختار ہونا چاہئے۔
اس موقع پر شاہ محمود قریشی کا کہنا تھا کہ وہ ا پنے وفد کے ساتھ میر جماعت اسلامی کو آزادی مارچ میں شرکت کی دعوت دینے آئے تھےا ور مطمئین واپس جا رہے ہیں،انکا کہنا تھا کہ جماعت اسلامی اور تحریک انصا ف کے موقف بہت سے مسائل پر یکساں ہیں اور اس یگانگت کو آگے بڑھانا چاہتے ہیں۔
اسلام آباد : اپوزیشن لیڈر خورشید شاہ نے کہا ہے کہ حکومت عمران خان سے مذاکرات کرے،عمران خان اتنے آگے نہ بڑھیں کہ واپسی کا راستہ نہ رہے۔
پیپلزپارٹی نے حکومت اور اپوزیشن کے درمیان ثالثی کی پیشکش کر دی ہے ، پارلیمنٹ کے باہر میڈیا سے گفتگو میں خورشید شاہ کا کہنا تھا کہ اگردونوں جماعتیں چاہیں تو پیپلز پارٹی ثالث کا کردار اد اکرسکتی ہے،پیپلزپارٹی کسی صورت حکومت گرنے نہیں دے گی۔
خورشید شاہ کا کہنا تھا کہ نوازشریف کو تحریک انصاف سےمذاکرات کرنے چاہئیں، اس سے قبل ڈپٹی اسپیکرسےملاقات میں خورشید شاہ نے اسلام آباد میں آرٹیکل دو سو پینتالیس کےنفاذپراحتجاج کیا، ان کا کہنا تھاکہ اسلام آباد میں ہنگامی حالت نہیں کہ آرٹیکل دو سوپینتا لیس کا نفاذ کیا جائے۔
