لاہور: پاکستان کرکٹ بورڈ کے نئے چیئرمین ذکا اشرف نے کہا ہے کہ نجم سیٹھی کو باعزت طریقے سے الوداع کرنا چاہتے تھے۔
پی سی بی مینجمنٹ کمیٹی کے نئے چیئرمین ذکا اشرف نے چارج سنبھالنے کے بعد میجمنٹ کمیٹی کے اجلاس سے خطاب کرتے ہوئے کہا کہ وزیر اعظم شہباز شریف، آصف زرداری کا شکر گزار ہوں، ان کے اعتماد پر پورا اترنے کی کوشش کروں گا۔
پی سی بی چیئرمین نے کہا کہ میری خواہش تھی کہ اختلافات نہیں ہونے چاہئیں، ہم نے متحد ہو کر پاکستان کرکٹ کی بہتری کے لئے کام کرنا ہے، چاہتے تھے نجم سیٹھی کو باعزت طریقے سے الوداع کرتے، نجم سیٹھی کو پیغام بھجوایا تھا، آج اعجاز بٹ کو بھی اچھی طرح سے رخصت کیا۔
ذکا اشرف نے کہا کہ ایشیا کپ، ورلڈ کپ سمیت بہت سے معاملات میں بہتری کی ضرورت ہے، ہم اپنی پوری توجہ کرکٹ اور کرکٹرز کی بہتری پر مرکوز رکھیں گے۔
نئے چیئرمین ذکا اشرف نے پی سی بی مینجمنٹ کمیٹی کا چارج سنبھال لیا
انہوں نے کہا کہ بین الاقوامی محاذ پر بہت سارے چیلنجز کا سامنا ہے، بین الاقوامی ایونٹس میں پاکستان کرکٹ کو اسکا جائز حق دلوائیں گے، جس کے لیے چاہتے ہیں کہ کرکٹ کی بہتری کے لئے سب مل کر کام کریں۔
پی سی بی مینجمنٹ کمیٹی کے نئے چیئرمین ذکا اشرف نے بورڈ کے معاملات میں شفافیت لانے کی سخت ہدایت کردی۔
انہوں نے کہا کہ ریجنز، ایسوسی ایشنز کے انتخابات میں دھاندلی کی شکایات کا ازالہ کیا جائے گا، ریجنز اور ایسوسی ایشنز کے صاف شفاف انتخابات کا انعقاد یقینی بنایا جائے، وزارت بین الصوبائی رابطہ آڈٹ کے لئے جو چیزیں مانگ رہی ہیں اسکو فراہم کی جائیں۔
ذکا اشرف نے کہا کہ ڈومیسٹک کرکٹ میں کھلاڑیوں کو اچھی سہولیات دیں گے تو اچھے کرکٹر سامنے آئیں گے، ایبٹ آباد، میرپور اور حیدرآباد اسٹیڈیم کو بہتر بنایا جائے گا، اسٹیڈیمز میں ہاسپیٹیل باکسز کو اپ گریڈ کریں گے۔
ذکااشرف نے مزید کہا کہ کرکٹ شائقین کے لیے سہولتوں میں مزید بہتری لائی جائے گی، کوشش کی جائے کہ پاکستان کرکٹ بورڈ کی آمدن میں اضافہ ہو ۔
ذکااشرف، سلمان نصیر اور فیصل حسنین کی آئی سی سی اجلاس میں شرکت فیصلے کی توثیق کردی۔
