Tag: چیئرمین سینیٹ

سکھر: پاکستان پیپلز پارٹی کے سینیئر رہنما خورشید شاہ کا پڑوسی ملک کی جانب سے ایل او سی پر کلسٹر بموں کے استعمال پر کہنا ہے کہ بھارت کی پوری کوشش ہے کہ خطے کا امن خراب ہو۔

تفصیلات کے مطابق خورشید شاہ سندھ کے شہر سکھر میں میڈیا سے گفتگو کر رہے تھے، انھوں نے کہا کہ بھارت اس خطے میں مسلسل امن خراب کرنے کی کوشش کر رہا ہے۔

انھوں نے سینیٹ میں اپوزیشن کی تحریکِ عدم اعتماد کی ناکامی پر کہا کہ سینیٹرز کو چاہیے تھا کہ وہ ووٹ نہ دیتے اور اجلاس سے چلے جاتے۔

پی پی رہنما کا کہنا تھا کہ پارلیمنٹ کے اراکین بھی اگر بکیں اور پارٹی سے غداری کریں تو ملک کو کیا عزت ملے گی، مذکورہ ارکان نے ملک کی جگ ہنسائی کرائی۔

یہ بھی پڑھیں:  سینیٹ میں تحریک عدم اعتماد کی ناکامی، بلاول بھٹو نے فیکٹس فائنڈنگ کمیٹی بنادی

خورشید شاہ نے مزید کہا کہ ہم ایسے لوگ ہیں جو کبھی بھی دباؤ میں نہیں آئے، سیاست دانوں کو جیل میں ڈال کر کم زور نہیں کیا جا سکتا، ہم نے نہ کبھی کسی کی بالا دستی قبول کی تھی اور نہ اب کریں گے۔

انھوں نے کہا کہ ہمارے پاس سب سے بڑا ہتھیار پارلیمنٹ ہے، تاہم ہمارے ہی سینیٹرز چوری ہوئے اور ہم نہ روک سکے، تو حکومت کو کام سے کیا روک سکیں گے۔

خیال رہے کہ چیئرمین پیپلز پارٹی بلاول بھٹو نے چیئرمین سینیٹ کے خلاف تحریک عدم اعتماد کی ناکامی پر پارٹی پالیسی کے خلاف ووٹ دینے والے سینیٹرز کو بے نقاب کرنے کے لیے فیکٹس فائنڈنگ کمیٹی بنا دی ہے۔

اسلام آباد: وفاقی وزیر سائنس اور ٹیکنالوجی فواد چوہدری نے کہا ہے کہ اپوزیشن ناکام ہو گئی، مولانا فضل الرحمان نے مریم نواز اور بلاول بھٹو کو استعمال کیا۔

تفصیلات کے مطابق اپوزیشن کی جانب سے پریس کانفرنس کے بعد وفاقی وزیر نے میڈیا سے بات کرتے ہوئے کہا کہ مریم اور بلاول کو پتا چل گیا ہوگا کہ سیاست ایسے نہیں ہوتی، سیاست کرنا کوئی بچوں کا کام نہیں ہے۔

انھوں نے کہا کہ اپوزیشن کو چاہیے مولانا سے پوچھیں ان کے 5 ووٹ کہاں گئے، نواز شریف، آصف زرداری مولانا سے بلیک میل ہونے کی بہ جائے پلی بارگین کر لیں۔

وفاقی وزیر نے کہا کہ اکثر سینیٹرز کی رائے تھی کہ یہ تحریکِ عدم اعتماد ٹھیک نہیں، لیکن کچے ذہنوں کے فیصلہ تھا کہ ابو کے لیے چیئرمین سینیٹ کو ہٹانا ہے، ان کے ابو جیلوں میں ہیں اور پیسے بھی نہیں دینا چاہتے۔

یہ بھی پڑھیں:  اپوزیشن کا ہارس ٹریڈنگ کا الزام، اگلے ہفتے اے پی سی بلانے کا اعلان

فواد چوہدری نے کہا کہ اپوزیشن کی سیاست دفن ہو گئی، تحریک عدم اعتماد سے ان کو کیا فائدہ ہوا، اپوزیشن لوگوں کو بھیڑ بکریاں سمجھنا چھوڑ دے، پیپلز پارٹی اور ن لیگ کے پاس کوئی نظریہ نہیں ہے۔

وفاقی وزیر کا کہنا تھا کہ اپوزیشن کو خطرہ ہے تو مولانا فضل الرحمان کی جیبیں بھی چیک کرے، مولانا مریم نواز اور بلاول بھٹو کو استعمال کیا، اپوزیشن کے ساتھ ہمارا کوئی بڑا جھگڑا نہیں ہے، وہ چاہتی ہے کیسز اور احتساب پر حکومت بات نہ کرے جب کہ قانون میں پلی بارگین کا آپشن ہے پیسا دے دیں اور باہر چلے جائیں۔

فواد چوہدری نے کہا کہ چیئرمین سینیٹ کی کام یابی سی حکومت اور ایوان مضبوط ہوا، کیا پتا حاصل بزنجو نے صادق سنجرانی کے حق میں ووٹ دیا ہو۔

اسلام آباد: چیئرمین سینیٹ صادق سنجرانی نے صدر مملکت ڈاکٹر عارف علوی سے ملاقات کے بعد میڈیا سے گفتگو کرتے ہوئے کہا ہے کہ سینیٹ کا اجلاس یکم اگست ہی کو ہوگا۔

تفصیلات کے مطابق آج جمعرات کو صدر مملکت عارف علوی سے چیئرمین سینیٹ صادق سنجرانی نے خصوصی ملاقات کی ہے، بتایا گیا ہے کہ ملاقات میں سیاسی صورتِ حال پر بات چیت کی گئی۔

چیئرمین سینیٹ صادق سنجرانی نے ملاقات کے بعد میڈیا سے غیر رسمی گفتگو کی، صحافی نے سوال کیا کہ صدر مملکت سے ملاقات کس سلسلے میں ہوئی، تو چیئرمین سینیٹ نے جواب دیا کیوں میں صدر مملکت سے نہیں مل سکتا؟

دریں اثنا، صادق سنجرانی نے کہا کہ صدر مملکت عارف علوی سے ان کی ملاقات معمول کے مطابق تھی۔

یہ بھی پڑھیں:  سینیٹ چیئرمین کے خلاف تحریک عدم اعتماد، حکومت اور اپوزیشن میں بیک ڈور رابطے

انھوں نے واضح طور پر کہا کہ سینیٹ کا اجلاس یکم اگست ہی کو ہوگا، یہ اجلاس تحریکِ عدم اعتماد کے معاملے ہی پر بلایا گیا ہے۔ خیال رہے کہ صدر مملکت کی جانب سے یکم اگست کو سینیٹ اجلاس بلانے کی ہدایت کی گئی تھی۔

واضح رہے کہ حکومت اور اپوزیشن کے درمیان چیئرمین سینیٹ کی تبدیلی کا معاملہ بہت آگے بڑھ چکا ہے، گزشتہ روز اس سلسلے میں بیک ڈور رابطے بھی ہوئے، ذرایع نے بتایا کہ حکومت کی جانب سے اپوزیشن کی اعلیٰ قیادت سے ملاقاتوں کا بھی امکان ہے۔

وزیر اعلیٰ بلوچستان جام کمال نے گزشتہ روز جے یو آئی ف کے سربراہ مولانا فضل الرحمان سے ملاقات کر کے چیئرمین سینیٹ کے معاملے پر ان سے تعاون کی اپیل کی تھی۔