لاہور: مسلم لیگ ن کے رہنما اور پنجاب اسمبلی کے اپوزیشن لیڈر حمزہ شہباز نے لاہور ہائی کورٹ کے بنچ پر اچانک عدم اعتماد کا اظہار کردیا ، جس کے بعد بنچ نے ملزم کی درخواستِ ضمانت سننے سے معذرت کرلی۔
تفصیلات کے مطابق حمزہ شہباز آج احتساب عدالت میں پیشی بھگت کر رمضان شوگر ملز، اثاثہ جات اور صاف پانی کیس میں عبوری ضمانت میں توسیع کے معاملے پر ہائی کورٹ پہنچنے ، سماعت کے دوران انہوں نے بنچ پر اچانک عدم اعتماد کا اظہار کیا جس کے سبب دو رکنی بینچ نےملزم کی درخواست ضمانت سننے سے معذرت کرتے ہوئے چیف جسٹس سےنیا بینچ تشکیل دینےکی سفارش کردی۔بنچ کی معذرت کے ساتھ حمزہ شہباز کی ضمانت میں بھی توسیع ہوگئی۔
سماعت شروع ہوئی تو وکیل صفائی ایک گھنٹہ دلائل دیتے رہے ۔ پھر حمزہ شہباز اچانک کھڑے ہوئے اور کیس سننےوالےبینچ پرعدم اعتمادکااظہارکردیا۔ ملزم حمزہ شہبازنےکہا چیئرمین نیب کہتےہیں حمزہ شہبازکے لیے بینچ تبدیل کرایا، کیاچیئرمین نیب اتنا طاقتور ہے جو مرضی کا بنچ بنوا کر حمزہ شہباز کی ضمانت منسوخ کروا سکتا ہے۔ لہذا اس بینچ پر تحفظات ہیں۔
حمزہ شہباز کی جانب سے عدم اعتماد کے اظہار پرجسٹس علی باقر نجفی کی سربراہی میں دو رکنی نےحمزہ سماعت سےمعذرت کرلی اورچیف جسٹس سےمقدمہ سماعت کےلیےدوسری بینچ کوبھجوانےکی سفارش کردی۔
فاضل ججز نے کہا کہ درخواست گزارنےچیئرمین نیب کےانٹرویوکی بنیادپر تحفظات کااظہارکیا،اب مزیدسماعت نہیں کرسکتے۔ نئی صورتحال میں حمزہ شہبازکی عبوری ضمانت میں غیرمعینہ مدت تک توسیع ہوگئی۔
سماعت کے بعد میڈیا سے گفتگو کرتے ہوئے حمزہ شہباز نے چیئرمین نیب کو شدید تنقید کا نشانہ بھی بنایا، ان کا کہنا تھا کہ عدالتیں کہہ چکی ہیں نیب سیاست زدہ ہوچکی ہے۔
انہوں نے یہ بھی کہا کہ میں اپنی ذات کے لیے بات نہیں کررہا ، میں چاہتا ہوں کہ احتساب ہو تو سب کا ہو۔ میں نے اٹھارہ کروڑ ظاہر کیے ، چیئرمین نیب اب پارلیمانی کمیٹی سے بھاگ نہیں سکتے۔
