Tag: چیف جسٹس آصف کھوسہ

اسلام آباد : سپریم کورٹ نے محمد سبطین قتل کیس میں ملزم کی بریت کے خلاف درخواستیں مسترد کر دیں ، چیف جسٹس نے ریمارکس میں کہا سپریم کورٹ واضح کہہ چکی ہے کہ جہاں بھی سچ کو جھوٹ سے ملائیں گے سب برباد ہو جائےگا۔

تفصیلات کے مطابق سپریم کورٹ میں ویڈیو لنک کے ذریعے محمد سبطین کے قتل سے متعلق کیس کی سماعت ہوئی ، چیف جسٹس  آصف کھوسہ کی سربراہی میں تین رکنی بینچ نے کیس کی سماعت کی۔

چیف جسٹس نے کہاکہ چھ سال گزر چکے ہیں عبد القیوم کو بری ہوئے، چاروں عینی شاہدین زخمی تھے پھر بھی سچ نہیں بولا، حالات جب خراب کر دیئے جائیں تو پھر نتائج بھی خراب ہی آتے ہیں، گواہوں کو کم از کم سچ بولنا چاہیے تھا۔

چیف جسٹس نے وکیل سے استفسار کیا کہ آپ کہتے ہیں کہ کچھ تو سچ بولا ہے ، سپریم کورٹ واضح کر چکی ہے کہ جہاں بھی سچ کو جھوٹ سے ملائیں گے سب برباد ہو جائےگا۔

جسٹس آصف کھوسہ کا کہنا تھا کہ اللہ کا حکم ہے سچ کو غلط ملت نہ کرو، ملزمان کا رول ہی بدل دیا گیا، سارا مسئلہ پانی سے شروع ہوا اور اس حوالے سے کوئی ثبوت ہی نہیں ہے، جو گواہ اپنی حد تک سچ نہیں بتا سکے ٹرائل کورٹ نے دوسروں کے حوالے سے کیسے یقین کر کے عبد القیوم کو سزا دے دی۔

دلائل سننے کے بعد عدالت نے ملزم کی بریت کے خلاف درخواستیں مسترد کر دیں۔

یاد رہے کہ ٹرائل کورٹ نے عبد القیوم کو عمر قید جبکہ محمد افضل اور مختار احمد کو بری کر دیا تھا،ہائیکورٹ نے 2013 میں عبد القیوم کو بری دیا تھا۔

اسلام آباد : چیف جسٹس آصف کھوسہ نے قتل کےملزم کی بریت کےخلاف نظرثانی اپیل خارج کرتے ہوئے ریمارکس دیئے سچ بولنے کی ہمت نہیں توانصاف بھی نہ مانگیں، سچ کے بغیر انصاف نہیں ہوسکتا،گواہ اللہ کی خاطر بنا جاتا ہے،اللہ کا حکم ہے اپنے والدین، بھائی، عزیز کےخلاف سچی گواہی دو۔

تفصیلات کے مطابق سپریم کورٹ میں چیف جسٹس آصف کھوسہ کی سربراہی میں 3 رکنی بینچ نے قتل کے ملزم احمد کی بریت کیخلاف مقتول طارق محمود کے بھائی کی نظر ثانی اپیل پر سماعت کی۔

دور ان سماعت چیف جسٹس نے مقتول کے بھائی سے مکالمہ کیا کہ سپریم کورٹ نے آپ کی اپیل کیوں خارج کی ، کیا عدالتی فیصلہ آپ نے پڑھا۔

بھائی مقتول صفدر صدیق نے کہاکہ میرے بھائی کو احمد نے قتل کیا، جس پر چیف جسٹس نے کہاکہ احمد نے قتل کیا ہوگا، سوال یہ ہے احمد بری کیسے ہوا؟۔

چیف جسٹس نے کہاکہ غلط شہادت پر ملزم بری ہو جاتے ہیں،جھوٹی شہادت پر ملزمان کے بری ہونے کا الزام عدلیہ پر ڈال دیا جاتا ہے، سچ بولنے کی ہمت نہیں تو انصاف بھی نہ مانگیں۔

چیف جسٹس نے مکالمہ کیا کہ آپ نے بھائی کے قتل کی جھوٹی گواہی دی، جس ڈیرہ پر قتل کا واقعہ ہوا وہاں آپ موجود ہی نہیں تھے،کیوں نہ جھوٹی گواہی پر آپ کےخلاف کاروائی کرکے عمر قید سزا دیں۔

جسٹس آصف کھوسہ نے کہاکہ جھوٹی گواہی پر پہلے ہی پانچ جھوٹے گواہوں کو کارروائی کا سامنا ہے، سچ کے بغیر انصاف نہیں ہو سکتا،گواہ اللہ کی خاطر بولا جاتا ہے،اللہ کا حکم ہے اپنے والدین، بھائی، عزیز کےخلاف سچی گواہی دوں۔

چیف جسٹس نے کہاکہ جھوٹے گواہوں کے خلاف کاروائیاں شروع ہو چکی ہیں،کوشش کر رہے ہیں عدلیہ میں سچ کو واپس لائیں۔

یاد رہے کہ 2014 میں احمد پر طارق محمود کو قتل کا الزام تھا ،ٹرائل کورٹ اور ہائیکورٹ نے عمر قید کی سزا سنائی تھی،سپریم کورٹ نے ملزم احمد کو بری کر دیا تھا، احمد کی بریت کیخلاف مقتول کے بھائی صفدر صدیق نے نظر ثانی اپیل دائر کی تھی۔