لارکانہ: وزیر خارجہ بلاول بھٹو کا کہنا ہے کہ مناسب یہی ہے کہ لارجر بینچ بنایا جائے ایسا نہ ہوا تو آئینی بحران پیدا ہوگااور خدانخواستہ مارشل لا لگ جائے گا۔
تفصیلات کے مطابق لاڑکانہ میں میڈیا سے گفتگو کرتے ہوئے چیئرمین پاکستان پیپلز پارٹی بلاول بھٹو زرداری نے کہا کہ ججزکی طرف سے اعلیٰ عدلیہ پرجو تنقید ہورہی ہے وہ تاریخی ہے،سینئرججزکی جانب سےاعلیٰ عدلیہ پرتنقید کی جارہی ہے، آپ کے اپنےججزآپ کےکردارکےخلاف ہیں اب مناسب بات ہے کہ لارجربینچ بنادیاجائے۔
بلاول بھٹو کا کہنا تھا کہ آئین کے مطابق ایک لارجر بینچ بنادیا جائے تمام ججز بیٹھیں اور فیصلہ سنائیں ہمیں وہ فیصلہ سرآنکھوں پر ہوگا اگر لارجر بینچ نہیں بنتا تو آئینی بحران پیدا ہوگا اور ایسا نہ ہو کہ خدانخواستہ مارشل لا لگ جائے۔
وزیر خارجہ کا کہنا تھا کہ پیپلزپارٹی نے ہمیشہ آئین کی سربلندی کیلئےجدوجہد کی،انتخابات کےمعاملےپرجو کچھ ہورہاہےقوم کےسامنےہے،تین ججز صاحبان کوسوچناچاہیے کہ کیا ہورہاہے؟یہ الیکشن کاٹرائل نہیں چل رہا بلکہ سپریم کورٹ کاٹرائل چل رہاہے۔
بلاول بھٹو نے کہا کہ عمران خان پرویز مشرف کا چیف پولنگ ایجنٹ تھا آج ہر وہ شخص جس کاماضی غیرجمہوری تھا وہ پی ٹی آئی میں شامل ہے،پاکستان کی سیاست یرغمال ہوچکی،سیلاب متاثرین کاپیسہ تخت لاہورکی لڑائی پرلگےگاتوہم احتجاج کرینگے۔
