کراچی : چیف جسٹس عطا عمر بندیال نے کےالیکٹرک نجکاری سے متعلق کیس میں ریمارکس دیئے ہم معاشی معاملات میں مداخلت نہیں کریں گے، معاشی معاملات میں ہماری مہارت نہیں ہے، آپ چاہیں تو متعلقہ ہائیکورٹ سے رجوع کر سکتے ہیں۔
تفصیلات کے مطابق سپریم کورٹ کراچی رجسٹری میں ویڈیو لنک کے ذریعے کے ای ایس سی کی نجکاری کے خلاف جماعت اسلامی کی درخواست پر سماعت ہوئی۔
چیف جسٹس کی سربراہی میں3رکنی بینچ نے سماعت کی، جسٹس اطہر من اللہ نے استفسار کیا یہ پالیسی میٹرہے اس کا دائرہ اختیار یہ کورٹ تو نہیں ؟ میرا خیال ہے پہلے مناسب فورم پر جانا چاہئے۔
جسٹس عائشہ ملک نے کہا کہ اب تو ادارے کی نجکاری ہوچکی ،ادارہ طویل عرصہ سے کام کررہا ہے، جس پر وکیل جماعت اسلامی نے بتایا کہ اس میں کئی معاملات حل طلب ہیں سناجائیگا تو بتاؤنگا سماعت کیوں ضروری ہے۔
چیف جسٹس عمر عطا بندیال نے ریمارکس دیے کہ نجکاری کو 18 سال ہوچکے ہیں ، کئی ڈویلپمنٹ ہوچکی ہے، آپ درخواست کو اپڈیٹ اور اپ گریڈ کرلیں تو اچھا ہے۔
کےالیکٹرک نجکاری سےمتعلق کیس میں چیف جسٹس پاکستان نے وکیل درخواست گزار سے مکالمے میں کہا کہ ہم معاشی معاملات میں مداخلت نہیں کریں گے، معاشی معاملات میں ہماری مہارت نہیں ہے، آپ چاہیں تو متعلقہ ہائیکورٹ سے رجوع کر سکتے ہیں، ویسے بھی پارلیمنٹ نے آرٹیکل 184کی شق تین سے متعلق دو قوانین بنائے ہیں۔
چیف جسٹس نے استفسار کیا کہ پرانے مقدمات اس لیے سماعت کیلئے مقرر کر رہے ہیں تاکہ دیکھ سکیں لائیو ایشو ہے؟ ایڈووکیٹ صلاح الدین نے بتایا کہ کے ایس سی لیبر یونین کیخلاف درخواست بھی آئی ہے تو جسٹس عائشہ ملک کا کہنا تھا کہ وہ کیس اس وقت ہمارے سامنے نہیں ہے۔
وکیل درخواست گزار نے استدعا کی کہ کیس کی سماعت آئندہ ہفتے تک ملتوی کی جائے، جس پر چیف جسٹس نے کہا کہ آئندہ ہفتے چھٹیاں شروع ہو رہی ہیں، ججز دستیاب نہیں ہونگے،آئندہ ہفتے ججز متعلقہ رجسٹریوں میں ہوں گے، آپ ہدایات لے لیں، کل کیس سنیں گے، کے الیکٹرک کی نجکاری کو 18 سال ہو چکےہیں۔
بعد ازاں عدالت نے کےالیکٹرک نجکاری سےمتعلق کیس کی سماعت کل تک ملتوی کردی۔
