Tag: چیف جسٹس یحییٰ آفریدی

اسلام آباد : بانی پی ٹی آئی نے چیف جسٹس یحییٰ آفریدی اور قائم مقام چیف جسٹس کو خط لکھا،جس میں‌ آئین اوربنیادی حقوق کی خلاف ورزیوں پرنوٹس لینے کی استدعا کی گئی ہے۔

تفصیلات کے مطابق بانی پی ٹی آئی کا خط چیف جسٹس یحییٰ آفریدی کے چیمبرمیں پہنچا دیا گیا، خط سلمان اکرم راجہ نےچیف جسٹس کے چیمبر میں پہنچایا۔

خط چیف جسٹس یحییٰ آفریدی اور قائم مقام چیف جسٹس کے نام لکھا گیا ہے ، خط میں آئین اوربنیادی حقوق کی خلاف ورزیوں پرنوٹس لینے کی استدعا کی گئی ہے۔

عمران خان کی بہن علیمہ خانم نے اسلام آباد ہائیکورٹ کے باہر میڈیا سے گفتگو کرتے ہوئے کہا پریشانی میں مبتلا ہیں، 5 ماہ سے بانی سے ملاقات نہیں کرنےدی جا رہی ہے۔

علیمہ خانم کا کہنا تھا کہ چیف جسٹس سے ملاقات کامقصد عدلیہ کےتقدس کی بحالی تھا، ایک وقت تھاجب مجسٹریٹ بھی توہین عدالت پرجیل میں ڈال دیتاتھا ،ہم نےدرخواست کی ہے کہ اب کورٹ کو ڈیجیٹلائزکردیں۔

دوسری جانب چیئرمین پی ٹی آئی بیرسٹر گوہر نے بتایا تھا کہ قائم مقام چیف جسٹس اسلام آباد ہائیکورٹ سردارسرفراز ڈوگر سے ملاقات ہوئیم، جس میں ہم نے اپنی تمام گزارشات چیف جسٹس کےسامنے رکھیں ، علیمہ خانم نےتفصیل سے فیملی ملاقاتوں سے متعلق بتایا۔

ان کا کہنا تھا کہ چیف جسٹس سے ملاقات کے بعد امید پیدا ہوئی ہے، ہمیں منگل کوبانی پی ٹی آئی سے فیملی اور وکلا کی ملاقات کی امید ہے۔

اسلام آباد : چیف جسٹس آف پاکستان یحییٰ آفریدی نے انتظامی کمیٹیوں کی تشکیل نو کردی، جس کے تحت جسٹس مسرت ہلالی کو خیبرپختونخوا کی انسداد دہشت گردی عدالتوں کا نگران جج مقرر کردیا گیا۔

تفصیلات کے مطابق چیف جسٹس آف پاکستان یحییٰ آفریدی نے انتظامی کمیٹیوں کی تشکیل نو کردی، رجسٹرار سپریم کورٹ نے تقرریوں کے نوٹیفکیشن جاری کردیے۔

جس کے تحت جسٹس مسرت ہلالی کو خیبرپختونخوا کی انسداد دہشت گردی عدالتوں کا نگران جج مقرر کردیا گیا جبکہ جسٹس ملک شہزاد پنجاب،جسٹس ہاشم کاکڑ بلوچستان کی انسداددہشت گردی عدالتوں کے نگران ہوں گے۔

جسٹس صلاح الدین پنہور کو سندھ ،جسٹس عامر فاروق کو اسلام آباد اے ٹی سی کا نگران مقرر کیا گیا ہے۔

سپریم کورٹ بلڈنگ کمیٹی کی سربراہی جسٹس جمال مندوخیل کے سپرد کی گئی، جسٹس شفیع صدیقی اور جسٹس عامر فاروق بلڈنگ کمیٹی کے ممبر ہوں گے۔

چیف جسٹس یحییٰ آفریدی آئی ٹی کمیٹی کی سربراہی خود کریں گے جبکہ جسٹس محمد علی مظہر اور جسٹس گل حسن کمیٹی ارکان ہوں گے۔

ریسرچ سینٹر کمیٹی کی سربراہی جسٹس شاہد بلال حسن کے سپرد کی گئی، جس کے ارکان میں جسٹس شفیع صدیقی اور جسٹس عامر فاروق کو شامل کیا گیا ہے۔

جسٹس محمد علی مظہر لاکلرک پروگرام کمیٹی کےسربراہ اور جسٹس گل حسن ممبر ہوں گے جبکہ مختلف نوعیت کی چیمبر اپیلیں چیف جسٹس یحییٰ آفریدی،جسٹس حسن اظہر،جسٹس ہاشم کاکڑ،جسٹس صلاح الدین پنہور اور جسٹس شکیل احمد سنیں گے۔

سپریم کورٹ آرکائیو اینڈ میوزیم کمیٹی کی سربراہی جسٹس حسن اظہر رضوی کے سپرد کی گئی ہے، جسٹس صلاح الدین پنہور، جسٹس گل حسن اورنگزیب کمیٹی ارکان ہوں گے۔

جسٹس ملک شہزاد کو فوری انصاف اورماڈل کورٹس کمیٹی کی سربراہی دی گئی ہے جبکہ جسٹس ہاشم کاکڑ،جسٹس صلاح الدین،جسٹس اشتیاق ابراہیم کمیٹی کے رکن ہوں گے۔

چیف جسٹس یحییٰ آفریدی نے جسٹس اشتیاق ابراہیم کو سیکیورٹی جج تعینات کردیا، سیکیورٹی جج سپریم کورٹ بلڈنگ، برانچ رجسٹریزاور ججز کالونی کے سیکیورٹی اموردیکھیں گے۔

جسٹس گل حسن کو فیملی اور بچوں کی حوالگی کیسز میں پاک برطانیہ پروٹوکول رابطہ کار جج تعینات کیا گیا ہے۔

سپریم کورٹ عملے کے یونیفارم کی کوالٹی چیک کرنے کیلئے قائم کمیٹی تحلیل کردی گئی ۔

اسلام آباد : چیف جسٹس آف پاکستان یحییٰ آفریدی نے بانی پی ٹی آئی کے خط کے حوالے سے کہا ان کا خط ججز آئینی کمیٹی کو بھجوادیا ہے۔

تفصیلات کے مطابق چیف جسٹس آف پاکستان یحییٰ آفریدی نے صحافیوں سے ملاقات میں بانی پی ٹی ائی کے خط سے متعلق سوال پر کہا کہ بانی پی ٹی آئی جو ہم سے چاہتے ہیں وہ آرٹیکل 184 کی شق 3 سے متعلق ہیں، میں نے کمیٹی سے کہا اس خط کا جائزہ لے کر فیصلہ کریں۔

چیف جسٹس پاکستان کا کہنا تھا کہ بانی پی ٹی آئی کا خط ججز آئینی کمیٹی کو بھجوایا ہے وہ طے کریں گے، یہ معاملہ آرٹیکل 184 کی شق 3 کے تحت آتا ہے اسے آئینی بینچ نے ہی دیکھنا ہے۔

صحافی نے سوال کیا عدلیہ میں اختلافات ختم کرنے کیلئے کیا اقدامات کریں گے ؟ جس پر چیف جسٹس نے جواب دیا کہ یہ معاملات پہلے سے چل رہے ہیں، ٹھیک ہونے میں وقت لگے گا، پرانی چیزیں ہیں آہستہ آہستہ سب ٹھیک ہوجائے گا۔

جسٹس آفریدی نے مزید کہا کہ میں نے ججز سے کہا سسٹم چلنے دیں، سسٹم کونہ روکیں، میں نے کہا مجھے ججز لانے دیں، جسٹس گل حسن اورنگزیب کو سپریم کورٹ لانے کا حامی ہوں، میرے بھائی ججزجو کارپوریٹ کیسز کرتے تھے وہ آج کل کیسز ہی نہیں سن رہے۔

کراچی : چیف جسٹس یحییٰ آفریدی کا کہنا ہے کہ مقدمات میں غیرضروری تاخیربرداشت نہیں ہوگی ، زیر التوامقدمات کی مدت 2 سال سے زیادہ نہیں ہونی چاہیے۔

تفصیلات کے مطابق چیف جسٹس یحییٰ آفریدی پہلے دورے پر کراچی پہنچ گئے ، جہاں سپریم کورٹ کراچی رجسٹری میں جیل اصلاحات سے متعلق اہم اجلاس ہوا۔

اجلاس کی صدارت چیف جسٹس آف پاکستان جسٹس یحییٰ آفریدی نے کی ، اجلاس میں چیف جسٹس سندھ ہائیکورٹ محمد شفیع صدیقی، آئی جی جیل خانہ جات و دیگر نے بھی شرکت کی، اجلاس کا مقصدجیل سسٹم میں موجود اہم مسائل کو حل کرنا تھا۔

ذرائع نے بتایا کہ اجلاس میں چیف جسٹس پاکستان کی جانب سے اہم گائیڈلائنز جاری کی گئیں، جسٹس یحییٰ آفریدی نے کہا کہ مقدمات میں غیرضروری تاخیربرداشت نہیں ہوگی ، زیر التوامقدمات کی مدت 2 سال سے زیادہ نہیں ہونی چاہیے۔

اعلامیے میں بتایا گیا کہ چیف جسٹس نےقیدیوں کےساتھ انسانی ہمدردی اورقانونی تقاضوں کے مطابق سلوک کی اہمیت پر زور دیتے ہوئے کہا کہ فوجداری نظام انصاف سےمتعلق سابقہ پالیسیوں کاجائزہ لیاجائے۔

اجلاس میں سندھ کیلئے ذیلی کمیٹی تشکیل دی گئی، کمیٹی جیلوں کی موجودہ صورتحال کاجائزہ لےکرجامع اصلاحاتی پیکیج تجویزکرے گی۔

جیل اصلاحات سے متعلق سندھ کی ذیلی کمیٹی کا سربراہ جسٹس ریٹائرڈارشادعلی شاہ کو بنایا گیا ہے۔

پراسکیوٹر جنرل سندھ نے بتایا کہ تمام ملزمان کیخلاف بروقت کیسز کا چالان جمع کرایا جاتا ہے، ذرائع نے بتایا کہ کراچی کی دو جیلوں میں قیدیوں کی تعداد گنجائش سے دوگنا ہوچکی ہے، جس پر چیف جسٹس نے قیدیوں پر سندھ حکومت اور چیف جسٹس ہائیکورٹ و دیگر کو پالیسی بنانے کی ہدایت کردی۔

اسلام آباد : چیف جسٹس یحییٰ آفریدی کی زیر صدارت جوڈیشل کمیشن کا اجلاس آج پھر ہوگا، جس میں سندھ ہائیکورٹ کیلئے آئینی بنچز کی تشکیل پر غورہوگا۔

تفصیلات کے مطابق جوڈیشل کمیشن کا اجلاس آج اسلام میں طلب کر لیا گیا ، چیف جسٹس یحییٰ آفریدی اجلاس کی صدارت کریں گے۔

ذرائع کا بتانا ہے کہ اجلاس میں سندھ ہائیکورٹ کیلئے آئینی بنچز کی تشکیل پر غور ہوگا۔

دوسری طرف سندھ میں بھی آئینی بینچ کی تشکیل کے حوالے سے چیف جسٹس سندھ ہائیکورٹ کی زیرصدارت اجلاس آج ہوگا۔

اجلاس میں وزیرقانون وداخلہ ضیالنجار، ایڈووکیٹ جنرل سمیت دیگرحکام شرکت کریں گے۔

ذرائع کا کہنا ہے کہ اجلاس میں سندھ بارکونسل کوبھی مدعو کیا گیا ہے۔

مزید پڑھیں : جوڈیشل کمیشن نے 7 رکنی آئینی بینچ تشکیل دے دیا

یاد رہے گذشتہ اجلاس میں جوڈیشل کمیشن آف پاکستان نے 7 رکنی آئینی بینچ تشکیل دیا تھا، سینئر ترین جج جسٹس امین الدین کو بینچ کا سربراہ مقرر کیا گیا تھا۔

جسٹس امین الدین خان اور جسٹس عائشہ ملک کا پنجاب سے آئینی بینچ کیلیے تقرر کیا گیا تھا جبکہ جسٹس نعیم اخترافغان اور جسٹس جمال مندوخیل بلوچستان سے بینچ میں شامل ہیں۔

اسی طرح جسٹس محمد علی مظہر اور جسٹس حسن اظہر رضوی سندھ سے آئینی بینچ میں شامل ہیں جبکہ جسٹس مسرت ہلالی خیبر پختونخوا سے بینچ میں شامل ہیں۔

اسلام آباد : طویل مقدمہ بازی سے متعلق چیف جسٹس یحییٰ آفریدی کے اہم ریمارکس سامنے آگئے۔

تفصیلات کے مطابق سپریم کورٹ میں چیف جسٹس یحییٰ آفریدی کی سربراہی میں دورکنی بینچ نے زمینی تنازع کیس کی سماعت کی۔

وکیل درخواست گزار نے بتایا کہ عدالت تحریری حکمنامے میں متعلقہ فورم سے رجوع کی ہدایت کردے۔

دوران سماعت چیف جسٹس یحییٰ آفریدی نے طویل مقدمہ بازی سے متعلق ریمارکس میں کہا کہ رجسٹرار آفس کےاعتراضات کیخلاف ایک اپیل سن رہاتھا، وکیل نےاستدعاکی سپریم کورٹ متعلقہ فورم سےرجوع کرنےکی ہدایت کرے۔

چیف جسٹس کا کہنا تھا کہ بعض اوقات ایک جملہ لکھ دینےسےاٹھارہ اٹھارہ سال تک کیسزچلتے رہتے ہیں، حکم نامے میں ایسی آبزرویشن نہیں دیں گے، جس سےدوبارہ نیچےسےمقدمہ ہو۔

جسٹس شاہد بلال حسن نے کہا ہمارے لکھے بغیر بھی متعلقہ فورم سےرجوع کر سکتے ہیں۔

بعد ازاں عدالت نے متعلقہ فورم سے رجوع کرنے کی آبزرویشن دینے کی استدعا مسترد کردی۔