چیمپئنز ٹرافی کے لیے پاکستانی اسکواڈ میں فہیم اشرف کی اچانک شمولیت پر سب حیران ہیں تاہم ہیڈ کوچ عاقب جاوید نے اس کی اہم وجہ بتا دی ہے۔
آئی سی سی چیمپئنز ٹرافی کا آغاز 19 فروری کو پاکستان کی میزبان میں آغاز ہو رہا ہے۔ دفاعی چیمپئن اسکواڈ کا سب سے آخر میں اسکواڈ کا اعلان کیا گیا، تاہم اسکواڈ کا اعلان ہوتے ہی اس پر انگلیاں اٹھ رہی ہیں۔ بالخصوص آل راؤنڈر فہیم اشرف اور خوشدل شاہ کی کئی سال بعد اچانک ٹیم میں واپسی پر شائقین کرکٹ کے ساتھ سابق کھلاڑی بھی سوالات اٹھا رہے ہیں۔
ایسے میں پاکستان کرکٹ ٹیم کے ہیڈ کوچ عاقب جاوید سامنے آئے ہیں اور انہوں نے فہیم اشرف کی اسکواڈ میں شمولیت کا دفاع کرتے ہوئے کہا ہے کہ ہم فہیم اشرف کو ٹیم میں اس لیے لائے ہیں، کیونکہ ٹاپ سیون میں ہمیں فاسٹ بولنگ آل راؤنڈر کی ضرورت تھی۔
عاقب جاوید نے کہا کہ بہترین کمبی نیشن کے طور پر قومی ٹیم تشکیل دی ہے، تاکہ ضرورت پرفاسٹ باؤلر اوراسپن آل رائونڈر دستیاب ہوں۔ ناقدین کا فہیم اشرف کی سلیکشن کو تنقید کا نشانہ بنانا ان کی رائے ہے۔
اسکواڈ میں صرف ایک اسپیشلسٹ اسپنر کی شمولیت پر ہیڈ کوچ کا کہنا تھا کہ ابرار احمد کے ہوتے ہوئے سفیان مقیم کا ٹیم میں جگہ بنانا مشکل ہے۔ خوشدل شاہ اور سلمان علی آغا کنڈیشن کے مطابق 20 اوورز بھی کر سکتے ہیں۔
انہوں نے کہا کہ ہوم کنڈیشنز میں پاکستان کو تین سو سے زائد رنز بنانے چاہیئں، ٹی ٹوئنٹی کرکٹ کی وجہ سے کرکٹ تیز ہوگئی ہے، ہر ٹیم آسانی سے تین سو پلس رنز بنالیتی ہے۔
عاقب جاوید نے چیمپئنز ٹرافی سے قبل ٹرائی نیشن سیریز کو پاکستان ٹیم کے لیے انتہائی مفید قرار دیتے ہوئے کہا کہ سہ ملکی سیریز کے ذریعے پاکستان ٹیم کو چیمپئینز ٹرافی کے لیے گیئر اپ ہونے کا موقع ملے گا۔
واضح رہے کہ پاکستان چیمپئنز ٹرافی میں اپنا افتتاحی میچ 19 فروری کو کراچی نیشنل اسٹیڈیم میں نیوزی لینڈ کے خلاف کھیلے گا جب کہ اس سے قبل 8 فروری سے جنوبی افریقہ اور نیوزی لینڈ کے ساتھ سہ فریقی ون ڈے ٹورنامنٹ کھیلا جائے گا۔
https://urdu.arynews.tv/champions-trophy-2025-waseem-akram-on-faheem-ashraf-selection/
