ARYNews.tv | Urdu – Har Lamha Bakhabar

Tag: چین

  • ٹرمپ نے شی جن پنگ پر امریکا کے خلاف سازش کرنے کا الزام لگا دیا

    ٹرمپ نے شی جن پنگ پر امریکا کے خلاف سازش کرنے کا الزام لگا دیا

    واشنگٹن (03 ستمبر 2025): صدر ڈونلڈ ٹرمپ نے صدر شی جن پنگ پر امریکا کے خلاف سازش کرنے کا الزام لگا دیا ہے۔

    تفصیلات کے مطابق امریکا کے صدر ڈونلڈ نے چین پر روس اور شمالی کوریا سے مل کر سازش کا الزام لگا دیا ہے، اور دوسری طرف جاپان کے ماضی کا ذکر کر کے اسے ایک پریشان کن صورت حال میں ڈال دیا۔

    روئٹرز کے مطابق ڈونلڈ ٹرمپ نے بیجنگ میں چین کی سب سے بڑی فوجی پریڈ شروع ہوتے ہی، ٹروتھ سوشل پر ایک پوسٹ میں، چین کو جاپان سے آزادی حاصل کرنے میں مدد کرنے میں امریکی کردار پر روشنی ڈالی۔

    ٹرمپ نے چینی صدر کو مخاطب کرتے ہوئے لکھا کہ ’’براہ کرم ولادیمیر پیوٹن اور کم جونگ اُن کو میری نیک تمنائیں پہنچا دیں جب آپ لوگ امریکا کے خلاف سازش کر رہے ہوں۔‘‘

    چین کے صدر شی جن پنگ نے دنیا کو امن کا پیغام دے دیا

    ٹرمپ نے اس سے قبل صحافیوں سے گفتگو کرتے ہوئے کہا کہ وہ چین کے فوجی پریڈ کو امریکا کے لیے کسی چیلنج کے طور پر نہیں دیکھتے، اور انھوں نے چینی صدر شی جن پنگ کے ساتھ اپنے ’’نہایت اچھے تعلقات‘‘ برقرار رکھنے کا اعادہ کیا۔ دوسری طرف بدھ کے روز جاپان کے اعلیٰ ترین سرکاری ترجمان نے پریڈ پر تبصرہ کرنے سے گریز کرتے ہوئے کہا کہ ایشیا کی دو بڑی معیشتیں تعمیری تعلقات قائم کر رہی ہیں۔

    واضح رہے کہ بیجنگ میں فوجی پریڈ سے خطاب میں چین کے صدر شی جن پنگ نے دنیا کو امن کا پیغام دے دیا ہے، انھوں نے کہا کہ انسانیت کو جنگ یا امن میں سے کسی ایک کا انتخاب کرنا ہوگا۔ شی جن پنگ نے اپنے خطاب میں اس عزم کا بھی اظہار کیا کہ ’’ہم جتنے بھی مضبوط ہو جائیں کبھی توسیع پسندی کا راستہ اختیار نہیں کریں گے، ہم کبھی اپنے ماضی کی مصیبت کو کسی دوسرے ملک پر عائد نہیں کریں گے۔‘‘

  • چین کے صدر شی جن پنگ نے دنیا کو امن کا پیغام دے دیا

    چین کے صدر شی جن پنگ نے دنیا کو امن کا پیغام دے دیا

    بیجنگ (03 ستمبر 2025): چین کے صدر شی جن پنگ نے دنیا کو امن کا پیغام دے دیا ہے، بیجنگ میں فوجی پریڈ سے خطاب میں انھوں نے کہا کہ انسانیت کو جنگ یا امن میں سے کسی ایک کا انتخاب کرنا ہوگا۔

    شی جن پنگ نے اپنے خطاب میں اس عزم کا بھی اظہار کیا کہ ’’ہم جتنے بھی مضبوط ہو جائیں کبھی توسیع پسندی کا راستہ اختیار نہیں کریں گے، ہم کبھی اپنے ماضی کی مصیبت کو کسی دوسرے ملک پر عائد نہیں کریں گے۔‘‘

    چین کے صدر کا کہنا تھا کہ چینی عوام تاریخ کے درست سمت پر کھڑے ہیں، چینی عوام امن کے لیے پرعزم ہیں، انھوں نے کہا ’’ہماری خوش حالی اور ترقی کو روکا نہیں جا سکتا، ہم دنیا میں ایسا عالمی نظام چاہتے ہیں جو انصاف اور مساوات پر مبنی ہو۔‘‘

    ایران کے پُرامن جوہری توانائی کے حق کی حمایت جاری رکھیں گے، چین کا اعلان

    بدھ کو بیجنگ میں چین کی اب تک کی سب سے بڑی فوجی پریڈ کا انعقاد کیا گیا، جس میں ولادیمیر پیوٹن کم جونگ اُن نے بھی شرکت کی، یہ تقریب دوسری جنگ عظیم کے اختتام پر جاپان کی شکست کے 80 سال مکمل ہونے پر منعقد کی گئی تھی۔

    صدر شی نے تیانانمن اسکوائر پر 50,000 سے زائد تماشائیوں کے ہجوم سے خطاب کرتے ہوئے کہا کہ ’’آج انسانیت کو امن یا جنگ، مکالمے یا تصادم، جیت یا صفر کے انتخاب کا سامنا ہے۔‘‘

  • چین میں ویزا فری انٹری سے متعلق اہم خبر

    چین میں ویزا فری انٹری سے متعلق اہم خبر

    چین نے روسی شہریوں کو آزمائشی بنیادوں پر ویزا فری داخلے کی اجازت دینے کا اعلان کیا ہے۔

    بین الاقوامی خبر رساں ادارے کی رپورٹ کے مطابق چینی وزارتِ خارجہ کا اس حوالے سے کہنا ہے کہ یہ سہولت 15 ستمبر سے عام پاسپورٹ رکھنے والے روسی شہریوں کے لیے مؤثر ہوگی۔

    چینی وزارتِ خارجہ کا کہنا ہے کہ ویزا فری سہولت ایک سال کے لیے دی جا رہی ہے جس کے تحت روسی شہری زیادہ سے زیادہ 30 دن تک چین میں قیام کر سکیں گے۔

    اس سے قبل چین نے سیاحت کو فروغ دینے کیلیے 70 سے زائد ممالک کے شہریوں کیلیے ویزا فری انٹری کا اعلان کیا تھا۔

    چین میں ویزا پالیسی میں نرمی کے بعد دنیا بھر سے سیاح ملک میں سیاحتی مقامات کا رُخ کر رہے ہیں۔

    نئی پالیسی کے مطابق 74 ممالک کے شہری بغیر ویزا چین میں 30 دن تک قیام کر سکتے ہیں۔ دراصل چینی حکومت سیاحت، معیشت اور اپنی طاقت کو فروغ دینے کیلیے ویزا فری انٹری کو مسلسل بڑھا رہی ہے۔

    ملک کی نیشنل امیگریشن ایڈمنسٹریشن کے مطابق 2024 میں 20 ملین سے زائد غیر ملکی سیاح بغیر ویزا داخل ہوئے۔

    کم جونگ اُن بذریعہ ٹرین چین روانہ ہوگئے

    اگرچہ زیادہ تر سیاحتی مقامات اب بھی غیر ملکیوں سیاحوں سے بھرے ہوئے ہیں لیکن ٹریول کمپنیاں اور ٹور گائیڈ اب موسم گرما کی تعطیلات کیلیے چین آنے والوں کی توقع میں بڑی آمد کیلیے تیار ہیں۔

    واضح رہے کہ دسمبر 2023 میں چین نے فرانس، جرمنی، اٹلی، ہالینڈ، اسپین اور ملائیشیا کے شہریوں کیلیے ویزا فری داخلے کا اعلان کیا تھا، لیکن اس کے بعد سے تقریباً پورا یورپ نئی ویزا پالیسی میں شامل ہو چکا ہے۔

  • چین میں شدید بارشوں سے اربوں ڈالرز کا نقصان

    چین میں شدید بارشوں سے اربوں ڈالرز کا نقصان

    چین میں بھی شدید بارشوں سے سڑکوں کو 2.2 ارب ڈالرز کا نقصان ہونے کی اطلاعات ہیں۔

    بین الاقوامی خبر رساں ادارے کی رپورٹ کے مطابق چین کی وزارت ٹرانسپورٹ کی جانب سے تصدیق کی گئی ہے کہ بارش اور سیلاب کے آغاز سے 23 صوبوں میں سڑکوں کو نقصان پہنچا ہے۔

    چین کے وزیر ٹرانسپورٹ کا کہنا ہے کہ وزارت خزانہ نے سڑکوں کی ہنگامی مرمت کی مد میں تقریباً 540 ملین یوآن مقامی حکام کو دینے کی منظوری دے دی ہے۔

    چین کی وزارت آبی وسائل کے مطابق ملک میں شدید بارشوں اور سیلاب کا سلسلہ یکم جولائی کو شروع ہوا جس سے ملک کے شمال اور جنوب میں ریکارڈ بارشیں ہوئیں۔

    پنجاب میں دریائے چناب، راوی اور ستلج میں سیلاب کی تازہ ترین صورت حال

    لاہور: فلڈ فورکاسٹنگ ڈویژن نے پنجاب میں دریائے چناب، راوی اور ستلج میں سیلاب کی تازہ ترین صورت حال جاری کی ہے۔

    دریائے چناب خانکی بیراج پر پانی کا بہاؤ 8 لاکھ 59 ہزار کیوسک ریکارڈ کیا گیا ہے، قادرآباد بیراج پر پانی کا بہاؤ 9 لاکھ 96 ہزار کیوسک ہے، دونوں مقامات پر انتہائی خطرناک اونچے درجے کا سیلاب ہے جس کے لیے فلڈ وارننگ جاری کی گئی ہے۔

    دریائے چناب ہیڈ مرالہ پر پانی کا بہاؤ 1 لاکھ 91 ہزار کیوسک ہے، اسے بھی اونچے درجے کا سیلاب بتایا گیا ہے اور عوام سے محتاط رہنے کی اپیل کی گئی ہے۔

    دنیا میں ہر 4 میں سے ایک فرد گندا پانی پینے پر مجبور ہے، ڈبلیو ایچ او کا انکشاف

    دریائے راوی میں شاہدرہ کے مقام پر پانی کی سطح میں مسلسل اضافہ ہو رہا ہے، شاہدرہ میں پانی کا بہاؤ ایک لاکھ 50 ہزار کیوسک ہے، ڈپٹی کمشنر لاہور کے مطابق راوی کے سائفر پوائنٹس پر بہاؤ ایک لاکھ 60 سے، 70 ہزار کیوسک کے درمیان ہے، اسے بھی اونچے درجے کا سیلاب قرار دے کر فلڈ الرٹ جاری کیا گیا ہے۔

  • جوہری ہتھیاروں میں کمی، چین نے روس اور امریکا کیساتھ مذاکرات سے انکار کردیا

    جوہری ہتھیاروں میں کمی، چین نے روس اور امریکا کیساتھ مذاکرات سے انکار کردیا

    بیجنگ(27 اگست 2025): چین نے روس اور امریکا کے ساتھ جوہری ہتھیاروں میں کمی کے مذاکرات میں شامل ہونے سے انکار کردیا۔

    چینی وزارت خارجہ کے ترجمان نے ایک بیان میں کہا کہ سہ فریقی ایٹمی تخفیف اسلحہ بات چیت غیر معقول ہے کیوں کہ  چین کے پاس جوہری ہتھیاروں کا ذخیرہ امریکا اور روس کے مقابلے میں کہیں کم ہے۔

    چینی وزارت خارجہ کے ترجمان کا کہنا ہے کہ بیجنگ کو ایسے مذاکرات میں شامل کرنے کی کوشش کرنا حقیقت سے دور کرنے کے مترادف ہے، امریکا اور چین کا اسٹریٹجک ماحول اور جوہری پالیسیاں بالکل مختلف ہیں۔]

    ترجمان نے کہا کہ چین کسی ملک کے ساتھ ہتھیاروں کی دوڑ میں شامل نہیں ہوگا، چین نے واضح کیا جوہری طاقت رکھنے والے بڑے ملک خاص طور پر امریکا اور روس کو پہلے بڑے پیمانے پر تخفیف کرنی چاہیے۔

    چینی وزارت خارجہ کے ترجمان نے کہا کہ دونوں ممالک کے تخفیف کے بعد دیگر ملکوں کو شامل کیا جاسکتا ہے، صدر ٹرمپ نے چین کو مذاکرات میں شمولیت خواہش ظاہر کی تھی۔

  • چین سے مزید 100 جدید ترین الیکٹرک بسیں شپ پر پاکستان روانہ

    چین سے مزید 100 جدید ترین الیکٹرک بسیں شپ پر پاکستان روانہ

    لاہور : چین سے مزید 100 جدید ترین الیکٹرک بسیں شپ پر پاکستان روانہ ہوگئیں ، جدید ترین الیکٹرک بس کا کرایہ صرف 20 روپے ہوگا۔

    تفصیلات کے مطابق وزیراعلیٰ پنجاب مریم نواز شریف کی کاوش رنگ لے آئی، شنگھائی سی پورٹ سے مزید 100 جدید ترین الیکٹرک بسیں پاکستان کے لئے روانہ کردی گئیں۔ یہ بسیں چند ہفتوں میں پنجاب پہنچ جائیں گی۔

    وزیراعلیٰ مریم نواز شریف نے سماجی رابطے کی ویب سائٹ ایکس پر اعلان کیا کہ دسمبر تک پنجاب کے ہر ضلع میں جدید الیکٹرک بسیں چلائی جائیں گی، جبکہ ان کا کرایہ صرف 20 روپے مقرر کیا گیا ہے۔

    انہوں نے بتایا کہ نئی الیکٹرک بسوں میں ایئر کنڈیشنڈ اور اندرونی موسم کنٹرول کی سہولت موجود ہوگی جبکہ خواتین کے تحفظ کے لیے بسوں میں سی سی ٹی وی مانیٹرنگ سسٹم بھی نصب کیا جائے گا تاکہ ہراسانی کے واقعات کی روک تھام ممکن بنائی جا سکے۔

    مریم نواز نے مزید کہا کہ عوام کو جلد ایک آرام دہ، جدید اور ماحول دوست ٹرانسپورٹ سسٹم میسر آئے گا، جو پنجاب کے ہر ضلع میں دستیاب ہوگا۔

  • چین میں زیر تعمیر پل کی ایک اسٹیل کیبل اچانک ٹوٹی گئی، متعدد ہلاکتیں

    چین میں زیر تعمیر پل کی ایک اسٹیل کیبل اچانک ٹوٹی گئی، متعدد ہلاکتیں

    بیجنگ (23 اگست 2025): چین میں زیر تعمیر پل گرنے سے 12 افراد ہلاک اور 4 لاپتا ہو گئے۔

    غیر ملکی میڈیا رپورٹس کے مطابق چین کے شمال مغربی صوبے چنگھائی میں پل کی تعمیر کے دوران کیبل ٹوٹنے کے حادثے میں 12 افراد ہلاک اور چار لاپتا ہو گئے ہیں۔

    یلو ریور پر زیر تعمیر پل کے کام کے دوران علی الصبح ایک اسٹیل کیبل اچانک ٹوٹ گئی تھی جس کے باعث یہ حادثہ پیش آیا، اور پل کا 108 میٹر لمبا درمیانی حصہ دریا میں جا گرا، حادثے کے وقت مقام پر 15 مزدور اور ایک پروجیکٹ منیجر موجود تھے۔

    امدادی ٹیمیں لاپتہ افراد کو تلاش کرنے کے لیے سرچ آپریشن کر رہی ہیں، جب کہ حادثے کی وجوہ جاننے کے لیے تحقیقات کا آغاز بھی کر دیا گیا ہے۔

    چینی میڈیا رپورٹس کے مطابق حادثے کے بعد سے اب تک 806 سے زائد امدادی کارکن ریسکیو میں حصہ لے چکے ہیں، جن کے ساتھ 91 گاڑیاں، 27 کشتیاں، ایک ہیلی کاپٹر اور 5 روبوٹ تعینات کیے گئے تھے، جب کہ متاثرین کو فوری طبی امداد فراہم کرنے کے لیے 6 اسپتالوں نے ہنگامی سہولت فراہم کی۔

    جاپان کے آسمان پر عجیب منظر ، اچانک رات دن میں تبدیل ، شہری حیران

    پیپلز ڈیلی کے مطابق یہ دریائے زرد (یلو ریور) پر تعمیر ہونے والا چین کا پہلا فولادی محرابی ریلوے پل ہے، جو تبتی خودمختار علاقے کی سرحد پر واقع ہے، پل کے دونوں طرف کی دو کیبل ٹاورز 14 جون کو مکمل کی گئی تھیں، اور منصوبہ یہ تھا کہ اس کے مرکزی حصے کو رواں ماہ کے آخر تک جوڑ دیا جائے گا۔

    پل کے سائیڈ اسپینز پر کیبل کا زیادہ سے زیادہ دباؤ 1,161 میٹرک ٹن ہے، جو کہ تقریباً 750 چھوٹی گاڑیوں کے وزن کے برابر ہے، جب کہ ہر ٹاور کا وزن 1,800 ٹن ہے، اور سب سے بڑا حصہ 45 ٹن وزنی ہے، رپورٹ کے مطابق ان ٹاورز کی تنصیب میں درستگی کا براہ راست تعلق فولادی سپورٹ بیم کی حفاظت اور کامیابی سے ہے۔

    یہ پل سچوان-چھنگھائی ریلوے کا ایک کلیدی منصوبہ ہے، 1,596 میٹر سے زائد لمبا ہے، اور اس کے محراب کی بلند ترین چوٹی پانی کی سطح سے 130 میٹر بلند ہے، جو تقریباً 40 منزلہ عمارت کی اونچائی کے برابر ہے۔

  • چین سے پاکستان کے تعلقات سدا بہار، سی پیک 2 جلد شروع ہوگا، وزیراعظم

    چین سے پاکستان کے تعلقات سدا بہار، سی پیک 2 جلد شروع ہوگا، وزیراعظم

    اسلام آباد (22 اگست 2025): وزیراعظم شہباز شریف نے کہا ہے کہ چین سے پاکستان کے تعلقات سدا بہار ہیں اور جلد سی پیک 2 کا آغاز ہو گا۔

    اے آر وائی نیوز کے مطابق وزیراعظم شہباز شریف نے وفاقی کابینہ کے اجلاس سے خطاب کرتے ہوئے کہا کہ چین سے پاکستان کے تعلقات سدا بہار ہیں اور جلد سی پیک 2 کا آغاز ہو گا۔ میں چین جا رہا ہوں، جہاں ایس سی او کے علاوہ دو طرفہ ملاقاتیں بھی ہوں گی۔

    وزیراعظم کا کہنا تھا کہ چین نے ہمیشہ پاکستان سے تعاون کیا ہے۔ چینی وزیر خارجہ پاکستان تشریف لائے تھے اور وزارت خارجہ میں ان کی بھرپور میٹنگ ہوئی تھی اور کل شب چینی وزیر خارجہ میرے پاس بھی تشریف لائے۔

    واضح رہے کہ چینی وزیر خارجہ وانگ ژی کی قیادت میں اعلیٰ سطح وفد گزشتہ روز اسلام آباد پہنچا تھا۔ پاکستان اور چین کے درمیان اسٹرٹیجک ڈائیلاگ کا چھٹا دور ہوا جس کی صدارت مشترکہ طور پر دونوں ممالک کے وزرائے خارجہ نے کی تھی۔

    بعد ازاں چینی وزیر خارجہ وانگ ژی نے فیلڈ مارشل آرمی چیف جنرل عاصم منیر سے اہم ملاقات کی۔اس دوران علاقائی سییورٹی، انسداد دہشتگردی اور دیگر امور پر تبادلہ خیال کیا گیا۔

    https://urdu.arynews.tv/pakistan-china-economic-relations-panda-bond-21-august-2025/

  • 15سالہ لڑکی کے پیٹ سے 2 کلو بالوں کا گچھا نکال لیا گیا

    15سالہ لڑکی کے پیٹ سے 2 کلو بالوں کا گچھا نکال لیا گیا

    چین میں 15سالہ لڑکی کے پیٹ سے 2کلو وزنی بہت بڑا بالوں کا گچھا نکال لیا گیا، لڑکی 6 سال سے اپنے بالوں کو کھانے کی عادت میں مبتلا تھی۔

    غیرملکی میڈیا رپورٹس کے مطابق چین کے صوبے ہینان کی رہائشی لڑکی نی نی 6 سال سے اپنے ہی بال نگلتی تھی، اچانک اسے پیٹ میں شدید درد ہوا، جس پر والدہ اسے چلڈرن اسپتال لے گئیں، جہاں معائنے کے بعد انکشاف ہوا کہ اس کے پیٹ میں 2 کلوگرام بالوں کا گچھا (ہیئر بال) موجود ہے۔

    ڈاکٹروں نے بتایا کہ 15 سالہ نی نی شدید خون کی کمی (انیمیا کی بیماری) میں مبتلا تھی، اسے مسلسل پیٹ درد کی شکایت تھی جس کی وجہ سے کھانا کھانے سے بھی قاصر تھی۔

    لڑکی کے معدے میں بالوں اور کھانے کے ذرات سے بنا ایک بڑا گولا موجود تھا جو تقریباً پورے معدے میں پھیل چکا تھا اور اس وجہ سے پیٹ کا نظام درست طور پر کام نہیں کررہا تھا۔

    آپریشن کے بعد ڈاکٹروں نے نی نی کے معدے سے 2 کلو وزنی بالوں کا گچھا نکال لیا، سرجری کے وقت معلوم ہوا کہ اس کا معدہ بھی عام سائز سے دگنا پھول چکا ہے۔

    کامیاب آپریشن کے5 دن بعد نی نی نے دوبارہ کھانا پینا شروع کردیا ہے، چیک اپ کے دوران بتایا گیا کہ وہ مکمل طور پر صحتیاب ہو چکی ہے۔

    ماہرین کے مطابق یہ ایک خطرناک بیماری ہے جو ٹرائیکوفگیا (Trichophagia) کہلاتی ہے جس میں مریض ایسی اشیا کھاتے ہیں جو انسانی غذا نہیں ہوتی، مثلاً بال یا شیشہ وغیرہ کھانے کی عادت میں مبتلا ہو تے ہیں۔

    والدین کو ڈاکٹر نے انتباہ دیا ہے کہ اگر بچے ایک ماہ سے زائد عرصے تک غیرغذائی اشیا کھانے کی عادت کو ترک نہ کرسکیں تو فوراً طبی معائنہ کروائیں اور ڈاکٹرز سے مشورہ کریں۔

  • چین نے بھارت کو زبردست مشورہ دے دیا

    چین نے بھارت کو زبردست مشورہ دے دیا

    بیجنگ (19 اگست 2025): چین کے وزیر خارجہ نے بھارت کو مشورہ دیا ہے چین اور بھارت کو ایک دوسرے کو دشمن نہیں شراکت دار سمجھنا چاہیے۔

    تفصیلات کے مطابق چینی وزیر خارجہ وانگ یی نے بھارتی ہم منصب جے شنکر سے ملاقات میں کہا کہ چین اور بھارت کو ایک دوسرے کو شراکت دار سمجھنا چاہیے، دشمن یا خطرہ نہیں۔

    وانگ یی نے مزید کہا کہ چین اور بھارت کو درست اسٹریٹجک مفاہمت قائم کرنی چاہیے، چین ہم آہنگی، باہمی فائدے کے اصول کو برقرار رکھنے کے لیے تیار ہے۔

    چین کا پاکستان میں سیلاب سے ہونے والے نقصانات پر دکھ کا اظہار

    اس موقع پر بھارتی وزیر خارجہ جے شنکر نے کہا کہ دونوں ہمسایہ ممالک اپنے تعلقات میں ایک مشکل دور کے بعد آگے بڑھنا چاہتے ہیں، ہمیں اختلافات کو تنازعات میں اور مقابلے کو تصادم میں نہیں بدلنا چاہیے۔

    خیال رہے کہ چینی وزیر خارجہ 3 دن کے دورے پر نئی دہلی میں ہیں، وہ بھارتی وزیر اعظم نریندر مودی سے بھی ملاقات کریں گے، غیر ملکی میڈیا کا کہنا ہے کہ چین کے وزیر خارجہ رواں ہفتے اسلام آباد کا دورہ بھی کریں گے۔ بھارتی میڈیا کا کہنا ہے کہ نریندر مودی ممکنہ طور پر اسی ماہ چین کا دورہ بھی کر سکتے ہیں۔