ARYNews.tv | Urdu – Har Lamha Bakhabar

Tag: چینی سفیر

  • چینی سفیر کی عمران خان کو انتخابات میں کامیابی پر مبارکباد

    چینی سفیر کی عمران خان کو انتخابات میں کامیابی پر مبارکباد

    اسلام آباد: چیئرمین پی ٹی آئی عمران خان سے چینی سفیر نے ملاقات کی اور عمران خان کو انتخابات میں کامیابی پر مبارکباد دی۔

    تفصیلات کے مطابق بنی گالا میں چینی سفیر نے تحریک انصاف کے چیئرمین عمران خان سے ملاقات کی اور انتخابات میں کامیابی پر ان کو مبارکباد پیش کی۔

    چینی سفیر نے کہا کہ دونوں ممالک کے بانیان کی جدوجہد تاریخ میں منفرد مقام کی حامل ہے، پاکستان کی انتظامیہ ڈھانچے میں اصلاحات کی ویژن کی حمایت کرتے ہیں، پی ٹی آئی کے قانون کی بالادستی ویژن کی بھی حمایت کرتے ہیں۔

    انہوں نے کہا کہ غربت کے خاتمے کے لیے عمران خان کا ویژن قابل تعریف ہے، معیشت، سفارشات، عالمی معاملات میں معاونت جاری رکھیں گے۔

    چیئرمین تحریک انصاف عمران خان نے بھی چینی سفیر کا بھرپور خیرمقدم کرتے ہوئے کہا کہ تہنیتی پیغامات اور نیک تمناؤں کے ظہار پر چینی قیادت کا شکریہ ادا کرتا ہوں۔

    عمران خان نے کہا کہ پاک چین تعلقات کو نہایت اہمیت کی نگاہ سے دیکھتے ہیں، غربت کے خاتمے کے لیے چین کے تجربات سے استفادہ کریں گے، ماحولیات کے تحفظ، ایکوسولائزیشن کے لیے اشتراک میں دلچسپی ہے، سبز ترقی، نیشنل پارکس، توانائی کے فروغ میں فائدہ اٹھانا چاہیں گے۔

    ایرانی سفیر کا عمران خان کے نام خط

    دوسری جانب پاکستانی میں ایرانی سفیر مہدی ہنردوست نے کہا ہے کہ عمران خان کی جیت سے پاک ایران تعلقات مزید بہتر ہوں گے۔

    ایرانی حکومت نے بھی عمران خان کو اپنے مکمل تعاون کی یقین دہانی کرائی ہے، پاکستان میں تعینات ایرانی سفیر مہدی ہنر دوست نے عمران خان کو خط کے ذریعے مبارکباد دی۔

    ایرانی سفیر کا کہنا تھا کہ پاکستانی عوام نے جمہوریت کی بنیادیں مضبوط کیں، عمران خان کی جیت سے پاک ایران تعلقات مزید مضبوط ہوں گے، ایران پاکستان کے ساتھ ہر شعبے میں تعاون مزید بڑھائے گا۔

    مہدی ہنر دوست نے عمران خان کی اچھی صحت، تحریک انصاف کی کامیابی اور پاکستان کے عوام کی فلاح و بہبود اور خوشحالی کے لیے دعا کی۔

    مالدیپ کے صدر عبداللہ یامین نے پاکستان تحریک انصاف کے چیئرمین عمران خان کو عام انتخابات میں کامیابی پر مبارکباد دی، انہوں نے عمران خان کو ٹیلی فون کیا اور اگلی حکومت کے لیے نیک تمناؤں کا اظہار کیا، عمران خان نے پاکستان کے لیے نیک خواہشات کا اظہار کرنے پر مالدیپ کے صدر کا شکریہ ادا کیا۔

    واضح رہے کہ الیکشن 2018 میں کامیابی کے بعد پی ٹی آئی کے چیئرمین عمران خان کو دنیا بھر سے مبارکباد کے پیغامات دئیے جارہے ہیں۔

    خیال رہے کہ چند روز قبل سعودی سفیر نے عمران خان سے ملاقات کی تھی اور سعودی فرماں روا شاہ سلمان کا پیغام پہنچایا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • سی پیک کھلی کتاب ہے، تحفظات رکھنے والے پاکستان آکر جائزہ لیں، چینی سفیر

    سی پیک کھلی کتاب ہے، تحفظات رکھنے والے پاکستان آکر جائزہ لیں، چینی سفیر

    اسلام آباد : پاکستان میں چین کے سفیر ژاﺅ جنگ کا کہنا ہے کہ سی پیک کے پیچھے کوئی خفیہ ایجنڈا نہیں، یہ ایک کھلی کتاب کی طرح ہے، تحفظات رکھنے والے ممالک پاکستان آئیں اور سی پیک کو سمجھیں۔

    یہ بات انہوں نے اپنے ایک جاری بیان میں کہی، چینی سفیر نے کہا کہ سی پیک میں چھپانے کیلئے کچھ بھی نہیں، اور نہ ہی اس کےپیچھے کوئی خفیہ ایجنڈا ہے، سی پیک کا مقصد خطے کےعوام کی حالت زار میں بہتری کرنا ہے۔

    ان کا مزید کہنا تھا کہ کچھ ممالک اور شخصیات سی پیک سے متعلق متنازع بیانات دے رہے ہیں، ہم ایسے بیانات پر تحفظات کا اظہار کرتے ہیں، تحفظات رکھنے والے ممالک کے نمائندے پاکستان آئیں سی پیک کو سمجھیں۔

    چینی سفیر نے کہا کہ اقتصادی ترقی کیلئے سیکیورٹی بنیادی شرط ہے، دس سال پہلے میں نے اسلام آباد میں بطور سفارت کار تعیناتی میں صورت حال کا تجربہ کیا، دوبارہ پاکستان میں تعیناتی پر یہاں بہترسیکیورٹی کا ماحول دیکھ سکتا ہوں، حکومت اور فوج کی سیکیورٹی بہتر بنانے کیلئے کوششوں کو سراہتا ہوں۔

    انہوں نے مزید کہا کہ پاکستان میں تیس ہزارسے زائد چینی انجینئرز اور مزدور کام کررہے ہیں، چینی شہریوں کو پاکستان میں سیکیورٹی پرکوئی شک و شبہ نہیں، چینی انجینئرز اور مزدور سیکیورٹی کی بہتر صورتحال پر مطمئن ہیں۔

    ژاؤ جنگ نے کہا کہ چین سیکیورٹی کے بہترین انتظامات پر پاکستان کا شکر گزار ہے، سیکیورٹی کے چیلنجز پاکستان نہیں پورے خطے کو درپیش ہیں، پاکستان چین کی حکومتیں قریبی تعاون سے چیلنجز کا سامنا کررہی ہیں۔

  • دہشت گردی کیخلاف پاکستان کی قربانیاں قابل تحسین ہیں، چینی سفیر

    دہشت گردی کیخلاف پاکستان کی قربانیاں قابل تحسین ہیں، چینی سفیر

    اسلام آباد : چینی سفیر سن وی ڈونگ نے کہا ہے کہ پاکستان سے متعلق چینی پالیسی میں کوئی تبدیلی نہیں آئی ہے، دہشت گردی کیخلاف پاکستان کی قربانیاں قابل تحسین ہیں، پاکستانی وزیر خارجہ جلد چین کا دورہ کریں گے۔

    یہ بات انہوں نے اپنے ایک بیان میں کہی چینی سفیر کا کہنا تھا کہ دہشت گردی کیخلاف پاکستان کی قربانیاں قابل تحسین ہیں، چین دہشتگردی کےخلاف پاکستانی مؤقف کی حمایت کرتاہے۔

    ان کا مزید کہنا تھا کہ پاکستانی وزیرخارجہ خواجہ آصف 8ستمبرکو چین کادورہ کریں گے، پاکستانی وزیر خارجہ کا دورہ بیجنگ امریکا کی نئی پالیسی کے تناطر میں ہے۔

    خواجہ آصف کے دورہ بیجنگ میں برکس اعلامیے پر بھی بات چیت ہوگی، علاقائی چیلنجز سے متعلق چین اور پاکستان رابطے میں ہیں۔

    انہوں نے کہا کہ برکس اعلامیے میں پاکستان سے کوئی نیا مطالبہ نہیں کیا گیا، برکس اعلامیے میں کالعدم قرار دی گئی تنظیموں سے متعلق بات کی گئی تھی۔

    خواجہ آصف کل چین کا یک روزہ دورہ کریں گے

    علاوہ ازیں دفتر خارجہ کے ترجمان نے واضح کیا ہے کہ وزیرخارجہ خواجہ آصف 8ستمبرکو ایک روزہ دورے پرچین روانہ ہوں گے، خواجہ آصف چینی ہم منصب سےملاقات کریں گے۔

    اس کے علاوہ وہ چینی خارجہ امور کےاسٹیٹ قونصلر ودیگرحکام سے بھی ملاقاتیں کرینگے، ترجمان دفترخارجہ نے کہا کہ ملاقاتوں میں خطےکی ترقی اورافغانستان کی صورتحال اور دوطرفہ تعلقات کاجائزہ لیا جائے گا۔،

    ترجمان کے مطابق وزیر خارجہ خواجہ آصف چین کے دورے کے بعد روس، ترکی اور ایران کا دورہ بھی کریں گے۔

     

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • پاک چین دوستی شہد سے زیادہ میٹھی ہے،پرویزرشید

    پاک چین دوستی شہد سے زیادہ میٹھی ہے،پرویزرشید

    اسلام آباد : وفاقی وزیراطلاعات پرویز رشید نے کہا ہے کہ پاکستان اور چین کی دوستی سمندر سے گہری اور شہد سے میٹھی ہے پاکستان اور چین کی دوستی باہمی اعتماد اور مشترکہ مفادات پر مشتمل ہے۔

    تفصیلات کے مطابق وفاقی وزیر اطلاعات اور نشریات پرویز رشید پاک چین سفارتی تعلقات کی 65 ویں سالگرہ کی تقریب سے خطاب کر رہے تھے،جہاں انہوں نے پاک چین دوستی ریلی کے شرکاء کا خیرمقدم کیا اور امید ظاہر کی کہ اس ریلی سے ثقافت اورسیاحت کو فروغ ملے گا۔

    وفاقی وزیر نے اپنے خطاب میں کہا کہ اقتصادی راہداری صرف اقتصادی منصوبہ نہیں بلکہ شاہراہوں کی تعمیر،انفراسٹرکچر اور توانائی کے منصوبوں پر مشتمل کثیر الجہتی منصوبہ ہے جس سے پاکستان ترقی کی نئی راہ پر گامزن ہو جائے گا۔

    پرویز رشید کا کہنا تھا کہ شاہراہ قراقرم کے ذریعے پاکستان اور چین زمینی راستے سے منسلک ہوئے ہیں اور دونوں طرف اقتصادی تبادلے کے ساتھ ساتھ سماجی رابطے استوار ہوئے اور یہ بندھن مضبوط سے مضبوط تر ہوئے،اسی طرح اقتصادی راہداری سے یہ روابط مزید گہرے اور پختہ ہوں گے۔

    چینی سفیرسن ڈی ڈونگ نے تقریب سے خطاب کرتے ہوئے کہا کہ اقتصادی راہداری منصوبے سے پاکستان میں ترقی کا نیا دورشروع ہوگا جس سے ترقی کی نئی راہیں کھلیں گی جو خوشحالی کا دور لائے گا۔

    چینی سفیر نے مزید کہا کہ اقتصاد ی راہداری کے منصوبوں پر تیزی سے کام جاری ہے جس سے پاکستان کے تمام صوبے یکساں مستفید ہوں گے اور ترقی سے مستفید ہوں گے۔

    پاکستان اور چین کے درمیان سفارتی تعلقات کو 65 ویں سالگرہ آج منائی جا رہی ہے جس کی تقریب میں اپنی تقریرکے اختتام پرچینی سفیر ڈی ڈونگ نے پاکستان زندہ باد کا نعرہ لگایا۔