اسلام آباد: وزیر خارجہ شاہ محمود قریشی نے کہا ہے کہ پاکستان اور چین انتہائی بااعتماد دوست اور شراکت دار ہیں، دونوں ممالک کی دوستی تجربات، اہداف، خوشحالی پر استوار ہے۔
تفصیلات کے مطابق وزیر خارجہ شاہ محمود قریشی نے ’سلک روڈ کے دوست فورم‘ سے خطاب کرتے ہوئے کہا کہ چینی نائب صدر اور ان کے وفد کو پاکستان میں خوش آمدید کہتے ہیں، چین کی دہائیوں پر محیط دوستی پر خراج تحسین پیش کرتا ہوں۔
شاہ محمود قریشی نے کہا کہ پاکستان میں وانگ کشان کا بطور بے مثال معیشت دان، عظیم رہنما احترام کیا جاتا ہے، چین پاکستان شراکت داری میں آپ کی مخلصانہ کاوشیں قابل قدر ہیں۔
وزیر خارجہ نے کہا کہ آپ کی ہماری قیادت سے گفتگو سے دونوں ملکوں کی دوستی کو فروغ ملے گا، چین کی 70 سالہ سالگرہ پر دل کی گہرائیوں سے مبارک باد پیش کرتا ہوں۔
واضح رہے کہ اس سے قبل چین کے نائب صدر کو نشان پاکستان کا اعزاز دینے کے لیے ایوان صدر میں تقریب کا انعقاد کیا گیا تھا، صدر عارف علوی نے معزز مہمان کو نشان پاکستان کے اعزاز سے نوازا۔
مزید پڑھیں: چین کے نائب صدر وانگ کشان تین روزہ دورے پر اسلام آباد پہنچ گئے، شاہ محمود نے استقبال کیا
یاد رہے کہ آج چین کے نائب صدر وانگ کشان تین روزہ دورے پر اسلام آباد پہنچے ہیں، وزیر خارجہ شاہ محمود قریشی نے ان کا استقبال کیا تھا۔
چینی نائب صدر کے دورے میں متعدد معاہدوں اور مفاہمتی یادداشتوں پر دستخط ہوں گے، چینی نائب صدر لاہور بھی جائیں گے جہاں وہ تاریخی مقامات کا دورہ کریں گے۔
گورنر پنجاب چوہدری محمد سرور کی جانب سے چینی نائب صدر وانگ کشان کے اعزاز میں عشائیہ بھی دیا جائے گا۔
