Tag: چینی وزیراعظم لی چیانگ

اسلام آباد : چینی وزیراعظم لی چیانگ نے پاکستان کی عسکری قیادت سے اہم ملاقات کی ، جس میں دو طرفہ دیرینہ تعلقات کو مزید مضبوط اور وسعت دینے کے عزم کا اعادہ کیا گیا۔

تفصیلات کے مطابق شنگھائی تعاون تنظیم سربراہ اجلاس کے لیے پاکستان آئے چین کے وزیراعظم لی چیانگ کی پاکستان کی عسکری قیادت سے اہم ملاقات ہوئی۔

پاک فوج کے محکمہ تعلقات عامہ ( آئی ایس پی آر) کی جانب سے جاری بیان میں کہا گیا کہ چینی وزیراعظم نے آرمی چیف جنرل سیدعاصم منیر سے ملاقات کی، آرمی چیف جنرل عاصم منیر نے معزز مہمان کا پرتپاک استقبال کیا ، جس پر لی چیانگ نے گرم جوشی سے آرمی چیف سے مصافحہ بھی کیا۔

آئی ایس پی آر کا کہنا تھا کہ ملاقات میں دوطرفہ دیرینہ تعلقات کو مزید مضبوط اوروسعت دینےکے عزم کا اعادہ کیا گیا جبکہ دونوں ملکوں کے درمیان دفاع اور انسداد دہشت گردی کے حوالے سے امور زیر بحث آئے۔

ترجمان نے بتایا کہ چینی وزیراعظم نے دہشت گردی کیخلاف جنگ میں پاکستانی افواج کے کردار کو سراہتے ہوئے دہشت گردی کے خلاف جنگ میں پاکستان کی مکمل حمایت اورمددکی یقین دہانی کرائی۔

چینی وزیراعظم نے چیئرمین جوائنٹ چیفس آف سٹاف کمیٹی اورسروسزچیفس سے بھی اہم ملاقات کی۔

یاد رہے گذشتہ روز چین کے وزیراعظم لی چیانگ چار روزہ دورے پر پاکستان پہنچے تھے، اسلام آباد پہنچنے پر وزیراعظم شہبازشریف نے چینی ہم منصب کا پرتپاک استقبال کیا، نائب وزیراعظم اسحاق ڈار، وفاقی وزرا محسن نقوی، احسن اقبال اورعطا تارڑ بھی استقبال کیلئے موجود تھے۔

معزز مہمان کو ثقافتی لباس میں ملبوس بچوں نےپھول پیش کئے اور پاکستان آمد پر اکیس توپوں کی سلامی دی گئی تھی۔

چین کے کسی بھی وزیراعظم کا گیارہ سال بعد پاکستان کا دورہ ہے، چین کے وزیر اعظم کے ساتھ چین کے وزرا اور اعلیٰ سطح وفد بھی ہے

چینی وزیراعظم لی چیانگ نے کہا ہے کہ پاکستان کی ترقی کیلئےچین اپناکرداراداکرتارہےگا، گوادر ایئرپورٹ کی تکمیل اہم سنگ میل ہے۔

اے آر وائی نیوز کے مطابق اسلام آباد میں تقریب سے خطاب کرتے ہوئے چینی وزیراعظم لی چیانگ کا کہنا تھا کہ گوادر انٹرنیشنل ایئرپورٹ کی تکمیل ایک اہم سنگ میل ہے، منصوبے کی تکمیل کیلئے پاکستان چینی افرادی قوت کی کاوشیں قابل ستائش ہیں۔

لی چیانگ نے کہا کہ گوادر علاقائی ترقی کا محور ہونے کیساتھ دونوں ملکوں کی مضبوط دوستی کا بھی عکاس ہے، پاکستان کےعوام کی خوشحالی ہمارے دل کےبہت قریب ہے۔

چینی وزیراعظم نے مزید کہا کہ دونوں ممالک کی تذویراتی شراکت داری وقت کیساتھ گہری ہورہی ہے، مشترکہ مستقبل اورترقیاتی اہداف کیلئے ہماراعزم غیرمتزلزل ہے۔

دریں اثنا پاکستان اور چین کے درمیان مختلف شعبوں میں تعاون کی مفاہمتی یادداشتوں پر دستخط ہوئے، تقریب میں وزیراعظم شہباز شریف اور چینی ہم منصب لی چیانگ نے شرکت کی۔

دونوں ممالک کے درمیان اسمارٹ کلاس رومز سے متعلق دستاویز کا تبادلہ ہوا، سی پیک کےتحت گوادر پر7ویں جوائنٹ ورکنگ گروپ کے اجلاس کےنکات کی دستاویز کا بھی تبادلہ ہوا۔

اس موقع پر اطلاعات و مواصلات کے شعبوں میں تعاون سے متعلق مفاہمتی یادداشت طے ہوئے، پاکستان اورچین کےدرمیان آبی وسائل کے شعبے، غذائی تحفظ کے شعبے اور مشترکہ لیبارٹریوں کے قیام کی مفاہمتی یادداشت پر بھی دستخط ہوئے۔

پاکستان اورچین کےدرمیان کرنسی کے تبادلے کا معاہدہ ہوا، کرنسی تبادلے کا معاہدہ اسٹیٹ بینک اور پیپلز بینک آف چائنہ کے درمیان طے پایا۔