Tag: چینی کی قیمت

اسلام آباد : شوگرملز مالکان نے حکومت سے اپنی بات منوالی اور حکومت نے چینی کی ریٹیل قیمت 164 روپے فی کلو رکھنے کا فیصلہ کرلیا۔

تفصیلات کے مطابق چینی کی قیمتوں پرعوام سے پھر ہاتھ ہوگیا، شوگر ملزمالکان نے حکومت سے اپنی بات منوالی۔

حکومت نے چینی کی ریٹیل قیمت 164 روپے فی کلو رکھنے کا فیصلہ کرلیا ، نائب وزیراعظم اسحاق ڈار نے شوگر ملز مالکان کے ساتھ اجلاس کے بعد کہا چینی کی قیمت ایک سو چونسٹھ روپے سے اوپر نہیں جانی چاہیے۔

اسحاق ڈار کا کہنا تھا کہ جو بھی چینی کی قیمت مصنوعی طریقے سے بڑھانے کی کوشش کرے گا، اس کے ساتھ آہنی ہاتھوں سے نمٹا جائے گا۔

نائب وزیراعظم نے بتایا کہ آج کے اجلاس میں طے ہوا ہے، رانا تنویر شوگرملزکے ساتھ مل کر قیمتوں کا تعین کریں گے۔

خیال رہے چینی برآمد کی اجازت سے پہلے ایسوسی ایشن نے چینی کی قیمت ہول سیل میں 140 اور ریٹیل میں 145 روپے رکھنےکا وعدہ کیا تھا۔

خیال ریے رمضان المبارک سے پہلے ایک سو پچیس روپے فی کلو فروخت ہونے والی چینی ایک سو پچھتر سے ایک سو اسّی روپے میں بکنے لگی ہے ، شہریوں کا کہنا ہے کہ چینی مہنگی ہوئی تو زندگی سے مٹھاس ہی چلی گئی۔

افطار کے لیے مشروبات کی تیاری میں چینی کا استعمال لازمی ہوتا ہے جبکہ سحری میں دہی کے ساتھ چینی کا استعمال بھی اٹوٹ ہے، ایسے میں مہنگی چینی خریدنا لوگ کے بس میں نہیں رہا۔

اسلام آباد : چینی کی قیمت میں کمی کے حوالے سے آج اہم فیصلہ متوقع ہے، شوگر ملز ایسوسی ایشن کی 175 روپے فی کلو ایکس مل قیمت کا تخمینہ دیا تھا۔

تفصیلات کے مطابق چینی مہنگی ہونے کے معاملے پر نائب وزیراعظم کی زیرصدارت کمیٹی اجلاس آج پھر ہوگا۔

ذرائع نے بتایا کہ وفاقی وزرارانا تنویر، اعظم نذیر، ڈاکٹر توقیر شاہ، طارق باجوہ شریک ہوں گے جبکہ پاکستان شوگر ملز ایسوسی ایشن کے نمائندگان بھی اجلاس میں شرکت کریں گے۔

ذرائع کا کہنا تھا کہ شوگر کی قیمت میں کمی کے حوالے سے اقدامات پر غور کیا جائے گا اور چینی کی ایکس مل قیمت کے حوالے سے بات چیت ہوگی۔

ذرائع نے کہا کہ اجلاس میں آج چینی کی قیمت میں کمی کے حوالے سے فیصلہ متوقع ہے ، شوگر ملز ایسوسی ایشن قیمت کے حوالے سے اپنی تجاویز دے گی۔

گزشتہ روز اجلاس میں حکومت شوگر ملز کے ایکس مل قیمت کو مسترد کرچکی ہے ، شوگر ملز ایسوسی ایشن کی 175 روپے فی کلو ایکس مل قیمت کا تخمینہ دیا تھا۔

حکومتی مؤقف میں کہا گیا کہ چینی کی اوسط پیداواری قیمت 153 روپے کلو ہے، انڈسٹری کو خود ہی چینی کی قیمتیں کم کرنی چاہئیں تاہم شوگر ملز نے چینی کی قیمتوں کے حوالے سے وقت مانگا تھا۔

وزیراعظم نے چینی کی قیمتوں میں اضافے پر کمیٹی تشکیل دی تھی ، کمیٹی کو 3 روز کے اندر رپورٹ پیش کرنے کی ہدایت کی تھی۔

چینی کی قیمت میں 1روپے فی کلواضافےسے شوگر ملزکو2.8ارب روپے کا فائدہ ہوا ، چینی برآمد کی اجازت کے بعد سے ملک میں چینی 19 فیصد تک مہنگی ہوچکی ہے، ملک میں چینی کی فی کلو قیمت 180 روپے تک ہے۔

لاہور : شوگر ملز نے چینی کی قیمت کم کرنے سے انکار کردیا اور خبردار کیا حکومت قیمت کم کرنے کی کوشش کرے گی توچینی نہیں ملے گی۔

تفصیلات شوگر ملز مالکان اورحکومت کے درمیان چینی کی قیمت پرتنازع برقرار ہے، ذرائع نے بتایا کہ شوگر ملزنے140 روپے فی کلو چینی دینےسےانکار کر دیا، چینی کی قلت ہے عید پر مزید ریٹ بڑھ سکتے ہیں۔

شوگر مل کے نمائندوں نے خبردار کیا ہے کہ اگر حکومت پاکستان نے قیمتیں کم کرنے میں مداخلت کی تو مارکیٹ میں چینی کی سپلائی روک دی جائے گی۔

انہوں نے یہ نشاندہی کی کہ حکومت نے خود چینی کی برآمد کی اجازت دی ہے تو اب شکوہ کیوں؟ اس کے نتیجے میں پیدا ہونے والی قلت کی شکایت نہیں کرنی چاہیے۔

اس وقت ریٹیل مارکیٹوں میں چینی 170 سے 175 روپے فی کلو میں فروخت ہو رہی ہے۔ حکومت کی جانب سے قیمتوں کو مستحکم کرنے کی کوششوں کے باوجود کوئی خاص کمی دیکھنے میں نہیں آئی۔

خیال رہے کہ حکومت پاکستان نے ریٹ کے استحکام کی یقین دہانی پر شوگر ملز کو چینی برآمد کرنے کی اجازت دی تھی، ذرائع نے 14 مارچ کو بتایا کہ وزیر اعظم (پی ایم) شہباز شریف نے مہنگائی کا نوٹس لیتے ہوئے چینی کی ذخیرہ اندوزی کے خلاف کریک ڈاؤن کا حکم دیا تھا۔

شہباز شریف نے زور دے کر کہا تھا کہ چینی کی قیمتوں میں مصنوعی اضافے کے لیے چینی ذخیرہ اندوزی اور فرضی ٹریڈنگ برداشت نہیں کی جائے گی۔

اسلام آباد : وزیراعظم شہبازشریف نے تحریری معاہدے کے باوجود چینی مہنگی ہونے پر شوگر مل مالکان اور بڑے ڈیلروں کو آج اسلام آباد بلا لیا۔

تفصیلات کے مطابق وزیراعظم شہبازشریف نے چینی کی قیمت مسلسل بڑھنے پر اظہار ناراضی کیا، جس پر وزارت پیداوار نے شوگر مل مالکان اور بڑے ڈیلروں کو آج اسلام آباد بلا لیا ہے.

حکومت اور شوگر ملز مالکان کے درمیان تحریری معاہدہ ہوا تھا کہ چینی قیمت نہیں بڑھے گی۔

شوگرملز ایسوسی ایشن نے ایکسپورٹ کی اجازت پر معاہدہ کیا تھا اور برآمدات کی اجازت کے بعد چینی کی قیمت کوایک سوچوبیس سےایک سو اسی روپے تک لے گئے۔

ذرائع کا کہنا ہے کہ ایف آئی اے نے کئی شہروں میں چھاپوں کا سلسلہ شروع کر دیا ہے اور سٹےبازوں کی فہرست تیار اور ذمےداروں کا تعین کیا جا رہا ہے۔

مزید پڑھیں : ملک میں چینی کی قیمت 180 روپے فی کلو تک پہنچ گئی

خیال رہے حکومتی کوششوں کے باوجود چینی کی قیمت 180 روپے تک پہنچ گئی ہے، رمضان میں چینی کی قیمت 14 روپے کلو تک بڑھی۔

ادارہ شماریات کا کہنا تھا کہ راولپنڈی، اسلام آباد اور کراچی والے مہنگی چینی خریدنے پرمجبورہیں۔3

فروری میں شوگر ملوں کے پاس چینی کے 45 لاکھ ٹن کے ذخائر تھے جبکہ حکومت نے 7 لاکھ 41 ہزارمیٹرک ٹن چینی بیرون ملک بھیجی۔

اسلام آباد : وزیراعظم شہباز شریف نے چینی کی قیمتوں میں استحکام کیلئے خصوصی اجلاس طلب کرلیا۔

تفصیلات کے مطابق وزیراعظم شہباز شریف چینی کی قیمت میں کمی کے لیے متحرک ہوگئے اور چینی کی قیمتوں میں استحکام کے لیے خصوصی اجلاس طلب کرلیا۔

ذرائع نے بتایا کہ چینی کے شعبے میں ٹیکس چوروں کے خلاف بڑے ایکشن کی تیاری مکمل کرلی گئی ہے۔

ذرائع کا کہنا تھا کہ ملک میں چینی کی کوئی قلت نہیں، ملک میں 7.5 ماہ کی چینی موجود ہے، ملک میں اکتوبر کے وسط تک چینی کے وسیع ذخائر موجود ہیں۔

ذرائع نے کہا کہ فروری تک ملک میں 56 ملین ٹن گنا کرشنگ کے لیے لایا گیا، فروری تک شوگر ملز نے 53 لاکھ ٹن چینی گنے سے تیار کی، ملک میں چینی کے سابقہ ذخائر 9.5 لاکھ ٹن ہیں، فروری شوگر ملز کے پاس چینی کے 40 سے 45 لاکھ ٹن ذخائر ہیں۔

شوگر انڈسٹری میں جعلی ٹریک اینڈ ٹریس کے خلاف کارروائی کا فیصلہ کیا ہے، جعلی ٹریک اینڈ ٹریس کا کاروبار کرنے والوں کے خلاف ایکشن ہوگا اور چینی کی بوری کا ٹریک اینڈ ٹریس دوبارہ استعمال کرنے بھی کارروائی ہوگی۔

عالمی منڈی میں چینی کی قیمت 250 روپے کلو کے لگ بھگ ہے، خام چینی امپورٹ کرکے چینی تیار کی گئی تو لاگت 190 روپے تک آئے گی۔