Tag: چینی کی قیمت

کراچی : ملک کے کئی شہروں میں ایک کلوچینی کی قیمت کی ڈبل سنچری ہونے کے بعد خریداروں کے اوسان خطا ہوگئے ، عوام چینی سستی کرنے کا مطالبہ کر رہی ہے۔

تفصیلات کے مطابق چینی کی مسلسل بڑھتی قیمت نے شہریوں کے ہوش اڑا دیئے، کئی شہروں میں چینی کی فی کلوقیمت ڈبل سنچری سے بھی اوپر چلی گئی۔

عوام نے حکومت سے اپیل کی ہےکہ اب گزارا مشکل ہوگیا،، قیمتیں کم کی جائیں ، چمن کے لوگ چینی سب سے مہنگی خریدرہے ہیں، جہاں فی کلو قیمت دوسوتیس روپے ہوگئی۔

کوئٹہ اور سکھر والے دوسوبیس روپے فی کلو چینی خریدنےپر مجبورہیں جبکہ معاشی حب کراچی میں بھی قیمت آؤٹ آف کنٹرول ہے،، شہری فی کلو چینی ایک سواسی سےدوسوروپے میں خرید رہے ہیں۔

لاہورمیں فی کلو چینی ایک سو پچانوے سے دوسو روپے میں فروخت ہورہی ہے جبکہ جھنگ اور فیصل آباد میں بھی صورت حال مختلف نہیں۔

دوسری جانب چینی کی قیمتوں میں ہوشربا اضافے کی تحقیقات شروع ہوگئیں ہیں، لاہور میں شوگر ملز مالکان، ڈیلرز اور دیگر افراد کے گرد گھیرا تنگ کردیا گیا ہے۔

چینی کا کاروبار کرنے والوں کا چھ ماہ کا ڈیٹا حاصل کرلیا گیا ہے اور ذخیرہ اندوزی کرنےوالوں کی بھی فہرستیں تیار ہے جبکہ صوبائی حکومت کو ایک ہفتے میں کریک ڈاؤن کر کے چینی قیمت کم کرنے کا ہدف دے دیا ہے۔

پیپلز پارٹی کے سینئر رہنما قمرزمان کائرہ نے کہا ہے کہ چینی کی قیمتوں سے متعلق کسی کو ذمہ دار قرار دینے کی ضرورت نہیں۔

اے آر وائی نیوز پر نشر ہونے والے پروگرام آف دی ریکارڈ میں گفتگو کرتے ہوئے انھوں نے کہا کہ حکومت کے سامنے چینی کے اسٹاک سے متعلق رپورٹ رکھی جاتی ہے۔ قیمتوں میں اضافے سے متعلق کسی کو ذمہ دار قرار دینے کی ضرورت نہیں۔

قمر زمان نے کہا کہ حکومت رپورٹ کی بنیاد پرہی ایکسپورٹ سے متعلق فیصلہ کرتی ہے، سرپلس چینی ہوتی ہے تو ایکسپورٹ کرنے کی اجازت دی جاتی ہے۔

انھوں نے کہا کہ پاکستان سے افغانستان کو چینی، گندم اور فرٹیلائزر اسمگل ہوتی ہے، افغانستان کے ساتھ ساتھ ایران کو بھی اشیا اسمگل ہوتی ہیں۔

قمرزمان کائرہ کا کہنا تھا کہ لمحہ فکریہ ہے کہ اسمگلنگ کی روک تھام کے سلسلے میں کوئی اقدامات نہیں کیے گئے۔ ایکسپورٹ کی اجازت نہ دی جائے تو شوگر مل مالکان کسانوں کو پریشان کرتے ہیں۔

شوگرمل مالکان کسانوں کو گنے کے پیسے نہیں دیتے، گنا نہیں اٹھاتے۔ یہ درست ہے ملک میں چینی کے ساتھ ساتھ بےشمار مافیاز ہیں۔ یہ مافیاز مرضی کی پالیسیاں بنواتے ہیں،اسمگلنگ میں بھی ملوث ہوتے ہیں۔

انھوں نے کہا کہ کل تک حکومت کا حصہ تھا آج کس منہ سے ایسی باتیں کر رہا ہوں، اس میں کوئی دو رائے نہیں بجلی کے بل بہت زیادہ آئے ہیں۔ عام آدمی پریشان ہے، میں حقائق کے ساتھ ہوں۔ آئی ایم ایف معاہدے پرعمل نہیں کریں گے تو مسائل مزید بڑھیں گے۔

اسحاق ڈار نے کہا ہے کہ چینی کے ریٹ مناسب انتظامی کنٹرول نہ ہونے سے بڑھ رہے ہیں، پی ڈی ایم حکومت نے چینی برآمد کا فیصلہ تمام متعلقین کی مشاورت سے کیا تھا۔

تفصیلات کے مطابق اسحاق ڈار کا اپنی ٹوئٹ میں کہنا تھا کہ چینی کی برآمد کی اجازت دینے سے پہلے اسٹاک کی تصدیق کی گئی تھی، اسٹاک کو مدنظر رکھتے ہوئے 12.5 کروڑ ڈالر کی چینی ایکسپورٹ کی گئی تھی۔

سابق وزیرخزانہ اسحاق ڈار نے کہا کہ گنے کی کرشنگ کا سیزن محض ڈھائی ماہ دور ہے، گنے کی کرشنگ 16 نومبر سے شروع ہوتی ہے۔

اپنی ٹوئٹ میں انھوں نے مزید کہا کہ گنے کی نئی فصل آنے سے پہلے قیمت بڑھنے کا کوئی جواز نہیں، ملک میں چینی کے 23 لاکھ ٹن ذخائر موجود ہیں۔

اسحاق ڈار نے کہا کہ ملک میں چینی کی قلت اور اسٹاک میں کمی کا تاثرگمراہ کن ہے، ملک میں ماہانہ چینی کی کھپت 5 لاکھ ٹن ہے، نئی کرشنگ کے وقت بھی 10 لاکھ ٹن چینی موجود ہوگی، ملک میں چینی کے ریٹ بڑھنے کا تعلق اسٹاک سے نہیں۔