Tag: چینی

لاہور: چینی کی قیمت کو ایک بار پھر پَر لگ گئے ہیں، ایک ہفتے کے دوران چینی کی قیمت 100 روپے تک پہنچ گئی، چینی کی قیمتوں میں اضافے کے بعد لاہور میں گھی کی قیمت میں بھی 20 روپے فی کلو اضافہ ہوگیا۔

تفصیلات کے مطابق عوام ایک بار پھر ضروری اشیائے صرف کی قیمتوں کے بوجھ تلے دبنے لگے ہیں، ایک ہفتے کے دوران چینی کی قیمت بڑھتے بڑھتے سو روپے تک پہنچ گئی ہے، چینی مہنگی ہونے سے دکان دار اور گھریلو صارفین مشکلات کا شکار ہیں۔

چینی کی قیمت 80 روپے سے بڑھ کر سو روپے ہوئی ہے، کنٹرول ریٹ پر چینی نہ ملنے کی وجہ سے چھوٹے دکان داروں نے چینی بیچنا ہی چھوڑ دی۔

مہنگائی سے پریشان عوام کے لیے چینی کی قیمت میں اضافے کے ساتھ ساتھ دکانوں پر اس کی عدم دستیابی بھی ایک بڑا مسئلہ بن چکی ہے، وزیر اعظم عمران خان کی جانب سے چینی کی قیمت کنٹرول کرنے کی واضح ہدایات کے باوجود متعلقہ ادارے اپنی ذمہ داری نبھانے میں ناکام نظر آتے ہیں جس کی وجہ سے عوام کو ریلیف نہیں مل رہا۔

دوسری طرف چینی کی قیمتوں میں اضافے کے بعد لاہور میں گھی کی قیمت میں بھی یکمشت 20 روپے فی کلو اضافہ ہوگیا ہے، اشیائے ضروریہ کی قیتموں میں اضافے سے صارفین شدید پریشانی کا شکار ہو گئے ہیں۔

گھی کی قیمت نے اڑان بھر لی ہے اور چند روز کے دوران مختلف برا نڈز کے گھی کی قیمت فی کلو بیس سے 40 روپے بڑھ گئی، مختلف کمپنیوں کے گھی کی قیمت فی کلو 220 سے بڑھ کر 265 روپے تک جا پہنچی ہے۔

دکان داروں کا کہنا ہے گھی ملز مالکان اور ڈیلرز نے گھی کی سپلائی کم کر کے قیمت بڑھائی ہے اور پرائس کنٹرول کمیٹیاں کہیں نظر نہیں آ رہیں، حکومت نے نوٹس نہ لیا تو گھی کی قیمت مزید بڑھنے کا خدشہ ہے۔

اسلام آباد: وزیر اعظم کے معاون خصوصی شہباز گل نے ٹویٹ کرتے ہوئے کہا ہے کہ شوگر ملز ایسوسی ایشن نے حکومت کو چینی 70 روپے فی کلو کی پیش کش کر دی ہے۔

اے آر وائی نیوز کے مطابق ڈاکٹر شہباز گل نے ٹویٹ میں لکھا کہ وہ شوگر ملوں والے جو کل تک کہتے تھے کہ ان کی لاگت زیادہ ہے اس لیے قیمتیں کم نہیں کر سکتے، آج بھاؤ تاؤ کرنے لگے ہیں۔

ان کا کہنا تھا کہ شوگر ملوں والوں کو پتا نہیں کہ آگے عمران خان بیٹھا ہوا ہے، اب بات 70 پر نہیں رکے گی، ہم اصل لاگت عوام کے سامنے رکھیں گے اور درست قیمت طے کرنی پڑے گی۔

واضح رہے کہ شوگر ملز ایسوسی ایشن نے حکومت کو 60 ہزار ٹن چینی 70 روپے کلو پر فراہمی کی پیش کش کر دی ہے، ذرایع کا کہنا ہے کہ اس سلسلے میں سیکریٹری کابینہ ڈویژن کے نام ایک خط لکھا گیا جس میں کہا گیا کہ حکومت عوام تک چینی پہنچانے کے لیے اقدامات کرے۔

اسلام آباد ہائی کورٹ نے چینی انکوائری کمیشن کو کارروائی سے روک دیا

یاد رہے کہ 11 جون کو اسلام آباد ہائی کورٹ نے چینی انکوائری کمیشن کو 10 دن کے لیے شوگر ملز کے خلاف کارروائی سے روک دیا تھا اور آئندہ سماعت تک ملک میں چینی 70 روپے کلو بیچنے کا حکم بھی دیا تھا۔

اسلام آباد: ذرایع نے کہا ہے کہ حکومت چینی بحران کے ذمہ داروں کے خلاف آج بڑا فیصلہ کرے گی۔

اے آر وائی نیوز کے مطابق حکومت چینی بحران کے ذمہ داروں کے خلاف آج بڑا فیصلہ کرے گی، رپورٹ کی روشنی میں متعین کرداروں سے متعلق فیصلہ اعلیٰ سطح اجلاس میں ہوگا۔

وزیر اعظم عمران خان اس اعلیٰ سطح اجلاس کی صدارت کریں گے، ذرایع کا کہنا ہے کہ شوگرانکوائری رپورٹ میں ذمہ دار قرار دیے گئے افراد کے خلاف ایکشن کا فیصلہ ہوگا، اجلاس میں چینی بحران میں ملوث افراد کے خلاف مقدمات دائر کرنے کا بھی فیصلہ ہوگا۔

اجلاس کے بعد کیے گئے فیصلوں کا اعلان وزیر اعظم کے معاون خصوصی شہزاد اکبر کریں گے۔

شبلی فراز نے اس سلسلے میں آج ٹویٹ میں کہا کہ وزیر اعظم نے شوگر مافیا کی سرپرستی اور فائدہ اٹھانے والوں کے خلاف کارروائی کا وعدہ کیا ہے، وزیر اعظم کا وعدہ جلد پورا ہوگا، آج بنی گالہ میں انتہائی اہم اجلاس کے بعد پریس کانفرنس ہوگی۔ شہزاد اکبر نے بھی ٹویٹ میں لکھا شوگر کمیشن رپورٹ پر فیصلے منظوری کے لیے آج وزیر اعظم کو پیش کیے جائیں گے، وزیر اعظم کو مخصوص پینل ایکشنز، ریگولیٹری اقدامات اور ریکوری میکنزم پیش کیا جائے گا، ایکشن کا آغاز آج سے ہوگا۔

یاد رہے کہ 31 مئی کو وزیر اطلاعات شبلی فراز نے کہا تھا 15 دنوں میں چینی بحران میں ملوث تمام لوگ بے نقاب ہو جائیں گے۔ ادھر اپوزیشن کا بھی مطالبہ ہے کہ آٹا چینی بحران کے اصل ذمہ داران کے خلاف ٹھوس کارروائی کی جائے۔

یاد رہے کہ ڈی جی ایف آئی اے واجد ضیا کی سربراہی میں تحقیقاتی رپورٹ کا فرانزک کرنے کے لیے بننے والے 6 رکنی تحقیقاتی کمیشن نے حتمی رپورٹ میں جہانگیر ترین، مونس الہیٰ، اومنی گروپ اور مخدم خسرو بختیار کے بھائی عمر شہریار کو چینی بحران کا ذمہ دار قرار دیا تھا۔

رپورٹ میں کمیشن نے چینی بحران کا ذمہ دار ریگولیٹرز کو قرار دیا ہے، جن کی غفلت کے باعث چینی بحران پیدا ہوا اور قیمت بڑھی، کمیشن نے کیسز نیب، ایف آئی اے اور اینٹی کرپشن کو بھجوانے کی سفارش کی ہے۔

اسلام آباد: جہانگیر ترین نے یوٹیلٹی اسٹورز کارپوریشن کو دیگر ملز کے مقابلے میں سستی چینی فراہم کرنے کی پیش کر دی۔

تفصیلات کے مطابق جہانگیر ترین نے چینی کی فراہمی سے متعلق یوٹیلٹی اسٹورز کارپوریشن کے چیئرمین کو خط لکھ کر واضح کیا ہے کہ یوٹیلٹی اسٹورز کو 20 ہزار ٹن چینی فراہم کرنے کی آفر کی ہے۔

جہانگیر ترین کا کہنا ہے کہ چینی 67 روپےفی کلو کے رعائتی نرخوں پر دینےکی آفر کی ہے مگر میڈیا میں موجود کچھ عناصر اس آفر کو غلط رنگ دے رہے ہیں۔

یہ بھی پڑھیں: وزیراعظم کا گندم،چینی بحران پر حتمی رپورٹ ایک ہفتے میں جمع کرانے کا حکم

خط کے مطابق تاثر دیا جا رہا ہے کہ جیسے اس آفر کا مقصد مجھے نوازنا ہے جو حقیقت کے برعکس ہے، میڈیا میں منفی پروپیگنڈے کے باعث میں یہ آفر واپس لینا چاہوں گا۔

واضح رہے کہ یوٹیلٹی اسٹورز کارپوریشن نے 1 لاکھ ٹن چینی بغیر ٹینڈر خریداری کے لیے وفاقی کابینہ سے اجازت طلب کی ہے۔

چیئرمین یوٹیلٹی اسٹورز کارپوریشن نے کابینہ کو لکھے گئے خط میں بتایا کہ جہانگیر ترین نے دیگر ملز کے مقابلے میں رعایتی قیمت پر چینی فراہم کرنے کی یقین دہانی کروائی ہے۔

اسلام آباد: وزیراعظم عمران خان نے چینی کی قیمتوں میں اضافے سے متعلق حقائق جاننے کے لیے انکوائری کمیٹی تشکیل دے دی۔

تفصیلات کے مطابق وزیراعظم عمران خان نے چینی کی قیمتوں میں اضافے کے حوالے سے حقائق جاننے کے لیے ڈی جی ایف آئی اے کی سربراہی میں انکوائری کمیٹی تشکیل دی ہے۔

انکوائری کمیٹی میں ڈی جی ایف آئی اے، ڈائریکٹر جنرل اینٹی کرپشن پنجاب اور انٹیلی جنس بیور کا گریڈ 20 یا 21 کا افسر ہوگا۔ ڈی جی ایف آئی اے بطور کنوینر کسی بھی ممبر کو کمیٹی میں شامل کرنے کا مجاز ہوگا۔

انکوائری کمیٹی کو وزیراعظم آفس کی جانب سے درجن سے زائد سوالات بھجوا دیے گئے ہیں، کمیٹی کو ہدایت کی گئی کہ وہ اس بات کا تعین کرے کہ معاملے میں کون کون سے عناصر ملوث ہیں۔

کمیٹی کو کہا گیا کہ ہے وہ اس بات کا جائزہ لے کہ چینی کی قیمتوں کو قابو میں رکھنے کے لیے مقامی انتظامیہ اور حکومتی اداروں نے کیا حفاظتی اور پیشگی اقدامات کیے۔

انکوائری کمیٹی حقائق کے تناظر میں ذمہ دار اداروں یا افسران کا تعین کرے گی اور اس بات کا جائزہ لے گی کہ قیمتوں میں اضافہ کسی کو فائدہ پہنچانے کی کوشش تو نہیں،کمیٹی مستقبل کے حوالے سے سفارشات بھی پیش کرے گی۔

میلسی: ذخیرہ اندوزوں کے خلاف کارروائیوں کا سلسلہ جاری ہے، پنجاب میں چینی ذخیرہ کرنے والے گودام کو سیل کردیا گیا۔

اے آر وائی نیوز کے مطابق پنجاب کے شہر میلسی میں کالونی چوک پر اسسٹنٹ کمشنر نے ذخیرہ اندوزوں کے خلاف کارروائی کی، اس دوران چینی کی ایک ہزار بوریاں اور 5ہزار گھی کے ڈبے ضبط کرلیے گئے۔

اسسٹنٹ کمشنر نے گوادم سیل کردیا جبکہ مالک کی تلاش جاری ہے۔

ادھر ذخیرہ اندوزوں کو بےنقاب کرنے کے لیے اے آر وائی نیوز کا بھی مشن جاری ہے، گزشتہ روز بلوچستان کے شہر حب سے ذخیرہ کردہ چینی نے 15 ہزار بوریاں برآمد کی گئی تھیں۔

ذخیرہ اندوز بے نقاب، چینی کی 15 ہزار بوریاں برآمد

اینکر اقرار الحسن اور ٹیم سرعام نے اسسٹنٹ کمشنرروحانہ کاکڑ کے ہمراہ بڑا ایکشن لیا تھا اور حب میں ویئرہاؤس اے ایس ایل میں ذخیرہ چینی کی 15ہزار بوریاں برآمد کی تھیں۔

خیال رہے کہ وزیراعظم عمران خان کی ہدایت پر ذخیرہ اندوزوں اور ملاوٹ کرنے والوں کیخلاف آپریشن تیز کردیا گیا ہے، ذخیرہ اندوز اور ملاوٹ کرنے والے خلاف کریک ڈاؤن جاری ہے۔