Tag: چین

چین میں عمارتیں گرنے سے8 افراد ہلاک،متعدد زخمی

وین ژو : چین کے صوبے ژی جیانگ میں نامعلوم وجوہات کی بناء پر چارعمارتوں کی گرنے سے 8 افرادجاں بحق اور متعدد زخمی ہوگئے ہیں۔

تفصیلات کے مطابق چین کے صوبے ژی جیانگ میں اچانک چارعمارتیں ایک ساتھ گرنے سے 8 افراد موقع پرہی جاں بحق ہو گئے ہیں جب کہ متعدد زخمی ہیں۔

ہلاک اور زخمی ہونے والے افراد کو قریبی اسپتال منتقل کردیا گیا ہے جہاں زخمی افراد کو فوری طبی امداد دی جا رہی ہے جب کہ مییتوں کو لواحقین کے حوالے کردیا گیا ہے۔

ریسکیو اداروں کا کہنا ہے کہ کئی افراد کے ملبے تلے دبے ہونا خدشہ ہے جن کو بہ حفاظت نکالنے کے لیے پوری تندہی کے ساتھ امدادی کاموں کو جاری رکھا ہوا ہے۔

ریسکیو ادارے نے میڈیا کو بتایا ہے کہ واقعہ پیر کی صبح پیش آنے والے واقعہ میں 8 افراد کی لاشیں نکال لی گئی ہیں،متعدد افراد ملبے تلے دبے ہیں جس کے باعث ہلاکتوں میں اضافے کا خدشہ ہے جب کہ اب تک پانچ افراد کو زندہ نکال لیا گیا ہے۔

مقامی انتظامیہ کا کہنا ہے کہ ابتدائی طور پر عمارتیں گِرنے کی وجوہات کا اب تک پتہ نہیں چل سکا ہے،تحقیقات کر رہے ہیں اگر انتظامی نا اہلی سامنے آئی تو ذمہ دار افراد کے خلاف سخت کارروائی کریں گے۔

اکتوبر 10, 2016
چین کو گدھوں کی ضرورت ہے

آپ گدھے کو ہوسکتا ہے ایک کم تر جانور سمجھتے ہوں، اور بے شک اسے یہاں صرف بوجھ ڈھونے کے لیے استعمال کیا جاتا ہو، لیکن چینیوں کے لیے یہ ایک انتہائی ضروری جانور ہے، اتنا ضروری کہ چین اسے دوسرے ممالک سے خرید رہا ہے۔

دنیا کی سب سے بڑی معیشت چین آج کل گدھوں کی آبادی میں کمی کے باعث پریشانی کا شکار ہے۔ ماہرین کے مطابق سنہ 1990 سے لے کر اب تک گدھوں کی آبادی میں شدید کمی واقع ہوچکی ہے اور ان کی تعداد 11 ملین سے گھٹ کر 6 ملین تک آچکی ہے۔

یہی وجہ ہے کہ اب چین دوسرے ممالک سے گدھے خرید رہا ہے۔ اس کے لیے اس نے سب سے پہلے افریقی ممالک سے رابطہ کیا تاہم کئی افریقی ممالک نے اپنے گدھے بیچنے سے انکار ردیا۔ افریقی ممالک میں سہولیات کی کمی کے باعث غیر ترقی یافتہ علاقوں اور گاؤں دیہاتوں میں گدھا اب بھی نقل و حمل اور دیگر کاموں کے لیے استعمال ہوتا ہے۔

اس مشکل موقع پر نائیجریا کا پڑوسی ملک نائیجر چین کے کام آیا اور اس نے 80 ہزار گدھے چین کو فروخت کیے۔

میک اپ مصنوعات میں گدھے کی کھال استعمال کیے جانے کا انکشاف *

اب سوال یہ ہے کہ چین جیسے ترقی یافتہ ملک کو آخر کس لیے گدھے درکار ہیں؟

اس کا جواب چین کی معیشت کی ترقی سے تعلق رکھتا ہے۔ گدھے کی کھال سے ایک مادہ جیلاٹن تیار ہوتا ہے۔ یہ مادہ ’اجیاؤ‘ نامی ایک دوا بنانے میں کام آتا ہے۔ یہ دوا کئی اقسام کی تکالیف کے علاج میں معاون ہے۔ خاص طور پر خون کی کمی اور خون سے متعلق دیگر امراض کے لیے یہ دوا نہایت مؤثر ہے۔

چین نے گذشتہ برس نائیجر سے 27 ہزار گدھے درآمد کیے تھے اور رواں برس یہ تعداد دگنی سے بھی زیادہ ہوگئی ہے۔ افریقی ماہرین معاشیات کا کہنا ہے کہ اس اقدام سے آہستہ آہستہ افریقہ میں بھی گدھوں کی تعداد میں کمی ہوتی جائے گی اور اس کا اثر مجموعی معیشت پر پڑے گا جو پہلے ہی کوئی خاص بہتر نہیں ہے۔

البتہ افریقہ میں ان افراد کی چاندی ہوچکی ہے جو اس رجحان کو دیکھتے ہوئے اب گدھوں کی خرید و فروخت کا کاروبار کر رہے ہیں اور اس سے ان کی ذاتی معاشی صورتحال میں کافی بہتری آچکی ہے۔

اکتوبر 7, 2016
چین نے بھارت کا پانی بند کردیا

بیجنگ : چین نے تبت سے آنے والے برہما پترا دریا کا پانی بند کردیا ہے جس سے نہ صرف بھارت بلکہ بنگلہ دیش کے بھی متاثر ہونے کا امکان ہے۔

تفصیلات کے مطابق چین نے تبت سے آنے والے برہما پترا دریا کا پانی بند کر دیا ہے جس سے فائدہ اُٹھانے والوں میں بھارت اور بنگلہ دیش شامل ہیں، برہما پترا دریا کا پانی بند ہونے سے بھارت اور بنگلہ دیش کو پانی کی کمی کا سامنا ہو سکتا ہے تاہم ابھی تک یہ واضح نہیں کہ اس اقدام سے بھارت اور بنگلہ دیش کو آبی حوالے سے کس حد تک نقصان کا سامنا کرنا پڑے گا۔

ذرائع کے مطابق چین نے پانی کی بندش کا اقدام اپنے اہم ترین ہائیڈرو پراجیکٹ ”لالہو“ کی تکمیل کے لیے اٹھایا ہے اس پراجیکٹ پر 744 ملین امریکی ڈالر لاگت آئے گی۔

چین 12ویں پانچ سالہ منصوبے کے تحت برہما پترا پر تین مزید منصوبے لگانے کی منصوبہ بندی کرچکا ہے۔

واضح رہے کہ یہ پروجیکٹ جون 2014ء میں شروع کیا گیا تھا جس کی تکمیل آخری مراحل میں ہے اور امید کی جا رہی ہے کہ یہ اہم ترین چینی منصوبہ 2019ء تک مکمل ہوجائے گا۔

یاد رہے کہ گزشتہ برس چین نے برہما پترا دریا پر زام ہائیڈرو اسٹیشن کو آپریشنل کیا تھا جس پر بھارت نے تحفظات کا اظہار کیا تھا تاہم چین نے ان کو مسترد کردیا تھا۔

واضح رہے کہ بھارت نے لائن آف کنٹرول پر بڑھتی ہوئی کشیدگی کے بعد پاکستان کا پانی بند کرنے کی دھمکی دی تھی جس کے بعد پاکستان کی طرف اس قدم کو جنگ کے مترادف قرار دیا گیا تھا۔

اکتوبر 1, 2016
چین میں کوئلے کی کان میں حادثہ،18افراد ہلاک

بیجنگ: چین کے جنوبی صوبے ننجیشا ہوئی میں کوئلے کی کان میں گیس بھر جانے سے 18 کان کن جان کی بازی ہار گئے۔

تفصیلات کےمطابق چین کی سرکاری نیوز ایجنسی شن ہوا کا کہنا ہےکہ شہر شیزوشان میں لینی کول مائینگ کمپنی کی جانب سے کوئلے کی کان میں کام جاری تھا۔جہاں کان میں گیس بھرنے کے باعث 18 کان کن ہلاک ہوگئے۔

حادثے کے بعد ایک متاثرہ کان کن کو کان سے زندہ نکالا گیا تھا تاہم بعد ازاں وہ دم توڑ گیا جبکہ دیگر 17 افراد کی لاش نکالی گئیں اور دو لاپتہ افراد کی تلاش کا کام تاحال جاری ہے۔

سرکاری نیوز ایجنسی کی رپورٹ کےمطابق جس وقت حادثہ پیش آیا کان میں 20 افراد کام کررہے تھے جن کو نکالنے کےلیے 200 ریسکیو اہلکار امدادی سرگرمیوں میں حصہ لیا۔

یاد رہے کہ رواں سال مارچ میں چین کے شمالی صوبے سہانشی میں کوئلے کی کان میں حادثے کے نتیجے میں 19 افراد ہلاک ہوگئے تھے۔

واضح رہے کہ چین دنیا میں سب سے زیادہ کوئلہ پروڈیوس کرتا ہے جہاں کوئلے کی کانوں میں حادثے کے باعث آئے دن کان کنوں کی ہلاکتوں کے واقعات رپورٹ ہوتے ہیں۔

ستمبر 28, 2016
دنیا کی سب سے بڑی دوربین نے کام شروع کردیا

چین کی جانب سے بنائی جانے والی دنیا کی سب سے بڑی دوربین نے ستاروں، کہکشاؤں اور خلا کے پوشیدہ رازوں کے سگنل کی تلاش کا کام شروع کر دیا ہے۔

فاسٹ نامی اس دوربین کی تیاری پر چین نے تقریباً 18 کروڑ ڈالر کی رقم خرچ کی ہے اور اس کو مکمل کرنے میں پانچ برس کا عرصہ لگا۔ اس دوربین کا حجم فٹ بال کے 30 گرؤانڈز کے برابر ہے۔

اس دوربین میں 500 میٹر قطر کے ریفلیکٹر لگائے گئے ہیں جب کہ 4450 پینلز نصب کیے گئے ہیں۔ ہر پینل کی ایک سطح کی لمبائی 11 میٹر ہے۔ یہ دوربین دیگر جدید آلات کے مقابلے میں آسمان کو دو گنازیادہ سکین کرنے کی صلاحیت رکھتی ہے۔

دنیا کی سب سے بڑی دوربین پر فیڈ کیبن نصب *

چین کے قومی فلکیات کے ادارے سے وابستہ زنگ ژوانین کا اس موقعے پر کہنا تھا کہ خلا کی گہرائیوں کا جائزہ لینے کے لیے بنائی جانی والی یہ دوربین اس بات کی مظہر ہے کہ چین غیر معیاری صنعت کاری سے ہٹ کر ہائی ٹیک سائنسی صنعت کاری کی طرف بڑھ رہا ہے۔

زنگ ژوانین کا کہنا تھا کہ اس منصوبے سے خلا میں پوشیدہ رازوں کو بہتر طریقے سے جاننے میں مدد ملے گی۔ ان کا مزید کہنا تھا کہ اس دوربین کی مدد سے خلائی مخلوق کے بارے میں بھی تحقیق کی جاسکے گی۔

ان کے بقول یہ دور بین اگلے 10 سے 20 برس تک دنیا کی سب سے بڑی دور بین رہے گی اور اس کے سامنے دیگر بڑی دوربینیں پست دکھائی دیں گی۔

دوربین کی لانچ کے موقع پر کئی ہزار افراد نے جمع ہو کر اس کا نظارہ دیکھا۔

ستمبر 26, 2016
محبوبہ کی ہیرے کی فرمائش، چینی آرٹسٹ نے شاہکار بنا ڈالا

مرد حضرات اکثر خواتین کی مہنگی مہنگی فرمائشوں سے پریشان رہتے ہیں۔ انہیں سمجھ نہیں آتا کہ وہ اپنی محدود تنخواہ میں آخر کیسے ان کی مہنگی فرمائشوں کو پورا کریں۔

چین میں بھی ایک شخص کو ایسی ہی مشکل پیش آئی جب اس کی محبوبہ نے اس سے قیمتی ترین ہیرے زمرد کی انگوٹھی کی فرمائش کر ڈالی۔

اس شخص نے یہ فرمائش پوری تو کردی لیکن اس طرح کہ کہ اس کی جیب پر کوئی بوجھ نہیں پڑا۔

آپ حیران ہوں گے کہ اس نے مہنگے زمرد کی انگوٹھی آخر کیسے حاسل کی۔ تو اس کا جواب یہ کہ اس نے یہ انگوٹھی خود اپنے گھر پر بنائی۔ اور آپ جان کر دنگ رہ جائیں گے کہ اس نے یہ انگوٹھی شیشے کی بوتل کو کاٹ کر بنائی۔

آرٹ کا یہ اسٹوڈنٹ اپنی اس کاوش کو بہترین قرار دیتا ہے جس سے وہ نہ صرف اپنی محبوبہ کو خوش کرنے میں کامیاب رہا بلکہ اس نے ایک بڑی رقم خرچ ہونے سے بھی بچا لی۔

اس نے سبز رنگ کی شیشے کی بوتل کا نچلا حصہ کاٹ کر اس کی گھسائی کی اور ماہرانہ انداز میں اسے ایک ہیرے کی شکل دے ڈالی۔

مصنوعی ہیرا بنانے کے مراحل کی تصاویر جب سوشل میڈیا پر شیئر کی گئیں تو ہر شخص اس کی صلاحیتوں اور عقلمندی پر اش اش کر اٹھا۔

ایک شخص نے تبصرہ کیا، ’یہ ہیرا مہنگا تو نہیں لیکن دنیا کا خوبصورت ترین ہیرا ہے‘۔

تو پھر کیا خیال ہے آپ کا، کیا آپ بھی شیشہ سے ہیرا بنا کر کسی کو خوش کرنے کی صلاحیت رکھتے ہیں؟

ستمبر 22, 2016
کتے کے لیے 8 آئی فون

دنیا بھر میں لوگوں کی بڑی تعداد نیا آئی فون 7 خریدنا چاہتی ہے اور آئی فون 7 اس وقت سب سے بڑا موضوع بحث بن چکا ہے۔ چین میں بھی ایک شخص نے اپنے کتے کے لیے 8 آئی فون 7 خرید ڈالے۔

ہر شخص جہاں آئی فون کے نئے ماڈل کا دیوانہ ہے وہیں وینگ سیکونگ نے سوچا کہ اس کا کتا کیوں پیچھے رہے۔ اس نے ایک نہیں بلکہ اپنے کتے کے لیے 8 آئی فون خرید ڈالے۔

وینگ سیکونگ چین کے دولت مند ترین افراد میں سے ایک ونگ جیانلن کا بیٹا ہے۔ آئی فون خریدنے کے بعد اس نے کتے کی تصویر سوشل میڈیا پر ڈالی جسے دیکھ کر لوگ دنگ رہ گئے۔

ستم ظریف نے لکھ ڈالا، ’سمجھ نہیں آرہا لوگ سوشل میڈیا پر کس چیز کے لیے دکھاوا کر رہے ہیں۔ کیا مجھے بھی کچھ دکھاوا کرنا چاہیئے؟ لیکن ایسا کرنے کے لیے کچھ ہے نہیں‘۔ اور دکھاوا نہ کرنے والی تصویر میں کتے کے ساتھ 8 آئی فون 7 فون موجود ہیں۔

وینگ سیکونگ اکثر و بیشتر اپنے کتے کی تصاویر سوشل میڈیا پر شیئر کرتا رہتا ہے جن سے ظاہر ہوتا ہے کہ اس کے کتے کو دنیا بھر کی سہولیات اور سامان آسائش فراہم ہے۔ اس سے قبل بھی وہ اپنے کتے کی ایک تصویر شیئر کرچکا ہے جس میں وہ ایپل کی 2 مہنگی ترین گھڑیاں پہنے ہوئے ہے۔

اس کی تصاویر پر اکثر لوگ تبصرہ کرتے ہیں، ’افسوس! ایک کتا بھی ہم سے بہتر حالت میں ہے‘۔

ستمبر 21, 2016
جدید دور میں حنوط کی جانے والی مشہور شخصیات کی لاشیں

لاشوں کوحنوط کر کے رکھنے کا رواج ہزاروں سال قدیم ہے۔ قدیم مصر میں بادشاہوں اور فراعین کی لاش کو حنوط کر کے رکھ دیا جاتا ہے۔ مصریوں کا ماننا تھا کہ مرنے کے بعد انہیں دوبارہ زندگی ملے گی اور وہ دوبارہ جی اٹھیں گے۔ بڑے بڑے اہرام مصر جو دراصل فراعین کے مقبرے ہیں اسی عقیدے کی یادگار ہیں۔

مصر میں فراعین کے مرنے کے بعد ان کی لاشوں کو حنوط کر کے ان کے ساتھ ڈھیر سارا سونا چاندی اور دولت بھی ان کے مقبرے میں رکھ دیا جاتا ہے، تاکہ جب یہ فراعین دوبارہ اٹھیں تو انہیں کسی چیز کی کمی نہ ہو۔

دنیا میں موجود ہر مذہب میں لاشوں کو محفوظ طریقہ سے ٹھکانے لگادیا جاتا ہے۔ کہیں مردوں کو دفن کیا جاتا ہے، کہیں جلا دیا جاتا ہے۔ پارسی مذہب میں مردوں کو تابوت میں رکھ کر ایک کھلے ہوئے ٹاور یا کنویں یا ایک کھودے گئے گڑھے میں رکھا دیا جاتا ہے، تاکہ یہ مردار خور پرندوں کی خوراک بن سکیں۔ جس مقام پر ان مردوں کو رکھا جاتا ہے اسے مقام سکوت یا ٹاور آف سائلنس کہا جاتا ہے۔

تاہم جدید دور میں لاشوں کو محفوظ کرنے کا رواج بھی جاری ہے۔ یہ رواج کہیں ثقافتی بنیادوں پر، اور کہیں صرف عقیدت کی بنیاد پر اپنایا جاتا ہے۔ مختلف ممالک نے نے اپنے ملک کے لیے نمایاں خدمات انجام دینے والے یا لیڈران کی لاشوں کو حنوط کر کے عجائب گھروں میں رکھ لیا ہے جنہیں دیکھنے کے لیے روزانہ سینکڑوں افراد آتے ہیں۔

:لینن

روس کا انقلابی رہنما ولادیمیر لینن اپنی موت کے بعد اپنی والدہ کے پہلو میں دفن ہونا چاہتا تھا لیکن روسیوں نے اس کی لاش کو حنوط کر کے اسے ماسکو میوزیم میں رکھ چھوڑا جہاں روزانہ ہزاروں کی تعداد میں لوگ لینن کے مردہ جسم کو دیکھنے آتے ہیں۔

کچھ روسی ایسے بھی ہیں جو اب لینن کو دفنانے پر زور دے رہے ہیں، دیکھیئے وہ کب کامیاب ہوتے ہیں۔

:ایوا پیرون

ارجنٹینا کے صدر جان پیرون کی دوسری بیوی اور ملک کی پہلی خاتون صدر ایوا پیرون ارجنٹینا میں پسے ہوئے طبقہ کی آواز بن کر ابھری۔ اس نے مزدور طبقہ کی بہبود کے لیے بے تحاشہ کام کیا۔ اس کی موت کے بعد اسے دفن کیا گیا لیکن ایک فوجی بغاوت کے دوران فوجیوں نے اس کی لاش کو قبر سے نکال کر چھپا دیا۔

سنہ 1974 میں جان پیرون کی تیسری بیوی نے ایک معاہدے کے ذریعہ اس کا جسم واپس حاصل کیا ور اب یہ بیونس آئرس کے ایک میوزیم میں حنوط شدہ حالت میں موجود ہے۔

:ہو تائی منگ

جدید ویتنام کا بانی ہو تائی منگ گو کہ چاہتا تھا کہ اس کے مرنے کے بعد اس کے جسم کو جلا دیا جائے اور اس کی راکھ کو فضاؤں میں اڑا دیا جائے، لیکن اس کی خواہش کے برخلاف اسے بھی حنوط کرکے ویتنام کے دارالحکومت ہنوئی کے میوزیم میں رکھا گیا ہے۔

:ماؤزے تنگ

چین کے انقلابی لیڈر ماؤزے تنگ کے جسم کو بھی چینیوں نے محفوظ کر رکھا ہے۔ بیجنگ کے تائینامن اسکوائر میں واقع ماؤزے تنگ میموریل ہال میں ان کا جسد خاکی محفوظ ہے جسے ہر روز کیمیائی محلول سے دھویا جاتا ہے۔

:فرنینڈ مارکوس

فلپائن کے سابق صدر فرنینڈ مارکوس نے 20 سال فلپائن پر حکومت کی۔ اس کے بعد انہیں جلا وطنی اختیار کرنی پڑی۔ ان کے انتقال کے بعد جب فلپائن میں آمریت کا خاتمہ ہوا تو ان کا خاندان ان کے جسم سمیت واپس فلپائن آگیا۔

ان کے جسم کو ان کے آبائی گاؤں کے ایک میوزیم میں رکھ دیا گیا۔

:کم سنگ دوئم اور کم جونگ دوئم

کوریا کے مسند صدارت پر یکے بعد دیگرے فائز رہنے والے باپ بیٹے کم سنگ دوئم اور کم جونگ دوئم کے مردہ جسموں کو بھی محفوظ کرلیا گیا ہے۔

یہاں آنے والے افراد کے لیے مخصوص لباس پہننا لازم ہے اور ان افراد کو ہدایت کی جاتی ہے کہ وہ ان دونوں کی لاشوں کے سامنے پہنچ کر جھک کر انہیں تعظیم دیں۔

ستمبر 17, 2016
محفوظ سمندری حدود پاک چین اقتصادی راہداری کےلیے لازم ہے،نیول چیف

کراچی: نیول چیف ایڈمرل ذکاءاللہ نے کہا ہے کہ محفوظ سمندری حدود پاک چین اقتصادی راہداری کےلیے لازم ہے۔

تفصیلات کے مطابق کراچی میں فاسٹ اٹیک کرافٹ بیڑہ پاک بحریہ میں شامل کرنے کی تقریب سے خطاب کرتے ہوئے پاک بحریہ کے سربراہ ایڈمرل ذکاءاللہ کا کہناتھا کہ بحری جہاز کی شمولیت سے بحری دفاع میں اضافہ ہوگا۔

نیول چیف نے کہا کہ بحری جہاز کی تیاری خود انحصاری کی طرف اہم قدم ہے،محفوظ سمندری حدود پاک چین اقتصادی راہداری کےلیے لازم اور اقتصادی راہداری ملکی معیشت میں نیا موڑ ثابت ہو گی۔

انہوں نے کہا کہ فاسٹ اٹیک کرافٹ میزائل کراچی شپ یارڈ میں چین کے تعاون سے دو سال میں تیار کیا گیا جسے آج پاک بحریہ کے بیڑے میں شامل کر دیا گیا ہے۔

بیڑہ دشمن کے ریڈار میں آئے بغیر اپنے اہداف کو نشانہ بنانے کی صلاحیت سے لیس ہے ۔فاسٹ اٹیک کرافٹ میزائل بوٹ پاکستان نیوی کی تیسری بوٹ ہے۔

واضح رہے کہ بحری بیڑے کی لانچنگ تقریب کراچی شپ یارڈ میں ہوئی جس میں پاکستان نیوی کے اعلیٰ افسران نے بھی شرکت کی ۔

ستمبر 17, 2016
پانڈا معدومی کے خطرے کی زد سے باہر

ماحولیات اور جنگلی حیات کے ماہرین نے تصدیق کی ہے کہ چین کا پانڈا معدومی کے خطرے کی زد سے باہر نکل آیا ہے اور اب اس کی نسل کو معدومی کا خدشہ نہیں ہے۔

عالمی ادارہ برائے تحفظ ماحولیات آئی یو سی این نے اس بات کی تصدیق کی ہے کہ پانڈا کی نسل کو اب مکمل معدومی کا خطرہ نہیں ہے البتہ اسے خطرے سے دو چار یا غیر محفوظ جنگلی حیات کی فہرست میں رکھا گیا ہے۔

ماہرین کا کہنا ہے کہ چینی حکومت نے پانڈا کے تحفظ کے لیے ان کی پناہ گاہوں اور رہنے کے جنگلات میں اضافہ کیا اور غیر معمولی کوششیں کی جس کے باعث پانڈا کی آبادی میں اضافہ دیکھنے میں آیا۔

گزشتہ عشرے میں پانڈا کی تعداد میں 17 فیصد اضافہ ہوا جس کے بعد اب ان کی تعداد 2000 ہوگئی ہے۔

جنگلی حیات کے تحفظ کی تنظیم ڈبلیو ڈبلیو ایف کے مطابق یہ ایک حوصلہ افزا صورتحال ہے۔ ان کے مطابق اس میں حکومت کے ساتھ ساتھ غیر سرکاری تنظیموں اور مقامی آبادیوں کی کاوشیں بھی شامل ہیں۔

آئی یو سی این کے مطابق کلائمٹ چینج یا موسمیاتی تغیر کے باعث پانڈا کے رہائشی جنگلات میں ایک تہائی کمی ہوسکتی ہے۔ پانڈا اپنی رہائش مخصوص درختوں کے جنگلات میں رکھتا ہے جنہیں بمبو فاریسٹ کہا جاتا ہے۔

اس سے قبل امریکی ریاست کیلیفورنیا میں پائی جانے والی لومڑیوں کی ایک قسم بھی معدومی کے خطرے کی زد سے باہر آچکی ہے۔ ان لومڑیوں کا قد چھوٹا ہوتا ہے اور انہیں ننھی لومڑیاں کہا جاتا ہے۔

حکام کے مطابق ان لومڑیوں کو اگلے عشرے تک معدومی کا 50 فیصد خطرہ تھا اور اسے شدید خطرے سے دو چار نسل کی فہرست میں رکھا گیا تھا۔

واضح رہے کہ ماہرین نے متنبہ کیا ہے کہ درجہ حرارت میں اضافے یعنی گلوبل وارمنگ کے باعث دنیا میں موجود ایک چوتھائی جنگلی حیات 2050 تک معدوم ہوجائے گی۔

ستمبر 9, 2016

Tag: چین

:لینن

:ایوا پیرون

:ہو تائی منگ

:ماؤزے تنگ

:فرنینڈ مارکوس

:کم سنگ دوئم اور کم جونگ دوئم