ARYNews.tv | Urdu – Har Lamha Bakhabar

Tag: چین

  • پاکستانی طلباء کے لئے بڑی خوشخبری

    پاکستانی طلباء کے لئے بڑی خوشخبری

    اسلام آباد : وزیراعظم شہباز شریف کا کہنا ہے کہ پاکستانی طلباء کی چین میں جدید زرعی تربیت کا پورا خرچ حکومت پاکستان اٹھائے گی۔

    تفصیلات کے مطابق وزیراعظم شہباز شریف کی زیرصدارت چین میں جدید زراعت کی تربیت کیلئے گئے پاکستانی طلباء سے متعلق جائزہ اجلاس ہوا۔

    وزیرِ اعظم نےچین میں زرعی شعبے کی تربیت کیلئے بھیجے جانے والے طلباء کے انتخاب میں شفافیت اور میرٹ کو اولین ترجیح دینے کی ہدایت کرتے ہوئے کمیٹی تشکیل دینے کے احکامات جاری کردیئے۔

    وزیرِ اعظم نےپورٹل کے ذریعے درخواستوں کی اسکروٹنی کے دوران سلیکشن کے معیار پر پورا نہ اترنے والے طلباء و طالبات کی شکایات کے اذالے کیلئے کمیٹی بنانے کی ہدایت کرتے ہوئے کہا ہے کہ چین پاکستان کا دیرینہ دوست ہے جس کی زرعی شعبے میں ترقی بے مثال ہے۔

    ان کا کہنا تھا کہ اپنے دورہ چین کے دوران چینی قیادت سے زرعی شعبے میں پاکستانی طلباء کی جدید تربیت کی درخواست کی تھی، پاکستانی طلباء و طالبات کی چین میں جدید زرعی تربیت کا پورا خرچ حکومت پاکستان اٹھائے گی۔

    وزیرِاعظم نے کہا اللہ کے فضل و کرم سے بہت جلد طلباء و طالبات کا پہلا بیچ زراعت کے شعبے میں جدید تربیت کیلئے چین روانہ ہوگا، زرعی شعبے کی جدید تربیت کیلئے چین جانے والے طلباء و طالبات میں 10 فیصد خصوصی کوٹہ بلوچستان کے طلباء کیلئے مختص کیا گیا ہے۔

    شہباز شریف نے چینی قیادت اور چینی یونیورسٹیوں کے شکریہ ادا کرتے ہوئے کہا کہ انہوں نے پاکستانی طلباء کو چین میں زراعت کی جدید تربیت کا موقع دیا۔

    وزیراعظم کوبریفنگ میں بتایا گیا زرعی شعبے سے تعلق رکھنے والے طلباء و طالبات نے شفاف طریقے سے پورٹل کے ذریعے درخواستیں جمع کروائیں، 1287 درخواستوں میں سے 711 طلباء و طالبات تربیت کے طے کردہ معیار پر پورے اترے۔

    ان طلباء و طالبات میں بلوچستان اور گلگت بلتستان کے امیدوار بھی شامل ہیں، ان طلباء و طالبات کو دو بیچز میں چین بھیجا جائے گا۔

    300 طلباء و طالبات آبپاشی میں بہتری، مویشیوں میں بیماریوں کی تشخیص و نگرانی، مویشیوں کی افزائش نسل و جدید جینیات اور جدید بیجوں کی تیاری و ان کی پراسیینگ کے شعبوں میں تربیت کیلئے بھیجا جائے گا۔

    طلباء و طالبات کی پہلی کھیپ مارچ 2025 میں چین روانہ ہوگی جبکہ 400 طلباء کی دوسری کھیپ رواں برس کے وسط میں چین بھیجی جائے گی۔

    طلبا کو زراعت میں جدید مشینری کے استعمال، فصلوں کی تیزی سے افزائش، زراعت میں جدید ٹیکنالوجی بشمول مصنوعی ذہانت کا استعمال اور پھلوں و سبزیوں کی پراسیسنگ کے شعبوں میں تربیت دی جائے گی،

    اجلاس میں وفاقی وزراء احسن اقبال، رانا تنویر حسین، احد خان چیمہ، چیئرمین ہائر ایجوکیشن کمیشن اور متعلقہ اعلی حکام نے شرکت کی۔

  • ایم ایل ون کی تعمیر کے لیے چین سے فنانسنگ معاہدہ تاخیر کا شکار ہو گیا

    ایم ایل ون کی تعمیر کے لیے چین سے فنانسنگ معاہدہ تاخیر کا شکار ہو گیا

    اسلام آباد: ریلوے کے منصوبے ایم ایل ون کی تعمیر کے لیے چین سے فنانسنگ معاہدہ تاخیر کا شکار ہو گیا ہے۔

    ذرائع وزارت منصوبہ بندی کے مطابق ایم یل ون معاہدے میں نئے سرے سے دستخط کیے جانے کے باعث تاخیر ہو رہی ہے، تاخیر کی وجہ ریلوے لائن کی تعمیر کے لیے فیزز میں تبدیلی بھی ہے۔

    ایم ایل ون فیز ون کے لیے 2024 کے آخری کوارٹر میں معاہدہ طے پایا جانا تھا، پلاننگ کمیشن اور اقتصادی امور سال 2024 کے آخری کوارٹر میں معاہدے کے لیے کوشاں تھے، لیکن اب ٹیکنیکل ٹیم کے آئندہ ماہ دورے سے قبل کل ورچوئل مذاکرات ہو رہے ہیں۔

    ذرائع کا کہنا ہے کہ ٹیکنیکل ٹیم کے ساتھ منصوبے کی فزیبیلٹی اسٹڈی اور دورے پر حتمی بات چیت ہوگی، ورچوئل میٹنگ کے دوران فزیبیلٹی اسٹڈی اور دورے کے لیے تاریخ سے آگاہ کیا جائے گا، اس کے بعد جوائنٹ ورکنگ گروپ کا اجلاس ہوگا اور پھر معاہدہ طے ہو جائے گا۔

    ذرائع کے مطابق ایم ایل ون کے لیے جو معاہدہ طے ہوگا وہ دو مراحل میں تقسیم ہو چکا ہے۔ واضح رہے کہ 2024 کے آخری کوارٹر میں معاہدہ ہونے سے فروری 2025 میں افتتاح ہونا تھا۔

    ایم ایل ون یا مین لائن 1 پاکستان میں ریلوے کا ایک منصوبہ ہے جس کا مقصد ملک کے نقل و حمل کے بنیادی ڈھانچے کو جدید بنانا ہے، یہ ریلوے لائن سندھ میں کیماڑی اسٹیشن سے خیبرپختونخوا میں پشاور کنٹونمنٹ اسٹیشن تک جاتی ہے۔ یہ پاکستان کی چار اہم ریلوے لائنوں میں سے ایک ہے اور ملک کی بنیادی مسافر اور مال بردار لائن ہے۔

  • چین میں 7.1 شدت کا زلزلہ، کئی عمارتیں زمین بوس، درجنوں ہلاک

    چین میں 7.1 شدت کا زلزلہ، کئی عمارتیں زمین بوس، درجنوں ہلاک

    چین کے زیر اہتمام تبت میں زلزلے نے تباہی مچادی ہے، اب تک 100 کے قریب اموات اور درجنوں کے زخمی ہونے کی اطلاعات ہیں۔

    غیر ملکی ذرائع ابلاغ کے مطابق ایک ہزار سے زائد گھر اور کئی عمارتیں منہدم ہوگئیں، بھارت اور نیپال میں بھی زلزلہ محسوس کیا گیا۔

    رپورٹس کے مطابق چین کے مقامی وقت کے مطابق زلزلہ صبح 9 بج کر 5 منٹ پر آیا، تبت، نیپال، بھارت کے شمال اور شمال مشرقی علاقوں میں بھی زلزلے کے شدید جھٹکے محسوس کیے گئے۔

    چین کے زلزلہ نیٹ ورک سینٹر کا اس حوالے سے کہنا ہے کہ شدت 6.8 ریکارڈ کی گئی جس کی گہرائی 10 کلو میٹر بتائی جا رہی ہے۔

    چینی نیوز ایجنسی کی رپورٹ کے مطابق تبت کی ٹنگری کاؤنٹی میں گاؤں میں گھروں کے گرنے سے شہریوں کے ہلاک و زخمی ہونے کی اطلاعات سامنے آرہی ہیں۔

    فلپائن لوزون میں 5.6 شدت کا زلزلہ

    اس کے علاوہ بھارتی ریاست بہار میں آنے والے زلزلے کی شدت 5.1 ریکارڈ کی گئی، زلزلہ صبح 6 بج کر 40 منٹ پر آیا جس کی شدت سے 5 سیکنڈ تک عمارتیں جھولتی رہیں، تاحال کسی جانی اور مالی نقصان کی اطلاعات سامنے نہیں آئی ہیں۔

  • چین کے طرز پر لاہور میں دھول مٹی سے نجات کا جدید طریقہ لاگو کرنے کا فیصلہ

    چین کے طرز پر لاہور میں دھول مٹی سے نجات کا جدید طریقہ لاگو کرنے کا فیصلہ

    لاہور: چین کے طرز پر لاہور میں فضائی آلودگی اور دھول مٹی سے نجات کا جدید طریقہ لاگو کرنے کا فیصلہ کیا گیا ہے۔

    وزیر اعلی پنجاب مریم نواز نے 1500 تعمیراتی مقامات پر پانی کے چھڑکاؤ کا نظام نصب کرنے کا حکم دے دیا ہے، وزیر اعلیٰ نے سی اینڈ ڈبلیو اور ایل ڈی اے کو واٹر سپرنکل سسٹم فوری طور پر لگانے کی ہدایت کر دی ہے۔

    واٹر سپرنکل سے پانی کو فوارے کے انداز میں چلایا جاتا ہے جس سے تعمیراتی مقام پر اس طرح چھڑکاؤ ہوتا ہے کہ مٹی نہ اڑے اور گرد و غبار پیدا نہ ہو۔

    وزیر اعلیٰ پنجاب نے 15 جنوری 2024 تک قذافی اسٹیڈیم میں واٹر سپرنکل سسٹم کی تنصیب کا حکم دیا ہے، نیز تعمیراتی مقامات کو سبز کپڑے سے ڈھانپنا ہوگا تاکہ تعمیراتی کام کے دوران سیمنٹ، مٹی، اور دھول نہ اڑے۔

    احکامات کے مطابق 10 فروری کے بعد پانی کے چھڑکاؤ کے طریقہ کار پر عمل نہ کرنے پر مقدمہ درج ہوگا۔

    لاہور کی 4 موٹر ویز شدید دھند کے باعث بند

    مریم اورنگزیب کا کہنا ہے کہ ماحولیاتی تحفظ کا ادارہ ای پی اے 9 ماہ سے فضائی آلودگی کے خاتمے کی جنگ لڑ رہا ہے، واٹر سپرنکلرز اور مسٹ کے طریقہ کار سے اسموگ کے خاتمے میں بہتری آئے گی، رویوں کی تبدیلی، ہر شہری کا تعاون، جدید مشینری، اور جدید طریقوں کا استعمال ضروری ہے۔

  • بھارت کو ایک اور دھچکا، چین نے لداخ کا اہم حصہ اپنے نام کرلیا

    بھارت کو ایک اور دھچکا، چین نے لداخ کا اہم حصہ اپنے نام کرلیا

    بھارت کو ایک اور دھچکا لگا گیا، چین نے لداخ کے کچھ حصے شامل کر کے 2 نئی کاؤنٹیوں کے قیام کا اعلان کردیا۔

    رپورٹ کے مطابق چین نے لداخ کے کچھ حصے شامل کر کے 2 نئی کاؤنٹیوں کے قیام کا اعلان کردیا جس پر مودی حکومت سیخ پا ہوگئی اور بھارتی وزارت خارجہ نے احتجاج بھی ریکارڈ کرایا۔

    بھارتی وزارت خارجہ کے ترجمان نے کہا کہ ان نام نہاد کاؤنٹیوں کے کچھ حصے ہندوستان کے مرکز کے زیر انتظام علاقہ لداخ میں آتے ہیں، اس چینی کارروائی سے نئی دہلی کی خودمختاری پر کوئی اثر نہیں پڑے گا۔

    لداخ اور کارگل کی عوام مودی سرکار کے خلاف سڑکوں پر نکل آئی

    انہوں نے کہا کہ ہم نے اس علاقے میں ہندوستانی سرزمین پر چین کے غیر قانونی قبضے کو کبھی قبول نہیں کیا دوسری جانب چینی دفاعی ترجمان کا کہنا ہے کہ سرحدی علاقوں میں امن کیلئے مشترکہ کوششوں پر تیار ہیں۔

    واضح رہے کہ 2020 میں لداخ میں سرحدی کشیدگی کے دوران کئی بھارتی فوجی ہلاک ہوئے تھے۔

  • چین کی سبزی مارکیٹ میں خوفناک آگ بھڑک اُٹھی، متعدد ہلاک

    چین کی سبزی مارکیٹ میں خوفناک آگ بھڑک اُٹھی، متعدد ہلاک

    چین کے شمالی صوبے ہیبائی کی ایک سبزی مارکیٹ میں خوفناک آگ بھڑک اُٹھی، جس کے نتیجے میں 8 افراد ہلاک جبکہ 15 زخمی ہوگئے۔

    بین الاقوامی خبر رساں ادارے کی رپورٹ کے مطابق چین کی ژانگیاجیا کیکو مارکیٹ میں دن کے وقت میں آگ بھڑک اٹھی، آگ کیوں لگی، اس کی وجہ تاحال معلوم نہ ہوسکی۔

    چینی میڈیا رپورٹس کے مطابق یہ ایک روایتی سستی مارکیٹ ہے جہاں سپر مارکیٹس کے مقابلے میں زیادہ بھیڑ ہوتی ہے۔

    آگ لگنے کی وجوہات کا حکام کی جانب سے جائزہ لیا جارہا ہے، لیکن خیال ظاہر کیا جا رہا ہے کہ گوشت پکانے کے لیے رکھے گئے کوئلے اور گیس کی بوتلوں کے باعث آگ لگی۔

    یاد رہے کہ اس سے قبل بھارتی ریاست مدھیہ پردیش میں بھی چلتی ٹرین میں آگ لگ گئی تھی جس کے بعد مسافروں نے جان بچانے کے لیے ٹرین سے چھلانگ لگا دی تھی۔

    آگ لگنے کے بعد کئی مسافروں نے جان بچانے کے لیے ٹرین سے چھلانگیں لگا دیں۔ فی الحال اس حادثے میں جان و مال کے نقصان کی کوئی اطلاع نہیں ہے۔

    رپورٹس کے مطابق ٹرین نمبر 09347 ڈاکٹر امبیڈکر نگر-رتلام ڈیمو ٹرین میں آگ لگ گئی تھی، جب اس ٹرین میں آگ لگی تو یہ اندور سے رتلام جا رہی تھی۔

    یہودی آبادکاروں کی شرانگیزی، مسجد کو آگ لگا دی

    دیوالی کا موقع ہونے کی وجہ سے ٹرین مسافروں سے کھچا کھچ بھری ہوئی تھی لوگوں کو ٹرین میں آگ لگنے کا علم ہوا تو بھگدڑ مچ گئی۔ کچھ لوگوں نے چلتی ٹرین سے چھلانگ لگا دی، انہیں معمولی چوٹیں آئیں۔ دھواں نکلنے کے بعد ٹرین ڈرائیور نے ٹرین روک دی تھی۔

  • چین میں نئے وائرس کی انٹری، اسپتال مریضوں سے بھر گئے، متعدد ہلاک

    چین میں نئے وائرس کی انٹری، اسپتال مریضوں سے بھر گئے، متعدد ہلاک

    چین میں کورونا وائرس کے بعد ایک اور وائرس نے اپنا قہر ڈھا دیا، جس کے بعد لوگوں کی بڑی تعداد نے اسپتالوں کا رخ کرلیا ہے، 170 سے زائد افراد کی ہلاکتوں کی اطلاعات سامنے آرہی ہیں۔

    بین الاقوامی خبر رساں ادارے کی رپورٹ کے مطابق اس وائرس کا نام ہیومن میٹاپنیو وائرس (HMPV) جو لوگوں کو متاثر کررہا ہے، اس سے متاثر ہونے والوں کو نزلہ اور کورونا جیسی علامات کی شکایات ہیں۔

    میڈیا رپورٹس کے مطابق چائنہ میں یہ وائرس تیزی سے پھیل رہا ہے، اسپتال مریضوں سے بھر گئے ہیں، جبکہ بڑی تعداد میں ہلاکتوں کی اطلاعات ہیں۔

    غیر ملکی میڈیا کا کہنا ہے کہ ایچ ایم پی وی میں نزلے جیسی علامات عام ہیں اور یہ کورونا جیسی علامات بھی پیدا کر سکتا ہے۔

    چائنا میں صحت سے متعلق حکام کے مطابق وائرس کے پھیلنے کے ساتھ ہی صورتِ حال پر گہری نظر رکھے ہوئے ہیں۔

    سوشل میڈیا پر گردش کرنے والی ویڈیوز میں دیکھا جاسکتا ہے کہ اسپتالوں میں وائرس سے متاثرہ افراد کی بھیڑ ہے، انٹرنیٹ صارفین کا کہنا ہے کہ انفلوئنزا، ایچ ایم پی وی، نمونیا اور کورونا وائرس پھیل رہا ہے۔

    انٹرنیٹ پر صارفین کی جانب سے یہ دعویٰ بھی کیا جارہا ہے کہ چائنا نے ایمرجنسی کا اعلان کر دیا ہے تاہم اس کی تصدیق تاحال نہیں ہو سکی ہے۔

    سرد موسم میں نزلہ زکام کھانسی سے نمٹنا بہت آسان، لیکن کیسے؟

    واضح رہے کہ دنیا بھر میں لاکھوں لوگوں کی موت کا سبب بننے والے کورونا وائرس نے چین سے شروع ہوکر دنیا بھر لاکھوں افراد کو متاثر کیا تھا۔

  • جدید سہولتوں سے آراستہ گوادر ایئرپورٹ تعمیر کرنے پر چین کے مشکور ہیں: وزیراعظم

    جدید سہولتوں سے آراستہ گوادر ایئرپورٹ تعمیر کرنے پر چین کے مشکور ہیں: وزیراعظم

    وزیر اعظم شہباز شریف نے کہا ہے کہ جدید سہولتوں سےآراستہ گوادر ایئرپورٹ کی تعمیر پرعظیم دوست کے شکر گزار ہیں۔

    تفصیلات کے مطابق وزیر اعظم شہباز شریف نے نیوگوادر انٹرنیشنل ایئرپورٹ سے متعلق امور پر اہم اجلاس کی صدارت کی، اجلاس میں وفاقی وزیر دفاع و ہوا بازی خواجہ محمد آصف سمیت متعلقہ اعلیٰ سرکاری افسران نے شرکت کی۔

    نائب وزیراعظم اور وزیر خارجہ اسحاق ڈار، وفاقی وزیر نجکاری، سرمایہ کاری و مواصلات عبدالعلیم خان بذریعہ وڈیو لنک اجلاس میں شریک ہوئے۔

    اجلاس کو نیوگوادر انٹرنیشنل ایئرپورٹ کی آپریشنلائزیشن پر تفصیلی بریفنگ  دی گئی جس میں بتایا گیا کہ گوادر سے مسقط  کیلئے پروازوں کا آغاز اگلے سال 10 جنوری سے ہو جائے گا، گوادر سے ملکی، بین الاقوامی فلائٹ آپریشنز کے حوالے سے بات چیت جاری ہے۔

    اس موقعے پر وزیر اعظم شہباز شریف نے کہا کہ گوادر کا نیا بین الاقوامی ہوائی اڈہ پاک چین عظیم دوستی کی نمایاں مثال ہے، عالمی معیار، جدید سہولتوں سےآراستہ ایئرپورٹ کی تعمیر پر عظیم دوست کے شکر گزار ہیں۔

    انہوں نے کہا کہ نیوگوادر ائیرپورٹ کے فعال ہونے سے خوشحالی اور روزگار کے مواقع  پیدا ہونگے، نیو گوادر انٹرنیشنل ائیرپورٹ کو مصروف ٹرانزٹ پوائنٹ بنانے کیلئے حکمت عملی بنائی جائے۔

  • سمندر سے بھرپور فائدہ اٹھانے کے لیے اجتماعی کوششوں کی ضرورت ہے، صدر آصف زرداری

    سمندر سے بھرپور فائدہ اٹھانے کے لیے اجتماعی کوششوں کی ضرورت ہے، صدر آصف زرداری

    اسلام آباد: صدر پاکستان آصف علی زرداری نے بلیو اکانومی تعاون پر تیسرے چین بحر ہند علاقائی فورم سے ویڈیو خطاب کیا، اس فورم کا انعقاد چین کی عالمی ترقیاتی تعاون ایجنسی نے چین کے شہر کُن مِنگ میں کیا۔

    ویڈیو خطاب میں آصف علی زرداری نے کہا پاکستان بحر ہند کے علاقے میں سمندری تعاون کے فروغ کے لیے پرعزم ہے، سمندر سے بھرپور فائدہ اٹھانے کے لیے اجتماعی کوششوں کی ضرورت ہے۔

    انھوں نے کہا کہ ماحولیاتی تبدیلی، آلودگی اور ماحولیاتی نظام کی تنزلی جیسے مسائل حل کرنے ہوں گے، پاکستان بحری شعبے میں تعاون کے فروغ کے لیے اسٹیک ہولڈرز کے ساتھ شراکت کا خواہاں ہے، پاکستان چاہتا ہے کہ ہمارا خطہ امن، ترقی اور پائیداری کا گڑھ بنا رہے۔

    صدر آصف زرداری کا کہنا تھا کہ مستقبل کی عالمی معاشی ترقی مشرقی ممالک پر انحصار کرے گی، دنیا کی بڑی آبادی چین اور ہمارے خطے کے دیگر ممالک میں رہتی ہے۔

    صدر مملکت نے ویڈیو پیغام میں بحر ہند میں امن، ترقی اور پائیداری کے لیے پاکستان کے عزم کا اعادہ کیا اور کہا پاک چین اقتصادی راہداری کے تحت گوادر پورٹ کو ترقی دی جا رہی ہے، گوادر پورٹ کو علاقائی روابط کے مرکز میں بدلا جا رہا ہے، بندرگاہ سے تجارت اور سمندری اقتصادی ترقی کو فروغ حاصل ہوگا۔

    انھوں نے کہا کہ پاکستان نے نیشنل میری ٹائم پالیسی متعارف کرائی، اور پائیدار ماہی گیری اور سمندری تحفظ کے لیے اقدامات کیے گئے۔

  • پاکستان آرمی اور چین کی پیپلز لبریشن آرمی کے درمیان مشترکہ جنگی مشقیں

    پاکستان آرمی اور چین کی پیپلز لبریشن آرمی کے درمیان مشترکہ جنگی مشقیں

    اسلام آباد: پاکستان آرمی اور چین کی پیپلز لبریشن آرمی کے درمیان مشترکہ جنگی مشقیں ’وارئیر 8‘ اختتام کو پہنچ گئیں۔

    آئی ایس پی آر کے مطابق وارئیر 8 مشقیں 19 نومبر سے 11 دسمبر تک جاری رہیں، پاکستان اور چین کے دستوں نے انسداد دہشت گردی کے حوالے سے تجربات سے استفادہ کیا۔

    واریئر 8 انسداد دہشت گردی کے حوالے سے پاکستان اور چین کے درمیان سالانہ مشقوں کی کڑی ہے، مشقوں کے دوران وزیٹرز ڈے تقریب کے دوران شرکا نے ٹلہ فیلڈ فائرنگ رینج کا دورہ کیا۔

    آئی ایس پی آر کے مطابق تقریب میں کور کمانڈر راولپنڈی لیفٹیننٹ جنرل شاہد امتیاز نے بطور مہمان خصوصی شرکت کی، جب کہ چینی سفیر دیگر چینی مہمانوں کے ساتھ تقریب میں موجود تھے۔

    اس موقع پر شرکا نے مشقوں کے دوران دستوں کی پیشہ وارانہ مہارت اور بلند معیار تربیت کو سراہا۔